Mushindu uudi mua kupeta balunda

“KUIKALA NE MULUNDA UMUE MU MATUKU EBE ONSO A MUOYO NKUKUMBANE; BABIDI MBAPITE BUNGI; BUA BASATU, ABU MBUALU BUKOLE.”​—Henry Brooks Adams.

MÊYI aa adi aleja ne: mbikole bua kupeta balunda balelela. Bantu badi bakeba bua kupeta balunda bualu badi badiumvua bikale nkayabu menemene batu bamba misangu mivule mêyi bu mudi: “Tshiena ne muntu wa kukuatshila yanyi idi mintonde,” “Tshiena ne wanyi undi mua kueyemena,” peshi “Mbua wanyi ke wanyi mulunda munene.”

Ki mbipepele bua kudia bulunda ne muntu ne kubulama mutantshi mule to. Pakelabu bantu kampanda nkonko mu tshisalu, biakaleja ne: “Mu États-Unis bantu bakulumpe 25 pa lukama kabena badiumvua bimpe bua ‘ditamba kudisombela nkayabu bu bana ba nshiya’ ne . . . mu France tshia bibidi tshia bantu badi badiumvua nkayabu menemene.” Mushindu udi mangumba a balume ne bakaji enda avula, dimanyishilangana malu ku biamu bia ordinatere ne bena dingumba dikuabu, ne mamanyisha bungi tshianana adi bantu badi bakeba balunda bafundisha mu bikandakanda, bionso ebi bidi bileja ne: bantu badi ne dijinga dia kudia bulunda ne bantu nabu.

Munganga David Weeks, utu wondopa masama a mpala udi wamba mudi didisombela dia muntu nkayende bu muana wa nshiya kadiyi anu disamisha lungenyi lua muntu awu to, kadi kabidi dimusamisha mene nansha ne mubidi mujima. “Ndi ne babedi bapite bungi badi ne buôwa bua disama ne badi ne tunyinganyinga tukole batudi mua kuamba ne: mbibenzekele nanku bualu mbadisombele nkayabu. Padi muntu utamba kudiumvua buana bua nshiya, udi upeta kanyinganyinga kakole, bualu malu abidi aa adi enda tshiapamue.”

Padi dibaka difua anyi dîku diabuluka, bidi bifikisha bantu bapite bungi ku didisombela nkayabu. Nkonko yakelabu bantu mu Grande-Bretagne yakaleja ne: ku ntuadijilu kua bidimu bia 2000, bantu ba mu ditunga adi bu 30 pa lukama bavua ne bua kudishadila muntu ne muntu mu nzubu nkayende.

Bible uvua mumanyishe ne: lungenyi lua dikeba anu masanka abu nkayabu luvua ne bua kuikala kudi bantu ba bungi mu ‘matuku a ku nshikidilu.’  (2 Timote 3:1-5) Mbimueneke ne: bantu ba bungi meji abu onso mmatuma anu ku bintu bu mudi nzubu anyi mashinyi, peshi kabidi ku midimu yabu pamutu pa didia bulunda ne bantu bakuabu. Mufundi eu (Anthony Storr) udi wamba ne: “Bantu, pamutu pa kuikalabu ne meji kudi bakaji babu ne bana ba munda muabu, meji abu onso adi anu ku midimu yabu.”

BALUNDA BADI NE MUSHINGA MUPITE

Mushindu udi malunda ebe ke mushindu wikala nsombelu webe. Misangu mivule bantu badi badisombele anu nkayabu kabatu ne disanka to, bualu kabena ne mulunda wa kudia nende pamue peshi udibu mua kukuatshila abu malu. Mêyi akamba Yezu Kristo aa mmalelela: “Disanka dia kupa ndipite dia kupeta.” (Bienzedi 20:35, MMM) Mufundi wa tusala kampanda muena Angleterre (George Byron) wakambulula pende mêyi malelela aa e kufunda ne: “Muntu yonso udi upeta disanka, udi ne bua kudiabanyangana ne bakuabu.”

