Bakolesha bua kuenza mudimu

NTSHINYI tshivua mua kuikala tshisake balume 24 ne bakaji babu bonso batshikale ne bukole bua mubidi bua kushiya balela babu, balunda babu, ne miaba ivuabu bibidile bua kutuadija mudimu wa bu-misionere mu matunga a ku ba bende? Bua tshinyi bakasanka bua kuya miaba bu mudi mu Papuasie-Nouvelle-Guinée ne mu Taïwan, kabidi ne mu matunga a mu Afrike ne mu Amerike-Latine? Ndinanga dia kuya kuendakana patupu anyi? Tòo. Tshidi tshibasaka bua kuya miaba eyi ndinanga dia bushuwa didibu nadi kudi Nzambi ne kudi muntu nabu.​—Matayo 22:37-39.

Mbanganyabu? Mbalongi badi bajikije mu kalasa ka 109 ka Gilada, Tshilongelu tshia Bible tshia Société Watchtower. Mu Disambombo dia 9 Kabitende 2000, bantu bonso basanga 5 198 bakatuilangana Muaba wa Tulasa tua Société Watchtower ku Patterson mu New York ne miaba mikuabu bua kuteleja mibelu milenga ivua mua kuambuluisha balongi aba bua kuikalabu ba misionere bimpe.

Mulombodi wa programe uvua Steven Lett wa mu Komite wa Dilongesha wa Kasumbu Kaludiki ka Bantemu ba Yehowa. Mêyi ende a mbangilu avua mimanyine pa Matayo 5:13. Mvese eu udi wamba ne: ‘Nuenu nudi luepu lua [pa] buloba.’ Muanetu Lett wakumvuija ne: mêyi a Yezu aa mmakumbanyine menemene balongi aba bavua ne bua kuangata mapoloma. Tshilejilu, luepu lutu lulengeja biakudia mukana. Nunku ba misionere badi pabu bu luepu padibu benza mudimu wabu wa diyisha ne tshisumi.

Badi babakankamija ne mêyi a kulayangana nawu

Pashishe Muanetu Lett wakatela bamue basadidi ba Yehowa bakadi benze matuku a bungi mu bulelela bakalua kuenza miyuki ya tshikuma mîpi ivua miangatshila mu Bible. Ngamba-malu wa kumpala uvua John Wischuk, udi mu Tshibambalu tshia Difunda. Tshiena-bualu tshiende tshipatuila mu Musambu wa 117 tshivua ne: “Musambu udi muipi ku yonso udi ukankamija lungenyi lua bu-misionere.” Lelu, pa buloba bujima kudi dijinga dia kumanyisha “ba mu bisamba” ne “bukua bantu bonso” malu a Yehowa ne makuabu adi atangila Bukalenge buende. Bua balongi kukumbaja tshidi Musambu wa 117 wamba, Muanetu eu wakabambila bua kuikalabu bakankamija bakuabu bua ‘batumbishe Yehowa.’

Pashishe mulombodi wa ndongamu wakashila Guy Pierce wa mu Kasumbu Kaludiki tshialu. Muyuki wende uvua ne tshiena-bualu tshia se: “Nuibidilangane ne malu mapiamapia, kadi nansha nanku, nuikale bashindame.” Dîyi dia Nzambi ditu muomumue. Mu Dutelonome 32:4 badi babikila Yehowa Nzambi ne: n’Dibue, kadi Dîyi diende didi dipepele bualu bavua badifundile bantu ba miakulu ne bibidilu bionso, mmumue ne: bantu bonso. Ngamba-malu wakabela balongi bua bayishe Dîyi dia Nzambi, ne benze bua mukenji wadi ulenge mutshima ne kuondo ka muoyo ka bantu bonso. (2 Kolinto 4:2) Muanetu Pierce wakababela ne: “Shindamayi mu mikenji miakane, kadi nuibidilangane ne malu mapiamapia. Kanupepeji bantu ba miaba inudi nuya anu bualu bibidilu biabu mbishilangane ne bienu to.”

