Malu akafikila mulume ne mukaji wa kumpala adi mua kutulongesha

NZAMBI wakakonkonona buloba. Uvua ubulongolola bua bantu basombelapu. Wakamona ne: bintu bionso bivuaye muenze bivua bimpe. Pakajika mudimu eu, wakamba ne: bivua “bimpe be!” (Genese 1:12, 18, 21, 25, 31) Kadi kumpala kua kuambaye mêyi aa malenga a ndekelu, Nzambi wakamba bua bualu bumue ne: kabuvua ‘buimpe’ to. Mbushuwa se: Nzambi kavua muenze tshintu tshivua katshiyi tshipuangane to. Tshivuaku ntshia se: mudimu wende wa difuka kauvua muanji kujika to. Yehowa wakamba ne: ‘Ki mbimpe bua mulume ashale nkayende nansha; nemmufukile mukuatshishi bu mudiye.’​—Genese 2:18.

Dijinga dia Yehowa divua dia se: bantu bonso bikale ne muoyo wa tshiendelele ne mubidi muimpe, ne disanka kabidi ne bintu bia bungi mu mparadizu pa buloba. Tatuende wa bantu bonso uvua Adama. Mukajende Eva wakalua “muledi wa bonso badi ne muoyo.” (Genese 3:20) Nansha mudi buloba bûle  ne miliyare mivule ya bantu, kabena tshibuipi ne bupuangane to.

Muyuki wa Adama ne Eva mmumanyike bikole. Kadi muyuki eu udi utuambuluisha ku tshinyi? Malu akenzekela mulume ne mukaji ba kumpala adi mua kutulongesha tshinyi?

“Wakabafuka mulume ne mukaji”

Pavua Adama winyika nyama mêna, wakamona ne: kuvua nyama milume ne mikaji, kadi yeye kavua ne mukaji to. Ke bua tshinyi wakasanka pakamonaye tshifukibua tshilengele tshivua Yehowa muenze ne lubadi luende. Pakamanyaye ne: tshifukibua atshi tshivua menemene tshiangatshila ku mubidi wende, Adama wakamba ne: ‘Eu udi mufuba wa mifuba yanyi ne musunyi wa misunyi yanyi; nebamuinyike ne: Mukaji, bualu bua bakamuangata kudi mulume.’​—Genese 2:18-23.

Mulume uvua dijinga ne “mukuatshishi.” Mpindieu uvua ne mukuatshishi uvua mukumbane. Eva uvua mukumbane bimpe menemene bua kuikala wambuluisha Adama bua kulama budimi ne nyama, bua kulela bana ne bua kukuatshishangana anu mutu balunda balelela mua kuenza.​—Genese 1:26-30.

Yehowa wakapesha mulume eu ne mukajende bintu bionso bimpe bivuabu mua kuikala nabi dijinga. Pakaluaye ne Eva kudi bayende ne kubasangisha mu dibaka, Nzambi wakajadika dibaka ne dîku divua ne bua kuikala nshindamenu wa bantu. Badi bamba mu Genese ne: ‘Mulume neashiye tatuende ne mamuende, nealamate mukaji wende; bubidi buabu nebikale mubidi umue.’ Pavua Yehowa mubeneshe mulume ne mukaji wa kumpala ne mubambile bua balelangane, uvua mulongolole bimpe bua muana yonso waledibua ikale mu dîku mudibu mua kumulama bimpe, muikale ne tatuende ne mamuende badi mua kumukuba.​—Genese 1:28; 2:24.

‘Ne tshifuanyikiji tshia Nzambi’

Adama uvua muana mupuangane wa Nzambi, mufuka mu ‘tshifuanyikiji Tshiende ne mufuanangane nende.’ Kadi bu mudi ‘Nzambi muikale Nyuma,’ difuanangana kadivua mua kuikala dia ku mubidi to. (Genese 1:26; Yone 4:24) Mbafuanangane ku ngikadilu idi yenza bua muntu ikale mutambe nyama kule ne kule. Dinanga, meji, bukole ne buakane nngikadilu idi munda mua muntu katshia ku tshifukilu. Nzambi uvua mumufuke ne tshipedi tshia budisunguidi ne bukole bua kukeba bua kumanya malu a mu nyuma. Udi ne dîyi dia munda-munda anyi kuondo ka muoyo kadi kamuambuluisha bua kusunguluja tshidi tshimpe ne tshidi tshibi. Muntu udi ne lungenyi ludi lumuambuluisha bua kuelangana meji a kumanya bua tshinyi bantu badi ne muoyo, bua kumanya malu a Mufuki wende ne bua kudia nende bulunda bulenga. Nenku Adama uvua ne bionso bivua bikengedibua bua kuenza mudimu uvuabu bamupeshe wa kutangila bintu bivua Yehowa mufuke pa buloba.

