Bena Kristo badi bapeta disanka padibu bakuatshila bakuabu mudimu

“Disanka dia kupa ndipite dia kupeta.”​—BIENZEDI 20:35, MMM.

1. Nngikadilu kayi mubi udi mutangalake lelu, ne bua tshinyi udi ne njiwu?

 MU BIDIMU bia pamue ne tshidimu tshia 2000, tudi batambe kumvua miaku ya se: “meme kumpala.” Miaku “meme kumpala” anyi “meme diambedi” idi ileja lungenyi lua lukuka ludi nalu muntu udi musue anu masanka ende nkayende, kayiku utshuka bualu bua bantu bakuabu. Tudi mua kuamba kushindika ne: mu tshidimu tshia 2000, lungenyi elu lua ne: anu “meme kumpala” ki ndujike to. Mmisangu bungi kayi iutu umvua lukonko lua buena elu: “Tshianyi muine amu ntshinyi?” anyi lua se: “Ntshinyi tshingapetamu?” Kukeba anu masanka etu nkayetu kakuena mua kutupetesha disanka to. Kudi kubengangana bikole ne dîyi diakamba Yezu ne: “Disanka dia kupa ndipite dia kupeta.”​—Bienzedi 20:35, MMM.

2. Mmunyi mudibi bimueneka ne: kupa kudi kufila disanka?

² Ntshia bushuwa bua ne: muntu udi upa udi upeta disanka dia bungi dipite dia udi upeta anyi? Eyowa. Elabi meji bua Yehowa Nzambi. Kudiye ke kudi ‘mushimi wa muoyo.’ (Musambu 36:9) Udi utupesha bionso bitudi nabi dijinga bua tuikale ne disanka ne bua tupete bintu bimpe. Yeye ke Mufidi wa ‘kupa kuonso kuimpe ne dipa dionso diakane tshishiki.’ (Yakobo 1:17) Yehowa, “Nzambi wa disanka,” utu utupesha bintu misangu yonso. (1 Timote 1:11, NW) Mmunange bantu badiye mufuke, ne udi ubapesha bintu bia bungi. (Yone 3:16) Angata kabidi tshilejilu tshia dîku. Wewe muikale muledi, udi mumanye bungi bua mudimu ne bungi bua bintu bidi bikengela bua kukolesha muana. Kadi munkatshi mua bidimu bivule muana eu ki mmumanye mushinga wa mudimu uudi wenza to. Buende yeye bionso ebi mmalu audi ne bua kumuenzela. Kadi, bidi bikuenza disanka bua kumona muanebe eu ukola bimpe bua paudi umupesha bintu kuyi ukuatshidila. Bua tshinyi? Bualu udi mumunange.

3. Bua tshinyi bidi bienza disanka bua kukuatshila Yehowa ne bena Kristo netu mudimu?

³ Bia muomumue, ntendelelu mulelela udi umanyikila ku dipeshangana bintu bua dinanga. Bu mutudi banange Yehowa ne bena Kristo netu, bidi bituenza disanka bua kubakuatshila mudimu, bituenza kabidi disanka bua kudifila kudibu. (Matayo 22:37-39) Muntu yonso udi utendelela ne tshipatshila tshia kupeta anu yeye nkayende masanka ku ndekelu katu upeta disanka dia bungi to. Kadi aba badi benza mudimu kabiyi bua kukeba masanka abu nkayabu, bawenza meji abu onso matuma anu ku tshidibu mua kufila pamutu pa ku tshidibu mua kupeta, buobu ke batu bapeta disanka dia bungi. Tuetu bakonkonone mushindu udibu benze mudimu ne imue miaku ya mu Bible idi itangila ntendelelu wetu, netumvue bimpe muanda mulelela eu. Netukonkonone isatu ya ku miaku eyi mu tshiena-bualu etshi ne mu tshidi tshilonda.

