Bantemu ba Yehowa mbatangile kumpala batuishibue bikole!

Luapolo lua Tshisangilu tshia ku tshidimu

MATUKU aa, bantu badi ne mpata ne dielakana, kadi Bantemu ba Yehowa buobu mbena Kristo badi batuishibue bikole. Muanda eu ke wakalejabu patoke mu tshisangilu tshia ku tshidimu tshia Société Watch Tower Bible and Tract wa mu Pennsylvanie, tshivua tshienzekele mu Nzubu wa Mpuilu wa Bantemu ba Yehowa mu tshimenga tshia Jersey, mu New Jersey mu Disambombo dia 7 Kasuamansense 2000. *

John Barr, mulombodi wa tshisangilu etshi wa mu Kasumbu Kaludiki ka Bantemu ba Yehowa, wakakangula tshialu ne mêyi aa: “Tudi bamanye ne bajadike bimpe ne: Yezu Kristo, Muana munanga wa Yehowa, udi mpindieu mu nkuasa wa butumbi mu diulu ukokesha munkatshi mua baluishi bende.” Bijadiki bia dituishibua dikole edi bavua babileje mu luapolo milenga isambombo ya mu matunga mashilangane.

Bulelela bua mu Bible budi butshimuna bumpaka-manga mu Haïti

Dipaka dia manga nditangalake bikole mu ditunga dia Haïti. John Norman, mulombodi wa filiale wa mu Haïti wakamba ne: “Pa tshibidilu, bantu batu batendelela mu vodu bua kudilama.” Nganga mukuabu wa kabukulu wakabanga kuelakana pakatshibukaye mukolo mu njiwu. Wakadikonka ne: ‘Mmunyi mudi bualu bua nunku mua kumfikila panyi bakishi bikale bandame?’ Bantemu ba Yehowa bakalongesha muntu eu bulelela (anu mudibu balongeshe bantu bakuabu ba bungi), ne bakamuambuluisha, yeye kulekela bumpaka-manga. Bidi bimueneka ne: Bantemu nebavule mu Haïti kumpala kutuyaya eku, bualu mu dia 19 Tshisanga 2000, bantu bapite pa bungi bua bamanyishi ba Bukalenge misangu inayi bavua babuele mu Tshivulukilu tshia lufu lua Kristo mu ditunga edi.

Badi bayisha ne lukunukunu mu Corée

Mu ditunga dia Corée, Bantemu ba Yehowa 40 pa lukama badi mu mudimu wa ku dîba ne ku dîba. Milton Hamilton, mulombodi wa Komite wa filiale mu Corée wakamba ne: “Bu mutudi ne tshiluilu etshi tshinene tshia bamanyishi, tutu tufika ku diyisha mu teritware wetu mujima eu (mudi bantu bapite pa miliyo 47) musangu umue ku ngondo.” Bisumbu bia muakulu wa tumama bidi bienda bivula bikole menemene. Mu tshimue tshijengu tshia bisumbu bia muakulu wa tumama, Bantemu ba Yehowa badi balombola malonga a Bible 800. Mmumue ne: mumanyishi yonso udi ulombola dilonga bu dimue nanku. Bia dibungama, batshidi bakuata bana betu bansonga ne babela mu maloko bualu kabena basue kubuela mu malu a tshididi to. Kadi balami ba maloko batu balame bena Kristo aba bimpe, ne batu batamba  kubapesha imue midimu itu ikengela bua bayenze kudi bantu ba kueyemena.

Malu adi akengela kuenza bua divula dia Bantemu mu Mexique

Bamanyishi ba Bukalenge 533 665 bavua bafile luapolo lua mudimu wa budimi mu Mexique mu Tshimungu 2000. Bantu bapite bungi abu misangu isatu bakabuela mu Tshivulukilu. Robert Tracy, mulombodi wa Komite wa filiale wa mu Mexique, wakamba ne: “Tshidimu etshi tshipatshila tshietu ntshia kuibaka Nzubu ya Bukalenge mikuabu 240. Nansha nanku, itudi nayi dijinga nya bungi kupita apa.”

Bansonga Bantemu ba Yehowa ba mu Mexique badi bafila tshilejilu tshilenga. Nsaserdose mukuabu muena Katolike wakamba bua munga nsonga ne: “Ndi musue kuikala ne nsonga umuepele patupu bu yeye munkatshi mua bena kuitabuja banyi. Ntu nganyisha bantu aba bikole be bua meji adibu nawu ne bua mudibu batambe kusua bua kuenza mudimu bimpe ne Bible. Badi babingisha Nzambi, nansha bia kumona lufu.”

