Dinanga diebe ditu ne mikalu anyi?

“Udi ne bua kunanga [muntu nebe] bu muudi mudinange wewe.”​—MATAYO 22:39, MML.

1. Bituikala banange Yehowa, bua tshinyi tudi ne bua kunanga kabidi muntu netu?

 PAKAKONKABU Yezu mukenji uvua mupite mikuabu, wakandamuna ne: “Udi ne bua kunanga [Yehowa Nzambi] webe ne mutshima webe wonso ne [anyima peshi] muoyo webe wonso ne lungenyi luebe luonso.” Pashishe wakatela mukenji muibidi mufuanangane ne wa kumpala eu ne: “Udi ne bua kunanga [muntu nebe] bu muudi mudinange wewe.” (Matayo 22:37, 39, MML) Kakuyi mpata, kunanga muntu netu ntshimanyinu tshia muena Kristo. Ntshia bushuwa, tuetu bikale banange Yehowa, tudi ne bua kunanga muntu netu. Bua tshinganyi? Bualu patudi tutumikila Dîyi diende (pabi Dîyi diende dikale ditulomba bua kunanga muntu netu), tudi tuleja ne: tudi banange Nzambi. Ke bua tshinyi tuetu katuyi banange bana betu bena Kristo, katuena banange Nzambi tshia bushuwa to.​—Lomo 13:8; 1 Yone 2:5; 4:20, 21.

2. Ndinanga dia mushindu kayi ditudi ne bua kuikala nadi kudi muntu netu?

² Pakamba Yezu ne: tudi ne bua kunanga muntu netu, kavua wakula bua bulunda bua patupu to. Ne uvua wakula bua dinanga didi dishilangane ne ditu pa tshibidilu mu mêku anyi pankatshi pa mulume ne mukajende. Uvua wakula bua dinanga didi Yehowa nadi kudi basadidi bende badilambule ne bua didibu buobu pabu nadi kudiye. (Yone 17:26; 1 Yone 4:11, 19) Mufundi mukuabu muena Yuda (uvua Yezu mumone ne: uvua wakula ne meji) wakitaba tshivua Yezu wamba bua se: muntu udi ne bua kunanga Nzambi “ne muoyo mujima, ne lungenyi luonso ne bukole buonso.” (Mâko 12:28-34, MMM) Uvua muambilemu. Dinanga didi muena Kristo nadi kudi Nzambi ne kudi muntu nende didi ditangila mutshima ne lungenyi luende. Didi difumina mu mutshima wende ne lungenyi luende ke ludi ludilombola.

3. (a) Mmunyi muvua Yezu muleje “mulongeshi wa Mikenji” ne: kavua ne bua kuikala ne mikalu pa bidi bitangila uvuaye umona bu muntu nende? (b) Mmunyi mudi mufuanu wa Yezu utangila bena Kristo lelu’eu?

 ³ Anu mudi Luka uleja, pakamba Yezu ne: tudi ne bua kunanga muntu netu, “mulongeshi mukuabo wa Mikenji” wakebeja Yezu ne: “[Muntu nanyi] nnganyi?” Yezu wakamuandamuna ne mufuanu. Wakamulondela ne: bavua bakume muntu mukuabu, bamunyenge biende bionso ne bamushiye mufue tshipuka kumpenga kua njila. Muakuidi umue kupitshila muaba au, pashishe muena Lewi mukuabu pende kupitshilapu. Bonso babidi kuenzabu anu bu bavua kabayi bamumone to. Panyima, muena Samalea wakavuila mu njila au, kumonaye muntu au uvuabu batape mputa, yeye kumuambuluisha bikole. Ku basatu aba nnganyi uvua muleje muntu eu uvuabu batape mputa ne: mmuntu nende? Diandamuna divua ditoke. (Luka 10:25-37, MML) Bivua mua kuikala bibungamije mulongeshi wa Mikenji pakumvuaye Yezu wamba ne: muena Samalea ke uvua muntu nende mulenga kupita muakuidi ne muena Lewi. Bulelela, Yezu uvua ulongesha muntu au bua kunangaye muntu nende ne dinanga didi kadiyi ne mikalu. Bena Kristo batu pabu ne dinanga dia mushindu’eu. Tangila bantu badibu banange.