Mudimu wa Yezu wa diambuluisha bantu

4. Ntshinyi tshidi tshimanyinu tshia “mudimu wa diambuluisha bantu” mu Bukua-buena-Kristo?

⁴ Mu tshiena-Greke tshia kale, muaku umue wa mushinga udi utangila ntendelelu ngua lei·tour·giʹa, utudi bakudimune bilondeshile nkudimuinu wa Traduction du monde nouveau ne: “mudimu wa diambuluisha  bantu.” Mu Bukua-buena-Kristo muaku lei·tour·giʹa ke udi mulele muaku wa mu Mfualansa wa “liturgie” (udibu bakudimune ne: nnemekelu wa Nzambi). * Kadi, malu a lubombo a ekeleziya ya Bukua-buena-Kristo ki mmudimu wa diambuluisha bantu udi mua kubenzela bimpe nansha.

5, 6. (a) Mmudimu kayi wa diambuluisha bantu uvuabu benza mu Isalele, ne uvua ukuatshisha ku tshinyi? (b) Mmudimu kayi mutambe bunene wa diambuluisha bantu wakapingana pa muaba wa uvuabu benza mu Isalele, ne bua tshinyi?

⁵ Mupostolo Paulo wakangata muaku wa mu tshiena-Greke udi upetangana ne lei·tour·giʹa pavuaye wakula bua bakuidi ba mu Isalele. Wakamba ne: ‘Muakuidi yonso udi wimana bulelela ku dituku ku dituku wenza mudimu wende [wa diambuluisha bantu] [mushindu wa lei·tour·giʹa] ne ufila ku musangu ku musangu milambu ya muomumue.’ (Ebelu 10:11) Mu Isalele, bakuidi bena Lewi bavua benza mudimu wa diambuluisha bantu uvua ne mushinga wa bungi. Bavua balongesha bantu Mikenji ya Nzambi ne bafila milambu ivua ibabuikidila mpekatu. (2 Kulondolola 15:3; Malaki 2:7) Pavua bakuidi ne bantu bonso balonda Mikenji ya Yehowa, tshisamba tshijima tshivua tshipeta masanka.​—Dutelonome 16:15.

⁶ Kuenza mudimu wa diambuluisha bantu mu tshikondo tshia Mikenji kuvua diakalenga dinene bua bakuidi bena Isalele, kadi pakalua Nzambi kubenga Isalele bua pavuaye mupange lulamatu, mudimu wabu kautshivua kabidi ne mushinga to. (Matayo 21:43) Yehowa wakalongolola tshintu tshikuabu tshia mushinga mukole: mudimu wa diambuluisha bantu muenza kudi Yezu, Muakuidi Munene. Tudi tubala mu Bible ne: ‘Yeye, bualu bua udi ushala tshiendelele, udi ne buakuidi budi kabuyi bushintuluka. Nunku yeye udi ne bukole bua kusungila ne lupandu lujima badi basemena pabuipi ne Nzambi bua bualu buende, yeye muikale ne muoyo tshiendelele bualu bua kubakuila.’​—Ebelu 7:24, 25.

