Nuikale bakumbane ne batuishibue bikole

“[Udi] udienzeja misangu yonso bua bualu buenu mu masambila ende, bua ndekelu wa bionso nuikale bakumbane ne batuishibue bikole bua malu onso adi Nzambi musue.”​—KOLOSAI 4:12, NW.

1, 2. (a) Bantu bavua kabayi bena Kristo bakamba tshinyi bua bena Kristo ba kumpala? (b) Mmunyi mudi mukanda wa Kolosai uleja muvua bana betu bikale ne dinanga?

 BAYIDI ba Yezu bavua banange bena Kristo nabu bikole. Tertullien (mufundi wa mikanda wa mu lukama lua bidimu luibidi ne luisatu B.B.) wakamba malu mimpe avua bayidi abu benzela bana ba nshiya, bakengi ne bakulakaje. Malu adi aleja dinanga diabu aa akatamba kukemesha bantu bavua kabayi bayidi ba Yezu, bamue kufikabu ne ku diamba bua bena Kristo ne: ‘Monayi mudibu banangangane.’

² Mukanda wa Kolosai udi uleja muvua mupostolo Paulo ne mulunda wende Epafa bikale banange bana babu ba balume ne ba bakaji ba mu Kolosai mushindu’eu. Paulo wakabafundila ne: Epafa udi “udienzeja misangu yonso bua bualu buenu mu masambila ende, bua ndekelu wa bionso nuikale bakumbane ne batuishibue bikole bua malu onso adi Nzambi musue.” Mu 2001, mvese wa tshidimu wa  Bantemu ba Yehowa neikale mêyi a mu Kolosai 4:12 aa: “Nuikale bakumbane ne batuishibue bikole bua malu onso adi Nzambi musue.”

3. Mmalu abidi kayi avua Epafa ulomba mu masambila?

³ Tangila, masambila avua Epafa wenzela bantu bavuaye munange avua ne bipatshila bibidi: (1) uvua ujinga bua “ndekelu wa bionso [bikale] bakumbane” ne (2) bua bikale “batuishibue bikole bua malu onso adi Nzambi musue.” Bavua bafunde malu aa mu Mukanda wa Nzambi bua kutuambuluishawu. Nunku diebeja ne: ‘Ndekelu wa bionso, ntshinyi tshindi ne bua kuenza bua ngikale mukumbane ne mutuishibue bikole bua malu onso adi Nzambi musue? Ne meme muenze tshintu atshi, nempete tshinganyi?’ Tumonayi mudi bualu ebu.

Dienzejayi bua “nuikale bakumbane”

4. Mmu mushindu kayi muvua bena Kolosai ne bua kuikala “bakumbane”?

⁴ Epafa uvua ujinga ne muoyo mujima bua bana babu ba mu nyuma balume ne bakaji ba mu Kolosai bikale ‘ndekelu wa bionso bakumbane.’ Muaku wakangata Paulo udibu bakudimune muaba eu ne: “bakumbane,” udi mua kumvuija: bapuangane, bakole anyi bapie mu nyuma. (Matayo 19:21; Ebelu 5:14; Yakobo 1:4, 25) Pamu’apa udi mujadike ne: dikala Ntemu wa Yehowa mutambule kadiena diumvuija diakamue kuikala muena Kristo mukole mu nyuma nansha. Paulo wakafundila bena Efeso, bavua ku Ouest kua Kolosai ne: balami ne balongeshi badi bambuluisha bantu ‘bonso bua bapete buobumue bua ditabuja ne bua kumanya kua Muana wa Nzambi, too ne patuafika ku mulongo wa muntu mukole, too ne ku luidi lua dikola didi tshiuwidi tshia Kristo.’ Muaba mukuabu Paulo wakabela bena Kristo bua balue ‘bantu bakole mu meji.’​—Efeso 4:8-13; 1 Kolinto 14:20.

