Bua tshinyi tudi ne bua kuikala tusambila?

‘NUDI nulomba ne kanuena nuangata bintu, bualu bua nudi nubilomba bibi. Semenayi pabuipi ne Nzambi ne yeye neasemene pabuipi nenu.’ (Yakobo 4:3, 8) Mêyi aa a Yakobo muyidi wa Yezu adi mua kutusaka bua kumanya bimpe tshitudi tusambidila.

Disambila ki nkuambila anu patupu Nzambi malu atudi tujinga to. Yezu wakamba mu Muyuki wende muende lumu wakenzaye pa Mukuna ne: “Tatu wenu ukadi mumanye binudi nujinga diambedi kanuyi bamulombebi.” Kadi wakamba kabidi ne: “Lombayi, nenupete.” (Matayo 6:8; 7:7, Muanda Mulenga Lelu) Nenku Yehowa mmusue bua tumuambile bitudi nabi dijinga. Kadi malu a kumuambila mu disambila ki mmashikidile anu pa bitudi nabi dijinga to.

Balunda balelela kabatu bayukila anu padi mukuabu dijinga ne tshintu to. Badi bakuatshishangana, ne bulunda buabu budi bushemakana padibu bambilangana yabu ya munda. Bia muomumue, disambila didi ne tshipatshila tshinene kupita dilomba patupu bintu bitudi nabi dijinga. Didi ditupetesha mushindu wa kukolesha malanda etu ne Yehowa patudi tumuleja mushindu utudi bamulamate ne muoyo mujima.

Bulelela, Nzambi mmutupe disambila bua tuetu kumona mua kusemena pabuipi nende. Tudi mua kusemena pabuipi ne Nzambi nunku tuetu bikale tumuleja yetu ya munda pamutu pa kuenza masambila a malu makuata ku muoyo. Kuyukila ne Yehowa mu disambila ndisanka dinene! Lusumuinu lukuabu lua mu Bible ludi luamba ne: “[Disambila]  dia bantu bakane didi dimusankisha.”​—Nsumuinu 15:8.

Mufundi wa Misambu Asafa wakimba ne: ‘Bidi bimpe bua meme kusemena pabuipi ne Nzambi.’ (Musambu 73:28) Kadi bua tuetu kusemena pabuipi ne Nzambi, tudi ne malu makuabu a bungi a kuenza pa kumbusha disambila. Tangila mushindu udi muyuki udi ulonda eu uleja bualu ebu:

“Umue wa ku balongi [ba Yezu] kumulomba ne: Mfumu, utulongeshe mua kusambila.” Yezu kumuandamuna ne: “Panudi nusambila, nuambe ne: Tatu, dîna diebe ditumbe; Bumfumu buebe bufike.” (Luka 11:1, 2, MMM) Muntu udiku mua kusambila nunku bikalaye kayi muanji kumanya dîna dia Nzambi ne mushindu watumbishabu dîna edi anyi? Muntu udiku mua kusambila biumvuangane ne mêyi a Yezu aa bikalaye kayi mumanye tshidi Bukalenge bua Nzambi anyi? Kulonga Bible ne ntema kudi kutuambuluisha bua kumanya malu aa. Dimanya edi nedituambuluishe bua kumanya Nzambi ne bua kujingulula njila yende. Pashishe, kumanya Yehowa Nzambi nekutuambuluishe bua tuetu kudimona bikale pabuipi nende menemene ne kudiumvua bamulamate bikole. Katuakupeta kabidi lutatu lua kumuambila malu atudi nawu mu disambila nansha.

Disambila didi mua kujikija ntatu

Kuikala mulunda wa Yehowa wa menemene nekutuambuluishe bua kujikija ntatu. Ki muvuabi bienzeke mu malu adi alonda aa. Adi aleja mushindu uvua bantu bavua basambila bafike ku dishemeja bulunda buabu ne Yehowa.

