Ambuluishayi bakuabu bua bende biakanangane ne Yehowa

‘Katuena tulekela [kulomba] Nzambi bua bualu buenu, ne kulomba bua nuenu nuende biakanangane ne [Yehowa] ku dimusankisha dionso, ne bua nuenu nukuame mamuma mu mudimu wonso muimpe.’​—KOLOSAI 1:9, 10.

1, 2. Ntshinganyi menemene tshidi mua kutupesha disanka?

 “TUDI basombele mu dikadika ku madimi. Bu mutudi ne bintu bikese, tudi ne dîba dia bungi dia kuyisha bantu lumu luimpe. Tudi bapete mushindu wa kuambuluisha bantu bavule bua kudilambulabu kudi Yehowa.” Aa mmêyi a mulume mukuabu ne mukajende badi benza mudimu wa ku dîba ne ku dîba mu ditunga dia Afrique du Sud.

² Kuenaku umona ne: kuambuluisha bakuabu kudi kufila disanka anyi? Bamue bantu batu bapeta disanka bualu batu pa tshibidilu bambuluisha babedi, bakengi ne aba badi badisombele. Bena Kristo balelela mbajadike ne: kupetesha bakuabu dimanya dia Yehowa Nzambi ne Yezu Kristo ke diambuluisha ditambe bunene didibu mua kubapa. Anu diambuluisha edi ke didi mua kufikisha bakuabu bua kuitaba tshia-bupikudi tshivua Yezu mufile, kubambuluisha bua kukolesha bulunda buabu ne Nzambi, pashishe bua buobu kukumbanyina muoyo wa tshiendelele.​—Bienzedi 3:19-21; 13:48.

3. Ndiambuluisha dia mushindu kayi ditudi katuyi mua kulengulula?

³ Kadi tudi mua kuambuluisha aba bakadi basadila Nzambi, bawetu bakadi balonda ‘Njila’ anyi? (Bienzedi 19:9) Kakuyi mpata, utu utamba kubajingila disanka, kadi pamu’apa kuena mua kuikala mumanye tshia kuenza bua kubenzela malu a bungi anyi kutungunuka ne kubambuluisha to. Bumue, nsombelu webe udi mua kumueneka bu udi kayi ukupesha mushindu wa kubambuluisha, ukupangisha ne disanka diuvua nansha mua kupeta. (Bienzedi 20:35) Bua bidi bitangila nseke yonso ibidi eyi, malu adi mu mukanda wa Kolosai adi mua kutuambuluisha.

4. (a) Mmalu kayi avuaku pavua Paulo ufundila bena Kolosai? (b) Mmalu kayi avua Epafa muenze?

⁴ Pavua mupostolo Paulo mufundile bena Kristo ba mu Kolosai, uvua ku nzubu kuende (mu Lomo) kadi muikale mulama kudi basalayi. Nansha nanku uvua ne mushindu wa kuakidila bantu bavua balua kumumona. Anu bu muudi mua kumona, Paulo wakayisha Bukalenge bua Nzambi nansha muvuaye ne budikadidi anu bukese. (Bienzedi 28:16-31) Bena Kristo nende bavua baya kumumona, pamu’apa bamue bavua mene babalama pamue nende kudi basalayi abu. (Kolosai 1:7, 8; 4:10) Umue wa kudibu uvua Epafa muambi wa lumu luimpe wa lukunukunu, wa mu tshimenga tshia Kolosai mu Fugia, mu mpata wa ku Est kua Efeso mu Asia Mukese (lelu Turquie). Epafa uvua muambuluishe bua kuasa tshisumbu tshia mu Kolosai, ne uvua mukuate mudimu mukole bua bisumbu bivua pabuipi ne Laodikiya ne Hielapoli. (Kolosai 4:12, 13) Kadi bua tshinyi Epafa wakenza luendu bua kuya kumona Paulo mu Lomo, ne ntshinganyi tshitudi mua kulongela ku tshiakumvua Paulo?