Dinanga munda mua dîku

4. Mmuaba kayi udi muena Kristo ulejila dinanga kumpala?

⁴ Bena Kristo batu banange bena mu dîku diabu: bakaji mbanange babayabu, balume mbanange bakaji babu, ne baledi mbanange bana babu. (Muambi 9:9; Efeso 5:33; Tito 2:4) Bulelela, mu mêku a bungi bantu batu pa tshibidilu ne dinanga. Kadi ngumu ya mabaka adi mafue, dikengeshangana mu mabaka ne bana balekelela anyi badibu bakengesha, idi ileja ne: lelu dîku didi mu lutatu, ne kabidi se: dinanga ditu nadi bantu mu dîku kadiena dikumbana bua kulama dîku mu buobumue nansha. (2 Timote 3:1-3) Bua bena Kristo kuikalabu bimpe menemene mu mêku abu, badi ne bua kuikala ne dinanga dia buena didi nadi Yehowa ne Yezu.​—Efeso 5:21-27.

5. Nnganyi udi baledi balomba diambuluisha bua kukolesha bana babu, ne ntshinyi tshidi baledi ba bungi bapete?

⁵ Baledi bena Kristo badi bamona bana babu bu tshiuma tshidi Yehowa mubapeshe, ne badi bamulomba bua abambuluishe bamone mua kubakolesha bimpe. (Musambu 127:3-5; Nsumuinu 22:6) Nenku badi benza muabu muonso bua kuikala ne dinanga dia bena Kristo, dinanga didi dibambuluisha bua kukuba bana babu ku malu adi mua kubanyanga. Ke bualu kayi baledi bena Kristo ba bungi mbapete disanka dia buena dia mamu mukuabu wa mu ditunga dia Pays-Bas. Yeye mumane kumona muakatambula muanende wa balume (umue wa ku bantu 575 badi batambule tshidimu tshishale mu Pays-Bas), wakafunda mêyi adi alonda aa: “Mpindieu, mudimu undi muenze bidimu 20 wapatudi bipeta. Dîba dionso ne makanda andi mujimije, ntatu ne tunyinganyinga, mudimu mukole ne dibungama bimvua nabi, ndi mubipue muoyo.” Mamu eu udi ne disanka dia bungi bua mudi muanende mudisunguile bua kuenzela Yehowa mudimu. Munkatshi mua bamanyishi 31 089 badi bafile luapolo mu Pays-Bas tshidimu tshishale, ba bungi bavua babalongeshe kudi baledi babu bua kunanga Yehowa.

6. Mmunyi mudi dinanga dia bena Kristo mua kukolesha malanda mu dibaka?

⁶ Paulo wakabikila dinanga ne: “tshisuikidi [tshipuangane tshia buobumue],” ne didi mua kukuba dibaka nansha mu bikondo bia ntatu mikole. (Kolosai 3:14, 18, 19; 1 Petelo 3:1-7) Muntu mulume mukuabu (wa mu Rurutu, tshidiila tshikese tshidi mutantshi wa kilometre 700 ne Tahiti) wakabanga kulonga Bible ne Bantemu ba Yehowa, kadi mukajende kavua musue dilonga edi nansha kakese. Nenku wakangata bana, kushiyaye bayende, e kuya kusombela nabu mu Tahiti. Kadi bua mukuetu wa balume eu kulejaye ne: uvua anu munange mukajende, uvua umutumina makuta, umuela nshinga misangu ne misangu bua kumuebeja ni kuvua tshintu tshivuaye yeye anyi bana natshi dijinga. Wakenza muende muonso bua kukumbaja malu avua Buena-Kristo bumulomba. (1 Timote 5:8) Uvua usambila misangu yonso bua mukajende ne bana bapingane, ne ndekelu wa bionso mukajende wakapingana. Pakapinganaye, mukuetu wa balume eu wakasomba nende mu “dinanga ne ditantamana ne kalolo.” (1 Timote 6:11) Mu 1998, muntu mulume eu wakatambula. Ne wakasanka bikole pakalua mukajende kuitaba bua kulonga Bible. Dilonga edi divua dimue dia ku malonga 1 351 adi bana betu balombole tshidimu tshishale mu tshitupa tshidi Betele wa mu Tahiti utangila.

