Bua tshinyi udi usadila Nzambi?

Umue musangu, mukalenge mukuabu uvua utshina Nzambi wakapesha muanende mubelu eu: “Umanye Nzambi wa tatu’ebe, umukuatshile mudimu ne mutshima mutoke ne didikokela kudiye.” (1 Kulondolola 28:9) Bidi bileja ne: Yehowa mmusue bua basadidi bende bamuenzele mudimu ne mitshima miuule ne disanka ne dianyisha.

MUTUDI Bantemu ba Yehowa, tudi tuitaba kakuyi dielakana ne: pakatumvuijabu malu adi Bible mulaye bua musangu wa kumpala, mitshima yetu yakuula tente ne dianyisha. Dituku dionso tuvua tulonga bualu bupiabupia pa bidi Nzambi musue. Dijinga dietu dia kukuatshila Nzambi mudimu “ne mutshima mutoke ne didikokela kudiye” diakakola patuvua tuenda tulonga malu a bungi a Yehowa.

Bantu ba bungi badi balua Bantemu ba Yehowa badi batungunuka ne kukuatshila Yehowa mudimu ne disanka dia bungi mu matuku abu onso a muoyo. Bamue bena Kristo badi batuadija luendu bimpe, kadi padi matuku apita, badi bapua muoyo malu avua mabasake bua kusadila Nzambi. Udi pebe muapue muoyo anyi? Biobi bikale nanku, kuteketshi mu maboko to. Udi mua kupetulula disanka diudi mujimije. Kadi tshia kuenza ntshinyi?

Bala bungi bua mabenesha audi mupete

Tshia kumpala, ela meji bimpe mudi Nzambi ukuambuluisha dituku dionso. Uvuluke mapa mimpe adi Yehowa ukupesha: bintu bipite bungi bidiye mufuke, bidi muntu yonso mua kumona nansha yeye muikale mubanji anyi mulanda. Vuluka biakudia ne biakunua bidiye mutupeshe, makanda a mubidi audi nawu, dimanya dia bulelela bua mu Bible diudi nadi ne nangananga ditupesha Muanende wakatufuila. Lufu lua Muanende eu luakakulongoluela njila bua wewe kusadila Nzambi ne kuondo ka muoyo kimpe. (Yone 3:16; Yakobo 1:17) Paudi utamba kuelangana meji bua buimpe bua Nzambi, neumuanyishe bikole. Nunku mutshima webe neukusake bua kumusadila bua kuleja dianyisha bua bionso bidiye muenze. Kakuyi mpata, neutuadije kabidi kuela meji bu muakaela mufundi wa Misambu wakamba ne: ‘Yehowa Nzambi wanyi, wakavudija malu a kukema awakenza ne malu awakapangidija bua kutuenzela; kakuena mukuabu utudi bamanye mua kuelekeja nebe. [Malu aa] neampite bua kuabala.’​—Musambu 40:5.

Davidi ke wakafunda mêyi aa (uvua pende mupete ntatu). Patshivuaye nsongalume, Davidi wakapitshisha tshitupa tshinene tshia matuku a muoyo wende mu dinyemakana pavua Mukalenge mubi Shaula ne basalayi bende benda bamukeba bua kumushipa. (1 Samuele 23:7, 8, 19-23) Davidi uvua ne biende bilema bivuaye ne bua kuluangana nabi. Ke tshiakalejaye mu Musambu wa 40: “Makenga mmmanjingile kaayi kubala, bilema bianyi mbinnemenene, mesu anyi kaena mua kumona kabidi tshintu, mbivulangane, bipite ne nsuki yanyi ya ku mutu.” (Musambu 40:13, MMM [40:12]) Tshia bushuwa, Davidi uvua ne ntatu, kadi kayivua mimupite mutu mimuteke panshi to. Wakatamba kutangila mishindu ivua Yehowa mumuambuluishe nansha muvuaye ne ntatu, kumonaye ne: malu mimpe avua Nzambi mumuenzele avua mapite kule ne kule makenga ende.

Padi ntatu ikupita makanda peshi udimona kuyi mua kuenza malu kampanda, anji kuimana ubale bungi bua malu adi aleja ne: udi ne diakalenga bu muakenza Davidi. Kakuyi mpata, dianyisha bua malu aa ke diakakusaka bua wewe kudilambula kudi Yehowa; ngenyi eyi idi kabidi mua kukupesha disanka diudi mujimije ne kukuambuluisha bua kuenzela Nzambi mudimu ne dianyisha mu mutshima.

