Malu a mu nsombelu

Ndi nsadila ne muoyo wanyi mujima nansha mundi ne ntatu

MALONDA KUDI RODOLFO LOZANO

Ndi mulela mu ditunga dia Mexique, mu tshimenga tshia Gómez Palacio tshia mu Provense wa Durango, mu dia 17 ngondo wa tshitema wa 1917. Bavua baluangana bua kushintulula mbulamatadi wa ditunga dia Mexique. Nansha muakimana malu au mu 1920, bimvundu biakatungunuka bidimu bia bungi muaba utuvua basombele, ke nsombelu kuluaye mukole mutambe.

DIMUE edi, pakumvua Mamu ne: bantomboji bavua ne bua kuluangana mvita ne basalayi ba mbulamatadi, wakatulama matuku a bungi mu nzubu meme ne batutuanyi basatu ne bana betu ba bakaji babidi. Katuvua nansha ne biakudia bine bia nsongo to, ne ndi muvuluke kabidi mutuvua basokome muinshi mua bulalu meme ne muakunyanyi wa bakaji. Pashishe, Mamu wakaya netu mu ditunga dia États-Unis muakalua Tatu kutulonda kunyima.

Tuakafika mu Californie mu 1926, matuku makese kumpala kua malu a mfranga ya mu États-Unis kunyangukawu. Tuvua tuenda tutambakana tukeba muaba utuvua mua kupeta mudimu, tuakaya bu mudi mu San Joaquin Valley, Santa Clara, Salinas ne mu King City. Tuakalonga mua kudima madimi ne kupola bimuma ne kuaka bisekiseki bia mishindu ne mishindu. Nansha mumvua muenze mudimu mupite bukole ku buana, atshi tshivua tshikondo tshimpe tshia dikema.

Ndi mmanya bulelela bua mu Bible

Mu ngondo muisatu wa 1928, Mulongi wa Bible mukuabu (muvuabu babikila Bantemu ba Yehowa dîba adi) wakalua kututangila. Mulongi wa Bible au diende Esteban Rivera, uvua tatu mukulakaje uvua wakula tshiena-Espagne. Tshiena-bualu tshia kakanda kakatushilaye (ka “Bafue batu penyi?”) ne malu avuamu biakankemesha bikole. Nansha muntshivua anu mupuekele, ngakatuadija kulonga Bible ne kudisangisha ne Balongi ba Bible. Pakapita matuku, Mamu ne muakunyanyi wa bakaji Aurora bakabanga pabu kuyisha lumu luimpe ne lukunukunu.

 Munkatshi mua bidimu bia 1930, bakenzela bena tshisumbu tshia muakulu wa Anglais Nzubu wa Bukalenge mu tshimenga tshia San Jose. Bu muvua bantu ba bungi bavua bakula tshiena-Espagne benza mudimu mu madimi a mu tshimenga etshi, tuakabanga kubayisha ne kulonga nabu Tshibumba tshia Nsentedi. Bana betu bavua bakula tshiena-Espagne ba mu San Francisco (bavua mutantshi wa kilometre 80 ne muaba utuvua) bakatuambuluisha bikole. Panyima pa matuku, bantu bavua babuela mu bisangilu bia tshiena-Espagne mu Nzubu wa Bukalenge wa mu San Jose bakafika bu ku 60 nanku.

Ku ndekelu, mu dia 28 ngondo muibidi wa 1940, ngakaleja ne: mmvua mudilambule kudi Yehowa pangakatambula mu mpuilu wakenzeka mu San Jose. Tshidimu tshiakalonda, ngakalua mpanda-njila anyi Ntemu wa Yehowa muambi wa lumu luimpe wa ku dîba ne ku dîba. Pashishe mu ngondo muinayi wa 1943, bakandomba bua kuya kuenza tshisumbu tshia muakulu wa tshiena-Espange ku Stockton, tshimenga tshidi mutantshi wa kilometre mitue ku 130 ne muaba utuvua basombele. Tshikondo atshi mvua mutangidi muludiki wa tshisumbu tshia Anglais tshia mu San Jose, ne mvua kabidi ngambuluisha Bantemu bavua bakula tshiena-Espagne. Kunyima kua meme mumane kulongolola bua bakuabu kutungunukabu ne midimu eyi, ngakaya ku Stockton.