7. Bilondeshile muntu mukuabu wa mu Allemagne, ntshinyi tshivua tshivuije dibaka diende dikole?

⁷ Mu ditunga dia Allemagne, muntu mulume mukuabu uvua ubengela mukajende bua kulonga  bulelela bua mu Bible, bualu buende yeye uvua mutuishibue ne: Bantemu ba Yehowa bavua bakeba kushima mukajende. Kadi kunyima, wakafundila Ntemu uvua muyukile ne mukajende musangu wa kumpala, wamba ne: “Tuasakidila bua muudi mufikishe mukajanyi mu Bantemu ba Yehowa. Kumpala, tshivua ne dikisha to bualu mvua mumvue banuamba malu mabi a bungi be. Kadi mpindieu pandi mbuela mu bisangilu bienu ne mukajanyi, ndi mmona ne: mvua mutupakane bikole. Ndi mumanye ne: tshindi ndonga mpindieu mbulelela, ne bulelela ebu ke budi bukoleshe dibaka dietu.” Munkatshi mua Bantemu ba Yehowa 162 932 ba mu Allemagne ne 1 773 ba mu bidiila bidi Betele wa mu Tahiti utangila, mudi mêku a bungi adi dinanga dia Nzambi diambuluishe bua kusomba mu buobumue.

Tunangayi bena Kristo netu

8, 9. (a) Nnganyi udi utulongesha bua kunanga bana betu, ne dinanga didi ditusaka bua kuenza tshinyi? (b) Fila tshilejilu tshia mushindu udi dinanga mua kuambuluisha bana betu bua kukuatshishangana.

⁸ Paulo wakambila bena Kristo ba mu Tesalonike ne: “Nuenu nudi bayishibue kudi Nzambi bua kunangangana.” (1 Tesalonike 4:9) Kakuyi mpata, bantu badi ‘bayisha kudi Yehowa’ mbanangangane. (Yeshaya 54:13) Dinanga diabu didi dimuenekela mu bienzedi, anu muakaleja Paulo pakambaye ne: “Bua dinanga dienu nukuatshilangane mudimu.” (Galatia 5:13; 1 Yone 3:18) Badi bakuatshilangana mudimu eu, tshilejilu, padibu baya kutangila bana babu badi basama, padibu bakankamija badi babungame ne bambuluisha badi batekete. (1 Tesalonike 5:14) Dinanga dilelela dia bena Kristo ditudi nadi didi didiundishisha mparadizu wetu wa mu nyuma.

⁹ Mu Tshisumbu tshia Ancón (tshimue tshia ku bisumbu 544 bia mu ditunga dia Équateur), bana betu bakaleja dinanga diabu patoke. Bu muvua malu a mfranga kaayi enda bimpe, bakashala kabayi ne mudimu udi upetesha mfranga. Nenku bua kupeta mfranga, bana betu aba bakabanga kupanyisha biakudia kudi balobi ba mu musoko au dîba divuabu bapingana pambelu bafuma ku diloba butuku. Muntu yonso uvua wenza mudimu, nansha bana pabu bavua bawenza. Bavua batuadija pa dîba 1 wa butuku bajikija kulamba biakudia pa dîba 4 wa dinda, divua balobi bapingana kumbelu. Bana betu bakabanyangana mfranga yakapetabu bilondeshile majinga abu. Diambuluishangana dia mushindu’eu diakaleja muvuabu ne dinanga dia bushuwa.

10, 11. Mmunyi mutudi mua kuleja ne: tudi banange bana betu batudi katuyi bamanye?

