Kusambila kutuku kuambuluisha anyi?
Kusambila kutuku kuambuluisha anyi?
MU TSHIKONDO kampanda, bantu pabuipi ne bonso batu bumvua muoyo wa kusambila. Bushuwa, bantu ba mu bitendelelu pabuipi ne bionso batu basambila bikole. Tshilejilu, muena Buddha udi mua kuambulula disambila dia “Ndi ngitabuja Amida Buddha” misangu binunu ne binunu ku dituku.
Pa kumona mudi ntatu yenda anu ivula pa buloba bujima, ki mbibi to bua kudiebeja ne: Bantu batu bajinga kupeta tshinyi patubu basambila? Masambila onso atubu benza aa atuku abambuluisha anyi?
Bua tshinyi bantu batu basambila?
Bena mu Asia ba bungi batu basambila bankambua babu ne nzambi wa bena Shinto anyi wa bena Tao. Batu benza masambila aa bua kukuata mateta a mu tulasa, bua kunowa bia pa madimi bimpe, anyi bua kuepuka masama. Bena Buddha batu bela meji ne: buobu badienzeje bikole, nebafike too ne mu tshikondo tshidi katshiyi tshia makenga ne ntatu. Bena Hindu batu basambila ne muoyo mujima nzambi yabu milume ne mikaji itubu basue bikole, bayilomba dimanya ne bubanji, bayilomba kabidi bukubi.
Bamue bena Katolike batu bela meji ne: badi mua kuambuluisha bantu padibu balua badiambike anyi bamansere basombele mu nzubu ya badiambike miela mu mpangu, basambila dîba dionso. Bena Katolike miliyo ya bungi batu benza masambila makuata ku muoyo, pamu’apa ne lunzadi, bua Mariya kubenzelaye malu mimpe. Mu matunga a mu Asia, bantu ba bungi batu ne tuamu tuenze bu nkata, tuikale ne masambila mamana
kufundapu anyi mela munda muatu. Bena Mishonyi, nansha mutubu bambila Nzambi malu adibu nawu munda kabayi badianjile kuakuata ku muoyo, batu pabu bambulula mêyi a mu Disambila dia Tatu Wetu. Bena Yuda ba bungi batu benza ngendu mile bua kuya kusambila ku Tshimanu tshia ku Ouest mu Yelushalema, batekemene bua se: nebibakulule ntempelo ne bindile tshikondo tshipiatshipia tshia masanka ne ditalala.Nansha mudi bantu miliyo ya bungi badifile mu masambila, bupele, dinua dia bintu bidi bikuata bu mudi diamba, difua dia mabaka, dibunda bilumbu ne mvita bidi bienda anu bivula. Tudi mua kuamba ne: bantu bonso aba kabena basambila bimpe anyi? Kudiku muntu utu uteleja masambila anyi?
Kudiku muntu utu uteleja masambila anyi?
Masambila adi mua kuambuluisha anu kuoku kuikale muntu udi uateleja. Padi muntu usambila, mmujadike bimpe ne: kudi munga muntu udi kayi umueneka udi umuteleja. Bushuwa, ki ndupepele lutu lufikisha masambila kudiwu aya nansha. Bantu ba bungi batu bitaba ne: kudi muntu kampanda udi mene mua kumona ngenyi ya muntu udi usambila. Muntu au udi mua kuikala nganyi?
Tshia kumpala, mushindu mene udi ngenyi ibangila mu miliyare mivule ya tujilu tukese tua mu buongo mbualu budi bena meji bapangile bua kumvua. Nanku bidi biumvuika bimpe ne: Muntu wakenza buongo ke udi ne bukole bua kumanya ngenyi eyi. Muntu au m’Mufuki wetu, Yehowa Nzambi. (Musambu 83:18; Buakabuluibua 4:11) Yeye ke utudi ne bua kusambila. Kadi tudi mua kuamba ne: Yehowa utu uteleja masambila onso adibu bamusambila anyi?
Nzambi utu uteleja masambila onso anyi?
Davidi Mukalenge wa Isalele wa kale uvua munange kusambila bikole. Bu muvuaye mufunde misambu ku nyuma wa Nzambi, wakamba ne: ‘Wewe udi umvua milombu, bukua-bantu buonso nebufike kuudi.’ (Musambu 65:2) Yehowa udi ne bukole bua kuteleja masambila adi bantu benza mu binunu bia miakulu idi bantu bakula. Nansha mudi lungenyi lua muntu kaluyi mua kukuata malu a bungi menemene, kabiena biumvuija ne: Nzambi kêna mua kuteleja bonso badi bamusambila mu mushindu muimpe to.
Kadi Yezu Kristo (muntu uvua pende munange kusambila bikole) wakaleja ne: masambila onso kaatu asankisha Nzambi to. Tangila tshiakambaye bua tshilele tshivua natshi bantu ba bungi mu tshikondo atshi tshia kuambulula masambila avuabu bakuate ku muoyo, njila ne njila. Bilondeshile Mukanda wa Mvidi Mukulu, Yezu wakamba ne: “Panudi nusambila, lekelayi kuvudija miaku bu mudi bantu ba bisamba bikuabo benza, bela meji ne: pakulabo miaku mivule, nebabateleje bipite.” (Matayo 6:7) Katuena mua kuela meji ne: Nzambi udi mua kuteleja masambila adi kaayi afumina menemene mu mutshima wetu to.
Lusumuinu kampanda lua mu Bible ludi luleja tshidi amue masambila kayi asankishila Nzambi, luamba ne: ‘Udi umusha matshi ende ku diyisha dia mikenji, mulombu wende udi utondesha Nzambi.’ (Nsumuinu 28:9) Lusumuinu lukuabu ludi luolu luamba ne: ‘Yehowa udi kule ne bantu babi, kadi udi umvua kulomba kua bantu bakane.’ (Nsumuinu 15:29) Mu tshikondo kampanda tshivua bamfumu ba mu Yuda wa kale bapie tshibawu tshinene, Yehowa wakabambila ne: ‘Panuolola bianza bienu kundi, nensokoke mêsu anyi kunudi; e, panuantendelela ne mitendelelu ya bungi mene, tshiena nnumvuila; bianza bienu bidi biule tente ne mashi.’—Yeshaya 1:1, 15.
Mupostolo Petelo yeye wakaleja bualu bukuabu budi mua kufikisha Nzambi ku dibenga kuteleja masambila. Wakafunda ne: ‘Nuenu balume muomumue, nuikale ne bakaji benu bu mudi lungenyi luimpe, bu mudibu banutambe mubidi butekete, bu mudibu bapianyi nenu ba ngasa wa muoyo; bua [masambila] enu kaapumbishibu.’ (1 Petelo 3:7) Masambila a mulume udi ulengulula mubelu eu kaatu ne kudiwu aya to!
Bushuwa, bidi bikengela kukumbaja amue malu bua Nzambi kutelejaye masambila etu. Kadi bantu ba bungi batu basambila kabatu batamba kuenza bidi Nzambi ubalomba to. Ke bualu kayi malu ki mmalongoloke pa buloba nansha mudi bantu badifile bikole mu masambila.
Kadi ntshinyi tshidi Nzambi utulomba bua kushishaye kuteleja masambila etu? Diandamuna didi ditangila tshitudi mene tuenzela masambila. Bulelela, tuetu basue kumanya bikala masambila ne diambuluisha, tudi ne bua kumvua tshipatshila tshiawu. Bua tshinyi Yehowa mmuenze bua tuikale tuyukila nende?
[Mêyi a dianyisha bua tshimfuanyi mu dibeji 3]
G.P.O., Yelushalema