Diambuluisha dikumbane bua bena Kolosai

5. Bua tshinyi Paulo wakafunda malu akafundilaye bena Kolosai?

⁵ Epafa wakenza luendu lua ntatu mikole mutangile ku Lomo bua kuambila Paulo malu avua mu tshisumbu tshia mu Kolosai. Wakamuambila bua ditabuja ne dinanga diabu, kabidi ne bua mudimu wa kuamba kua lumu luimpe uvua bena Kristo aba benza. (Kolosai 1:4-8) Uvua kabidi ne bua kuikala mumuleje kanyinganyinga kende bua malu mabi avua amba kujiwula bena Kolosai mu nyuma. Bua malu aa, Paulo wakafunda mukanda ne diambuluisha dia nyuma wa Nzambi bua kuimanyika amue malu avua balongeshi ba dishima benda bamuangalaja. Paulo wakashindamena nangananga pa mudimu  munene udi Yezu Kristo nawu. * Diende dibambuluisha divua anu kubambila malu manene a mu Bible anyi? Ntshinyi tshikuabu tshivuaye mua kuenza bua kuambuluisha bena Kolosai, ne mmalongesha kayi atudi mua kupeta pa bidi bitangila diambuluisha bakuabu?

6. Mbualu kayi buvua Paulo mutambe kuakula mu mukanda wende wakafundilaye bena Kolosai?

⁶ Ku ntuadijilu kua mukanda wende, Paulo wakumvuija diambuluisha ditudi pamu’apa mua kulengulula. Bu muvua Paulo ne Epafa bikale kule ne Kolosai, awu uvua mushindu muimpe wa kuambuluisha bantu bavua kule. Paulo wakamba ne: ‘Tudi tusakidila Nzambi, Tatu wa Mukalenge wetu Yezu Kristo, tudi tunulombela Nzambi misangu yonso.’ Bulelela, aa avua masambila masunguluke avuaye wenza bua bena Kristo ba mu Kolosai. Paulo wakamba kabidi ne: ‘Bua muanda eu, tuetu kabidi, katshia ku dituku dituakumvua lumu elu, katuena tulekela [kulomba] Nzambi bua bualu buenu, ne kumulomba bua nuenu nuujibue tente ne kumanya kua disua diende mu meji onso ne dijingulula bia mu nyuma.’​—Kolosai 1:3, 9.

7, 8. Tutu tutamba kuakula bua bualu kayi patutu tusambila pa nkayetu ne mu tshisumbu?

⁷ Tudi bamanye ne: Yehowa utu ‘umvua milombo,’ ke bua tshinyi tudi ne bua kuikala bajadike ne: matshi ende adi ateleja ne lukasa masambila atudi tuenza biumvuangane ne disua diende. (Musambu 65:2; 86:6; Nsumuinu 15:8, 29; 1 Yone 5:14) Kadi mmalu kayi atutu tutela mu masambila etu dîba ditutu tusambila bua bakuetu?

⁸ Misangu ya bungi tutu mua kuvuluka ‘bana betu ba mu Kristo badi pa buloba’ ne kusambila bua bualu buabu. (1 Petelo 5:9) Peshi tudi mua kusambila Yehowa bua bena Kristo netu ne bantu bakuabu badi muaba udi tshipupu tshienzeke anyi dikenga kampanda. Mu bidimu lukama bia kumpala, pakumvua bayidi ba miaba mishilangane bua nzala ivua mu Yudaya, tudi tuela meji ne: bavua ne bua kuikala benze masambila bungi tshianana bua bana babu kumpala mene kua kubatumina bintu bia kubambuluisha nabi. (Bienzedi 11:27-30) Matuku etu aa, misangu mivule tutu tumvua masambila adibu benza bua bana betu bonso ba buloba bujima anyi bua tshisumbu tshinene tshia bana betu, mu bisangilu bia tshisumbu mudi bantu ba bungi ne bua kuumvua ne pashishe kuamba ku ndekelu ne: “Amen.”​—1 Kolinto 14:16.

Ikala wamba malu masunguluke paudi usambila

9, 10. (a) Mbilejilu kayi bidi bileja ne: mbimpe kusambila bua bantu basunguluke? (b) Mmunyi muakenzelabu Paulo disambila disunguluke?