¹⁰ Kadi, katuena ne bua kunanga anu bena Kristo  batudi bamanye nansha. Mupostolo Petelo wakamba ne: ‘Nunange bana benu [bonso] ba mu Kristo.’ (1 Petelo 2:17) Tudi banange bana betu bonso bualu badi batendelela netu Yehowa Nzambi. Tudi mua kubaleja dinanga edi mu bikondo bia dikenga. Tshilejilu, mu tshidimu tshia mudimu tshia 2000, mvula mikole yakaloka, mâyi kusapalalawu, kunyanga bintu mu ditunga dia Mozambique; ne mvita ya munanunanu ya mu ditunga dia Angola mmishiye bantu ba bungi bianza bitupu. Malu aa mmakuate ba bungi ba ku bana betu 31 725 badi mu Mozambique ne 41 222 badi mu Angola. Ke bua tshinyi Bantemu ba mu ditunga dia Afrique du Sud (didi pabuipi ne matunga aa) bavua batume bintu bia bungi bua kuambuluisha bana babu aba. Mbaleje dinanga diabu mu ditaba bua kufila biabu bivua “bisambuke” kudi bana babu badi mu dikenga.​—2 Kolinto 8:8, 13-15, 24, MMM.

¹¹ Dinanga didi dimueneka kabidi padi bana betu ba mu matunga mavule bafila mapa bua mudimu wa diasa Nzubu ya Bukalenge ne Nzubu ya Mpuilu mu matunga mapele. Tuangate tshilejilu tshia Bidiila bia Salomon. Nansha mudi ndululu ya bungi mikalemu, bamanyishi mbavule ne bantu 6 pa lukama tshidimu tshishale, bonso basanga badi mpindieu 1 697. Bakalongolola bua kuibaka Nzubu wa Mpuilu. Nansha muvua bantu ba bungi ba mu bidiila ebi banyeme bua ndululu, bena budisuile bakafuma mu Australie bua kuasa Nzubu wa Mpuilu. Kadi bangabanga ne bena budisuile aba kupinganabu kuabu, bakanji kulongesha bana betu ba mu Salomon mushindu wa kujikija tshishimikidi. Milonda ne bintu bia biamu bimana kulongolola bua kuibaka nabi Nzubu eu biakafuma mu Australie, ne pajika nzubu eu mulenga wa ntendelelu (mu tshikondo tshidi bantu ba bungi balekele nzubu ivuabu bibaka) dîna dia Yehowa ne dinanga dia bana betu nebiende lumu lulenga.

Tudi banange ba pa buloba anu mudi Nzambi mubanange

12. Mmunyi mutudi tuidikija Yehowa mu mushindu utudi tuangata bantu badi kabayi mu ntendelelu wetu?

¹² Tudi banange anu bena mu dîku dietu ne bena Kristo netu anyi? Katuakuenza nanku to bituasua ‘kuidikija kuenza mudi Nzambi wenza.’ Yezu wakamba ne: ‘Nzambi wakatamba kusua ba pa buloba, yeye wakabapa Muanende umuepele mulela bua muntu yonso wamuitabuja kafu biende, kadi ikale ne muoyo wa tshiendelele.’ (Efeso 5:1; Yone 3:16; tuetu mbadi baladike maleta.) Tudi tuenzela bantu bonso (nansha badi kabayi mu ntendelelu wetu) malu ne dinanga anu mudi Yehowa Nzambi ubenzelawu. (Luka 6:35, 36; Galatia 6:10) Tudi tubenzela malu aa nangananga patudi tubayisha lumu luimpe lua Bukalenge ne tubambila bualu bunene budi Nzambi mubenzele ne dinanga. Malu atudi tuyisha aa adi mua kufikisha bantu bonso badi baateleja ku lupandu.​—Mâko 13:10; 1 Timote 4:16.

13, 14. Nng’amue malu kayi avua bana betu benze mu ntatu ya bungi bua kuleja muvuabu banange bantu bavua kabayi Bantemu?

