Lumu luimpe lua ditalala ludi lufika ku mikuna ya mu Chiapas

Tshikandakanda kampanda tshiakamba bua malu akenzeka mu Acteal mu provense wa Chiapas dia 22 Tshisua-munene 1997 ne: “Tshikondo tshivuabu bashipangane bibi menemene tshidi muntu kayi mua kupua muoyo mu provense wa Chiapas, ntshiakashipabu babidime 45 bavua kabayi ne mushindu wa kudisungila, kushipabu kabidi bana 13, bionso ebi kudi tshisumbu kampanda tshia . . . bantu bavua ne bia mvita.”​—“El Universal.”

CHIAPAS mprovense wa ku Sud menemene kua ditunga dia Mexique, pabuipi ne dia Guatemala. Bua bupele ne dikenga bia bidimu ne bidimu bidi mu Chiapas, tshisumbu tshia ba-Maya bena Inde bakambula bingoma ne kubangabu buntomboji mu Tshiongo 1994, bikale mu tshisumbu tshia Ejército Zapatista de Liberación Nacional (EZLN, Tshiluilu tshia bena Zapata bua Kupikula Ditunga). Ne buobu ne bena mbulamatadi bavua banengakana bua kumvuangana ne kujikija tshilumbu etshi mu ditalala. Mvita ayi ivua pankatshi pa bantomboji ne mbulamatadi mmishipeshe bantu. Tshimvundu etshi tshiakanyemeshisha babidime ba bungi ba muaba eu.

Mu ntatu mikole eyi, kudi tshisumbu tshimue tshia bantu badi banange ditalala bavua babenge kubuelakana mu makokangana a bena tshididi awu. Badi balongesha bantu ne lukunukunu luonso se: anu Bukalenge bua Nzambi ke budibu mua kutekemena bua kujikijabu ntatu idi bantu nayi mu misoko yabu ne idi pa buloba bujima. (Danyele 2:44) Mbanganyi abu? Mbantemu ba Yehowa. Bua kutumikila mukenji wa Yezu, badi badienzeja bua kufikisha lumu luimpe lua Bukalenge bua Nzambi mu bitupa bia kule ku mikuna ya mu Chiapas. (Matayo 24:14) Mmunyi muvua diyisha bantu mu ntatu eyi dienzeka, ne diakapatula malu kayi?

“Ndi Ntemu wa Yehowa”

Adolfo nnsongalume utshivua utuadijilaku diamba dia lumu luimpe lua Bukalenge. Dimue dituku uvua wenza mudimu ku kadiomba kakuabu ka mu tshimenga tshia Ocosingo. Diakamue kumvuaye bakokola ku tshîbi bikole. Bantu tshisumbu bavuale bifulu bibajike kuisu bakamubuelela mu nzubu buobu kumutangija bingoma ku mutu. Kubuelabu diakamue mu nzubu wa ditangalajila mêyi a ku tudiomba, kunyengabu kadiomba aku, e kumanyishabu ku tshisanji ne: bavua basue bua kuela mbulamatadi mvita.

Bena mvita abu bakakudimukila Adolfo, kumutuminabu dîyi bua abuele mu tshisumbu tshiabu. Nansha muvua Adolfo kayi muanji kutambula, wakabandamuna ne: “Ndi Ntemu wa Yehowa.” Yeye kubumvuija ne: Bukalenge bua Nzambi nkayabu ke butudi mua kutekemena bua kujadikabu ditalala; ne wakabenga ne muoyo mujima bua kuangata nsukutu ne tshingoma bivuabu bamupesha. Pakamonabu ne: kavua mua kushintulula dipangadika diende, bakamulekela yeye kuya. Adolfo udi uvuluka bualu abu wamba ne: “Muanda awu wakakolesha ditabuja dianyi.”

Ndekelu wa bionso, bimvundu biakatuyaku, kadi basalayi batshivua anu balame provense awu. Nansha nanku, Adolfo wakitaba ne disanka dionso pavua bakulu bamuambile bua kuya kenza mudimu pamue ne kasumbu ka bena Kristo bavua mutantshi ne tshisumbu tshiabu. Miaba ivua basalayi  bajike njila ivuaye ne bua kupitshila bavua bamunemeka pavuaye udimanyisha ne: ndi Ntemu wa Yehowa. Wakalua kutambula ne kabidi uvua mupete disanka bua muvuaye muambuluishe kasumbu aku bua kulua tshisumbu tshijima tshia Bantemu ba Yehowa. Adolfo wakamba ne: “Mpindieu unkadi mutambule, ndi mua kuamba ne dishindika dionso ne: ndi Ntemu wa Yehowa!”

“Yehowa wakatukolesha”

Matuku makese panyima pa bena EZLN bamane kumanyisha ku tshisanji muvuabu basue kuluisha mbulamatadi mvita, bantu bakanyema mu tshimenga atshi. Mpanda-njila mukuabu diende Francisco wakumvuija muvua Yehowa mubakoleshe yeye ne mukajende mu malu avua mabafikile.

