Udi muvuluke anyi?

Uvuaku muanyishe dibala dia nimero ya ndekelu ya Tshibumba tshia Nsentedi anyi? Nanku anji tetabi bua kuandamuna nkonko idi ilonda eyi:

• Ntshinyi tshidi ne mushinga bituasua kujikija tshilumbu ne muntu?

Tshia kumpala tudi ne bua kumanya se: tuetu bonso meji ne ngenyi mibi bitu bituvuila. Pashishe tudi ne bua kukonkonona bimpe menemene bua kumanya ne: ntuetu mbadi bakebeshe tshilumbu etshi, pamutu pa kuamba muntu mukuabu.​—15/8, dibeji 23.

• Ndîba kayi dialua “bikondo bia kujadikabo tshiakabidi malu onso” bidibu bambe mu Bienzedi 3:21?

Dijadika malu tshiakabidi didi dienzeka mu bitupa bibidi. Tshia kumpala: kudi dijadika malu tshiakabidi mu mparadizu wa mu nyuma didi dienda dienzeka mpindieu katshia mu 1919. Dijadika dikuabu dia malu tshiakabidi nedienzeke palua kabidi buloba ebu mparadizu mulelela.​—1/9, dibeji 17, 18.

• Bilondeshile Nsumuinu 6:6-8, mmunyi mudi kankenene kakayi ne mukalenge, kadi kikale katupesha tshilejilu tshimpe?

Kutu tshimamuende wa tunkenene, ne tshituku anu bua kuela mayi ne kutoya tukuabu tunkenene. Tunkenene tutu ne tshisumi tshia dikema, ne ke mutudi petu ne bua kuikala nanku, tudi ne bua kudienzeja bua kulengeja mudimu wetu, nansha padiku kakuyi muntu udi ututangila.​—15/9, dibeji 26.

• Bu muvuabu batape Yoshiya mputa munene mu mvita, pabi mulayi wa Huleda udi mu 2 Bakelenge 22:20 wamba ne: Yoshiya uvua ne bua kufua ‘talalaa,’ tudi mua kuamba ne: mulayi eu uvua mulelela anyi?

Eyowa, wakafua talalaa anyi mu ditalala bualu wakafua kumpala kua dikenga diakalua mu 609-607 K.B.B. pakatshintshimikabu Yelushalema kudi bena Babulona ne kumubutulabu.​—15/9, dibeji 30.

• Bua tshinyi Solomo uvua utua mukaji makumbu pakambaye ne: udi bu ‘ntole mukaji udi muena dinanga, bu dishina dia ngulungu didi dilengele ku mêsu’? (Nsumuinu 5:18, 19)

Dishina dia ngulungu peshi dia mbuji wa ku mikuna ditu ne tshimuenekelu tshimpe tshia lutulu. Kadi, udi mua kusombela ne kulelela bana mu mbuebue, miaba mikole bua kufikapu idi biakudia bikale bikese.​—1/10, dibeji 30, 31.

• Henry Grew ne George Storrs bavua banganyi?

Bantu balume babidi aba bavua ne muoyo mu bidimu bia 1800 ne bavua balongi ba Bible ba tshisumi. Grew wakalonga ne: dilongesha dia Busatu Bunsantu, ne dia se: anyima katu ufua pamue ne dia inferno wa kapia ki nga mu Bible to. Storrs wakajingulula ne: bamue bantu nebapete muoyo wa kashidi pa buloba. Bubidi buabu bavua badianjidile Charles Taze Russell, eu wakatuadija kupatula tshibejibeji etshi mu 1879.​—15/10, dibeji 26-30.

• Mmunyi mudi Bantemu ba Yehowa bangata diondapa muntu ne mashi ende nkayende?

Bu mudi malongesha abu mikale a mu Bible, kabatu bafila mashi abu ne pashishe bitaba bua kubelawu mu mubidi to. Muena Kristo yonso udi ne bua kudiangatshila dipangadika bua tshienzabu ne mashi ende dîba didibu munkatshi mua dimupanda, peshi padibu bamuenza mateta anyi padibu bamuondapa. Udi ne bua kukonkonona tshidi Bible wamba bua mashi ne udi ne bua kuvuluka se: mmudilambule yeye mujima kudi Nzambi.​—15/10, dibeji 30, 31.

• Dilonga divuabu benze ku mbangilu kua tshidimu etshi divua dileje dijinga kayi dinene didi nadi Bantemu ba Yehowa pa buloba bujima?

Badi dijinga ne Nzubu ya Bukalenge mipite pa 11 000 mu matunga adi kaayi ne bubanji bua bungi. Bena Kristo ba mu matunga a bungi badi bafila mapa adibu benza nawu mudimu wa kuibaka miaba mimpe ya kuenzela bisangilu.​—1/11, dibeji 30.

• Ngimue miaku kayi ya mu tshiena-Greke tshia kale idi Bible utela idi itangila ntendelelu?

Umue wa kudiyi n’lei·tour·giʹa, utudi bakudimune ne: “mudimu wa diambuluisha bantu.” Mukuabu n’la·treiʹa, utudi bakudimune ne: “mudimu wa tshijila.” (Ebelu 10:11, NW’; Luka 2:36, 37)​—15/11, dibeji 11, 12.

• Ndilongesha kayi dinene ditudi mua kupetela mu muyuki wa mu Bible udi wakula bua Adama ne Eva?

Kujinga bua kuela Yehowa Nzambi nyima ndibula lungenyi dia dikema.​—15/11, dibeji 24-27.

• Mbijadiki kayi bia mu Bible bidi bileja ne: Nzambi utu upesha basadidi bende bukole?

Davidi, Habakuka ne mupostolo Paulo, buonso buabu badi batupesha bijadiki bia se: Yehowa Nzambi uvua mubapeshe bukole peshi makanda. (Musambu 60:12; Habakuka 3:19; Filipoi 4:13) Ke bualu kayi tuikalayi bajadike ne: Nzambi mmusue, ne udi ne bukole bua kutupesha makanda.​—1/12, dibeji 10, 11.