Lulamatu luanyi ludi mu diteta

Patuakabuela mu 1940, bavua bambikila njila ne njila ku biro bia basalayi, kadi dîba dionso dimvua nyaku bavua banemeka dipangadika dimvua muangate dia kubenga kubuela mu busalayi. Matuku makese panyima pa ditunga dia États-Unis dimane kubuela padi mu mvita mibidi ya buloba bujima mu ngondo wa dikumi ne muibidi wa 1941, bena ku biro bia basalayi bakabanga kungenzeja bua meme kubuela ku busalayi. Ndekelu wa bionso e kungelabu mu buloko mu 1944. Pantshivua muindile bua kukosabu tshilumbu tshianyi, bakangela mu buloko bua muinshi mua buloba pamue ne bantu bavuabu bakuatshila dibunda dia bilumbu. Pakamanyabu ne: mvua Ntemu wa Yehowa, ke ba bungi kungelabu nkonko bua kumanyabu bikala Nzambi ni uvua mua kubangata bibi bua bilumbu bivuabu babunde.

Bantemu ba mu San Jose bakampatuisha mu buloko bua meme kuikadila pambelu, muindile anu dindumbuluisha. Mulumbuluidianganyi mukuabu wa mu Los Angeles uvua wimanyina bantu bavua ne bilumbu ubakuila mu malu a manême a bena ditunga, wakitaba bua kundumbuluila kayi undomba dikuta. Nzuji wakangata dipangadika dia kundekela, wamba ne: bua meme kukulekela udi ne bua kuanji kulekela bumpanda-njila, kubanga mudimu wa tshianana ne kuikala ulua kudileja kudi bamfumu ba mbulamatadi ku ngondo yonso. Tshiakitaba to, ke kumfundilabu tshibawu tshia bidimu bibidi mu buloko bua mu Tshidiila tshia McNeil mu Provense wa Washington. Mu buloko amu, ngakalonga  Bible bikole. Ngakalonga kabidi mua kukuma tshiamu tshia mikanda. Bidimu bibidi kabiyi bianji kukumbana, bakampatula mu buloko bua ngikadilu muimpe umvua nende. Mfika pambelu, meme kudilongolola diakamue bua kutungunuka ne mudimu wa bumpanda-njila.

Ndi ngenza mudimu muvule

Mu muvu wa mashika (hiver) wa mu 1947, bakatutuma ne mpanda-njila nanyi mukuabu bua kuenzela mudimu muaba uvuabu bakula tshiena-Espagne kudi bantu bavua basombele mu tshimenga tshia Colorado, mu provense wa Texas. Kadi bua bukole bua mashika avuamu, tuakaya ku San Antonio bua kupetaku luya. Kadi kuine aku paku mvula ivua iloka bikole kakuyi mushindu wa kutungunuka ne kuyisha ku nzubu ne ku nzubu to. Makuta atuvua nawu e kujika onso musangu umue. Tuakenza mbingu ne mbingu tuladila anu mampa mela shu mubishi ne tunua tshiayi tshia luzerne. Mpanda-njila nanyi au wakapingana kuabu, kadi meme ngakashala. Pakamanya bana betu bavua bakula Anglais ntatu imvua nayi, bakabanga kungambuluisha.

Mu muvu wa printemps wa tshidimu tshiakalonda, ngakapingana mu tshimenga tshia Colorado mumvua ngenzela mudimu, ndekelu wa bionso tshisumbu tshikese tshia muakulu wa tshiena-Espagne tshiakapatuka. Pashishe ngakaya ku Sweetwater, mu Texas, mungakambuluisha bua kuenza tshisumbu tshikuabu tshia muakulu wa tshiena-Espagne. Pantshivua mu Sweetwater, ngakapeta mukanda bambikila bua kuya kabuela mu kalasa ka 15 ka Gilada, Tshilongelu tshia Bible tshia Société Watchtower, bua kulonga bu-misionere. Kalasa aka kakatuadija mu dia 22 ngondo muibidi wa 1950. Kunyima kua tuetu bamane kupeta mapoloma mu muvu wa luya (été) mu mpungilu uvua bantu bafumine mu matunga mavule wakenzekela mu tshipalu tshia Yankee Stadium mu tshimenga tshia New York, ngakashala ku biro bidibu balombuela mudimu wa buloba bujima wa Bantemu ba Yehowa ku Brooklyn. Bakandongeshaku mudimu umvua ne bua kulua kuenza mu biro bia filiale wa Bantemu mu Mexique.

