Mbanganyi badi bena mudimu ba Nzambi lelu?

‘Dikumbana dietu didi difuma kudi Nzambi; yeye wakatukumbaja kabidi bu bena mudimu ba dipungila dipiadipia.’​—2 KOLINTO 3:5, 6.

1, 2. Mmudimu kayi uvua bena Kristo bonso ba mu bidimu lukama bia kumpala bakumbaja, kadi mmunyi muakashintuluka malu?

 MU BIDIMU lukama bia kumpala bia mu Bikondo Bietu ebi, bena Kristo bonso bavua bakumbaja mudimu wa mushinga mukole uvuabu babalombe bua kuenza wa kuyisha lumu luimpe. Buonso buabu bavua bela manyi a nyuma ne bavua bena mudimu ba dipungila dipiadipia. Bamue bavua ne majitu makuabu, bu mudi kulongesha mu tshisumbu. (1 Kolinto 12:27-29; Efeso 4:11) Baledi bavua ne majitu manene mu mêku abu. (Kolosai 3:18-21) Kadi bonso bavua benza mudimu wa mushinga mukole wa kuyisha. Mu tshiena-Greke tshia kale muvuabu bafunde Mifundu ya bena Kristo, bavua babikila mudimu eu ne: di·a·ko·niʹa, mmumue ne: mudimu (peshi ministère mu Mfualansa).​—Kolosai 4:17.

² Mu bungi bua matuku, malu akashintuluka. Kuakapatuka kasumbu ka bantu bavuabu babikila ne: balombodi ba ekeleziya, bavua badilamine nkayabu mudimu wa kuyisha. (Bienzedi 20:30) Balombodi ba ekeleziya aba bavua kasumbu kakese ka bantu bavua badibikila ne: bena Kristo. Bakuabu ba bungi bashadi aba bavua bababikila ne: bena kuitabuja (ta ba-layike). Nansha mudibu balongeshe bena kuitabuja ne: badi ne amue malu adibu ne bua kuenza, bu mudi kufila mapa bua kuambuluisha balombodi ba ekeleziya, bavule ba kudibu kabatu bayisha to, tshiabu nkuteleja badi balongesha.

3, 4. (a) Mmunyi mudi bantu balua bena mudimu anyi ba-ministre mu Bukua-buena-Kristo? (b) Nnganyi udibu bangata bu ministre mu Bukua-buena-Kristo, ne bua tshinyi kabiena nanku mu Bantemu ba Yehowa?

³ Balombodi ba ekeleziya badi badiamba mudibu  bena mudimu anyi ba-ministre (muaku udi mufumine ku muaku wa mu Latin minister, dikudimuna dia muaku wa tshiena-Greke di·aʹko·nos, udi umvuija “musadidi”). * Bua kuluabu ba-ministre, badi balonga mu iniversite anyi mu seminere ne pashishe badi babatambuisha mianzu eyi. Tshibungu kampanda tshidi tshiamba ne: “‘Kutambuisha mianzu’ ne ‘tshibilu tshia ditambuisha mianzu’ bitu pa tshibidilu bua muanzu wa pa buawu udibu bapesha balombodi peshi bansaserdose bua kuenza malu kampanda, batamba kushindamena pa bukenji bua kumanyisha Dîyi anyi bua kufila nsakramento, peshi bua kuenza bionso bibidi.” (The International Standard Bible Encyclopedia) Nnganyi udi utambuishangana mianzu eyi? Tshibungu tshikuabu tshidi tshiamba ne: “Mu ekeleziya idi milame dilondangana dia kuonso eku dia mianzu ya bepiskopo, misangu yonso muepiskopo ke utu utambuishangana mianzu. Mu ekeleziya ya bena Mishonyi, kasumbu ka bamfumu ba ekeleziya ke katu katambuishangana mianzu.”​—The New Encyclopædia Britannica.

⁴ Ke bualu kayi mu ekeleziya ya mu Bukua-buena-Kristo, badi batamba kufila mianzu eyi anu kudi bantu bakese menemene. Kadi kabiena nanku bua Bantemu ba Yehowa to. Bua tshinganyi? Bualu kabivua bienzeka nanku mu tshisumbu tshia bena Kristo mu bidimu lukama bia kumpala to.

Mbanganyi menemene badi bena mudimu ba Nzambi?