⁹ Bible udi utupesha bilejilu bia masambila matambe kusunguluka avua muntu pa nkayende wenza bua bantu bakuabu. Anji tangila mêyi akamba Yezu mu Luka 22:31, 32 pavuaye ne bapostolo bende ba lulamatu 11. Buonso buabu bavua bajinga bua Nzambi abambuluishe mu bikondo bia ntatu bivua kumpala, ke Yezu kusambila bua bualu buabu. (Yone 17:9-14) Nansha nanku, Yezu wakenza disambila kampanda anu bua Petelo nkayende. Mona bilejilu bikuabu: Elisha wakenzela musadidi wende disambila bua Nzambi amuambuluishe. (2 Bakelenge 6:15-17) Mupostolo Yone wakasambila bua Gayo ikale anu ne makanda a mubidi ne a mu nyuma. (3 Yone 1, 2) Kudi kabidi masambila makuabu avuabu benzela bisumbu bia bantu basunguluke.​—Yobo 42:7, 8; Luka 6:28; Bienzedi 7:60; 1 Timote 2:1, 2.

¹⁰ Mikanda ya Paulo mmitambe kushindamena pa tshilumbu tshia masambila adi masunguluke bikole. Paulo wakabalomba bua basambile bua bualu buende anyi buende yeye ne bua binende. Kolosai 4:2, 3 udi wamba ne: ‘Nunanukile mu ditendelela dienu, nutabalamu ne disakidila; nutulombele kabidi mu tshikondo tshiotshimue bua Nzambi atunzuluile tshiibi tshia dîyi bua tuetu kuamba bualu busokoka bua Kristo, buakunsuikilabu mu nkanu kabidi.’ Bala kabidi bilejilu bikuabu bidi mu Lomo 15:30; 1 Tesalonike 5:25; 2 Tesalonike 3:1; Ebelu 13:18.

11. Pavua Epafa mu Lomo, uvua usambila bua nganyi?

¹¹ Ke muvuabi kabidi bua mulunda wa Paulo uvua mu Lomo. Paulo wakamba ne: ‘Epafa, udi umue wenu udi unutumina muoyo, udi utshinta bikole misangu yonso bua bualu buenu mu mitendelelu yende.’ (Kolosai 4:12) Muaku udibu bakudimune ne: “utshinta bikole” udi mua kumvuija “kusumpakana” muvuabu basumpakana kudi bibidiji ba mubidi mu manaya a kale. Epafa uvuaku usambila ne muoyo  mujima anu bua bena Kristo nende bonso ba buloba bujima anyi peshi uvua mene usambila bua batendeledi balelela bavua mu Asia Mukese muonso? Paulo wakaleja ne: Epafa uvua usambila anu bua bena Kristo ba mu Kolosai. Epafa uvua mumanye malu abu. Katuena bamanye mêna abu bonso anyi ntatu ivuabu nayi to, kadi tudi mua kuteta kutela imue ya kudiyi. Pamu’apa nsonga Lino uvua uluangana bua kubenga kudibuejakaja mu malu a nkindi ivua mitangalake bikole tshikondo atshi, ne Lufo uvua mua kuikala dijinga ne bukole bua kumona mua kuepuka bilele bia kale bia mu Buena-Yuda. Bu muvua bayende wa Pêsi kayi muena Kristo, Pêsi kavuaku dijinga ne ditantamana ne meji bua kukoleshaye bimpe bana bende mu Mukalenge anyi? Ne Asunkulito uvua yeye ne disama dia lufu, kavuaku dijinga ne busambi bua bungi anyi? Bushuwa, Epafa uvua mumanye bawetu ba mu tshisumbu tshia kuabu atshi, ne wakabalombela Nzambi ne muoyo mujima bualu yeye ne Paulo bavua basue bua batshinyi ba Nzambi aba bende mudi Yehowa musue.

12. Bua tshinyi tudi mua kuamba malu matambe kusunguluka mu masambila a pa nkayetu?

¹² Udi mumone tshilejilu tshia tuetu kulonda bituajinga kuambuluisha bakuabu anyi? Anu mutukadi bamone, masambila menza pa bantu mu bisangilu bia tshisumbu atu misangu mivule bua malu a bungi, bualu mu bisangilu mutu bantu ba mishindu ne mishindu. Kadi masambila atudi tuenza pa nkayetu anyi mu dîku adi mua kuikala wowu ne malu masunguluke. Nansha mutudi imue misangu mua kulomba Nzambi bua alombole ne abeneshe batangidi bena ngendu anyi balami ba mu nyuma bonso, katuenaku pamu’apa mua kulomba malu masunguluke mu masambila etu anyi? Tshilejilu, bua tshinyi patudi tusambila katuenaku mua kutela dîna dia mutangidi wa tshijengu udi ukumbula tshisumbu tshietu anyi dia mulombodi wa dilonga dia mukanda? Mêyi a mu Filipoi 2:25-28 ne mu 1 Timote 5:23 adi aleja mushindu uvua Paulo ujingila Timote ne Epafodito makanda a mubidi. Tuetu petu tudi mua kutela mêna a bawetu badi basama bua kuleja ne: tudi tujinga bua bumvue bimpe.