7. Bua tshinyi mudimu wa Yezu wa diambuluisha bantu udi ufila masanka kaayi kufuanyikija?

⁷ Yezu udi anu muakuidi kashidi, muntu kakumupingana to. Nanku, amu yeye ke udi mua kusungila bantu menemene. Udi wenza mudimu eu wa diambuluisha bantu udi kauyi kufuanyikija mu ntempelo mulelela, mu ntendelelu munene wa Yehowa wakatuadija mu 29 mu Bikondo Bietu ebi, ki mmu ntempelo muenza kudi bantu nansha. Yezu udi wenzela mudimu wende mpindieu mu muaba Mutambe Bunsantu wa ntempelo au, mbuena kuamba ne: mu diulu. Udi “muena mudimu wa diambuluisha bantu [lei·tour·gosʹ] wa mu muaba munsantu ne mu ntenta mulelela, udibu base kudi Yehowa, ki nkudi muntu to.” (Ebelu 8:2, NW; 9:11, 12) Nansha mudi Yezu ne muanzu mubandile, utshidi anu “muena mudimu wa diambuluisha bantu.” Udi wangata bukokeshi buende bunene bua kupeshangana nabu bintu, ki mbua kubiangata kudi bakuabu to. Ne kufila kua mushindu’eu kudi kumupesha disanka. Disanka edi didi munkatshi mua malu adi enza ‘disanka diakatekibua kumpala kuende’ ne diakamupesha bukole bua kutantamana mu matuku ende onso a muoyo pa buloba.​—Ebelu 12:2.

8. Mmunyi muakenza Yezu mudimu wa diambuluisha bantu bua kupinganawu pa muaba wa tshipungidi tshia Mikenji?

⁸ Kudi tshitupa tshikuabu tshia mudimu wa diambuluisha bantu udi Yezu wenza. Paulo wakafunda ne: ‘Kristo wakupeta mudimu udi utamba butumbi, muupete nunku bualu bua yeye udi [mutuangaji] wa tshipungidi tshidi tshitamba buimpe, tshiakapungabu pa milayi mitambe buimpe.’ (Ebelu 8:6) Mose uvua mutuangaji wa tshipungidi tshiakafikisha Isalele ku didia malanda ne Yehowa. (Ekesode 19:4, 5) Yezu uvua mutuangaji wa tshipungidi tshipiatshipia, tshiakafikisha ku diledibua dia tshisamba tshipiatshipia: ‘Isalele wa Nzambi,’ muenza ne bena Kristo bela manyi a nyuma ba mu matunga onso. (Galatia 6:16; Ebelu 8:8, 13; Buakabuluibua 5:9, 10) Bushuwa eu uvua mudimu mulenga wa diambuluisha bantu! Ndisanka kayipu ditudi nadi bua mutudi bamanye Yezu, muena mudimu wa diambuluisha bantu! Bualu, buende yeye ke patudi mua kupeta mushindu wa kutendelela Yehowa mushindu udiye wanyisha.​—Yone 14:6.

Bena Kristo badi pabu benza mudimu wa diambuluisha bantu

9, 10. Ngimue mishindu kayi ya mudimu wa diambuluisha bantu idi bena Kristo benza?

⁹ Kakuena muntu udi wenza mudimu wa diambuluisha bantu udi muimpe kupita wa Yezu to. Kadi padi bena Kristo bela manyi bapeta difutu diabu dia mu diulu, badi basomba pamue ne Yezu bua kuenza mudimu wa diambuluisha bantu. Nebikale bakalenge ne bakuidi mu diulu. (Buakabuluibua 20:6; 22:1-5) Nansha nanku, bena Kristo badi pa buloba badi benza mudimu wa diambuluisha bantu, ne badi bapeta disanka dia bungi padibu bawenza. Tshilejilu, mu tshikondo tshivuaku nzala mu Palestine, mupostolo Paulo wakalua ne bintu bivua bana betu ba ku Mputu bafile bua kuambuluisha bena Kristo bena Yuda  ba mu Yudaya bavua mu dikenga. Tshivua mudimu wa diambuluisha bantu. (Lomo 15:27; 2 Kolinto 9:12) Lelu’eu, bena Kristo badi ne disanka dia kuenza mudimu wa muomumue padibu kabayi bajingakana bua kuambuluisha bana babu badi mu dikenga, badibu bakuate kudi bipupu anyi ntatu mikuabu.​—Nsumuinu 14:21.