5. Bilondeshile Bible, mbanganyi badi munkatshi mua bena mudimu?

⁵ Bilondeshile Bible, batendeledi bonso ba Yehowa ba mu diulu ne ba pa buloba mbena mudimu peshi mba-ministre. Banjelu bakakuatshila Yezu mudimu. (Matayo 4:11; 26:53; Luka 22:43) Banjelu badi kabidi ‘bakuatshila badi bamba kupiana lupandu mudimu.’ (Ebelu 1:14; Matayo 18:10) Yezu uvua muena mudimu. Wakamba ne: “Muana wa muntu kakuluila bua bantu bamukuatshile mudimu, wakuluila bua kubakuatshila mudimu.” (Matayo 20:28; Lomo 15:8) Nenku bu muvua bayidi ba Yezu ne bua ‘kumulonda mu makasa ende,’ kabiena bikemesha bua kumvua ne: buobu pabu bavua ne bua kuikala bena mudimu.​—1 Petelo 2:21.

6. Mmunyi muakaleja Yezu ne: bayidi bende bavua ne bua kuikala bena mudimu?

⁶ Katupa kîpi kumpala kua Yezu kubanda mu diulu, wakambila bayidi bende ne: ‘Yayi bienu, nuvuije ba bisamba bionso bayidi, nubabatize mu dîna dia Tatu ne mu dia Muana ne mu dia nyuma muimpe; nubayishe mua kuenza malu onso angakanuambila.’ (Matayo 28:19, 20) Bu muvua bayidi ba Yezu ne bua kuikala bavuija bantu bakuabu bayidi, nanku bavua bena mudimu. Bantu bavuabu bavuija bayidi bavua ne bua kulonga mua kutumikila malu onso avua Yezu mubambile, ne dîyi divuaye mutume dia kuya kuvuija bantu bayidi. Muyidi mulelela wa Yezu Kristo, mulume anyi mukaji, mukulumpe ta muana, uvua ne bua kuikala muena mudimu.​—Yoele 2:28, 29.

7, 8. (a) Mmvese kayi idi ileja ne: bena Kristo balelela bonso mbena mudimu? (b) Nnkonko kayi idi ijuka bua diteka bantu bena mudimu?

⁷ Ke bualu kayi mu dituku dia Pentekoste wa mu 33 B.B., bayidi bonso ba Yezu bavuapu dituku adi, balume ne bakaji, bakabanga kuamba “mianda minene ya Nzambi.” (Bienzedi 2:1-11) Kabidi, mupostolo Paulo wakafunda ne: ‘Bantu badi bitabuja ne mutshima bua kupeta buakane, badi bajikula ne mukana bua kupeta lupandu.’ (Lomo 10:10) Mêyi aa Paulo wakaambila “bonso ba mu Lomo, banangibue kudi Nzambi,” kakaambila kasumbu kakese ka balombodi ba ekeleziya to. (Lomo 1:1, 7) Bia muomumue, ‘bansantu [bonso] bavua mu Efeso ne bavua mua kueyemenyibua mu Kristo Yezu’ bavua ne bua ‘kubueja makasa abu mu bisabata bia kudilongolola kua lumu luimpe lua ditalala.’ (Efeso 1:1; 6:15) Ne bantu bonso bakateleja mukanda uvuaye mutumine bena Ebelu bavua ne bua  ‘kulamata bikole dijikula dia patoke dia ditekemena diabu kabayi batenkakana.’​—Ebelu 10:23, NW.

⁸ Kadi ndîba kayi didi muntu ulua muena mudimu anyi ministre? Mu mêyi makuabu, ndîba kayi didibu bamuteka muena mudimu? Ne nnganyi udi umupesha mudimu eu?

Ndîba kayi didibu bateka muntu muena mudimu?