5. Mmunyi mudi dikala bakumbane mua kulua tshipatshila tshietu tshinene?

⁵ Bikala bamue bena mu Kolosai kabavua banji kulua bantu bakole anyi bapie mu nyuma, bivua bikengela bikale ne tshipatshila atshi. Katuenaku petu ne bua kuikala ne tshipatshila etshi lelu anyi? Nansha tuetu batambule kukadi bidimu bia bungi anyi abidi aa, tudiku tudimona bantu bakole bushuwa mu ngelelu wetu wa meji ne mu mushindu ututu tumona malu anyi? Tutuku tuanji kujinga bua kumanya tshidi Bible wamba kumpala kua tuetu kuangata mapangadika anyi? Malu adi atangila Nzambi ne tshisumbu tshiende adiku ne mushinga wa bungi kutudi anyi peshi adi ne mushinga mukese? Muaba eu katuena mua kutela kumana malu onso atudi mua kuenza bua kuleja ne: tudi tuenda tukola batangile ku dikumbana to, kadi tutangile bilejilu bibidi patupu bidi bilonda ebi.

6. Mmu muanda kayi mudi muntu mua kuya kumpala mutangile ku dikala mupuangane bu Yehowa?

⁶ Tshilejilu tshia kumpala: Tufuanyikije ne: tudi bakolele muaba uvua bantu bakine bantu ba tshisamba tshikuabu, ba ditunga dikuabu anyi ba muaba mukuabu. Kadi mpindieu tukadi bamanye ne: Nzambi kêna ne kansungansunga ne tuetu petu katuena ne bua kuikala naku to. (Bienzedi 10:14, 15, 34, 35) Bantu ba miaba mikuabu badi mu tshisumbu anyi mu tshijengu tshietu. Tudiku mua kuikala tutshidi tubelela meji mabi munda muetu peshi tubabanda  ne amue malu anyi? Tudi bu bantu badi bakeba katamba ka kuapuka naku, badi ne lukasa lua kutuma meji ku bualu bubi padi muntu wa muaba mukuabu utuenzela ka-tshilema nansha kakese anyi? Diebeja ne: ‘Bidiku binkengela bua meme kuya kumpala mu nyuma bua tshikadi ne kansungansunga anu mutu Nzambi kayi naku anyi?’

7. Kulua muena Kristo mukumbane kudi mua kutulomba bua tuikale tuangata bakuabu mushindu kayi?

⁷ Tshilejilu tshibidi: Bilondeshile Filipoi 2:3, katuena ne bua ‘kuenza muanda bua ditapuluka anyi bua kuditumbisha kua patupu; kadi mu mitshima mipuekele muntu ne muntu abale mukuabu bu muntu udi mumutambe yeye.’ Mmunyi mutudi tuleja ne: tudi tuenda tukola mu muanda eu? Muntu yonso utu ne malu adi aleja buende butekete ne buende bukole. Bituikala kale tuvua ne lukasa lua kumona bilema bia bakuabu, mpindieu tukadiku bakole mu nyuma, katutshiyi kabidi tukeba bua bikale benza malu anu bu bantu ‘bapuangane’ anyi? (Yakobo 3:2, MMM) Kabiyi bu kumpala, mpindieu tudiku bamanye mua kumona peshi mene kukeba malu adi bakuabu benza kutupita anyi? ‘Ndi ngitaba ne: muanetu wa bakaji eu mmupite ku lutulu.’ ‘Muanetu wawa udi ne ditabuja dikole kumpita.’ ‘Bulelela, udi ulongesha bimpe kumpita meme.’ ‘Muanetu wa bakaji eu mmumanye mua kukanda tshiji kumpita meme.’ Pamu’apa bivua bilomba bamue bena Kolosai bua kukolabu mu malu aa. Kadi tuetu?

8, 9. (a) Mmu mushindu kayi muvua Epafa mulombele bena Kolosai bua ‘bikale’ bakumbane? (b) ‘Kuikala bakumbane’ kuvua kumvuija tshinyi pa bidi bitangila matuku atshivua alua?

⁸ Epafa uvua usambila bua bena Kolosai [bimane anyi] ‘bikale bakumbane.’ Uvua ulomba Nzambi bua padi bena Kolosai balua bena Kristo bakumbane, bapie ne bakole bashindame mu nyuma, ‘bikale’ anyi bashale amu nanku.