Udi wamba ne: “Tuakapangadija bua kunyemena mu tshitupa tshivua mutantshi wa mêba asatu ku makasa. Mu tshine tshitupa atshi muvua tshisumbu tshimue, muvua bana betu batuvua ne bua kupetangana nabu. Mutantshi eu tshikondo kukumbanatshi bua tuetu kuenza mpuilu wa tshijengu mu musoko wa Palenque. Meme ne mukajanyi katuvua basue kupangila tshisangilu tshia pa buatshi tshia bampanda-njila atshi to. Kadi bakalua kutuambila ne: bena EZLN bavua bakange njila uvua uya muaba uvua mpuilu wenzekela. Tuetu kupangadija bua  kulonda njila wa tshisuku, wakatuangata mêba tshitema bua kushisha kufika. Tuakafika kumpala kua dîba, tuetu kubuela mu tshisangilu tshia bampanda-njila tshituakanyisha bikole ne ndongamu mujima wa mpuilu wa tshijengu.

“Patuakapingana ku nzubu, tuakasangana buoshe nzubu wetu ne bibe nyama ituvua bamune. Tshivua tshishale tshivua anu kabuta ka bilamba. Tuakabungama bua bintu ebi bituvua bajimije, kadi bana betu ba mu Ocosingo bakatuambuluisha bualu bakatuteka ku nzubu yabu. Bakatuleja kabidi mua kuenza midimu ituvua tuetu babidime katuyi banji kuenza musangu mukuabu. Muanetu umue wakandongesha mua kukuata foto, mukuabu kundongesha mua kutela bilatu. Ke mutudi tudiambuluisha ne mukajanyi too ne mpindieu, katuyi tulekela mudimu wa bumpanda-njila. Patudi tuela meji bua malu avua matuenzekele, tudi tumona se: nansha muvuabi kabiyi bipepele bua tuetu kutantamena ntatu ayi, Yehowa wakatukolesha.”

Mamuma a mudimu wa buambi

Bantemu ba mu Provense wa Chiapas kabakalekela ntatu ne njiwu bibapangisha bua kuenza mudimu wa pa buawu wa kufikisha lumu luimpe kudi bantu ba muaba eu to. Tshilejilu, mu ngondo Muinayi ne Muitanu mu 1995, bakaditua pamue ne bena Kristo nabu ba buloba bujima mu mudimu wa diabanya Ngumu ya Bukalenge No. 34 ivua ne tshiena-bualu tshiakanyine menemene tshia se: Bua tshinyi muoyo mmuwule ne ntatu nunku?

Pavuabu babanya trakte eyi, Ciro uvua mpanda-njila wa pa tshibidilu wakapeta bena dîku dikuabu bakanyisha bulelela ne disanka muaba uvuabu babikila ne: Pueblo Nuevo. Pakapinganaye panyima pa matuku asatu, wakatuadija kulonga nabu Bible. Kadi pakapingana Ciro kabidi ne mumanyishi mukuabu bua kutungunuka ne dilonga ne dîku edi, tatu wa dîku kavua kumbelu to. Kuvua anu bantu bavuale bifulu bibajike kuisu bavua bamuindile bua kumuenzela bibi. Bakebeja Ciro ne mulunda wende tshivuabu balue kuenza, bafuna bua kubashipa. Pakasambilabu Yehowa mundamunda, bena Kristo babidi aba bakandamuna ne dikima ne: bavua balue kulongesha bena dîku adi Mukanda wa Nzambi. Pakumvua bantu abu nanku bakabalekela kuyabu. Katuena bamanye bualu buvua muena kumbelu kayi muvuile kumbelu dituku adi to.

Dimue edi kunyima kua bidimu bitue ku bisatu, Ciro wakakema pakamonaye tatu au mumufikile ku nzubu. Ciro wakasanka bikole pakumvuaye se: bena mu dîku adi bonso bakavua batambule ne mpindieu bavua mu tshisumbu kampanda tshia mu Guatemala. Umue wa ku bana ba bakaji ba tatu awu ukavua mene mpanda-njila wa pa tshibidilu!