¹⁰ Paulo wakakula bua mudimu mukuabu wa diambuluisha bantu pakafundaye ne: “Nansha buobu bampongolola bu tshia kunua tshidibu bafila pa mulambu ne mudimu wa diambuluisha bantu udi ditabuja dinufikisheku, ndi nsangala ne ndi nsanka nenu bonso.” (Filipoi 2:17, NW) Mudimu mukole uvua Paulo muenze bua bena Filipoi uvua mudimu wa diambuluisha bantu muenza ne dinanga ne tshisumi. Lelu’eu badi benda benza mudimu wa muomumue, nangananga kudi bena Kristo bela manyi, badi bikale “mupika wa lulamatu ne wa budimu,” udi ufila biakudia bia mu nyuma mu tshikondo tshiakanyine. (Matayo 24:45-47, NW) Bonso pamue badi kabidi “bakuidi ba tshijila,” badibu bapeshe mudimu wa ‘kufila milambu ya [mu] nyuma mitabujibue kudi Nzambi bualu bua Yezu Kristo’ ne wa ‘kuamba bua buimpe bua Nzambi wakababikila bua kubapatula mu mîdima bua kubabueja mu munya wende wa dikema.’ (1 Petelo 2:5, 9) Anu bu Paulo, badi basanka bua midimu eyi nansha padibu ‘badipongolola’ bua kuenza bidibu babalombe. Ne balunda babu “mikoko mikuabo” badi badisangisha kudibu bua kuenza mudimu wa kuambila bantu malu a Yehowa ne bidiye mulongolole. * (Yone 10:16; Matayo 24:14) Mmudimu wa disanka kayipu bunene nunku wa diambuluisha bantu!​—Musambu 107:21, 22.

Tuenzayi mudimu wa tshijila

11. Ntshilejilu tshimpe kayi tshidi muprofete mukaji Ana mushile bena Kristo bonso?

¹¹ Muaku mukuabu wa mu tshiena-Greke udi utangila ntendelelu wetu: la·treiʹa, tudi baukudimune bilondeshile nkudimuinu wa Traduction du monde nouveau ne: “mudimu wa tshijila.” Mudimu wa tshijila udi utangila malu a ntendelelu. Tshilejilu, badi bamba bua muprofete mukaji Ana (mukaji mukamba wa bidimu 84) ne: “kavuaku upangika ku ntempelo, wenza mudimu wa tshijila [muaku wa mu tshiena-Greke udi upetangana ne la·treiʹa] butuku ne munya, mu dijila dia biakudia ne mu milombu.” (Luka 2:36, 37, NW) Ana uvua utendelela Yehowa dîba dionso. Udi tshilejilu tshimpe buetu tuetu bonso, bakulumpe ne bana, balume ne bakaji. Anu muvua Ana ulomba Yehowa ne muoyo mujima ne umutendelela pa tshibidilu mu ntempelo, dienza masambila ne dibuela mu bisangilu bidi munkatshi mua mudimu wetu wa tshijila.​—Lomo 12:12; Ebelu 10:24, 25.

12. Ntshinyi tshidi tshimanyinu tshinene tshia mudimu wetu wa tshijila, ne mmunyi muditshi patshi mudimu wa diambuluisha bantu?

¹² Mupostolo Paulo wakatela tshimanyinu tshinene tshia mudimu wetu wa tshijila e kufundaye ne: ‘Nzambi, undi nkuatshila mudimu [wa tshijila] mu nyuma wanyi mu lumu luimpe lua Muanende, udi mumanyi wanyi bu mundi tshiyi ndekela kunutela misangu yonso mu mitendelelu yanyi.’ (Lomo 1:9) Bushuwa, kuyisha lumu luimpe kakuena anu mudimu wa diambuluisha bantu badi baluteleja to, kadi udi kabidi mushindu wa kutendelela Yehowa Nzambi. Nansha tuetu bapete bantu badi bateleja anyi babapangile, mudimu wa kuyisha mmudimu wa tshijila utudi tukuatshila Yehowa. Tudi tupeta disanka divule patudi tudienzeja bua kuambila bantu bakuabu ngikadilu milenga ya Tatu wetu wa mu diulu utudi banange ne malu mimpe adiye mulongolole.​—Musambu 71:23.