9. Ndîba kayi diakatekabu Yezu muena mudimu, ne nnganyi wakamuteka?

⁹ Bua kumanya dîba didibu bateka muntu muena mudimu ne udi umuteka, angata tshilejilu tshia Yezu Kristo. Kavua ne mukanda wa dimuteka nawu mu mudimu anyi muanzu kampanda wa mu seminere bua kujadika ne: uvua muena mudimu to. Ne kabavua bamutambuishe muanzu kudi muntu wetu wa matshi ne mêsu eu to. Kadi bua tshinyi tudi mua kuamba ne: uvua muena mudimu? Bualu mêyi avua Yeshaya mufunde ku nyuma avua amukumbanyina: ‘Nyuma wa Nzambi udi pambidi panyi, bualu bua yeye wakangela manyi pa mutu [bua] kuamba lumu luimpe.’ (Luka 4:17-19; Yeshaya 61:1) Mêyi aa kaena ashiya mpata nansha mikese bua se: bavua bapeshe Yezu mudimu wa kuamba lumu luimpe. Nnganyi wakamupeshawu? Bu muvua Yehowa mumuele manyi a nyuma bua mudimu eu, Yehowa Nzambi ke wakateka Yezu mu mudimu eu. Ndîba kayi diakamutekaye? Nyuma wa Yehowa wakapuekela Yezu pakatambulaye. (Luka 3:21, 22) Nanku bakateka Yezu mu mudimu dîba diakatambulaye.

10. Nnganyi udi uvuija muena mudimu muena Kristo ‘mukumbane’?

¹⁰ Netuambe bishi bua bayidi ba Yezu ba mu bidimu lukama bia kumpala? Yehowa ng’uvua mubateke pabu bena mudimu. Paulo wakamba ne: ‘Dikumbana dietu didi difuma kudi Nzambi; yeye wakatukumbaja kabidi bu bena mudimu ba dipungila dipiadipia.’ (2 Kolinto 3:5, 6) Mmunyi mudi Yehowa ukumbaja bantu badi bamutendelela bua kuikalabu bena mudimu? Angata tshilejilu tshia Timote, uvua Paulo mubikile ne: ‘muena mudimu wa Nzambi mu lumu luimpe lua Kristo.’​—1 Tesalonike 3:2.

11, 12. Mmushindu kayi wakakola Timote mu nyuma bua kuluaye muena mudimu?

¹¹ Mêyi akafundilaye Timote adi alonda aa adi atuambuluisha bua kumvua mushindu wakaluaye muena mudimu: “Kadi wewe, utungunuke mu malu awakalonga ne akakutuishabu bua kuitaba, mumanye bantu bakakulongeshawu ne se: kubangila ku buana udi mumanye mifundu minsantu, idi mua kukuvuija muena meji bua lupandu ku diambuluisha dia ditabuja didi ditangila Kristo Yezu.” (2 Timote 3:14, 15, NW) Tshishimikidi tshia ditabuja dia Timote, divua ne bua kumusaka bua kuenza dijikula dia patoke, tshivua dimanya dia Mifundu Minsantu. Kadi  kudibadila nkayaku ke kuvua mua kumuambuluisha bua kuenza bionso ebi anyi? Tòo. Timote uvua dijinga ne diambuluisha bua yeye kupeta dimanya dijalame ne dijingulula dia mu nyuma dia malu avuaye ubala. (Kolosai 1:9) Ke bua tshinyi bavua ‘batuishe [Timote] bua kuitabaye.’ Bu muvuaye mumanye Mifundu “kubangila ku buana,” balongeshi bende ba kumpala bavua ne bua kuikala mamuende ne kakuende mukaji, ne bidi bimueneka ne: tatuende kavua muena kuitabuja to.​—2 Timote 1:5.

¹² Kadi, dilua dia Timote muena mudimu divua dilombe malu a bungi. Tshilejilu, ditabuja diende diakakola bualu uvua udisangisha ne bena Kristo ba mu bisumbu bivua pabuipi nende. Mmunyi mutudi bamanye bualu ebu? Bualu, musangu wa kumpala wakapetangana Paulo ne Timote, Timote uvua ‘ne lumu luimpe lumanyibue kudi bana babu ba mu Luseta ne mu Ikonio.’ (Bienzedi 16:2) Kabidi, mu matuku au bamue bana betu bavua bafundila bisumbu mikanda bua kubikolesha muoyo. Ne batangidi bavua babikumbula bua kubikankamija. Malu aa akambuluisha bena Kristo bu mudi Timote bua kudiunda mu nyuma.​—Bienzedi 15:22-32; 1 Petelo 1:1.

13. Ndîba kayi diakatekabu Timote muena mudimu, ne bua tshinyi udi mua kuamba ne: dikola diende dia mu nyuma kadiakimanyina anu pinapu to?