Kadi mulunda nnganyi? Mukanda kampanda udi umvuija mulunda ne: “mmuntu udi mulamate mukuabu bualu mmumusue bikole anyi bualu udi umuangata ne mushinga.” Mulunda udi mua kukuambuluisha bua kuludika ngenyi yebe ku malu malenga. Udi mua kukukolesha ku muoyo, kabidi kukupesha ngenyi idi yambuluisha mu bikondo bia ntatu. Udi nansha mene mua kubungama pende paudi wewe mubungame. Mukalenge Solomo wakamba ne: ‘Mulunda utu wananga mu bikondo bionso, mmuanetu utu waleja bulela mu tshikondo tshia dikenga.’ (Nsumuinu 17:17) Nansha mutu bintu misangu mivule bijimija mushinga wabi padi matuku enda apita, bulunda bua bushuwa butu buobu buenda bukola ne bushemakana padi matuku avula.

Bible udi wambila bena Kristo bua ‘badiundishe’ dinanga diabu. (2 Kolinto 6:13) Kulamatangana ne bakuabu mbualu bua meji. Tudi tubala mu Muambi 11:1, 2 (MMM) ne: ‘Ela biakudia biebe pa mâyi, kunyima kua matuku neubisangane. Upeshe bantu muanda-mutekete nansha muanda-mukulu tshitupa tshia bintu biebe, bualu kuena mumanye dikenga didi mua kufika pa buloba.’ Mmunyi mudi dîyi edi mua kuambuluisha bulunda? Wewe mudie bulunda ne bantu ba bungi, bamue ba kudibu badi mua kukuambuluisha padi dikenga dikukuata.

Balunda balelela badi mua kukukuba mu mushindu mukuabu kabidi. Nsumuinu 27:6 udi wamba ne: ‘Padi mulunda mukutape mputa udi mua kumueyemena.’ Nansha mudi bantu ba bungi mua kuamba mêyi a kukutumbisha nawu, anu balunda balelela ke badi mua kukuangata ne mushinga, kukuleja tshilema kampanda tshinene pashishe kukupesha ne dinanga mibelu milenga.​—Nsumuinu 28:23.

Balunda ba pa muoyo badi bu bintu bia mushinga mukole bidi mua kukuenzela bimpe. Bienzedi nshapita wa 10 udi wakula bua bualu buakafikila Kônelio, munene wa basalayi ba bena Lomo, uvua muanjelu mumanyishe ne: Nzambi uvua muteleje masambila ende. Bu muvuaye mutekemene dilua dia mupostolo Petelo, Kônelio ‘wakasangisha bana babu ne balunda bende ba pa muoyo.’ Balunda ba pa muoyo ba Kônelio aba bavua munkatshi mua Bampangano ba kumpala bavua kabayi batengula bakitaba lumu luimpe, kuedibua manyi a nyuma muimpe, ke  kupetabu ditekemena dia kukokesha pamue ne Kristo mu Bukalenge bua Nzambi. Ndisanka kayipu bua balunda ba pa muoyo ba Kônelio aba!​—Bienzedi 10:24, 44, MMM.

Kadi, mmunyi muwafika ku didia bulunda ne bantu? Bible (mukanda udi ne malu a bungi adi atangila bulunda) udi ufila mibelu miakanyine bua kuandamuna lukonko elu. (Tangila kazubu kadi kuinshi eku.)

MUABA UUDI MUA KUPETELA BALUNDA BALELELA

Tshisumbu tshia bena Kristo ke muaba mutambe bulenga wa kupetela balunda ba bushuwa. Tshia kumpala, udi mua kupeta mushindu wa kudia bulunda ne Yehowa (Mufuki webe ne Tatu webe wa mu diulu), kabidi kudia bulunda ne Yezu Kristo, Musungidi webe. Yezu udi ukulomba bua wewe kulua mulunda wende. Wakamba ne: ‘Kakuena muntu udi ne dinanga didi ditambe edi, dia muntu udi ufuila balunda bende.’ (Yone 15:13, 15) Paudi udia bulunda ne Yehowa ne Yezu Kristo, ‘nebakuakidile mu miaba ya kushikama ya tshiendelele.’ Bushuwa, kudia bulunda ne Yehowa ne Yezu kudi kumvuija kupeta muoyo wa kashidi.​—Luka 16:9, MML; Yone 17:3.