Eva udi ushipa mukenji

Kakuyi mpata, Adama kakajingakana bua kuambila Eva mukenji uvua Yehowa muele uvua ubanyishila bua kudia bimuma bia mitshi yonso ivua mu budimi muvuabu basombele pa kumbusha anu mutshi umuepele: wa dimanya dia malu mimpe ne mabi. Kabavua ne bua kudia bimuma bia mutshi au to. Pavuabu anu badidinga babidia, bavua ne bua kufua dituku dine adi.​—Genese 2:16, 17.

Mutantshi eu, tshilumbu kujukatshi bua tshimuma atshi tshivuabu bakandike. Tshifukibua tshikuabu tshia mu nyuma tshiakangata nyoka bua kuyikila ne Eva. Muenze bu uvua kayi mumanye bualu, nyoka au wakakonka Eva ne: ntshia bushuwa bua se: ‘Nzambi wakamba ne: kanudi mamuma a mitshi yonso idi mu budimi anyi?’ Eva wakamuandamuna ne: bavua babanyishile bua kudia bimuma bia mitshi yonso pa kumbusha anu mutshi umuepele. Kadi nyoka wakabenga bivua Nzambi muambe, kuambilaye mukaji ne: ‘Kanuena nufua bulelela; bualu bua Nzambi udi mumanye ne: panuadia mamuma au, mêsu enu neabuluke, nenuikale bu Nzambi, nenumanye malu mimpe ne malu mabi.’ Mukaji wakatuadija kumona mutshi au mu mushindu mukuabu. ‘Mutshi au uvua muimpe wa kudia ne uvua muimpe ku mêsu.’ Bu muvuabu bamushime, Eva wakashipa mukenji wa Nzambi.​—Genese 3:1-6; 1 Timote 2:14.

Eva kavuaku ne mushindu wa kuepuka mpekatu eu anyi? Uvua nawu! Anji ditekabi pa muaba wende. Malu akamba nyoka akakonyangaja bikole bionso bivua Nzambi ne Adama bambe. Udi mua kumvua munyi bu wewe mua kumona muntu uudi kuyi mumanye ushiminyina muntu kampanda uutu munange ne weyemena malu? Eva kavua ne bua kuikala muenze nanku to, uvua ne bua kumvua bibi ne kufika munda bua malu au,  uvua mene nansha mua kubenga kuateleja. Tuamba eku tuela eku, nyoka muine uvua nganyi bua kutontolola buakane bua Yehowa ne kutontolola kabidi dîyi dia Adama bayende wa Eva? Bua kuleja muvuaye unemeka bumfumu, Eva uvua ne bua kuanji kulomba mibelu bangabanga ne kuangataye dipangadika dionso. Ke tshitudi ne bua kuenza petu bu muntu mua kutuambila malu adi abengangana ne mikenji ya Nzambi. Kadi, Eva wakitaba mêyi a Mutetshianganyi au. Uvua ukeba bua yeye nkayende kuikala udijadikila tshivua tshibi ne tshivua tshimpe. Bu muvuaye anu katshia walama bualu buende ebu mu lungenyi, buakalua kumusankisha bikole. Wakenza tshilema tshinene be pakalamaye dijinga dibi edi munda muende, pamutu pa kudiumusha mu lungenyi peshi kuyikila bualu ebu ne mfumuende!​—1 Kolinto 11:3; Yakobo 1:14, 15.