 Bisangilu bia tshisumbu bidi mua kukuambuluisha

Pa kumbusha dielangana meji pa nkayetu bua buimpe bua Yehowa, tudi ne bua kudisangisha ne bena Kristo netu. Bidi bitukankamija patudi tudisangisha ne balume, ne bakaji, ne bansonga badi banange Nzambi ne badi bapangadije bua kumukuatshila mudimu. Tshilejilu tshiabu tshidi mua kutusaka bua kukuatshila Yehowa mudimu ne muoyo mujima. Padibu batumona ku Nzubu wa Bukalenge bidi bibakankamija pabu.

Bushuwa, patudi tupingana kumbelu batshioke bua mudimu mukole wa dituku adi anyi padi bualu peshi butekete kampanda bututekeshe ku muoyo, bidi mua kutukolela bua kuela meji a kuya kubuela mu bisangilu ku Nzubu wa Bukalenge. Dîba dia nunku, katuena ne bua kudiumvuila luse nansha, tuenze bu se: tudi ‘tudikuma mubidi wetu’ bua tuetu kumona mua kutumikila mukenji udibu batuelele wa kuikala tudisangisha ne bena Kristo netu.​—1 Kolinto 9:26, 27; Ebelu 10:23-25.

Bikalabi bikengela kuenza malu mushindu’eu, tudiku mua kufika ku diamba ne: katuena banange Yehowa bikole anyi? Tòo. Bualu, nansha bena Kristo ba kale (bapie mu nyuma bavua banange bikole Nzambi) bavua bakengela pabu kudikankamika bikole bua kumona mua kuenza disua dia Nzambi. (Luka 13:24) Mupostolo Paulo uvua pende munkatshi mua bena Kristo aba. Mona muakumvuijaye patoke meji avuaye nawu: ‘Ndi mumanye ne: munda muanyi, mu mubidi wanyi mene, kamuena muikale bualu buimpe; bualu bua disua dia kuenza bimpe didi kundi, kadi bukole bua mua kuenza nabu bimpe kabuenaku. Bualu bua muanda muimpe undi musue kuenza, tshiena ngenza, kadi muanda mubi undi tshiyi musue kuenza, eu ngundi ngenza.’ (Lomo 7:18, 19) Ne wakambila bena Kolinto ne: ‘Bingambila bantu lumu luimpe, tshiena ne tshia kutumbila natshi; bua bualu budi bunkuata bua kuluamba. Bua bingenza nunku bua kudisunguila kuanyi, ndi ne difutu; kadi bingikala tshiyi ngenza nunku bua kudisunguila kuanyi, ndi ne bulami butekibue mu bianza bianyi.’​—1 Kolinto 9:16, 17.

Anu mudi bavule munkatshi muetu, meji a Paulo avua amusaka anu ku mpekatu ne kabidi avua amupangisha bua kuenza malu makane. Kadi wakaluisha meji au bikole, ne uvua uatshimuna misangu ya bungi. Bushuwa, Paulo kakatshimuna meji awu ku bukole buende yeye nansha. Wakafunda ne: ‘Ndi mumanye mua kuenza malu onso mu Mukalenge udi unkolesha.’ (Filipoi 4:13) Wewe mulombe Yehowa bua akuambuluishe, neakupeshe pebe bukole, anu bu muakabupeshaye Paulo, bua wewe kuenza malu adi makane. (Filipoi 4:6, 7) Nunku ‘luangana mvita mikole bua ditabuja,’ ne Yehowa neakubeneshe.​—Yuda 3, NW.

Kuena ne bua kuluangana mvita eyi nkayebe to. Mu bisumbu bia Bantemu ba Yehowa mudi bakulu bena Kristo bapie mu nyuma badi bananukila buobu bine mu diluangana ‘mvita bua ditabuja,’ ne mbasue bua kukuambuluisha. Wewe muambile mukulu bua akuambuluishe, neadienzeje bua kukuambila mêyi adi mua ‘kukukolesha.’ (1 Tesalonike 5:14) Neajinge bua kuikala ‘bu tshisokomenu ku tshipepele, ne tshinyemenu tshia ku tshipupu.’​—Yeshaya 32:2.

“Nzambi udi dinanga,” ne mmusue bua basadidi bende bamukuatshile mudimu bualu mbamunange. (1 Yone 4:8) Biwasua bua dinanga diebe diudi munange Nzambi dijukuluke tshiakabidi, wangate mapangadika makanyine a kuenza malu atudi bafume ku dileja aa. Tshia bushuwa, neusanke biwaatumikila.