Mmunyi muudi mua kudia nabu bulunda bua menemene? Malu malomba bua kuikala balunda ba Yehowa ne kupeta mushindu wa kubuela mu ntenta wa Yehowa mbaafunde mu Musambu wa 15. Keba musambu eu mu Bible, ne ubale mvese yawu yonso itanu. Yezu Kristo wakamba kabidi ne: ‘Nenuikale balunda banyi, binuenza bu mundi nnuambila.’​—Yone 15:14.

 Bushuwa, paudi ulonga ne utumikila ne muoyo mujima malu adi mu Mukanda wa Nzambi, udi uleja ne: udi musue kulua mulunda wa Yehowa ne Yezu. Bua kulua mulunda wabu, ikala kabidi ne tshibidilu tshia kubuela mu bisangilu bia Bantemu ba Yehowa. Mu bisangilu ebi ke muwapetela dimanya dia Yehowa Nzambi. Wewe muenze muebe muonso bua kulamata ne kuteleja Yehowa, bulunda buebe nende kabidi ne Muanende nebushemakane.

Mu bisangilu ebi udi kabidi mua kumanyangana ne bantu badi banange Yehowa ne badi baleja mamuma a nyuma bu mudi: dinanga, disanka, ditalala, muoyo-mule, bulenga, buimpe, ditabuja, bupole-malu ne didikanda mu nsombelu wabu. (Galatia 5:22, 23) Wewe muikale ujinga menemene bua kudia bulunda ne bantu ne kulekela didisombela nkayebe bu muana wa nshiya, buela mu bisangilu bia Bantemu ba Yehowa lumingu luonso. Kuenza nanku kudi kukuambuluisha bua wewe kukolesha bulunda bua kashidi ne bantu ba Nzambi.

BALUNDA BUA KASHIDI

Bulunda bulelela ndipa dia dikema dia kudi Yehowa Nzambi. Budi bufumina ku bumuntu buende ne ku ngikadilu yende. Bua dinanga ne kalolo bidiye nabi, Yehowa Nzambi mmuwuje buloba tente ne bantu baudi mua kudia nabu bulunda. Ikala udisangisha ne bena Kristo nebe. Ubakankamije pebe. Ikala upatuka nabu mu buambi. Sambila nabu pamue ne ikala usambila misangu yonso bua bualu buabu; neufike ku didikija Yehowa ne Muanende Yezu Kristo.

Bulunda ntshintu tshidi muntu yonso mua kufila anyi kupeta. Mu matuku adi kumpala eku, newikale ne mushindu wa kupeta balunda ba bungi. Udi mua kudia bulunda ne miliyo ya bantu badi ne muoyo mpindieu, kudia kabidi bulunda ne ba kale bakadi bafue, badi mpindieu bindile bua babike ku lufu pikala ‘lufu kaluyiku kabidi.’ (Buakabuluibua 21:4; Yone 5:28, 29) Udienzeje bikole mpindieu bua kuikala muena bulunda, ne udie bulunda ne bantu badi banange Yehowa. Teleja Dîyi dia Nzambi bua bulunda buebe ne Yehowa Nzambi ne Yezu Kristo kutungunukabu. Nanku, bua kashidi ne tshiendelele, kuakuikala kabidi nkayebe bu muana wa nshiya nansha.

[Kazubu/​Bimfuanyi mu mabeji 22, 23]

BIDIA BISAMBOMBO BUA BULUNDA BUA KASHIDI

1. IKALA MULUNDA. Bakabikila Abalahama ne: ‘mmulunda wa Nzambi’ bua ditabuja diende dikole divuaye nadi. (Yakobo 2:23) Kadi kabivua anu bua ditabuja nkayadi to. Bible udi wamba ne: Abalahama wakaleja muvuaye munange Nzambi bikole. (2 Kulondolola 20:7) Wakaleja Yehowa wende mushindu uvuaye umona amue malu. (Genese 18:20-33) Bushuwa, bidi bikengela kuenza amue malu bua kuleja ne: udi mulunda. Yezu wakamba ne: ‘Nupe bantu bintu, nunku nebanupe bintu kabidi.’ (Luka 6:38) Bulunda butu mua kutuadija anu ne mêyi a dikankamijangana nawu peshi diambuluishangana. Ralph Waldo Emerson (mufundi muena Amerike) wakamba ne: “Mushindu umu’epele wa kupeta mulunda, ngwa kulua mulunda.”