¹³ Bilondeshile dîyi divua Yezu mutume didi mu Matayo 28:19, 20, tudi mua kuamba ne: ditabuja dia Timote diakamusaka dîba kampanda bua kuidikija Yezu ne bua kutambula. (Matayo 3:15-17; Ebelu 10:5-9) Ditambula edi divua tshimanyinu tshia se: Timote uvua mudilambule ne anyima wende mujima kudi Nzambi. Nenku pakatambulaye, Timote wakalua muena mudimu. Kubangila anu pinapu, muoyo wende, makanda ende ne bintu bionso bivuaye nabi biakalua bia Nzambi. Etshi tshivua tshitupa tshinene tshia ntendelelu wende peshi “mudimu wa tshijila.” Kadi, Timote kakimanyina anu apu to. Wakatungunuka ne kukola mu nyuma, kuluaye muena mudimu muena Kristo mupie mu nyuma. Biakenzeka nanku bualu Timote uvua utamba kusomba ne bena Kristo bapie bu mudi Paulo, uvua udilongela ne wenza mudimu wa buambi ne lukunukunu.​—1 Timote 4:14; 2 Timote 2:2; Ebelu 6:1.

14. Lelu’eu, mmunyi mudi muntu ‘udi mudiakaje bimpe bua muoyo wa kashidi’ ukola mu nyuma bua kulua muena mudimu?

¹⁴ Lelu’eu, diteka bantu mu mudimu wa bena Kristo didi dienzeka mu mushindu wa muomumue. Badi bambuluisha muntu udi ‘mudiakaje bimpe bua muoyo wa kashidi’ bua kumanyaye Nzambi ne malu adiye mulongolole padibu balonga nende Bible. (Bienzedi 13:48, NW) Muntu eu udi ulonga mua kutumikila mêyi a mu Bible ne udi umanya mua kusambila Nzambi biakane. (Musambu 1:1-3; Nsumuinu 2:1-9; 1 Tesalonike 5:17, 18) Udi udisangisha ne bena Kristo bakuabu ne malu adi “mupika wa lulamatu ne wa budimu” mulongolole adi amuambuluisha. (Matayo 24:45-47, NW; Nsumuinu 13:20; Ebelu 10:23-25) Mushindu’eu, udi udiunda mu nyuma bilondeshile ndongeshilu kampanda mulongolola bimpe.

15. Ntshinyi tshidi tshienzeka padi muntu utambula? (Tangila kabidi diumvuija didi kuinshi kua dibeji.)

¹⁵ Ku ndekelu, mulongi wa Bible eu yeye mumane kunanga Yehowa Nzambi ne kuitabuja ne muoyo mujima mulambu udi upikula bantu, udi ujinga bua kudilambula yeye mujima kudi Tatuende wa mu diulu. (Yone 14:1) Udi wenza disambila pa nkayende udilambula kudi Nzambi ne pashishe udi utambula bua kuleja patoke tshikavuaye muenze pa nkayende. Ditambula diende ke tshibilu tshia dimuteka  muena mudimu bualu dîba adi ke didiye umanyika menemene bu di·aʹko·nos anyi musadidi wa Nzambi. Udi ne bua kushala mutapuluke ne bena panu. (Yone 17:16; Yakobo 4:4) Mmudifile yeye mujima bu “mulambu udi ne muoyo, wa tshijila, udi usankisha Nzambi bimpe.” (Lomo 12:1) * Udi muena mudimu wa Nzambi, muikale widikija Kristo.

Mmudimu kayi udi nawu bena Kristo?

16. Ngamue malu kayi avua Timote ne bua kuenza mu mudimu wende?

¹⁶ Mmalu kayi avua Timote wenza mu mudimu wende? Uvua ne midimu ya pa buayi bualu uvua wenza ngendu ne Paulo. Ne pakaluaye mukulu, Timote uvua wenza mudimu mukole wa kulongesha ne kukankamija bena Kristo nende. Kadi mudimu wende munene uvua wa kuyisha lumu luimpe ne kuvuija bantu bayidi anu muakenza Yezu ne Paulo. (Matayo 4:23; 1 Kolinto 3:5) Paulo wakambila Timote ne: “Kadi wewe, dimuka ku bionso, ukoleshe muoyo mu dikenga, wenze mudimu wa dilongesha mukenji mulenga, ukumbaje bimpe mudimu webe.”​—Tuetu mbadi baladike maleta; 2 Timote 4:5, MMM.

17, 18. (a) Mmudimu kayi udi bena Kristo bakumbaja? (b) Mudimu wa kuyisha udi ne mushinga kayi bua muena mudimu muena Kristo?