13. Mmalu a mushindu kayi adi makumbane bua tuetu kutela mu masambila a pa nkayetu?

¹³ Bushuwa, nansha mutudi ne bua kuepuka didibueja mu malu a bende, ki mbibi bua kuleja mu masambila etu ne: tudi tujingila bantu batudi bamanye ne bena mu dîku dietu disanka. (1 Timote 5:13; 1 Petelo 4:15) Badi mua kuikala bumbushe muanetu kampanda ku mudimu, ne pamu’apa katuena ne mushindu wa kumupetela mukuabu to. Kadi tudi mua kutela dîna diende mu masambila etu a pa nkayetu ne kushindamena pa lutatu luende. (Musambu 37:25; Nsumuinu 10:3) Tudiku bamanye muanetu wa bakaji mujike ukadi muntu mukole kadi kayi muanji kusedibua, amu bualu mmusue kusedibua ‘anu mu Mukalenge’ anyi? (1 Kolinto 7:39) Mu masambila a pa nkayebe, udi mua kulomba Yehowa bua amuambuluishe atungunuke ne lulamatu mu mudimu wende wa Nzambi. Tshilejilu tshikuabu, bakulu babidi badi mua kuikala bapeshe muanetu mukuabu uvua muenze tshilema mibelu. Mbimpe yonso wa kudibu ikale utela dîna dia muanetu eu mu masambila abu a pa nkayabu ku musangu ne ku musangu.

14. Mmunyi mudi dienza masambila masunguluke diumvuangana ne diambuluisha bakuabu?

¹⁴ Kudi mishindu ya bungi iudi mua kutela bantu baudi mumanye mu masambila ebe badi bikale dijinga ne diambuluisha, busambi, meji ne nyuma wa Nzambi anyi mamuma a nyuma eu. Bua mutantshi udi munutapulule anyi bua malu makuabu, udi mua kudimona kuyi ne mushindu wa kubambuluisha nansha ne tshintu to. Kadi nansha biobi bikale nanku, kupu muoyo bua kusambila bua bana benu ba balume ne ba bakaji. Udi mumanye ne: bu mudibu basue kuenda biakanangane ne Yehowa, badi mua kuikala dijinga ne diambuluisha bua kutungunukabu ne kuenda nanku bua kashidi. Masambila ebe mmushindu munene wa kubambuluisha.​—Musambu 18:2; 20:1, 2; 34:15; 46:1; 121:1-3.

 Keba bua kukolesha bakuabu

15. Bua tshinyi tudi ne bua kukonkonona tshitupa tshia ndekelu tshia mukanda wa Kolosai?

¹⁵ Bulelela, masambila a muoyo mujima, masunguluke ki mmushindu umuepele utudi mua kuambuluisha bakuabu nansha, nangananga bantu batudi batambe kunanga. Mukanda wa Kolosai udi utokesha bualu ebu bimpe. Bakonkononyi ba Bible ba bungi batu baleja ne: kunyima kua Paulo mumane kupesha bena Kolosai mibelu pa bidi bitangila malongesha ne malu makuabu, tshiakasakidilaye tshivua anu mioyo yakabelaye. (Kolosai 4:7-18) Kadi, tukadi bamone ne: mu tshitupa etshi tshia ndekelu tshia mukanda eu mudi mibelu ya mushinga, ne mudi malu a bungi a kulonga.

16, 17. Ntshinyi tshitudi mua kuamba bua bana betu badibu batele mu Kolosai 4:10, 11?

¹⁶ Paulo wakafunda ne: ‘Alistâko, muena lukanu nanyi udi unuela muoyo, ne Mâko, muanabu ne Bânaba (nuakamana kuangata mikenji ya bualu buende; bialuaye kunudi, numuitabuje) ne Yezu, udibu babikila ne: Yusto, badi ku luseke lua batengula; anu buobu nkayabu badi benzejanganyi nanyi ba mudimu bua bukalenge bua Nzambi, buobu mene bakuikala [diambuluisha didi dikolesha, NW] kundi.’​—Kolosai 4:10, 11.

