Bamanyishi ba Bukalenge badi balonda

Yehowa udi upesha bantu bende muaba wa kuikishila

MUENA luendu udi mupungile udi mua kusanka bikole yeye mupete muaba wa ditalaji udiye mua kuanji kuikishila mu njila wa pa mukuna. Mu ditunga dia Népal, miaba ya kuikishila ya nunku badi bayibikila ne: chautara. Muaba wa nunku utu nangananga muinshi mua mutshi mulenga wa banyan. Muntu udi ulongoluela bakuende chautara anyi muaba wa kuikishila mmuntu wa muoyo mulenga. Kadi bantu ba bungi batu benza malu a nunku batu bashala kabayi bamanyike.

Malu a mu ditunga dia Népal adi aleja mushindu udi Yehowa Nzambi muikale Mpokolo wa disanka ne wa bukole bua mu nyuma bua “bena luendu” ba bungi bakadi bapungile mu ndongoluelu wa malu eu.​—Musambu 23:2.

• Tshilejilu, Lil Kumari mmamu udi musombele mu tshimenga tshilengele tshia Pokhara, mutubu bamuena bilenga nsongo ya Mikuna ya Himalaya itu mibuikila kudi neje. Lil Kumari uvua ukeba mua kuambuluisha dîku diende kadi e kumonaye ne: kakuvua bua nsongo buvuaye mua kutekemena to. Pakalua Ntemu wa Yehowa kampanda kumutangila, malu malengele adi Bible ulaya akamufikisha ku diambila diakamue Ntemu awu bua balonge Bible.

Kadi nansha muvuaye wanyisha dilonga, kabivua bipepele bua kutungunuka to bualu dîku diende divua dimuluisha bikole. Kadi kakalekela nansha. Wakatuadija kubuela mu bisangilu bia Bantemu pa tshibidilu ne kutumikila bivuaye ulonga, nangananga pa bidi bitangila dikokela didi bakaji ne bua kuikala nadi kudi ba bayabu. Biakafikisha mamuende ne bayende ku dimona se: dilonga diende dia Bible divua dikuatshisha dîku dijima.

Bayende ne bamue balela babu badi mpindieu balonga Dîyi dia Nzambi. Lil Kumari ne balela bende 15 bakabuela mu mpuilu udi muenzeke matuku adi panshi aa ku Pokhara. Udi wamba ne: “Ku nzubu kuanyi nkulue muaba wa ditalala bualu dîku dietu didi mpindieu mu buobumue mu ntendelelu mulelela, ne ndi mpindieu ne ditalala dilelela dia mu mutshima.”

• Nansha mudi mikenji ya mu ditunga dia Népal ikandika kansungasunga, bantu batshidi amu naku. Ke bualu kayi bantu ba bungi badi basanka padibu bumvua mudi Bible wamba ne: bantu bonso badi diatshimue, ne ki mbimpe kuikala ne kansungasunga to. Kumanya ne: ‘Nzambi kêna ne kansungansunga’ kuakashintulula bikole nsombelu wa mamu Surya Maya ne dîku diende.​—Bienzedi 10:34.

Surya Maya uvua unyingalala bikole bua kansungasunga ne bua bilele ne bibidilu bikuabu. Wakalomba nzambi yende ya mpingu munkatshi mua bidimu ne bidimu bua kumuambuluishayi (bualu uvua muntu mukaji uvua udifila bikole mu ditendelela). Kadi kakapeta diandamuna nansha dimue to. Dimue edi pavuaye udila ukeba diambuluisha, muikuluende wa bakaji wa bidimu bisambombo (diende Babita), wakalua e kumukonka ne: “Bua tshinyi udi udidila mpingu idi kayiyi ne tshidiyi mua kuenza bua kukuambuluisha eyi?”

Pine apu mamuende wa Babita uvua ulonga Bible ne mamu mukuabu Ntemu wa Yehowa. Babita wakambila kakuende ne musangelu wonso bua kuluaye kubuela mu tshisangilu tshia Bantemu. Pakabuela mamu Surya Maya mu tshisangilu atshi, wakakema pakamonaye bantu ba nsombelu mishilangane bayikilangana ne disanka kakuyi bualu. Wakalomba diakamue bua kutuadija kulonga Bible. Nansha muakaluabu kumujila kudi bena mutumba nende bua dilonga edi, kabiakamutonda to; nansha mene dimanya diende dikese dia mukanda kadiakamupangisha bua kukolaye mu nyuma to.

Kukadi kupite bidimu muanda-mukulu, ne bena mu dîku diende basambombo bakadi mpindieu Bantemu ba Yehowa (kubadilamu ne bayende ne bana bende basatu ba balume). Surya Maya udi mpindieu mumanyishi wa lumu luimpe wa ku dîba ne ku dîba (mpanda-njila wa pa tshibidilu), wambuluisha bantu nende ne disanka bua kutudilabu majitu abu adi manême bikole mu muaba mulelela wa kuikishila udi anu Yehowa nkayende mua kufila.