Karl Adams, umue wa ku balongeshi ba mu Gilada, udi  muenze mudimu bidimu bitue ku 53 muaba udibu balombuela midimu ya Bantemu ba buloba bujima, wakenza muyuki wa tshikuma uvua wamba ne: “Panudi numbuka muaba eu nenuye penyi?” Bua kuamba bulelela, mbatume balume 24 aba ne bakaji babu mu bu-misionere mu matunga 20, kadi wakabela lukonko ne: Ntshinyi tshinuenza panudi nufika mu ditunga dienyi adi ne nudimona mudidi? Tudi pa buloba budi ne bantu badi batua eku batua eku. Batu basue kuya miaba mienyi ne kuenza malu mapiamapia bua kudisankisha. Kadi, muaba udi balongi aba baya ngudi Yehowa musue bua buobu kuya bua bamone mua kulama “mikoko” yende kabiyi bua kukeba disanka diabu nkayabu to. Kabena ne bua kufuana bantu ba mu Isalele wa kale bavua bajinga kudisankisha anu nkayabu ne bavua Yehowa mubenge bua kubangata bua kubenesha bantu buonso to. Pamutu pa nanku, badi ne bua kuidikija Yezu Kristo uvua misangu yonso wenza disua dia Tatuende kayi ujinga kudisankisha nkayende ne uvua muena butumike mu malu onso avua amufikila.​—Yone 8:29; 10:16.

Wallace Liverance, sekretere wa Tshilongelu tshia Gilada, wakenza muyuki uvua wamba ne: “Nunange malu male a Nzambi.” Misangu ne misangu, Bible udi ufuanyikija Dîyi dia Nzambi ne bubanji, mabue a mushinga mukole, biamu bia mushinga muvule, ne bintu bitubu bangata ne  mushinga wa bungi bitu bantu bakeba bikole. Nsumuinu 2:1-5 udi uleja ne: bua kupeta “dimanya dia malu a Nzambi” tudi ne bua kudikeba anu mutubu bakeba “biuma bisokoka.” Ngamba-malu wakakankamija balongi bua kutungunuka ne kulonga malu male a Nzambi dîba diafikabu miaba yabu mipiamipia ya mudimu. Muanetu Liverance wakaleja ne: “Kulonga eku kudi ne mushinga bualu kudi kukolesha ditabuja, kunuambuluisha bua kueyemena Yehowa bikole, kabidi nekukoleshe dipangadika dienu dia kushala anu muaba udibu banutume. Nekunuambuluishe bua kuakula ne dishindika dionso ne kuikala balongeshi bimpe dîba dinuikala numvuija bantu bakuabu malu adi Nzambi mulongolole.”

Mulongeshi mukuabu wa mu Gilada wakumvuija mushindu uvua Yehowa mubeneshe mudimu wa buambi wa balongi mu ngondo yonso itanu ivuabu benze. Lawrence Bowen wakatela mêyi adi mu Bienzedi 20:20 akamba mupostolo Paulo bua mudimu wa diyisha wakenzaye mu Efeso, kumvuijaye ne: Paulo uvua uyisha dîba dionso divuaku mushindu. Malu avua balongi bamone avua aleja ne: anu bu mupostolo Paulo, bantu badi banange Nzambi ne muntu nabu matuku etu aa kabatu badikanda bua kuyisha bulelela ne kulekela bukole bua Dîyi dia Nzambi bukuata mudimu munda mua bakuabu to. Ke tshitu tshifikisha bantu ku dipeta mabenesha a bungi a kudi Yehowa.

Bantu bamonemone mianda badi bakula

Patshivua balongi ba ku Gilada aba balonga, bavua bapete diambuluisha dia pa buadi bualu bavua ne bena mu Komite ya Filiale ba mu matunga 23, bavua balue pabu kulonda malongesha a pa buawu ku Patterson. Leon Weaver ne Merton Campbell ba mu Tshibambalu tshia Mudimu bakela bawetu bashilangana ba mu Komite ya Filiale nkonko, bualu bamue ba kudibu bavua pabu balonge ku Gilada. Balongi ne balela babu ne balunda bakakankamana pakumvuabu malu akamba ba-misionere aba bamonemone mianda.

Munkatshi mua mibelu yakapeshabu balongi aba bua kubambuluisha bua bibidilangane ne miaba mipiamipia ivuabu baya kuenzela mudimu muvua malu bu mudi: “Nulame disanka dienu. Nuenu bapete bualu bunutu kanuyi banji kumona peshi bunudi kanuyi mua kumvua, kanuteketshi to. Nueyemene Yehowa”; “Nulonge mua kusanka ne bintu bidiku, ne nuikale bashindike ne: Yehowa neanupeshe bintu binuikala nabi bualu.” Bakapesha kabidi balongi mibelu mikuabu bua kubambuluisha bua bikale anu ne disanka mu mudimu wabu. Mêyi makese akabambilabu avua se: “Kanufuanyikiji muaba udibu banutume ne muaba unudi bafume”; “nulonge muakulu wa muaba unudi nuya ne nuikale nuwakula bimpe bua numanye mua kuikala nuyikila ne bantu”; “numanye mudi bilele ne bibidilu biabu, bualu dimanya malu aa nedinuambuluishe bua nushale anu muaba wenu wa mudimu.” Mêyi aa akakankamija ba misionere bapiabapia aba bikole.