⁹ Katuena mua kuamba ne: muntu yonso udi ulua muena Kristo, nansha yeye mupie mu nyuma, neashale amu nanku to. Yezu wakamba ne: muanjelo mukuabu uvua muana wa Nzambi ‘kakimana mu bualu bulelela.’ (Yone 8:44) Paulo wakavuluija bena Kolinto bualu bua bamue bantu bavua mu tshikondo kampanda basadile Yehowa ne pashishe kuluabu kuenza malu mabi. Wakadimuija bana babu bela manyi a nyuma ne: ‘Muntu udi wela meji ne: ndi muimane, adimuke bua kaponyi biende.’ (1 Kolinto 10:12) Mêyi aa adi aleja mushinga uvua nawu disambila divuaye ulomba ujinga bua bena Kolosai ‘ndekelu wa bionso bikale bakumbane.’ Buobu bamane kulua bakumbane, bakole mu nyuma, bavua ne bua kunanukila, kubenga kupingana tshianyima anyi kupungila peshi kupambuka. (Ebelu 2:1; 3:12; 6:6; 10:39; 12:25) Nunku bavua mua kuikala “bakumbane” dituku divua Nzambi ulua kutangila malu abu bua kubanyishaye kashidi.​—2 Kolinto 5:10; 1 Petelo 2:12.

10, 11. (a) Ntshilejilu kayi tshiakatushila Epafa bua bidi bitangila kusambila? (b) Mu diumvuangana ne tshivua Epafa muenze, ndipangadika kayi diudi mua kuangata?

¹⁰ Tukadi bamone mushinga udi nawu kutela kua mêna a bakuabu mu masambila etu, kuamba malu masunguluke, kulomba Yehowa bua abambuluishe, abasambe, ababeneshe ne abapeshe spiritu munsantu. Masambila avua Epafa wenzela bena Kolosai avua a mushindu’au. Tudi ne bua kupeta mu mêyi aa mubelu muimpe udi utangila malu atudi tuambila Yehowa mu masambila atudi tuenza buetu tuetu nkayetu. Kakuyi mpata, tudi ne bua kulomba Yehowa ambuluishe yonso wa kutudi bua ‘ndekelu wa bionso ikale mukumbane.’ Ke tshiutu wenza anyi?

¹¹ Bua tshinyi kubenga kuakula bua nsombelu webe mu disambila? Leja Nzambi malu aukadi muenze bua kuikala ‘mukumbane,’ mukole ne mupie mu nyuma. Musengelele bua akuambuluishe umanye malu atshidi makushadile bua kuenza bua wewe kukola mu nyuma. (Musambu 17:3; 139:23, 24) Bulelela, utshidi ne ndambu wa malu a kukumbaja. Pashishe, pamutu pa kuteketa mu mikolo bua malu awudi kuyi muanji kukumbaja, sengelela Nzambi ne mêyi masunguluke bua akuambuluishe uye kumpala mu nyuma. Ikala umulomba nanku misangu ne misangu. Bushuwa, udi mua kupangadika bua kusambila mutantshi mule lumingu ludi lulua elu, kulomba bua ‘ndekelu wa bionso wikale mukumbane.’ Ke tshiudi kabidi ne bua kuenza pawudi ubala mvese wa tshidimu etshi. Paudi usambila, shindamena pa malu audi nawu adi mua kukupingaja tshianyima, kukupungija anyi kukupambuisha mu mudimu wa Nzambi ne bua mushindu uudi mua kuepuka malu aa.​—Efeso 6:11, 13, 14, 18.

Lombayi Nzambi bua nuikale batuishibue bikole

12. Bua tshinyi bena Kolosai bavua nangananga ne bua kuikala “batuishibue bikole”?

¹² Epafa uvua kabidi ulomba bualu bukuabu buvua ne mushinga wa bungi buvua ndekelu wa bionso mua kufikishisha bena Kolosai ku dianyishibua kudi Nzambi. Bualu abu budi kabidi ne mushinga kutudi. Mbualu kayi abu? Wakasambila bua bikale “batuishibue bikole bua malu onso  adi Nzambi musue.” Kuvua butontolodi ne nkindi mibi, bintu bivua munkatshi mua bivua bimueneka bu ntendelelu mulelela pabi bikale bia mafi. Tshilejilu, bavua benzeja bena Kolosai bua bikale basekelela amue matuku, bajila biakudia anyi benza mafesto, muvuabu benza kale mu ntendelelu wa bena Yuda. Balongeshi ba dishima bavua batamba kushindamena pa banjelo bavua bikale nyuma ya bukole ivua Nzambi utuma bua kufila Mikenji kudi Mose. Fuanyikijabi ne: wewe ke udibu bakamika bua kuenza malu a buena aa! Bushuwa, kuvua malongesha mapite bungi avua makondakane.​—Galatia 3:19; Kolosai 2:8, 16-18.