¹³ Angata mpindieu tshilejilu tshia bampanda-njila ba pa buabu banayi ba mu ditunga dia Népal. Bavua babatume bua kuenzela mudimu ku Sud-Ouest kua ditunga edi, mu bidimu bitanu bishale ebi, mbayishe ne lutulu mu tshimenga tshinene ne mu misoko idi ku mpenga bua kuleja dinanga diabu. Bua buobu kuyisha bantu bonso ba muaba eu, misangu mivule batu benza luendu lua mêba a bungi ku makalu mu munya wa dikema (40°C). Dinanga diabu ne “dinanukila diabo mu mudimu muimpe” diakapatuisha tshipeta tshilenga, bakenza kasumbu ka dilonga dia mukanda mu musoko mukuabu. (Lomo 2:7) Mu ngondo muisatu wa 2000, bantu 32 bakalua bua kuteleja muyuki wa patoke wakenza mutangidi wa tshijengu. Ditunga dia Népal divua ne bamanyishi 430 tshidimu tshishale, bungi buabu mbuvule ne bantu 9 pa lukama. Kakuyi mpata, Yehowa udi ubenesha lukunukunu ne dinanga bidi nabi bana betu ba mu ditunga edi.

¹⁴ Mu ditunga dia Colombie bampanda-njila ba pa buabu ba matuku makese bakaya kuyisha mu bena Inde ba-Wayuu. Bua kumonabu mua kubayisha, bampanda-njila aba bavua ne bua kulonga muakulu wa ba-Wayuu. Dinanga diabu diakabapetesha disanka bualu bantu 27 bakabuela mu muyuki wa patoke, nansha muvuaku mvula wa bungi. Lukunukunu ne dinanga bia buena bia bampanda-njila aba mbifikishe ku divula dia bantu 5 pa lukama mu Colombie, ne bamanyishi bonso basanga badimu badi 107 613. Mu ditunga dia Danemark muanetu wa bakaji mukulakaje uvua musue kuyisha bantu lumu luimpe, kadi uvua mulema. Wakapeta dikima dia kubanga kufundila bantu bavua basue kuteleja lumu luimpe mikanda. Patudi tuakula apa, udi ufundilangana mikanda ne bantu 42, ulonga Bible ne bantu 11. Muanetu wa bakaji eu ngumue wa ku bamanyishi 14 885 badi bafile luapolo mu Danemark tshidimu tshishale.

 Nangayi baluishi benu

15, 16. (a) Mmunyi muakamba Yezu ne: dinanga dietu kadiena ne bua kuikala ne mikalu? (b) Mmunyi muvua bana betu buomekela bujitu bajikije mu dinanga tshilumbu tshia muntu uvua mushiminyine Bantemu ba Yehowa malu?

¹⁵ Yezu wakambila mumanyi wa Mikenji bua kumonaye muena Samalea bu muntu nende. Yezu wakaya mene kule mu Muyuki wende wakenzaye pa Mukuna pakambaye ne: “Nukadi bumvue muvuabo bamba ne: Unange muena kuenu, ubenge muluishi. Meme ndi nnuambila ne: Nangayi baluishi benu, nusambile bua badi banukengesha. Nanku nenuikale bana ba Tatu wenu udi mu diulu.” (Matayo 5:43-45, MMM) Nansha padi muntu kampanda utuenzela malu mabi, tuetu tudi tukeba bua ‘kuenza malu mimpe bua kutshimuna bubi.’ (Lomo 12:19-21, MMM) Padiku mushindu, tudi tumumanyisha bulelela budi buikale tshiuma tshietu tshia mushinga mukole.