¹⁷ Ke mudibi kabidi bua bena mudimu bena Kristo lelu. Badi benza mudimu wa diambuluisha bantu, mudimu wa dilongesha mukenji mulenga, baleja bantu bakuabu njila wa lupandu luapetelabu mu mulambu wa Yezu ne balongesha bapuekele bua kubila dîna dia Yehowa. (Bienzedi 2:21; 4:10-12; Lomo 10:13) Badi bajadika ne Bible ne: Bukalenge ke tshintu tshimuepele tshidi bantu badi bakenga mua kutekemena, ne badi baleja kabidi ne: nansha mpindieu malu adi mua kuikala bimpe tuetu tutumikila mêyi a Nzambi. (Musambu 15:1-5; Mâko 13:10) Kadi muena mudimu muena Kristo kêna ulongesha evanjeliyo muimanyine pa malu a bantu nansha. Udi ulongesha ne: ‘dilamata [Nzambi], didi ditulaya muoyo mpindiewu ne bua matuku alualua.’​—1 Timote 4:8, MML.

¹⁸ Bushuwa, bena mudimu bavule badi ne mishindu mikuabu idibu basadila, idi mua kushilangana kudi muena Kristo umue ne kudi mukuabu. Ba bungi badi ne majitu mu mêku. (Efeso 5:21–6:4) Bakulu ne basadidi ba mudimu badi ne midimu ya kuenza mu tshisumbu. (1 Timote 3:1, 12, 13; Tito 1:5; Ebelu 13:7) Bena Kristo ba bungi badi bambuluisha bua kuasa Nzubu ya Bukalenge. Bamue badi ne diakalenga dia dikema dia kuikala bena budisuile mu umue wa ku nzubu ya Betele ya Société Watch Tower. Nansha nanku, bena mudimu bena Kristo bonso aba batu bayisha lumu luimpe. Kakuena muntu udi kayi uyisha to. Ku mudimu eu ke kudi bakuabu bamanyina ne: eu mmuena mudimu muena Kristo mulelela.

Ngikadilu wa muena mudimu muena Kristo

19, 20. Nngikadilu kayi udi bena mudimu bena Kristo ne bua kuikala nende?

¹⁹ Balombodi ba bungi ba mu Bukua-buena-Kristo batu basue bua babanemeke bikole, ne batu bangata mianzu bu mudi “reveran” (wa kunemeka) ne “mumpele.” Kadi, muena mudimu muena Kristo mmumanye ne: anu Yehowa nkayende ke udi muakanyine kanemu ka mushindu’eu. (1 Timote 2:9, 10) Muena mudimu muena Kristo nansha umue kêna ukeba kanemu kabandile ka mushindu’eu anyi kêna ukeba bua kupeta mianzu ya pa buayi to. (Matayo 23:8-12) Mmumanye ne: muaku di·a·ko·niʹa udi umvuija nangananga “mudimu.” Imue misangu mu Bible muaku wa pa muanda udi umvuangana nawu batu bawangata bua kuakula bua midimu ya ku nzubu bu mudi kuteka biakudia ku mesa. (Luka 4:39; 17:8; Yone 2:5) Nansha muaku eu wowu ne diumvuija dibandile bua mudimu wa bena Kristo, muntu udi di·aʹko·nos udi anu musadidi.

²⁰ Ke bualu kayi muena mudimu muena Kristo kêna ne bua kudimona ne mushinga wa bungi to. Bena mudimu bena Kristo balelela mbapika badipuekeshi, nansha aba badi ne midimu ya pa buayi mu tshisumbu. Yezu wakamba ne: ‘Wasua kulua munene munkatshi muenu neikale muena mudimu wenu; wasua kuikala pa mutu penu neikale mupika wenu.’ (Matayo 20:26, 27) Pavua Yezu uleja bayidi bende ngikadilu muakane uvuabu ne bua kuikala nende, wakabowesha mâyi ku makasa, wakenza mudimu wa mupika wa tshianana menemene. (Yone 13:1-15) Mmudimu kayipu wa budipuekeshi! Ke bualu kayi bena mudimu bena Kristo badi basadila Yehowa Nzambi ne Yezu Kristo ne budipuekeshi buonso. (2 Kolinto 6:4; 11:23) Badi baleja  bupuekele mu dikuatshilangana mudimu. Ne padibu bayisha lumu luimpe, badi bakuatshila bantu nabu mudimu ne muoyo wa kalolo.​—Lomo 1:14, 15; Efeso 3:1-7.