2. BITU BIANGATA MATUKU BUA BULUNDA KUSHEMAKANABU. Bantu ba bungi mbasue kuikala ne balunda. Kadi, midimu mivule idibu nayi idi ibangata dîba dionso didibu mua kulama bua kushemeja bulunda ne bantu nabu. Lomo 12:15, 16 udi utuambila bua kuabanyangana ne bakuetu diakalenga ne masanka, dibungama ne makenga. Tudi tubalamu ne: ‘Nusanke ne badi basanka; nudile ne badi badila. Nuikalangane ne meji amue, muntu ne muntu.’ Nansha muvua Yezu Kristo muikale ne malu mavule a kuenza, uvua wanji kuangata dîba dia kusomba ne balunda bende. (Mâko 6:31-34) Wamanya, bulunda butu bu bilongo; bitu bikengela kuikala ne dîba dia bungi bua kubiela mâyi ne kubidiisha.

3. IKALA UTELEJA PADI BAKUEBE BAKULA. Muntu utu uteleja bakuabu bimpe utu upeta balunda kakuyi lutatu. Yakoba udi wamba ne: “Muntu yonso ikale ne lukasa ku diteleja, ne lujoko ku diakula.” (Yakobo 1:19, MMM) Paudi uyikila ne bakuebe, umvua bidibu bumvua. Ubambile bakule bua malu adi abatangila. Ubanemeke. (Lomo 12:10) Ke buobu kuanyishabu bua kuikala nebe bulunda. Kadi pawikala wewe katshia wangata anu tshialu peshi ujinga bua bakumone amu wewe, dikuabu kuakupeta muntu wananga kukuteleja peshi wajinga bua kuditatshisha bua ebe malu to.

4. IKALA UFUILANGANA LUSE. Yezu wakambila Petelo bua kufuilanganaye luse misangu ‘makumi muanda-mutekete ne muanda-mutekete.’ (Matayo 18:21, 22, NW) Mulunda mulelela katu ulondolola tulemalema to. Tshilejilu: Bamue bantu kabatu basue kudia bimuma bia nkalafu bualu bitu ne tutete tutete. Pabi, bua batu babinange, tutete etu katutu nansha tubambila bualu to. Bia muomumue, batu bananga balunda balelela bua ngikadilu yabu milenga; tulemalema tuabu kabatu batuangata ne mushinga to. Paulo udi utuambila ne: ‘Nulejangane lutulu, nulekelelangane mibi yenu.’ (Kolosai 3:13) Muntu udi ulonga bua kufuila binende luse, bulunda ne balunda bende budi butungunuka.

5. UNEMEKE MALU A BAKUABU. Muntu yonso utu musue bua kuikalaye ne amue malu a nkayende. Ke tshidi balunda bebe basue pabu. Nsumuinu 25:17 udi utudimuija ne: ‘Dikasa diebe didiate ku nzubu wa muena mutumba nebe anu misangu mibale, bua bualu buebe kabumutondeshi ne bua yeye kikadi nebe lukuna.’ Nanku, mbimpe kuikala ne meji bua bungi bua misangu iudi uya kua balunda bebe ne mutantshi uudi ushalaku. Lekela kujinga bua mulunda akulamate amu wewe, bidi mua kukebesha mutshiawudi. Ikale ne meji paudi usua kuleja biudi wewe musue anyi mmuenenu webe. Dienza malu nunku nedilengeje bulunda.

6. IKALA MUENA KALOLO. Kalolo kadi kashemejija bulunda. Mupostolo Paulo udi utuambila bua ‘tudilongolole bua kupangana bintu.’ (1 Timote 6:18) Tshilejilu, kuambila bakuabu mêyi adi abakolesha ku muoyo. (Nsumuinu 11:25) Wikale wela bakuebe kalumbandi ne ubambila mêyi adi abapesha bukole. Paudi uditatshisha bua bimpe bia bakuabu, badi bakulamata. Ela meji bua tshiudi mua kubenzela pamutu pa kushala muimanyine anu pa malu adibu buobu mua kukuenzela.