13. Ndituishibua bua bualu kayi divua mua kuambuluisha bena Kolosai, ne mmunyi mudidi mua kutuambuluisha petu?

¹³ Paulo wakajadika mêyi ende pakashindamenaye pa mudimu uvua nawu Yezu Kristo. Wakamba ne: ‘Bu munuakitabuja Kristo Yezu Mukalenge, [tungunukayi ne kuenda nende mu buobumue]; nuikale ne miji yenu miedibue munda muende, nuikale bashibue munda muende, ne nuikale bajadikibue mu ditabuja dienu, bu munuakayishibua.’ Bushuwa, anu muvuabi bua bena Kolosai, tuetu petu tudi ne bua kuikala batuishibue tshishiki bua mudimu udi nawu Kristo mu malu adi Nzambi mulongolole ne mu nsombelu wetu. Paulo wakumvuija ne: ‘Bualu bua munda mua Kristo nkayende mudi muikale tshiuwidi tshijima tshia bunzambi mu tshikadilu tshia mubidi. Ne nuenu nudi [ne tshiuwidi bua bualu buende yeye] udi mutu wa makalenge onso ne makokeshi onso.’​—Kolosai 2:6-10.

14. Bua tshinyi ditekemena divua bualu bulelela kudi bantu bavua mu Kolosai?

¹⁴ Bena Kolosai bavua bena Kristo bela manyi a nyuma. Bavua ne ditekemena disunguluke dia kupeta muoyo mu diulu, ne bavua ne bijadiki bionso bivua bibasaka bua kulama ditekemena adi bimpe. (Kolosai 1:5) ‘Disua dia Nzambi’ divua dia se: bena Kolosai bikale batuishibue bikole bua se: ditekemena diabu ndilelela. Bavuaku ne bua kuelakana bua ditekemena adi anyi? Tòo! Kadi lelu bantu badi ne ditekemena didi Nzambi mufile dia kuikala ne muoyo mu mparadizu pa buloba badi pabu ne bua kuelakana anyi? Nansha kakese! Ditekemena dia mushinga adi mbumue bua ku ‘malu adi Nzambi musue.’ Mpindieu tangila nkonko eyi: Biwikala udienzeja bua kuikala munkatshi mua bantu ba mu “musumba munene” wapanduka ku “dikenga dinene,” ditekemena diebe ndilelela menemene anyi? (Buakabuluibua 7:9, 14) Didiku munkatshi mua ‘malu onso adi Nzambi musue audi mutuishibue bikole’ bua bualu buawu anyi?

15. Paulo wakatela mulongolongo wa malu kayi muvua ditekemena?

¹⁵ “Ditekemena” ditudi tuamba muaba eu ki ndijinga didi kadiyi disunguluke anyi bualu bufuikakaja budi kabuyi mua kukumbana nansha. Malu mulongolongo akavua Paulo muleje bena Lomo adi mua kutuambuluisha bua kumvua muanda eu. Mu malu au, bualu buonso budiye mutele budi bupetangana ne budi bubulonda anyi budi bukuatakaja kudibu. Tangila muaba udi Paulo uteka “ditekemena” mu mêyi ende aa: ‘Tutumbile bietu mu ntatu, tumanye ne: ntatu idi yenzeja ditantamana, ne ditantamana didi dienzeja dijadikibua, ne dijadikibua didi dienzeja ditekemena. Ne ditekemena kadiena difuisha bundu, bualu bua [dinanga] dia Nzambi diakitshikila mu mitshima yetu [bua bualu bua] nyuma muimpe.’​—Lomo 5:3-5.

16. Pawakalonga bulelela bua mu Bible, nditekemena kayi diwakapeta?

¹⁶ Pavua Bantemu ba Yehowa bakumanyishe mukenji wa mu Bible musangu wa kumpala, kuvua bulelela kampanda buvua bukoke ntema yebe, tshilejilu, bulelela bua tshidi tshienzekela bantu padibu bafua anyi bulelela budi butangila dibika dia ku lufu. Bua bantu ba bungi, bualu bua kumpala bupiabupia buvuabu bumvue buvua ditekemena dia mu Bible dia kuikala ne muoyo mu mparadizu pa buloba. Vuluka pawakumvua dilongesha edi musangu wa kumpala. Bushuwa edi nditekemena dilenga, bualu masama ne bukulakaje kabiakuikalaku kabidi to, udi mua kuikala anu ne muoyo usanka ne bia ku mudimu webe, bantu ne nyama nebasombe mu ditalala! (Muambi 9:5, 10; Yeshaya 65:17-25; Yone 5:28, 29; Buakabuluibua 21:3, 4) Edi nditekemena dilenga diudi mupete.