Mmuaba kayi utudi tuenzela mudimu wa tshijila?

13. Aba badi benzela mudimu wa tshijila mu lubanza lua munda lua ntempelo wa mu nyuma wa Yehowa badi ne ditekemena kayi, ne mbanganyi badi basanka nabu pamue?

¹³ Paulo wakafundila bena Kristo bela manyi ne: ‘Tulejayi disakidila, bualu bua tudi tuangata bukalenge budi kabuyi mua kuzakajibua. Tumueneshe disakidila  edi patuenzela [Nzambi] mudimu [wa tshijila] udi umusankisha, ne kanemu ne ditshina.’ (Ebelu 12:28, MML) Bu mudi bena Kristo bela manyi batekemene ne dishindika bua kupiana Bukalenge, ditabuja diabu kadiena ditenkakana padibu batendelela Mutambe Bunene to. Badi anu mua kumuenzela mudimu wa tshijila mu muaba Munsantu ne mu lubanza lua munda lua ntempelo wa mu nyuma wa Yehowa, ne mbindile ne muoyo mujima dîba dikalabu mua kumusadila pamue ne Yezu mu muaba Mutambe Bunsantu: mu diulu. Balunda babu mikoko mikuabu badi basanka pamue nabu bua ditekemena diabu dilenga edi.​—Ebelu 6:19, 20; 10:19-22.

14. Mmushindu kayi udi mudimu wa Yezu wa diambuluisha bantu upetesha musumba munene masanka?

¹⁴ Kadi mmuaba kayi udi mikoko mikuabu eyi yenzela mudimu wa tshijila? Anu mukavua mupostolo Yone mumone, musumba wabu munene mmulue kumueneka mu matuku a ku nshikidilu aa, ne bantu badimu ‘mbasukule nkanzu yabu mu mashi a Muana wa mukoko.’ (Buakabuluibua 7:14, MMM) Mbuena kuamba ne: anu bu batendeledi nabu bela manyi, badi bitabuja mudimu wa Yezu wa diambuluisha bantu, difila dia muoyo wende mupuangane wa bumuntu bua kupikula bukua-bantu. Mudimu wa Yezu wa diambuluisha bantu udi upetesha kabidi ba mu mikoko mikuabu badi ‘balamata tshipungidi tshia [Yehowa] bikole’ masanka. (Yeshaya 56:6) Ki mbua ne: buobu pabu badi mu tshipungidi tshipiatshipia etshi to, kadi badi batshilamata bikole mu ngumvuilu wa se: badi batumikila mikenji yatshi ne bakumbaja malu adibu balongolole ku diambuluisha dia tshipungidi etshi. Badi badisangisha ne Isalele wa Nzambi, badia ku mesa amue a mu nyuma, benza mudimu pamue, ne batumbisha kabidi Nzambi mu bantu ne bafila milambu ya mu nyuma idi imusankisha.​—Ebelu 13:15.

15. Mmuaba kayi udi bantu ba mu musumba munene benzela mudimu wa tshijila, ne mmunyi mudi dibenesha edi dibasankisha?

¹⁵ Nunku, bantu ba mu musumba munene badi bamueneka ‘bimane kumpala kua nkuasa wa butumbi ne kumpala kua Muana wa Mukoko, baluatshishibue mayeka matoke.’ Kabidi, ‘badi kumpala kua nkuasa wa butumbi wa Nzambi, ne badi bamukuatshila mudimu [wa tshijila] munya ne butuku mu ntempelo wende; ne udi ushikama mu nkuasa wende wa butumbi neashimike nzubu wende wa tshilulu pa mutu pabu.’ (Buakabuluibua 7:9, 15) Bena kuitabuja ba bisamba  bikuabu mu Isalele bavua batendelela mu lubanza lua pambelu lua ntempelo wa Solomo. Bia muomumue, bena mu musumba munene badi batendelela Yehowa mu lubanza lua pambelu lua ntempelo wende wa mu nyuma. Badi basanka bikole bua mudibu benzelamu mudimu. (Musambu 122:1) Nansha pikala wa ndekelu wa ku balunda babu bela manyi mua kupeta bumpianyi buende mu diulu, buobu nebatungunuke ne kukuatshila Yehowa mudimu wa tshijila bu bantu bende.​—Buakabuluibua 21:3.