Adama udi uteleja dîyi dia mukajende

Pashishe Eva e kufikisha Adama pende ku dienza mpekatu. Mmunyi mutudi mua kumvuija bitabataba bia mushindu’eu bivuaye nabi? (Genese 3:6, 17) Adama wakimana mukolo mule ne muipi, kamanyi kua diela dînu ne kua diela kakala. Uvua mua kutumikila Mufuki wende uvua mumupeshe bintu bionso, kumupesha kabidi ne Eva bua ikale mukajende uvuaye munange anyi? Adama uvuaku mua kulomba Nzambi mibelu bua bualu buvuaye usua kuenza anyi? Peshi mulume eu uvua mua kupangadika bua kulonda dikasa dia mukajende ne kuenza pende mpekatu eu? Adama uvua mumanye bimpe bitambe ne: tshintu tshivua mukajende mutekemene bua kupeta pavuaye udia tshimuma tshia mutshi mukandika katshivua mua kuenzeka to. Mupostolo Paulo wakafunda ku nyuma ne: ‘Uvuabu badinge ki ng’Adame to; bavua badinge mukaji, kutupaye ku diyi dia [Nzambi].’ (1 Timote 2:14, MMM) Nunku Adama wakadisunguila bua kubenga kutumikila mêyi a Yehowa. Ditshina bua kabavu kumutapulula ne mukajende divua dia bungi kupita ditabuja dia se: Nzambi uvua ne bukole bua kulongolola bualu abu.

Bualu buvua Adama muenze buvua bua njiwu ya lufu. Buakafikisha kabidi ne ku dishipesha ndelanganyi yonso ivua Yehowa bua luse mumuanyishile bua kulelaye, bualu yonso ivua milue kuledibua ne tshibawu tshia lufu tshifundila bena  mpekatu. (Lomo 5:12) Mbintu bungi kayipu biakajimijaye bua bupidia buende abu!

Malu adi mpekatu eu mukebeshe

Bundu ke bualu bua kumpala buvua mpekatu mukebeshe. Adama ne Eva bakasokoma pamutu pa kuyabu lubilu ne disanka bua kuyikila ne Yehowa. (Genese 3:8) Bulunda buabu ne Nzambi buakafua. Pakabakonkabu bua tshivuabu benze, kabakalejaku ne: bavua banyingalala to, nansha muvuabu bubidi buabu bamanye ne: bavua bashipe mukenji wa Nzambi. Pakadiabu tshimuma tshia mutshi uvuabu bakandike, bakabenga bimpe bionso bivua Nzambi mubenzele.

Ke bualu kayi Nzambi wakamba ne: mukaji uvua ne bua kuikala ukenga bikole pa lulelu. Mutshima wa Eva uvua ne bua kuikala anu kudi bayende, ne Adama yeye uvua ne bua kuikala ne bukokeshi ku mutu kuende. Dijinga diende dia kudienzela malu onso muvuaye musue diakamupetesha tshintu tshia tshianana. Mpindieu Adama uvua ne bua kudia ne kanyinganyinga bintu bivua buloba mua kumenesha. Pamutu pavuaye mua kuikala udia ukuta kakuyi lutatu mu budimi bua Edene, uvua mpindieu ne bua kuluangana bikole menemene bua kupeta tshiakudia too ne pavuaye upingana ku dimfuenkenya dia buloba divuabu bamuenze nadi.​—Genese 3:16-19.

Kamana kamana, e kuipatabu Adama ne Eva mu budimi bua Edene. Yehowa wakamba ne: ‘Monayi, mulume wakulua bu umue wetu, udi mumanye malu mimpe ne malu mabi; bua yeye kolodi tshianza tshiende bua kuangataye mamuma a mutshi wa muoyo, wadia, wikala ne muoyo tshiendelele, . . . ’ Mumvuiji wa Bible Gordon Wenham udi wamba ne: “Tshiambilu etshi ntshishikidile mu njila, ne mbatushile bua tuetu kusakidila lungenyi lua Nzambi ludi lushale; ludi mua kuikala lua se: ‘ndi mmuipata mu budimi.’” Pa tshibidilu, mufundi wa Bible utu ufunda lungenyi lujima lua bualu budi Nzambi wamba. Wenham udi utungunuka wamba ne: kadi muaba eu, “dibenga kujikija mêyi edi didi dileja ne: bualu buvua Nzambi usua kuenza buvua bua lukasa lukasa. Kayi nansha muanji kujikija kuakula to bakavua babipate mu budimi.” (Genese 3:22, 23) Bidi bimueneka ne: pakenzekabi nanku, diyikilangana pankatshi pa Yehowa ne bantu babidi ba kumpala diakajika.