Mudimu mu Mexique

Ngakafika mu tshimenga tshia Mexico mu dia 20 ngondo wa dikumi wa 1950. Kunyima kua mbingu bu ibidi, bakanteka mutangidi wa biro bia filiale; ngakenza mudimu eu bidimu binayi ne tshitupa. Malu angakamona mu bumpanda-njila, mu buloko, ku Gilada ne ku Brooklyn akangambuluisha bikole. Pangakafika mu Mexique, ngakamona diakamue ne: bivua bikengela kukolesha bumuntu bua mu nyuma bua bana betu ba balume ne ba bakaji ba mu Mexique. Bivua bikengela kubambuluisha bua bamanye mua kutumikila mikenji ya mu Dîyi dia Nzambi bua kuikalabu ne ngikadilu mulenga.

Mu matunga a mu Amerike wa ku Sud (kusangisha ne dia Mexique) balume ne bakaji bavua ne tshilele tshia kusomba pamue kabayi bafundishe mabaka abu kua mbulamatadi to. Bitendelelu bia mu Bukua-buena-Kristo (nangananga tshia bena Katolike ka bena Lomo) bivua bitaba bua tshilele tshidi Bible ubenga etshi kutangalakatshi. (Ebelu 13:4) Ke bua tshinyi tshikondo atshi bamue bavua balua Bantemu ba Yehowa nansha kabayi bafundishe dibaka diabu kua mbulamatadi to. Nenku tuakabakosela ngondo isambombo bua kufundisha mabaka abu kua mbulamatadi; tshianana katuvua mua kubangata kabidi bu Bantemu ba Yehowa to.

Bua bavule, kabivua bikole to. Bivua anu bibakengela kuelesha mabaka abu ku mikanda ya mbulamatadi patupu. Malu a bakuabu avua wowu makodiakane bikole. Tshilejilu, bamue bavua baselangane bamane kushipa mabaka abidi nansha asatu, kakuyi nansha mukanda wa kua mbulamatadi udi uleja difua diawu to. Pakalengela nsombelu wa bantu ba Yehowa biumvuangane ne malongesha adi mu Dîyi dia Nzambi pa bidi bitangila dibaka, bisumbu biakadiunda menemene.​—1 Kolinto 6:9-11.

Matuku au bantu ba bungi kabavua bamanye mukanda mu Mexique to. Kumpala mene kua meme kufikamu mu 1950, biro bia filiale bikavua bituadije kulongolola tulasa bua kulongeshangana mua kubala ne kufunda mu bisumbu. Tuakalongolola kabidi tulasa etu, tuakangata mapangadika bua tumanyike kua mbulamatadi. Kubangila mu 1946, tshidimu tshiakabangabu kufunda ne kulama luapolo ya tulasa etu, Bantemu ba Yehowa mbalongeshe bena mu Mexique bapite pa 143 000 mua kubala ne kufunda!

Mikenji ya mbulamatadi wa mu Mexique kayivua ishila bitendelelu budikadidi nansha bukese to. Kadi bidimu bishale ebi, malu a bungi mmashintuluke bikole. Bakela mukenji mupiamupia mu 1992 bua malu a bitendelelu, ke Bantemu ba Yehowa ba mu  Mexique kushishabu kumanyika kua mbulamatadi bu tshitendelelu mu 1993.

Mushindu wakashintuluka malu aa wakansankisha bikole, bualu kumpala tshivuaku ngela meji ne: bivua mua kuenzeka nanku to. Munkatshi mua bidimu bia bungi, mvua nya njila ne njila ku biro bia bena mbulamatadi, kadi bantu abu kabavua netu bimpe to. Nansha nanku, ndi ne disanka dia dikema pandi mmona mushindu uvua Tshibambalu tshia Mêyi ne Mikandu tshidi ku biro bia filiale tshijikije malu aa. Mpindieu katutshiena kabidi tutamba kupeta ntatu mu mudimu wa kuyisha to.