Muntu mukaji mukuabu wa mu ditunga dia Brésil, diende Maria, uvua usambila ulomba Nzambi diambuluisha. Pakamonaye muvua bantu bikale bena mpala ibidi, uvua musue kubanga kubenga imue mikenji ivua ileja nsombelu muimpe wa kuikala nende. Maria wakanyema kua bayende, kushiyaye bana bende ne nzubu wabu. Wakatuadija kunua diamba. Kadi pakapangilaye kupeta disanka divuaye ukeba adi, wakunzuluila Nzambi mutshima wende ne kusambilaye umulomba diambuluisha.

Mutantshi eu, Bantemu ba Yehowa babidi kuyishabu Maria ne kumushilabu tshibejibeji tshia Tshibumba tshia Nsentedi tshivua tshileja mushinga wa kuitaba mibelu ya Nzambi. Malu a mu Tshibumba tshia Nsentedi atshi akalenga mutshima wende. Anu dituku dimue dimue adi, kutuadijaye kulonga Bible ne Bantemu ba Yehowa. Malu akalongaye akamufikisha ku dipingana bua kusomba ne bayende ne bana bende. Pakalongaye malu a Yehowa, wakajinga kumuleja muvuaye mumunange. Maria wakamba ne: “Ngakadilengeja. Kumpala, bayanyi ne bana bakanji kubenga bua tshilongi Bible to. Kadi pakamonabu mushindu umvua ngenda nshintuluka, bakatuadija kunkankamija.” Pashishe, Maria wakadilambula kudi Muteleji wa masambila, kupangadijaye bua kumusadila.

José kavua ne disanka to nansha muvuaye ne mukaji muimpe kumona ne mudimu wa mfranga ya bungi mu ditunga dia Bolivie. Mukaji wa José wakamulekela bualu José uvua muende ne mukaji mukuabu. José wakabanga kukuatshika maluvu ne kudimonaye kantu ka patupu. Udi wamba ne: “Ngakatuadija kusambila ne mutshima wanyi wonso, ndomba bua mmanye tshimvua ne bua kuenza bua kusankisha Nzambi. Katantshi aka, Bantemu ba Yehowa kuluabu muaba wanyi wa mudimu, bangambila bua kulonga Bible kabiyi bua meme kufuta mfranga to, kadi ngakabipata. Ngakabipata misangu isatu mijima. Kadi mona, anu bu bisongakaja, musangu wonso umvua nsambila ndomba diambuluisha, dîba adi padi ke divuabu beyeka ku mbelu. Ndekelu wa bionso, meme kupangadija bua kubateleja dituku divuabu ne bua kulua kabidi. Nkavua mubale Bible mujima ne mvua ne nkonko ya bungi ya kubela, mandamuna avuabu bampesha avua anu ansankisha. Kulonga malu a Yehowa kuakampesha tshipatshila tshikuabu mu nsombelu wanyi, ne bamue balunda banyi Bantemu bavua bilejilu bivua bimpesha bukole! Ngakalekela nsongakaji umvua mubanjile au, meme kulekela kabidi ne balunda banyi bakanuayi. Kunyima kua matuku makese, ngakapingajangana ne mukajanyi ne bana banyi. Ngakatambula ku ntuadijilu wa 1999.”

Mu ditunga dia Italie, dibaka dia Tamara divua mu ndululu, ke bualu kayi uvua usambila ukeba meji bua kumona tshia kuenza. Uvua mulue mukaji wa tshikisu, bualu bavua bamukuma ne bamuipata kumbelu patshivuaye ne bidimu 14. Tamara udi wamba ne: “Ngakapeta Bible ne meme kubanga kumubala. Dilolo dikuabu, ngakabala mu Bible ne: ‘kupeta meji kudi bu kupeta biuma bisokoka.’ Ngakalomba meji au mu disambila. (Nsumuinu 2:1-6) Pakatshiabu mu dinda, Bantemu ba Yehowa bakalua kunyisha. Ngakabanga kulonga nabu Bible, kadi kuakanji kupita matuku a bungi bangabanga ne meme kutuadija kutumikila bimvua ndonga.  Ndekelu wa bionso, ngakapangadika bua kulonda nsombelu wa buena-Kristo ne ngakatambula. Mpindieu, pamue ne bayanyi, ndi ndeja bantu bakuabu mushindu udi meji a Nzambi mua kubambuluisha.”