Panyima pa diela bawetu aba nkonko, David Splane (misionere wa kale uvua mujikije mu kalasa ka 42 ka Gilada) udi mpindieu mu Kasumbu Kaludiki ka Bantemu ba Yehowa, wakenza muyuki munene uvua ne tshiena-bualu tshivua tshijula ntema tshia se: “Nudi nudimona bu balongi anyi bu bantu bakadi bangate mapoloma?” Wakebeja balongi aba bavua bajikija ne: “Nenuye kudimona bu banganyi panuaya mu miaba yenu ya mudimu wa bu-misionere? Bu bantu bakadi bakuate mapoloma badi bamanye malu onso a mudimu wa bu-misionere anyi peshi bu balongi batshidi ne malu a bungi a kulonga?” Muanetu Splane wakaleja ne: muntu wa meji ukadi muangate dipoloma udi udiangata bu mulongi. Ba-misionere badi ne bua kuikala bamona muntu yonso udibu bapetangana nende bu udi mua kubalongesha bualu kampanda. (Filipoi 2:3) Ngamba-malu wakakankamija balongi bua kuenzejangana mudimu ne ba-misionere bakuabu, bawetu ba ku biro bia Filiale ne ba mu bisumbu bivuabu baya. Muanetu Splane kubabela ne: “Nuajikiji kalasa kenu, kadi bulongi buenu ki mbujike to. Nuleje muntu yonso patoke ne: nudi basue kulonga.”

Kunyima kua muyiki eu, bakapesha balongi mapoloma abu ne kumanyishabu bateleji miaba ivuabu babatume. Balongi bakasanka bikole pavua mulongi nabu umue mulue kubala mukanda wabu uvua uleja dipangadika divuabu bangate bua kulekela bivuabu balonge mu Dîyi dia Nzambi bibasaka bua kuenza malu manene mu mudimu wa tshijila.

Bateleji bonso bakitaba muvua mibelu yonso eyi mikoleshe dipangadika dia balongi dia kuleja mudibu banange Nzambi ne muntu nabu. Mibelu eyi yakabakolesha kabidi bua kushala ne dipangadika dikole menemene dia kuambuluisha bantu mu nyuma mu mudimu wabu wa bu-misionere.

[Kazubu mu dibeji 25]

MALU ADI ATANGILA BALONGI

Bungi bua matunga adibu bafumine: 10

Bungi bua matunga adibu babatume: 20

Bungi bua balongi: 48

Muayene wa bidimu: 33,7

Muayene wa bidimu bienza mu bulelela: 16,2

Muayene wa bidimu mu mudimu wa ku dîba ne ku dîba: 12,5

[Tshimfuanyi mu dibeji 26]

Kalasa ka 109 ka Gilada, Tshilongelu tshia Bible tshia Watchtower

Mu liste udi kuinshi eku mbabale milongo ya balongi batuadijile kumpala bapingana panyima; mbafunde mêna abu babangile ku dia bakaji batangile ku dia balume mu mulongo wonso.

(1) Collins, E.; Miles, L.; Alvarado, A.; Lake, J. (2) Van Dusen, L.; Biharie, A.; Heikkinen, H.; Koós, S.; Smith, H. (3) Ashford, J.; Ashford, C.; Boor, C.; Richard, L.; Wilburn, D.; Lake, J. (4) Chichii, K.; Chichii, H.; Ramirez, M.; Baumann, D.; Becker, G.; Biharie, S.; Ramirez, A. (5) Van Dusen, W.; Lemâtre, H.; Pisko, J.; Cutts, L.; Russell, H.; Johnson, R. (6) Becker, F.; Baumann, D.; Johnson, K.; Pifer, Á.; Madsen, C.; Lemâtre, J.; Heikkinen, P. (7) Smith, R.; Russell, J.; Collins, A.; Pisko, D.; Wilburn, R.; Koós, G. (8) Cutts, B.; Boor, J.; Madsen, N.; Pifer, S.; Richard, E.; Miles, B.; Alvarado, R.