Ndi ngenza mudimu ne mukajanyi udi misionere

Pangakafika mu Mexique, mukavua ba-misionere ba bungi bavua bajikije kumpala kuetu mu tulasa tua Gilada. Umue wa kudibu uvua Esther Vartanian, Ntemu wa mu Arménie uvua yeye mutuadije kuenza bumpanda-njila mu tshimenga tshia Vallejo, ku Californie mu 1942. Tuetu kuselangana mu dia 30 ngondo wa muanda-mutekete wa 1955, pashishe tuetu kutungunuka ne mudimu wetu mu Mexique. Esther wakatungunuka ne mudimu wa bu-misionere mu tshimenga tshia Mexico, ne tuvua basombele ku Betele kumvua meme mutungunuke ne kuenzela mudimu.

Mu 1947, Esther ukavua mufike muaba wa kumpala wakamutumabu bua kuenzela mudimu wa bu-misionere, mu tshimenga tshia Monterrey, mu provense wa Nuevo León wa mu Mexique. Kuvua anu tshisumbu tshimuepele tshivua ne Bantemu 40 mu Monterrey, kadi dîba diakamutumabu mu tshimenga tshia Mexico mu 1950, wakashiyamu bisumbu binayi bijima. Balela babidi ba mu mêku avua Esther mulongeshe Bible pavuaye wenza mudimu mu Monterrey badi mpindieu ku filiale wetu pabuipi ne Mexico.

Mu 1950, ba-misionere bavua bayisha tshitupa tshinene tshia tshimenga tshia Mexico. Bavua bendakana mu tshimenga etshi (muvuabu babatume) ku makasa anyi mu bise ya kale ya dikema ivua anu miuule tente ne bantu. Pangakafikamu ku ndekelu kua 1950, muvua bisumbu muanda-mutekete. Mpindieu mbivule bifike ku 1 600, ne bamanyishi ba  Bukalenge mbapite pa 90 000 mu Mexico; tshidimu tshishale, bantu bapite pa 250 000 bavua babuele mu Tshivulukilu tshia lufu lua Kristo! Munkatshi mua bidimu bia bungi, bivua disanka buanyi meme ne Esther bua mutudi bapitshile mu bia bungi bia ku bisumbu ebi.

Patutu tutuadija kulonga Bible ne muntu ne Esther, tutu tuanji tukeba bua kulonga ne Tatu wa dîku bua dîku dijima kumulondadi ne kutuadija kulonga. Mushindu’eu ke utudi bafikishe mêku manene a bungi ku disadila Yehowa. Ndi ngela meji ne: bumue bua ku malu adi atamba kuyisha ntendelelu mulelela kumpala ne lukasa mu Mexique mbua se: misangu ya bungi mêku majima atu abuela mu ntendelelu mulelela.

Yehowa mmubeneshe mudimu utudi benze

Katshia mu 1950, mudimu udi wenzeka mu Mexique mmuye kumpala: bantu mbavule ne malu mmashintuluke. Tudi ne disanka dia bungi bua mutudi benze petu mudimu kakese bua didiunda edi kumuenekadi, tudi benze mudimu ne bantu ba musangelu badi bamanye mua kuakidilangana bilenga.

Karl Klein (udi mpindieu mu Kasumbu Kaludiki ka Bantemu ba Yehowa) wakalua kutumona ne mukajende pavuabu mu diikisha umue musangu kukadi kupite bidimu ndambu. Muanetu Klein uvua musue kumanya mudi mudimu wenzeka mu teritware wetu wa Mexique. Ke yeye ne mukajende Margaret kuluabu mu Tshisumbu tshia mu San Juan Tezontlatla, pabuipi ne tshimenga tshia Mexico, mutuvua tubuela musangu au. Nzubu wetu wa Bukalenge uvua mukese, uvua wa metre matue ku 4 ne tshitupa mu butshiama ne 5 ne tshitupa mu bule. Patuakafika, mukavua bantu batue ku 70, ne kamutshivua nansha muaba wa kuimana kuulu to. Bantu bakole bavua basomba mu nkuasa, bansonga pa bibasa ne bana bakese pa madioto anyi panshi.