Tantamana mu mudimu webe

21. Mmasanka kayi akapeta Paulo bua muvuaye mutantamane mu mudimu wende?

²¹ Bua Paulo, kuikala muena mudimu kuvua kulomba ditantamana. Wakambila bena Kolosai ne: uvua mukenge bikole bua kumona mua kubayisha lumu luimpe. (Kolosai 1:24, 25) Bantu ba bungi bakitaba lumu luimpe ne bakalua bena mudimu bualu wakananukila. Bakaledibua bu bana ba Nzambi ne bana babu ne Yezu Kristo. Badi ne ditekemena dia kulua bantu ba mubidi wa nyuma ne dia kuikala ne Yezu mu diulu. Ndifutu kayipu bunene didiye nadi bua muvuaye mutantamane!

22, 23. (a) Bua tshinyi bena mudimu bena Kristo lelu badi ne bua kutantamana? (b) Mbipeta kayi bilenga bidi bifumina ku ditantamana dia bena Kristo?

²² Ditantamana didi ne mushinga wa bungi lelu’eu bua bantu badi bena mudimu balelela ba Nzambi. Ba bungi badi baluangana matuku onso ne masama anyi ne ntatu ya bukulakaje. Baledi badi benza mudimu mukole bua kukolesha bana babu, bavule bikale benza mudimu eu diboko dia nkaya. Bana badi bakandamena bikadilu bibi mu tulasa mudibu baya ne dikima dionso. Bena Kristo ba bungi badi batata bikole bua kupeta makuta. Ne ba bungi badi bakenga anyi bapeta ntatu bua mutudi matuku a “malu makole”! (2 Timote 3:1) Bushuwa, basadidi ba Yehowa batue ku miliyo isambombo lelu badi mua kuamba diatshimue ne mupostolo Paulo ne: “Mu malu onso tudi tudimanyisha bu bena mudimu ba Nzambi, mu ditantamana dia bungi.” (2 Kolinto 6:4) Bena mudimu bena Kristo kabena balekela mudimu wabu to. Bushuwa bidi bikengela kubela kalumbandi bua ditantamana diabu.

²³ Kabidi, anu bu muvuabi bua Paulo, ditantamana didi dipatula bipeta bilenga. Patudi tutantamana, tudi tulama malanda etu mashême ne Yehowa ne tudi tusankisha mutshima wende. (Nsumuinu 27:11) Tudi tukolesha ditabuja dietu ne tuvuija bantu bayidi, tudiundisha buena-muntu bua bena Kristo. (1 Timote 4:16) Yehowa mmuambuluishe basadidi bende ne mmubeneshe mudimu wabu mu matuku a ku nshikidilu aa. Ke tshidi tshiambuluishe bua kusangisha ba ndekelu ba ku bantu 144 000, ne bakuabu miliyo mivule mbatekemene bikole bua kuikala ne muoyo wa kashidi mu mparadizu pa buloba. (Luka 23:43; Buakabuluibua 14:1) Kakuyi mpata, mudimu wa bena Kristo udi wenzeka bua luse lua Yehowa. (2 Kolinto 4:1) Tuetu bonso tuwangate ne mushinga wa bungi ne tuikale ne dianyisha bualu bipeta biawu bidi bishala kashidi.​—1 Yone 2:17.

[Mêyi adi kuinshi]

Udi mua kumvuija anyi?

• Mmudimu kayi uvua bena Kristo bonso ba mu bidimu lukama bia kumpala bakumbaja?

• Ndîba kayi didibu bateka muena Kristo muena mudimu ne nnganyi udi umuteka?

• Nngikadilu kayi udi muena mudimu muena Kristo ne bua kuikala nende?

• Bua tshinyi muena mudimu muena Kristo udi ne bua kutantamena ntatu?

[Nkonko ya dilonga]

[Bimfuanyi mu mabeji 16, 17]

Bakalongesha Timote Dîyi dia Nzambi kubangila ku buana. Bakamuteka muena mudimu pakatambulaye

[Tshimfuanyi mu dibeji 18]

Batismo udi muntu utambula udi uleja ne: mmudilambule kudi Nzambi ne mbamuteke muena mudimu

[Tshimfuanyi mu dibeji 20]

Bena mudimu bena Kristo mbasue kusadila bakuabu