¹⁶ Mu ditunga dia Ukraine, tshiena-bualu tshia mu tshikandakanda kampanda (Kremenchuk Herald) tshiakamba mudi Bantemu ba Yehowa bikale tshisumbu tshia nzambi tshia malu mabi. Etshi tshivua tshilumbu tshinene bualu ku Mputu bamue bantu batu bamba Bantemu ba Yehowa malu a mushindu’eu bua kufikisha banga bantu ku dimona ne: bidi bikengela kuelela midimu ya Bantemu mikandu anyi kuyikandika. Ke bua tshinyi bana betu buomekela bujitu ebu bakamonangana ne mufundi, kumuambilabu bua apatule tshiena-bualu tshikuabu bua kulongolola bivuaye muambe mu tshia kumpala. Wakitaba, kadi mu tshiena-bualu tshiakapatulaye atshi muvua tshiambilu tshivua tshileja se: bivuaye muambe mu tshiena-bualu tshia kumpala bivua bishindamene pa bualu bulelela buenzeke. Ke bana betu aba kumonanganabu nende kabidi, kumulejabu malu makuabu a bungi. Ndekelu wa bionso mufundi wa tshikandakanda etshi wakajingulula ne: malu avua mu tshiena-bualu tshia kumpala kaavua malelela to, nenku wakapatula tshinga tshiena-bualu bua kushintulula bivuaye muambe kumpala. Dimuambila malu patoke ne mu buimpe divua mushindu mulenga wa kujikija tshilumbu etshi, ne muanda eu wakapatuisha tshipeta tshimpe.

Mmunyi mutudi mua kuikala ne dinanga?

17. Ntshinyi tshidi tshileja ne: kabiena anu mua kuikala bipepele bua kuenzela bakuabu malu ne dinanga to?

¹⁷ Padi muana uledibua, baledi bende batu bamunanga musangu umue. Kuenzela bantu bakulumpe malu ne dinanga kakutu kudienzekela to. Pamu’apa ke bualu kayi Bible udi utuambila njila ne njila bua kunangangana; nanku dinanga ntshintu tshitudi ne bua kudienzeja bua kuikala natshi. (1 Petelo 1:22; 4:8; 1 Yone 3:11) Yezu uvua  mumanye ne: dinanga dietu divua ne bua kutetshibua pakambaye ne: tudi ne bua kubuikidila muanetu “too ne misangu makumi muanda-mutekete ne muanda-mutekete.” (Matayo 18:21, 22, NW) Paulo pende wakatubela bua tuetu ‘kulejangana lutulu.’ (Kolosai 3:12, 13) Kabiena bitukemesha padi Bible utuambila ne: “Kebayi dinanga”! (1 Kolinto 14:1, MMM) Kadi mmunyi mutudi mua kukeba dinanga?

18. Ntshinyi tshiatuambuluisha bua kunanga bakuabu?

¹⁸ Tshia kumpala: tuvulukayi dinanga ditudi nadi kudi Yehowa Nzambi. Dinanga edi ke didi ditusaka bua kunanga muntu netu. Bua tshinyi? Bualu patudi tuenza malu ne dinanga, bidi biendeshila Tatu wetu wa mu diulu lumu lulenga ne bisaka bantu bua kumutumbisha ne kumusamuna. (Yone 15:8-10; Filipoi 1:9-11) Tshibidi: tukebayi bua kumona malu mushindu udi Yehowa uamona. Dîba dionso ditudi tuenza mpekatu, Yehowa ke utudi tuenzela mpekatu au; kadi udi utubuikidila njila ne njila ne utungunuka ne kutunanga. (Musambu 86:5; 103:2, 3; 1 Yone 1:9; 4:18) Tuetu tumona malu mudi Yehowa uamona, netuikale badiakaje bua kunanga bantu bakuabu ne kubabuikidila bilema bidibu batuenzela. (Matayo 6:12) Tshisatu: tuenzele bakuabu malu atudi basue bua batuenzele petu. (Matayo 7:12) Misangu mivule tutu tukeba bua batubuikidile bilema bietu bualu tudi bantu bapange bupuangane. Tshilejilu, patudi tuamba malu adi abungamija bakuabu, tudi tuela meji ne: nebavuluke ne: muntu yonso utu wenza mpekatu ne ludimi ku misangu. (Yakobo 3:2) Bituasua bua bakuabu batuenzele malu ne dinanga, tuetu petu tudi ne bua kubenzela malu ne dinanga.