Mudimu wa tshijila udi Yehowa kayi wanyisha

16. Mmalu kayi adibu batudimuije nawu pa bidi bitangila mudimu wa tshijila?

¹⁶ Mu tshikondo tshia Isalele wa kale, bantu bavua ne bua kuenza mudimu wa tshijila bilondeshile mikenji ivua Yehowa mufile. (Ekesode 30:9; Lewitiki 10:1, 2) Ke mudibi kabidi lelu, kudi malu atudi ne bua kukumbaja bituikala basue bua Yehowa anyishe mudimu wetu wa tshijila. Ke bua tshinyi Paulo wakafundila bena Kolosai ne: ‘Tuetu katuena tulekela kutendelela Nzambi bua bualu buenu, ne kumulomba bua nuenu nuujibue tente ne kumanya kua disua diende mu meji onso ne dijingulula dia mu nyuma; ne bua nuenu nuende mu bienzedi bidi biakanangane ne Mukalenge ku dimusankisha dionso, ne bua nuenu nukuame mamuma mu mudimu wonso muimpe, ne bua nuenu nudiundadiunde mu kumanya kuenu kua Nzambi.’ (Kolosai 1:9, 10) Ki ntuetu badi ne bua kujadika mushindu muimpe wa kutendelela Nzambi to. Dimanya dijalame dia Bible, dijingulula dia mu nyuma ne meji a kudi Nzambi ke bidi ne bualu. Tshianana, malu adi mua kuya kubi.

17. (a) Mmunyi muvuabu banyange mudimu wa tshijila mu tshikondo tshia Mose? (b) Mmunyi mutudi mua kupambuka mu mudimu wa tshijila lelu?

¹⁷ Vuluka bena Isalele mu tshikondo tshia Mose. Bible udi wamba ne: ‘Nzambi wakabakoma nyima, wakabalekela bua kutendelelabu tshisumbu tshia bidi muulu.’ (Bienzedi 7:42) Bena Isalele abu bavua bamone malu a kukema avua Yehowa mubenzele. Kadi bakanyemena kudi nzambi mikuabu pakamonabu ne: ivua mua kubambuluisha. Kabavua ne lulamatu to. Nenku tudi ne bua kuikala ne lulamatu bituikala basue bua mudimu wetu wa tshijila usankishe Nzambi. (Musambu 18:25) Bulelela, bantu bakese lelu’eu ke badi mua kukoma Yehowa nyima bua kutuadija kutendelela mitoto anyi tuana tua ngombe tua or, kadi kudi mishindu mikuabu ya ditendelela mpingu. Yezu wakatudimuija bua kubenga kukuatshila “biuma” mudimu, ne Paulo wakabikila lukuka anyi dikuma dia mutshima ku bintu ne: nkutendelela kua mpingu. (Matayo 6:24, MMM; Kolosai 3:5) Satana udi udileja mudiye nzambi. (2 Kolinto 4:4) Mishindu ya ditendelela mpingu eyi mmitangalake bikole ne idi mikale buteyi. Tshilejilu, ela meji bua muntu udi wamba mudiye ulonda Yezu, kadi pende eku muikale ne tshipatshila anu tshimuepele tshia kulua mubanji, anyi muikale udieyemena yeye ne ngenyi yende. Nnganyi udiye ukuatshila mudimu menemene? Mmushilangane ku tshinyi ne bena Yuda ba mu tshikondo tshia Yeshaya bavua baditshipa mu dîna dia Yehowa kadi bikale bangata malu ende manene bamba muvuawu menza kudi mpingu ya tshianana?​—Yeshaya 48:1, 5.