17, 18. (a) Mmunyi muvua mulongolongo wa malu avua Paulo muleje bena Lomo makufikishe ku “ditekemena”? (b) Nditekemena dia mushindu kayi didibu baleje mu Lomo 5:4, 5, ne udi ne ditekemena dia buena edi anyi?

¹⁷ Pakapita matuku, bantu bakabanga pamu’apa kukuluisha anyi kukukengesha. (Matayo 10:34-39; 24:9) Ke mudibi bienzeke nansha matuku adi panshi aa. Mu matunga mavule mbapawule nzubu ya Bantemu anyi mbabavuije bena tshimuangi. Mbakengeshe bamue, kubanyenga ne mikanda itubu balonga nayi Bible ne kubendeshila ne ngumu ya dishima ku tudiomba ne mu bikandakanda. Kadi nansha bakukengeshe mushindu kayi, amu mudi Lomo 5:3  wamba, udi mua kutumbila mu ntatu, ne neumone muakupeteshabi disanka. Anu muakafunda Paulo, dikenga diakalela ditantamana munda muebe. Pashishe ditantamana diakakufikisha ku dijadikibua anyi dianyishibua. Uvua mumanye bimpe ne: uvua wenza tshivua tshiakane anyi disua dia Nzambi, kukujadikilabi ne: Nzambi uvua ukuanyisha. Bilondeshile mêyi a Paulo, uvua udiumvua wewe muikale ‘mujadikibue.’ Paulo wakatungunuka wamba ne: ‘dijadikibua didi dienzeja ditekemena.’ Bualu ebu budi mua kumueneka bu budi bukemesha. Bua tshinyi Paulo wakatela “ditekemena” ku ndekelu menemene kua malu onso aa? Wewe kuvua mupete ditekemena kuonso aku pawakumvua lumu luimpe musangu wa kumpala anyi?

¹⁸ Bushuwa, muaba eu Paulo kêna wakula bua meji akatuvuila kumpalampala a ditekemena dia kupeta muoyo mupuangane to. Bualu budiye wamba  apa mbupite malu aa; mbua mushinga mukole, budi butusaka ku dienza tshintu kampanda. Patudi tutantamena ntatu ne lulamatu ne tufika ku dijingulula ne: Nzambi udi utuanyisha, bidi bikolesha ditekemena dituvua nadi kumpala. Didi dilua mpindieu dia bushuwa menemene ne dishindama. Ditekemena edi dikolesha didi dikenka dibalakana. Didi dimueneka mu bumuntu buetu bujima ne mu ngikadilu yetu yonso. ‘Ne ditekemena kadiena difuisha bundu, bualu bua dinanga dia Nzambi diakitshikila mu mitshima yetu [bua bualu bua] nyuma muimpe.’

19. Mmunyi muudi ne bua kuikala utela ditekemena diebe mu masambila ebe a ku dituku dionso?

¹⁹ Epafa uvua usambila ne muoyo mujima bua bana babu ba balume ne ba bakaji ba mu Kolosai bashale baleja ne: mbatuishibue bua malu avua alua kumpala, bikale “batuishibue bikole bua malu onso adi Nzambi musue.” Bia muomumue, tuetu bonso tuikale tusambila Nzambi pa tshibidilu tumuambila bua ditekemena dietu. Paudi usambila pa nkayebe, ikala utela ditekemena diudi nadi bua bukua-panu bupiabupia. Leja Yehowa mushindu uudi mubuindile ne muoyo mujima, mutuishibue bikole bua se: nebulue. Musengelele bua akoleshe ne akuambuluishe utuishibue bikole. Anu muvua Epafa usambila bua bena Kolosai bikale “batuishibue bikole bua malu onso adi Nzambi musue,” ikala usambila pebe nanku. Ikala usambila nanku misangu ne misangu.