¹⁷ Muaba eu Paulo wakatela mêna a bamue bana betu bavua bamanyike bimpe. Wakamba ne: bavua munkatshi mua batengula bena Yuda. Mu Lomo muvua bena Yuda batengula ba bungi, ne bamue bakavua bena Kristo. Kadi bavua Paulo mutele ngaba bavua bamuambuluishe. Pamu’apa kabavua bumvue bibatonde bua kusomba ne bena Kristo ba bisamba bia bende to. Buobu ne Paulo bavua ne bua kuikala bayishe bantu ba bisamba bia bende aba.​—Lomo 11:13; Galatia 1:16; 2:11-14.

18. Mmunyi muvua Paulo muele bamue bavua nende kalumbandi?

¹⁸ Tangila tshiakamba Paulo: “Buobu mene bakuikala diambuluisha didi dikolesha kundi.” Paulo wakatela muaku wa tshiena-Greke udi mu Bible anu musangu umue eu patupu. Bakudimunyi ba bungi badi baukudimuna ne: “busambi.” Kadi kudi muaku mukuabu wa tshiena-Greke (pa·ra·ka·le’o) utubu  batambe kukudimuna ne: “busambi.” Paulo wakangata muaku eu miaba mikuabu mu mukanda muine eu kadi ki mmu Kolosai 4:11 to.​—Matayo 5:4; Bienzedi 4:36; 9:31; 2 Kolinto 1:4; Kolosai 2:2; 4:8.

19, 20. (a) Tshiambilu tshiakatela Paulo pakakulaye bua bana betu bavua bamuambuluisha mu Lomo tshidi tshiumvuija tshinyi? (b) Mmu malu kayi muvua bana betu aba mua kuikala bambuluishe Paulo?

¹⁹ Bantu bavua Paulo mutele mêna abu bavua ne bua kuikala bamuenzele bikuabu bia bungi pa kumbusha dimusamba ne mêyi a mukana. Muaku wa mu tshiena-Greke udibu bakudimune ne: “diambuluisha didi dikolesha” mu Kolosai 4:11 (Traduction du monde nouveau) bavua baufunda imue misangu mu mikanda ya malu a tshianana bua kuakula bua buanga buvua butalaja muaba uvua usama. Bible mukuabu (New Life Version) udi wamba ne: “Ndiambuluisha kayipu didibu bampeshe!” Munga (Today’s English Version) udi wamba pende ne: “Bavua bangambuluishe bikole.” Mmalu kayi avua bena Kristo bavua basombe ne Paulo abu mua kuikala bamuenzele bua kumuambuluisha?

²⁰ Paulo uvua mua kuikala wakidila bantu bavua balua kumutangila, kadi kuvua malu a bungi avuaye kayi mua kuenza bu mudi kusumba bintu bivuaye nabi dijinga, tshilejilu: biakudia ne bilamba bia kuela mu tshikondo tshia mashika. Mmunyi muvuaye mua kupeta mivungu bua kulonga anyi mmunyi muvuaye mua kusumba bintu bia kufundila ta kufunda nabi? (2 Timote 4:13) Kuenaku umona ne: bana betu aba bavua bambuluisha Paulo mu majinga ende bu mudi kuya kumusumbila bintu peshi kumuyila miaba mikuabu anyi? Paulo uvua mua kuikala ujinga kumanya malu avua apitakana mu tshisumbu kampanda bua kushishaye kutshikolesha. Bu muvuaye mulama kudi basalayi, kavua mua kudienzela malu aa nansha, ke bua tshinyi bana betu aba bavua mua kuikala balua kutangila Paulo, baya ne mikenji ivuaye ubapesha, bamutuadila pende mikuabu. Bivua bimukolesha be!

21, 22. (a) Bua tshinyi mêyi adi mu Kolosai 4:11 adi ne bua kutusankisha? (b) Ngamue malu kayi atudi mua kuenza bua kulonda tshilejilu tshia bantu bavua ne Paulo?

²¹ Malu akafunda Paulo bua bidi bitangila “diambuluisha didi dikolesha” adi atuleja tshitudi mua kuenza bua kuambuluisha bakuabu. Badi mua kuikala benda biakanangane ne Yehowa bua bidi bitangila mikenji yende, dibuela mu bisangilu ne diyisha lumu luimpe. Tudi ne bua kubela kalumbadi bua malu aa. Kadi tudiku mua kuenza bia bungi, kuikala “diambuluisha  didi dikolesha” mu malu a bungi anu muvua bantu bakambuluisha Paulo anyi?