Beatriz uvua mukaji muena kantu ku bianza wa mu tshimenga tshia Caracas, mu ditunga dia Venezuela. Kadi dibaka diende divua difue, tunyinganyinga tukole e kumukuata. Bua dishikila, dimue dituku wakasambila munkatshi mua mêba a bungi. Pakatshiabu mu dinda, wakumvua ngonga wa ku tshiibi udila. Ne tshiji, wakatangidila pa tu-masoso tua tshiibi ne kumonaye bantu babidi bikale ne bibuta. Wakenza bu uvua kayi mu nzubu to. Kadi kumpala kua mulume eu ne mukajende bavua balue kumbukabu, bakela kabeji kakese muishi mua tshiibi. Kavua kamba ne: “Manya Bible webe.” Dilua dia Bantemu aba kuende divuaku mua kuikala bua masambila avuaye muenze butuku anyi? Wakaya kubamona kuabu bua kubambila bua balue kabidi. Mutantshi eu kutuadijaye kulonga Bible ne pashishe kuluaye kutambula. Beatriz udi ne disanka mpindieu, ne lelu udi ulongesha bakuabu mushindu wa kupeta disanka.

Carmen uvua usambila bua bupele buende bujike. Uvua mamu wa bana dikumi, bayende Rafeal uvua kanuayi munene. Carmen wakamba ne: “Ngakatuadija kusukuila bantu bilamba bua kupeta makuta.” Kadi wakapitshisha ne dinua dia maluvu. Carmen udi uleja ne: “Bayanyi wakabanga kushintuluka anu patuakatuadija kulonga Bible ne Bantemu ba Yehowa. Tuakalonga bualu bua mulayi wa Bukalenge, bua se: mu katupa kîpi emu, Yehowa neajikije bupele ne tshinyangu pa buloba. Ndekelu wa bionso Nzambi wakandamuna masambila anyi!” Kulonga njila ya Yehowa kuakambuluisha Rafael bua kulekela bu-kanuayi ne wakavuala “bumuntu bupiabupia.” (Efeso 4:24, NW) Yeye ne dîku diende bakabanga kuikala ne nsombelu muimpe. Rafael udi wamba ne: “Nansha mutudi katuyi babanji, ne katuyi ne wetu nzubu, tudi ne bintu bitudi nabi bualu ne tudi ne disanka.”

Tshikondo tshiandamuna Nzambi masambila onso

Kusambila kuvuaku kuambuluishe bantu aba anyi? Menemene! Ne udi mumone bimpe ne: misangu ya bungi masambila abu avua apeta mandamuna pavua muntu wa mu tshisumbu tshia Bantemu ba Yehowa utuadija kulonga nabu Bible ne ubaleja mua kusemena pabuipi ne Yehowa Nzambi.​—Bienzedi 9:11.

Nenku, katuena tusambila anu bualu batu basambila to. Mu katupa kîpi emu, Nzambi neandamune disambila ditudi tulomba bua Bukalenge buende bulue ne bua disua diende dienzeke pa buloba. (Matayo 6:10) Kunyima kua Nzambi mumane kumbusha baluishi bende bonso, ‘buloba nebuule tente ne kumanya kua Yehowa.’ (Yeshaya 11:9) Pashishe bantu bonso badi banange Yehowa nebapete “budishikaminyi bua butumbi bua bana ba Nzambi,” ne bushuwa yeye neandamune masambila abu.​—Lomo 8:18-21.

[Tshimfuanyi mu dibeji 7]

Udiku mumanye bua tshinyi tudi ne bua kusambila anyi?