Batangidi ne basadidi na mudimu mbabateke bilondeshile mêyi a Teokrasi

“Nuditangile bienu bimpe, ne tshisumbu tshionso tshiakanutekelabu batangidi kudi nyuma muimpe.”​—BIENZEDI 20:28.

1, 2. Mmunyi mudi Yeshaya 60:22 wenda ukumbana?

 YEHOWA ukavua mumanyishe kale kuonso aku ne: muanda wa dikema uvua ne bua kuenzeka mu tshikondo tshia ku nshikidilu. Wakamba mukana mua muprofete Yeshaya ne: “Udi mukese nealue tshinunu, ne udi mutambe bukese nealue ditunga dia bukole. Meme Yehowa nkayanyi nengenzeje bualu ebu lukasa mu tshikondo tshiabu.”​—Yeshaya 60:22, NW.

² Kudiku bijadiki bidi bileja ne: mulayi eu udi ukumbana lelu anyi? Eyowa! Mu bidimu bia 1870, bakenza tshisumbu tshia bantu ba Yehowa mu Allegheny, ku Pennsylvanie (mu États-Unis). Bisumbu bidi bienda bivulangana binunu ne binunu pa buloba bujima lelu mbipatukile ku tshisumbu tshikese atshi. Bamanyishi ba Bukalenge miliyo mivule (badi bu ditunga dinene) badi mpindieu badisangisha mu bisumbu bipite pa 91 000 mu matunga 235. Kakuyi mpata, muanda eu udi ujadika ne: Yehowa udi wenzeja lukasa disangisha dia batendeledi balelela kumpala kua “dikenga dinene” dikadi pabuipi kutuadijadi.​—Matayo 24:21; Buakabuluibua 7:9-14.

3. Kutambula ‘mu dîna dia Tatu, dia Muana ne dia nyuma muimpe’ mmuomu ne tshinyi?

³ Kunyima kua bantu aba miliyo mivule bamane kudilambula ku budisuile kudi Yehowa bua kutumikila mêyi a Yezu, mbatambule “mu dina dia Tatu ne mu dia Muana ne mu dia nyuma muimpe.” (Matayo 28:19) Kutambula “mu dina dia Tatu” kudi kumvuija ne: bantu aba badilambule badi bitaba se: Yehowa n’Tatuabu wa mu diulu ne Mufidi wa muoyo, ne badi bakokela bumfumu buende. Kutambula ‘mu dina dia Muana’ kudi kumvuija ne: badi bitaba se: Yezu Kristo udi Mupikudi, Mulombodi ne Mukalenge wabu. Badi bitaba kabidi ne: nyuma muimpe wa Nzambi (anyi bukole buenzeji) udi ne mudimu wa kubalombola. Ditaba muanda eu didi dileja ne: mbatambule ‘mu dîna dia nyuma muimpe.’

4. Mmunyi mudibu bateka bena mudimu bena Kristo?

⁴ Padi bayidi bapiabapia batambula, badi babateka bena mudimu ba Yehowa Nzambi. Nnganyi udi ubateka? Bua kuamba bulelela, mêyi a mu 2 Kolinto 3:5 adi abakumbanyina: “Dikumbana dietu [bu bena mudimu] didi difuma kudi Nzambi.” Buabu buobu, dibateka bena mudimu kudi Yehowa Nzambi nkayende ke lumu lutambe bunene! Kunyima kua batismo wabu, padibu batungunuka ne kutumikila Dîyi dia Nzambi ne bitaba bua nyuma wende abalombole, badi benda bakola mu nyuma bu bena mudimu ba “lumu luimpe.”​—Matayo 24:14; Bienzedi 9:31.

Badi babateka bilondeshile mêyi a Teokrasi, kadi ki mbilondeshile mêyi a demokrasi to

5. Batuku basungula batangidi ne basadidi ba mudimu bena Kristo bilondeshile mêyi a demokrasi anyi? Umvuija.

⁵ Bua kukumbaja majinga a mu nyuma a bena mudimu ba tshisumi aba badi benda anu bavula, bidi bilomba bua kuikale batangidi bapie mu nyuma ne basadidi ba mudimu bakumbane. (Filipoi 1:1) Mmunyi mudibu bateka bantu aba bakole mu nyuma? Kabena benza mutubu benza mu Bukua-buena-Kristo to. Tshilejilu, kabatu bela tukanda bua kusungula batangidi bena Kristo  mutubu benza mu malu a demokrasi nansha, mmumue ne: bateka anu aba badi bapete tukanda tua tshitupa tshinene tshia bena mu tshisumbu. Kadi, badi bateka bantu aba bilondeshile mêyi a teokrasi. Mbuena kuamba tshinyi?

6. (a) Teokrasi mulelela ntshinyi? (b) Bua tshinyi badi bateka batangidi ne basadidi ba mudimu bilondeshile mêyi a teokrasi?