²² Biwikala mumanye muanetu wa bakaji udi mulonde bimpe mêyi a mu 1 Kolinto 7:37, kadi mpindieu kayi ne dîku didi nende pabuipi, kuenaku mua kumubueja mu malu anudi nuenza mu dîku dienu, tshilejilu, kumubikila bua kudia nende peshi bua yeye kusomba nenu pamue ne balunda peshi balela anyi? Bua tshinyi kubenga kumubikila bua kuyaye ne dîku dienu ku mpungilu anyi muaba mukuabu mu dikisha? Peshi udi mua kumulomba bua kuyaye kukufila mu tshisalu. Tudi mua kuamba kabidi malu a bungi a muomumue bua balume anyi bakaji ba mu lufuila, anyi pamu’apa bua bawetu badi kabayi kabidi mua kuendesha mashinyi. Nenusanke bua kuteleja malu adibu bamanye, ne bintu bu mudi: kusungula bimuma bimpe anyi kusunguila bana bilamba. (Lewitiki 19:32; Nsumuinu 16:31) Malu aa neenzeje bua se: bulunda buenu bukole. Kabakuelakana bua kunutuma ku farmasi anyi bua kubasumbila bintu bikuabu. Bana betu bavua ne Paulo mu Lomo bavua ne bua kuikala bamukoleshe bua mushindu uvuabu bamuambuluishe, anu mudi diebe diambuluisha mua kukoleshangana padi. Pa kale nansha mpindieu, dibenesha dikuabu ndia se: dinanga dietu didi dikola ne tudi tushale bapangadike bikole bua tuetu kusadila Yehowa pamue, ne lulamatu.

23. Nebikale bimpe bua yonso wa kutudi ikala ne dîba dia kuenza tshinyi?

²³ Yonso wa kutudi udi mua kuelangana meji bua malu atudi bambe mu tshiena-bualu etshi. Malu aa mbilejilu patupu, kadi adi mua kutuvuluija malu atudi mua kuenza bua kuikala menemene “diambuluisha didi dikolesha” kudi bana betu ba balume ne ba bakaji. Katuena basue kuamba ne: tshietu tshia kuenza tshidi anu kuambuluisha bakengi to. Atshi katshivua tshipatshila tshia bana betu badibu batele mu Kolosai 4:10, 11 to. Bavua ‘benzejanganyi ba mudimu bua bukalenge bua Nzambi.’ Atshi ke tshivua tshibapesha bukole. Bikalaku nanku buetu petu.

24. Mbua bualu kayi bunene butudi tusambidila ne tukebela bua kukolesha bakuabu?

²⁴ Tudi tutela mêna a bakuabu mu masambila etu a pa nkayetu ne tudienzeja bua kubakolesha bualu tudi tuitaba ne: bana betu ba balume ne ba bakaji mbasue ‘kuenda biakanangane ne [Yehowa] ku dimusankisha dionso.’ (Kolosai 1:10) Bualu ebu budi buenda pamue ne bualu bukuabu buakamba Paulo pakafundaye bua masambila avua Epafa wenza bua bena Kolosai, bua ‘bikale bakumbane ne batuishibue bikole bua malu onso adi Nzambi musue.’ (Kolosai 4:12, NW) Ntshinyi tshidi yonso wa kutudi mua kuenza bua kutuishibua mu malu onso adi Nzambi musue aa? Tumonayi.

[Mêyi adi kuinshi]

Udi mukuate anyi?

• Mmunyi mutudi mua kutamba kuambuluisha bakuabu mu masambila a pa nkayetu?

• Mmu mushindu kayi muvua bamue bena Kristo bikale ‘diambuluisha divua dikolesha’ Paulo mu malu a bungi?

• Mmu malu a mushindu kayi mutudi mua kuikala “diambuluisha didi dikolesha”?

• Ntshipatshila kayi tshitudi natshi patudi tusambila bua bana betu ba balume ne ba bakaji ne tukeba bua kubakolesha?

[Nkonko ya dilonga]

[Tshimfuanyi mu dibeji 18]

Kuenaku mua kubueja muena Kristo mukuabu mu malu anudi nuenza mu dîku dienu anyi?

[Mêyi a dianyisha]

Ne dianyisha dia Green Chimney’s Farm