20. Bikala bantu bakese bumbuka mu njila wa bulelela, bua tshinyi kabiena ne bua kututekesha mu mikolo?

²⁰ Kupetshi ditanaji, kuteketshi ku muoyo bua padi bantu bonso kabayi bashala bakumbane ne batuishibue bikole to. Bamue badi mua kupangila, kusesuka anyi mene kubilekela. Biakenzekela bantu bavua badia banua ne Yezu, bapostolo bende. Kadi pakalua Yudasa mutungidianganyi, bapostolo bakuabu bakateketa anyi peshi kubilekela anyi? Nansha! Petelo wakatela Musambu wa 109:8 bua kuleja ne: muntu mukuabu uvua ne bua kuangata muaba wa Yudasa. Bakasungula muntu uvua mua kumupingana, ne basadidi ba Nzambi ba lulamatu bakatungunuka ne kuenza mudimu wabu wa buambi ne tshisumi. (Bienzedi 1:15-26) Bavua bapangadike bua kuikala bakumbane ne batuishibue bikole.

21, 22. Mmu mushindu kayi muikala bantu mua kumona muudi mukumbane ne mutuishibue bikole?

²¹ Udi mua kuikala mujadike bimpe ne: bantu kabakupanga kumona muwikala mukumbane ne mutuishibue bikole bua malu onso adi Nzambi musue. Nebamone ne nebanyishe. Mbanganyi abu?

²² Bushuwa, bana benu ba balume ne ba bakaji badi bakumanye ne bakunange ke bamona. Nansha bikala ba bungi kabayi bakuambilabi, bualu buenzeka nebuikale bufuanangane ne tshitudi tubala mu 1 Tesalonike 1:2-6 ne: ‘Tudi tusakidila Nzambi misangu yonso bua buonso buenu tutela mêna enu mu milombo yetu, katuyi tulekela kuvuluka mudimu wenu wa ditabuja ne mudimu wenu mukole wa dinanga ne dinanukila dienu dia mu ditekemena dia Mukalenge wetu Yezu Kristo, ku mêsu kua Nzambi udi kabidi Tatu wetu. Bua lumu luimpe lutudi tuamba kaluakalua kunudi anu mu dîyi nkayadi, kadi luakalua mu bukole ne mu nyuma muimpe ne [dituishibua dikole]; ne nuenu nuakalua bidikiji betu ne ba Mukalenge.’ Bena Kristo ba lulamatu badi bakumanye nebumvue pabu muomumue padibu bakumona ‘muikale mukumbane ne mutuishibue bikole bua malu onso adi Nzambi musue.’​—Kolosai 1:23.

23. Mu tshidimu tshia 2001, ndipangadika kayi diudi ne bua kuikala nadi?

²³ Bulelela, Tatu webe wa mu diulu neamone ne neasanke. Ikala mujadike bualu abu. Bua tshinyi? Bualu udi mukumbane ne mutuishibue bikole “bua malu onso adi Nzambi musue.” Paulo wakafundila bena Kolosai bua kubakankamija bua bende ‘biakanangane ne [Yehowa] ku dimusankisha dionso.’ (Kolosai 1:10) Ntshia bushuwa, bantu badi kabayi bapuangane badi mua kumusankisha mu malu onso. Ke tshiakenza bana betu ba mu Kolosai. Nansha bena Kristo badi bakumanye badi benza pabu nanku mpindieu. Wewe pebe udi mua kuenza nanku! Ke bualu kayi, mu tshidimu tshia 2001, masambila ebe a dituku dionso ne bionso biwikala wenza bijadike ne: udi mudisuike bua ‘ndekelu wa bionso wikale mukumbane ne mutuishibue bikole bua malu onso adi Nzambi musue.’

Udi mua kuvuluka anyi?

• ‘Kuikala bakumbane’ kudi kumvuija malu kayi?

• Mmalu kayi adi akutangila audi ne bua kuikala utela mu masambila ebe?

• Anu bu mudi Lomo 5:4, 5 wamba, nditekemena dia mushindu kayi diudi ne bua kuikala nadi?

• Dilonga edi ndikusake bua kuikala ne tshipatshila kayi mu 2001?

[Nkonko ya dilonga]

[Tshimfuanyi mu dibeji 20]

Epafa uvua usambila bua bana babu bikale bakumbane, batuishibue bikole bua Kristo ne bua ditekemena diabu

[Bimfuanyi mu dibeji 23]

Bantu bakuabu miliyo mivule badi ne ditekemena ne dituishibua dikole biudi pebe nabi