18. Mmunyi muakenzabu bibi mudimu wa tshijila kale ne mmunyi mudibu bawenza bibi lelu?

 ¹⁸ Yezu wakatudimuija kabidi ne: ‘Dîba nedilue diela munushipi meji ne: Ndi ngenzela Nzambi mudimu [wa tshijila].’ (Yone 16:2) Kakuyi mpata, Shaula wakalua pashishe kumanyika bu mupostolo Paulo, uvua wela meji ne: uvua wenzela Nzambi mudimu pavuaye ‘witabuja bua Stefano kufuaye’ ne ‘pavuaye ufunyina bayidi ba Mukalenge bua kubashipaye.’ (Bienzedi 8:1; 9:1) Lelu’eu, bamue bantu badi bashipa bena bisa bikuabu badi bamba pabu mudibu batendelela Nzambi. Kudi bantu ba bungi badi bamba mudibu batendelela Nzambi, kadi ntendelelu wabu ngua nzambi ya dinanga dinekesha dia ditunga diabu, dia tshisamba tshiabu, bubanji, didinanga anyi nzambi mukuabu.

19. (a) Mmunyi mutudi tuangata mudimu wetu wa tshijila? (b) Mmudimu kayi wa tshijila watupetesha disanka?

¹⁹ Yezu wakamba ne: “Yehowa Nzambi webe ke uudi ne bua kutendelela, ne amu yeye nkayende ke uudi ne bua kuenzela mudimu wa tshijila.” (Matayo 4:10, NW) Mêyi aa uvua uambila Satana, kadi adi kabidi ne mushinga wa bungi kutudi tuetu bonso. Kuenzela Mfumu Munene wa diulu ne buloba mudimu wa tshijila ndisanka ditambe bunene be! Netuambe tshinyi bua dienza mudimu wa diambuluisha bantu udi mu diumvuangana ne ntendelelu wetu? Kuenza muanda eu bua diakalenga dia bantu netu mmudimu mulenga udi mua kutusankisha bikole. (Musambu 41:1, 2; 59:16) Bua mudimu eu kufilawu disanka dilelela tudi ne bua kuwenza mu mushindu muakane ne muoyo mujima. Kadi mbanganyi menemene badi batendelela Nzambi bimpe? Mmudimu wa tshijila muenza kudi nganyi udi Yehowa mua kuanyisha? Tudi mua kuandamuna nkonko eyi tuetu bakonkonone muaku muisatu wa mu Bible udi utangila ntendelelu wetu. Ke tshituenza mu tshiena-bualu tshidi tshilonda.

[Mêyi adi kuinshi]

Newandamune munyi?

• Mmudimu kayi munene wa diambuluisha bantu uvua Yezu muenze?

• Mmudimu kayi wa diambuluisha bantu udi bena Kristo benza?

• Mmudimu kayi wa tshijila udi bena Kristo benza, ne mmuaba kayi udibu bawenzela?

• Ntshinyi tshitudi ne bua kupeta tuetu basue bua mudimu wetu wa tshijila usankishe Nzambi?

[Nkonko ya dilonga]

[Tshimfuanyi mu dibeji 10]

Baledi badi bapeta disanka dia bungi padibu bafila

[Bimfuanyi mu mabeji 12, 13]

Bena Kristo badi benza mudimu wa diambuluisha bantu padibu bakuatshisha bakuabu ne padibu bamanyisha lumu luimpe

[Tshimfuanyi mu dibeji 14]

Tudi ne bua kuikala ne dimanya dijalame ne dijingulula bua tuetu kujadika ne: Nzambi udi wanyisha mudimu wetu wa tshijila