Dianyisha bua biakudia bia mu nyuma

Nansha mudi bantu ne ntatu ya munanunanu mu Chiapas, mutangidi wa distrike mukuabu udi uleja ne: Bantemu  ba mu provense eu mbamanye bimpe mushinga udi nawu bisangilu. (Ebelu 10:24, 25) Udi ulonda bualu buakenzeka mu mpuilu wa pa buende wa dituku dimue uvua muenzeke matuku abidi aa, uvuabu balongolole bua kubanga mu dinda menemene bua bantu bavua babuelamu bamone mua kupingana ku mabu bimpe dîba ditshikalaku. Nansha muvua ba bungi ne bua kuendela muitu mêba mapite pa asatu bua kufika muaba uvua mpuilu wenzekela, muntu yonso ukavua mufike ne musombe muaba wende pa dîba 7 wa mu dinda. Munkatshi mua bateleji abu muvua bantu basambombo ba mu tshisumbu tshia bena EZLN, bavua bateleja ne batuta pabu bikashi, bimueneka ne: bavua banyishe malu avuabu balongesha. Bavua bende pabu mêba asatu bua kubuela mu mpuilu eu. Bena EZLN bakuabu 20 bakabuela mu Tshivulukilu tshia lufu lua Kristo tshiakenzekela mu Nzubu wa Bukalenge wa muaba awu.

Bakatuma nsongalume mukuabu (wa mu tshisumbu tshia baluanganyi ba mvita abu) kudi bavua ku mutu kuende bua kulama musoko kampanda uvua mu dîtu. Pakafikaye muaba awu, wakasangana bena musoko buonso banyeme, bavule bavua Bantemu ba Yehowa. Ke yeye kubuela ku umue wa ku nzubu ya bena musoko bavua banyeme abu. Bu muvuaye kayi ne bia bungi bia kuenza, wakangata imue mikanda ivuaye mupete ku nzubu awu ne kutuadijaye kubala. Ivua mikanda ya Bantemu ba Yehowa ivuabu bashiye. Muvua nsongalume awu nkayende, uvua ne dîba dia bungi dia kuelangana meji a bivuaye ubala. Wakapangadija bua kushintulula nsombelu wende ne kulekela bia mvita. Wakakeba Bantemu ne lukasa luonso ne kutuadijaye kulonga Bible. Mu ngondo isambombo ukavua wambila bantu bakuabu lumu luimpe. Yeye ne bakunyi bende basatu bavua balamate pabu ku luseke lua tshisumbu tshia baluanganyi ba mvita abu badi mpindieu bena Kristo batambule.

Luseke luimpe lua malu aa

Nansha muvua ndululu eyi mikebeshe ntatu mipite bungi, yakafikisha bantu ku dibanga kuangata mudimu wa buambi ne mushinga. Mukulu mukuabu wa mu tshimenga muakatuadijila mvita udi wamba ne: “Matuku bu atanu nanku kunyima kua dibudika dia mvita eyi, tuakalongolola bua kuenza mudimu wa buambi munda ne pambelu pa tshimenga. Bantu bavua basue kututeleja bikole. Tuakabanya mikanda mivule ya kulonga nayi Bible, tuetu kutuadija kulonga Bible ne bantu bapite bungi. Muaba mukuabu, bantu bavule kabavua basue bulelela to, kadi bua mvita, mpindieu badi bateleja, balonga Bible ne babuela mu bisangilu ne mu mpuilu.”

Bana betu badi ne disanka bua mudibu batungunuke ne midimu yabu ya Bukalenge nansha mudi malu manyanguke bikole mu tshitupa etshi. Bu mudi basalayi ba mbulamatadi ne ba bena EZLN bamanye Bantemu bimpe, badi batungunuka ne kuenza mpuilu ne mpungilu yabu itu ibakolesha mu nyuma. Dibakumbula dia batangidi bena ngendu ndibambuluishe kabidi bikole bua kutungunukabu ne mudimu wa buambi. Tshidi tshisankisha ntshia se: too ne bantu bine badi baditue mu mvita badi bakankamija Bantemu, misangu mivule babambila bua kutungunukabu ne mudimu wabu wa buambi.

Nansha mudi ntatu ne makenga avua bena mu Chiapas bamone bienze bu bikepele panyima pa matuku, ki mbijike to. Kadi bualu butudi bajadike budi ne: Bantemu ba Yehowa mbadisuike bua kutungunuka kabayi balekela kutuadila bantu lumu luimpe lua ditalala ludi mu Bible. (Bienzedi 10:34-36; Efeso 6:15) Anu muakamba muprofete Yelemiya, mbamanye ne: “muntu kena mfumu wa njila udiye ulonda, muntu wendenda ewu kena ne bukole bua kuludika makasa ende.” (Yelemiya 10:23, Mukanda wa Mvidi Mukulu) Anu Bukalenge bua Nzambi budi mu bianza bia Muanende Yezu Kristo ke buajikija tunsungasunga ne bupele bidi pa buloba apa.​—Matayo 6:10.

[Karte mu dibeji 9]

(Bua kumona malu bimpe, tangila mu mukanda)

Golfe du Mexique

CHIAPAS

GUATÉMALA

Mbuu wa Pasifike

[Mêyi a dianyisha]

Mountain High Maps® Copyright © 1997 Digital Wisdom, Inc.

[Tshimfuanyi mu dibeji 9]

Bantemu baya kuyisha ku misoko ya ku mikuna ya mu Chiapas