Badi ne lulamatu nansha mudi ndululu mikale mu Sierra Leone

Kubangila mu Tshisanga 1991, pakatuadija mvita mu ditunga dia Sierra Leone, batu bashipe, batape ne bakose bimue bitupa bia mubidi bia bantu binunu ne binunu. Bill Cowan, mulombodi wa Komite wa filiale, wakamba ne: “Mvita ne ntatu mbishintulule bantu bikole. Bantu ba bungi bavua babenga kuteleja mukenji wetu badi mpindieu bauteleja bimpe. Miaba ya bungi bantu batu badivuila nkayabu ku Nzubu ya Bukalenge bua kubuela mu bisangilu musangu wabu wa kumpala. Misangu mivule batu bimanyika bana betu mu njila ne babalomba bua kulonga Bible.” Nansha mudi ditunga edi dikale anu dija, mudimu wa diyisha Bukalenge udi ukuama mamuma mimpe mu Sierra Leone.

Mudimu munene wa dibaka mu Afrique du Sud

Matuku aa, kudi dijinga dia Nzubu ya Bukalenge binunu ne binunu mu teritware udibu batangila kudi biro bia filiale wa Afrique du Sud. Bakadi bibake Nzubu ya Bukalenge nkama ya bungi. John Kikot wa mu Komite wa filiale wakamba ne: “Pamutu pa kudisangishila mu bisasa anyi muinshi mua mutshi bu muvuabu benza kumpala, mpindieu bana betu badi badisangisha muaba muimpe ne badi ne nkuasa milenga ya kusomba. Nansha mudi Nzubu ya Bukalenge eyi ya bungi kayiyi mienza ne bintu bia makuta a bungi, itu anu misunguluke, imueneka mimpe be miaba idibu bayibake. Mu imue miaba, bitu bienzeke ne: kunyima kua bamane kuibaka Nzubu wa Bukalenge, tshidimu tshidi tshilonda tshisumbu tshidi tshilela tshikuabu.”

Tshipungu tshipiatshipia tshia Bantemu mu Ukraine

Mu tshidimu tshia mudimu tshia 2000, ditunga edi divua ne bamanyishi 112 720. Bamanyishi bapite pa 50 000 ba kudibu mbalonge bulelela bua mu Bible mu bidimu bitanu bishale ebi. John Didur, mulombodi wa Komite wa filiale wakamba ne: “Bulelela, Yehowa mmujule tshipungu tshipiatshipia tshia Bantemu bua kumanyishabu dîna diende. Mu bidimu bibidi bishale ebi, tudi babanye bibejibeji bipite pa miliyo 50, bungi budi bupetangana ne bua bantu ba mu ditunga edi. Ku ngondo yonso, tutu tupeta mikanda mitue ku tshinunu idi bantu badi bakeba kumanya malu a bungi batutumina.”

Malu makuabu manene a mu tshisangilu etshi

Daniel Sydlik wa mu Kasumbu Kaludiki ka Bantemu ba Yehowa wakenza muyuki wa tshikuma. Tshiena-bualu tshia: “Mushindu udi Kasumbu Kaludiki kashilangane ne tshisumbu tshimanyike kua mbulamatadi” tshidi mu tshibejibeji etshi, ntshishindamene pa muyuki mulenga au.

Theodore Jaracz wa mu Kasumbu Kaludiki wakenza muyuki wa dikema uvua ne tshiena-bualu ne: “Batangidi ne basadidi ba midimu mbabateke bilondeshile mêyi a teokrasi.” Muyuki au mmupatuke mu tshimue tshia ku biena-bualu bidi mu tshibejibeji etshi.

David Splane wa mu Kasumbu Kaludiki uvua muenze pende muyuki mu tshisangilu atshi bua mvese wa tshidimu tshia 2001. Mvese eu mmuangatshila mu mêyi a mupostolo Paulo adi amba ne: “Nuikale bakumbane ne batuishibue bikole bua malu onso adi Nzambi musue.” (Kolosai 4:12, NW) Bantemu ba Yehowa ba buloba bujima mbadisuike bua kutumikila mêyi aa padibu benda bayisha lumu luimpe lua Bukalenge bua Nzambi pa buloba bujima ne lulamatu.​—Matayo 24:14.

[Mêyi adi kuinshi]