Adama ne Eva kabakafua tshia bushuwa mu dituku adi dia mêba 24 to. Kadi bakafua mu ngumvuilu wa mu nyuma. Bakatapulukangana kashidi ne Mpokolo wa muoyo, kutuadijabu kunyanguka [mibidi] baya batangile ku lufu. Elabi meji muvuabu bumvue bibi pakabakuata lufu bua musangu wa kumpala pavua Kana muanabu muanabute mushipe Ebele muanabu muibidi!​—Genese 4:1-16.

Panyima apu, anu malu makese patupu a mulume ne mukaji wa kumpala ke adi mamanyike. Muanabu wa balume muisatu, diende Sheta, wakaledibua pavua Adama muikale ne bidimu 130. Adama wakalua kufua kunyima kua bidimu 800, pakavuaye ne bidimu 930, mumane kulela ‘bana balume ne bana bakaji.’​—Genese 4:25; 5:3-5.

Tshidi malu aa atulongesha

Pa kumbusha dileja tshiledi tshia nsombelu mubi udi nende bantu lelu, muyuki wa mulume ne mukaji wa kumpala udi utulongesha bualu bunene. Kukeba bua kuikala kuenza tshionso tshidi muoyo musue ne diambu ne kujinga bua kuela Yehowa Nzambi nyima ndibula lungenyi dia dikema. Bantu badi ne meji etu a bushuwa aa badi beyemena Yehowa ne Dîyi diende, kadi kabena beyemena dimanya diabu buobu didibu bela meji ne: ndikumbane bua kubambuluisha mu malu onso nansha. Yehowa ke udi uleja tshidi tshimpe ne tshidi tshibi, ne nsapi wa malu makane nditumikila. Kuenza malu mabi mmuomumue ne: kushipa mikenji ya Nzambi ne kubenga kutumikila mêyi ende.

Nzambi wakapesha bantu ne utshidi ubapesha bintu bionso bidibu mua kuikala nabi dijinga: muoyo wa kashidi, budikadidi, disanka, diakalenga, makanda a mubidi, ditalala, nsombelu muimpe ne dimanya malu mapiamapia. Kadi bua tuetu kusanka ne bintu bionso ebi, tudi ne bua kumanya ne: muoyo wetu mujima udi mu bianza bia Tatu wetu wa mu diulu, Yehowa.​—Muambi 3:10-13; Yeshaya 55:6-13.

[Kazubu/​Tshimfuanyi mu dibeji 26]

Muyuki wa Adama ne Eva​—Mmuanu anyi?

Bena Babulona, bena Ashû, bena Ejipitu ne bakuabu bantu ba kale bavua bitaba ne: ku mbangilu kuvua mparadizu wakajimina bualu bantu bakenza mpekatu. Miyuki ya bungi itu yamba bua mutshi wa muoyo uvua ne bimuma bivua bipetesha bavua babidia muoyo wa tshiendelele. Nenku bantu badi bavuluka ne: kuakenzeka bualu bukuate buôwa mu budimi bua Edene.

Lelu’eu, bantu ba bungi badi babenga kuitaba muyuki wa mu Bible wa Adama ne Eva bamba mudiwu muanu. Pabi, bena meji ba bungi mbafike ku ditaba ne: bantu bonso badi benza dîku dimue didi difumine kudi muntu umue. Balongi bavule ba malu a Nzambi badi bamona bikole bua kuelesha mpata bua se: malu akafikila nkambua wetu bonso bua mpekatu wakenzaye mmatampakena bantu bonso. Kuitaba ne: bantu mbafumine miaba mishilangane nekubasake bua kuamba ne: mpekatu wa kumpala au bavua bamuenze kudi bankambua ba kumpala ba bungi. Pashishe, bivua mua kubafikisha ku divila Kristo, “Adame wa ndekelu,” wakapikula bantu. Kadi Yezu ne bayidi bende kabavua bapete lutatu lua mushindu’eu to. Bakitaba ne: muyuki wa mu Genese mmuyuki wa malu malelela.​—1 Kolinto 15:22, 45, MMM; Genese 1:27; 2:24; Matayo 19:4, 5; Lomo 5:12-19.