19. Mmunyi mutudi mua kukeba diambuluisha dia nyuma wa Nzambi bua kupeta dinanga?

¹⁹ Tshinayi: tukebe diambuluisha dia nyuma wa Nzambi, bualu dinanga ndimue dia ku mamuma a nyuma. (Galatia 5:22, 23) Misangu mivule, malunda, malanda a mu dîku ne dinanga dia mulume ne mukaji bitu bidiluila kakuyi dibienzeja ku bukole. Kadi tudi dijinga ne diambuluisha dia nyuma wa Yehowa bua tuetu kuikala ne dinanga dia buena didi nadi Yehowa, didi dikale tshisuikidi tshipuangane tshia buobumue. Tudi mua kukeba diambuluisha dia nyuma muimpe patudi tubala Bible udi muikale mufundisha ne nyuma wa Nzambi. Tshilejilu, tuetu bikale tulonga malu a nsombelu wa Yezu, netumone mushindu uvuaye wenzela bantu malu, ne tudi mua kumanya mua kumuidikija. (Yone 13:34, 35; 15:12) Tudi kabidi mua kulomba Yehowa nyuma wende nangananga padibi bitukolele bua kuenza malu ne dinanga. (Luka 11:13) Bualu bua ndekelu: tudi mua kukeba dinanga tuetu bashale pabuipi ne tshisumbu tshia bena Kristo. Kusomba ne bana betu badi bikale ne dinanga kudi kutuambuluisha bua kupeta dinanga.​—Nsumuinu 13:20.

20, 21. Ntshijadiki kayi tshia pa buatshi tshia dinanga tshidi Bantemu ba Yehowa baleje mu tshidimu tshia mudimu tshia 2000?

²⁰ Tshidimu tshishale, bamanyishi bonso ba lumu luimpe pa buloba bujima bavua 6 035 564. Bantemu ba Yehowa bavua benze mêba masanga 1 171 270 425 benda bakeba bantu ba kuambila lumu luimpe elu. Dinanga ke divua dibambuluishe bua kuenza mudimu eu mu munya, mu mvula ne mu mashika. Diodi ke divua dibasake bua kuyisha balongi nabu, bena mudimu nabu ne bua kuyisha bantu bavuabu kabayi bamanye mu njila ne miaba mikuabu. Bantu ba bungi bavua Bantemu bayishe kabavua basankidile lumu luimpe to, bakuabu bakese bavua babenge. Nansha nanku, bamue bantu bakateleja, ke tshivua tshienze bua Bantemu kupinganyinabu bantu misangu 433 454 049, ne kulombolabu malonga a Bible 4 766 631. *

²¹ Bionso ebi ntshijadiki tshia dinanga didi Bantemu ba Yehowa nadi kudi Nzambi wabu ne kudi bantu nabu! Dinanga adi kadiakukepa nansha kakese. Tudi bajadike ne: mu tshidimu tshia mudimu tshia 2001 Bantemu nebayishe kabidi bantu bikole menemene. Yehowa atungunukeku ne kubenesha batendeledi bende ba lulamatu ne ba lukunukunu bualu ‘malu abu onso, badi baenza ne dinanga’!​—1 Kolinto 16:14, MMM.

[Mêyi adi kuinshi]

Udi mua kumvuija anyi?

• Nnganyi utudi tuidikija patudi tunanga muntu netu?

• Bua tshinyi dinanga dietu kadiena ne bua kuikala ne mikalu?

• Nng’amue malu mamona kayi adi aleja ne: bena Kristo badi ne dinanga?

• Mmunyi mutudi mua kuikala ne dinanga dia bena Kristo?

[Nkonko ya dilonga]

 [Tablo mu mabeji 18-21]

LUAPOLO LUA BULOBA BUJIMA LUA BANTEMU BA YEHOWA BUA TSHIDIMU TSHIA MUDIMU TSHIA 2000

 (Bala mu mukanda)

[Bimfuanyi mu dibeji 15]

Dinanga dia bena Kristo didi mua kulama bena mu dîku kaba kamue

[Bimfuanyi mu dibeji 17]

Dinanga didi ditusaka bua kumanyisha bakuabu ditekemena ditudi nadi