Muanetu Klein wakakema bikole bualu bana bonso abu bavua ne Bible, ne pavua ngamba-malu ufila mvese bavua bayikeba mu Bible yabu. Kunyima kua muyuki wa patoke, Muanetu Klein wakenza muyuki mushindamene pa Matayo 13:19-23 ne kuambaye ne: mu Mexique muvua buloba “buimpe” bua bungi buvua Yezu muambe. Patudi tuakula apa, bana muanda-mutekete ba mu bavua mu bisangilu dituku adi badi benza mudimu munene wa kudiundisha nzubu ya Betele pabuipi ne tshimenga tshia Mexico. Umue udi wenza mudimu ku Betele, ne bakuabu ba bungi badi bampanda-njila!

Pangakalua mu Mexico, ku Betele kuvua anu bantu 11 tshianana. Mpindieu tukadi batue ku 1 350. Bantu batue ku 250 ba kudibu badi bibaka nzubu mipiamipia ya Betele. Pajika mudimu eu, pamu’apa mu 2002, nekuikale mushindu wa kubikidisha bantu bakuabu nansha 1 200 mu nzubu idibu badiundisha eyi. Ndi mvuluka ne: mu 1950 mu ditunga dijima muvua bamanyishi ba Bukalenge muinshi mua 7 000, kadi lelu tudi bapite pa 500 000! Mutshima wanyi mmuule tente ne disanka pandi mmona mudi Yehowa mubeneshe mudimu mukole udi bana betu bena budipuekeshi ba mu Mexique benza bua kumutumbisha.

Ndi mpeta lutatu lunene

Lumue lua ku ntatu minene indi mupete matuku mashale aa ndisama. Mbuena kuamba ne: kuonso eku tshivua muntu wa tusamasama to. Kadi mu ngondo wa dikumi ne umue wa 1988, luseke luanyi lumue lua mubidi luakanteketa. Bua didibidija dia mubidi ne manga andi ngangata, Yehowa mmungambuluishe ne ndi mupetululeku makanda ndambu, kadi nansha nanku bitupa bianyi bia mubidi kabiena binyunga mundi meme musue to. Ndi mutungunuke ne kuangata manga ne kulonda mibelu ya ba-minganga bua mutu kaunsami ne bua kumbusha ntatu mikuabu intshidi nayi.

Nansha mundi tshiyi kabidi mua kuenza malu a bungi bu mundi musue, ndi ne disanka pandi mvuluka ne: ndi muambuluishe bantu ba bungi bua kulonga malu adi Yehowa mulongolole ne bua kudilambulabu kudiye ne kulua basadidi bende. Ndi kabidi ne disanka pandi nyikila ne bana betu ba bungi dîba didibu balua kuendakana ku betele; ndi ngumvua ne: tudi tukankamijangana.

Kumanya ne: Yehowa udi wanyisha mudimu utudi tumuenzela, ne kabidi se: malu atudi benze katuena baenze patupu, nkutukoleshe ku muoyo bikole. (1 Kolinto 15:58) Nansha mundi eku ne malu andi tshitshiyi mua kuenza, eku kabidi ne disama, ndi muvuluke mêyi a mu Kolosai 3:23, 24 (MML) a ne: ‘Mudimu wenu nansha wowu muikale wa bishi, nuwenze ne mutshima wenu mujima, bu badi bawenzela Mfumu, kadi ki mbu badi bawenzela bantu to. Nuvuluke se: [Yehowa] neanufute: nenupete bumpianyi budiye ulaminyina bende yeye.’ Mu diumvuangana ne mubelu eu, ndi mulonge mua kusadila Yehowa ne muoyo wanyi mujima nansha mundi ne ntatu.

[Tshimfuanyi mu dibeji 24]

Pamvua mpanda-njila mu 1942

[Tshimfuanyi mu dibeji 24]

Mukajanyi wakatuadija bu-misionere mu Mexique mu 1947

[Tshimfuanyi mu dibeji 24]

Meme ne Esther lelu

[Bimfuanyi mu dibeji 26]

Kuulu menemene ku dia bakaji: Dîku dia Betele wetu wa mu Mexique mu 1952, meme ngudi lua kumpala eu

Kuulu: Bantu bapite pa 109 000 bakasangila mu tshipalu etshi tshia mu Mexico bua kuenza mpungilu wa distrike mu 1999

Kuinshi ku dia bakaji: Nzubu mipiamipia ya Betele ikadi pa kujika mpindieu