⁶ Teokrasi mulelela mbukokeshi budi Nzambi ulombola. Bantemu ba Yehowa badi bitaba bua kukokela bukokeshi buende ku budisuile, ne badi benza mudimu pamue bua kumona mua kuenza disua dia Nzambi. (Musambu 143:10; Matayo 6:9, 10) Diteka batangidi anyi bakulu bena Kristo ne basadidi ba mudimu didi dienzeka bilondeshile mêyi a teokrasi, bualu mushindu udibu bafila mêna a balume ba kueyemena aba ne udibu babateka udi ulonda malu adi Nzambi muambe adi mu Bible. Bu mudi Yehowa “ku mutu kua bionso,” amu yeye ke udi ne bukenji bua kujadika mushindu udi bulongolodi buende budi bumueneka ne bua kuenda.​—1 Kulondolola 29:11; Musambu 97:9.

7. Nnganyi udi ulombola Bantemu ba Yehowa?

⁷ Bantemu ba Yehowa mbashilangane ne bisumbu bia nzambi bivule bidi mu Bukua-buena-Kristo bualu buobu kabatu badisunguila nkayabu ndongoluelu wa malu a Nzambi udi ne bua kubalombola nansha. Bena Kristo balelela aba badi badienzeja bua kunemeka mikenji ya Yehowa. Ki mbena mu tshisumbu bonso anyi kasumbu ka balombodi ba ekeleziya badi bateka batangidi ba mu Bantemu ba Yehowa to. Padi bena panu basua kuela dîyi mu diteka dia bantu aba, basadidi ba Yehowa kabatu bitaba nansha kakese to. Badi bashala ne dipangadika dia buena dia bapostolo bakamba patoke mu bidimu lukama bia kumpala ne: ‘Butudi nabu mbua kutumikila mêyi a Nzambi kumpala kua mêyi a bantu.’ (Bienzedi 5:29) Mushindu’au ke udi Bantemu ba Yehowa bakokela Nzambi mu malu onso. (Ebelu 12:9; Yakobo 4:7) Nzambi udi utuanyisha patudi tulonda ngenzelu wa malu mu teokrasi.

8. Mmunyi mudi ngenzelu wa malu mu teokrasi mushilangane ne wa mu demokrasi?

⁸ Mutudi basadidi ba Muena teokrasi Munene, Yehowa, mbimpe tuikale bamanye dishilangana didi pankatshi pa ngenzelu wa malu mu teokrasi ne wa mu demokrasi. Mu demokrasi, muntu yonso udi ne bukenji bua kufila dîna diende. Misangu mivule badi bafuilakena nkuasa batu benza kampanye ne udi wangata muaba ngudibu belela tukanda tua bungi. Bua kuteka bantu bilondeshile mêyi a teokrasi kabatu benza nanku to. Diteka bantu bilondeshile mêyi a teokrasi kaditu difumina kudi bantu to; peshi kaditu dienzeka bilondeshile mêyi a tshisumbu kampanda tshimanyike kua mbulamatadi nansha. Bidi bimueneka ne: Paulo uvua mutume meji ku mushindu uvua Yezu ne Yehowa bamuteke “mupostolo kudi bisamba bia bende,” pakambilaye bena Galatia ne: ‘Yezu Kristo nkayende ne [Nzambi] Tatu wakamubisha ku bafue’ ke bavua bamuteke, kadi ki ‘ntshisumbu tshia bantu anyi muntu umue’ nansha.​—Lomo 11:13; Galatia 1:1, MML.

Badi babateka kudi nyuma muimpe

9. Ntshinyi tshidi Bienzedi 20:28 wamba bua mushindu udibu bateka batangidi bena Kristo?

⁹ Paulo wakavuluija batangidi ba mu Efeso ne: bavua babateke kudi nyuma muimpe wa Nzambi. Wakamba ne: ‘Nuditangile bienu bimpe, ne tshisumbu tshionso tshiakanutekelabu batangidi kudi nyuma muimpe, nudishe ekeleziya wa Mukalenge [Nzambi] wakasumbaye ku mashi [a Muanende].’ (Bienzedi 20:28) Bua batangidi bena Kristo abu kukumbajabu midimu yabu ya kulama tshisumbu tshia mikoko ya Nzambi, bavua ne bua kuikala balombola amu kudi nyuma muimpe. Pavua muntu uvuabu bateke katshiyi ukumbaja malu malomba kudi Nzambi, nyuma muimpe uvua ulua kuenza bua bamumbushe mu mudimu wa butangidi eu.

10. Mmunyi mudibi bienzeke ne: nyuma muimpe ikale ne mudimu munene mu mianda ya diteka bantu bilondeshile mêyi a teokrasi?

¹⁰ Ntshinyi tshidi tshitufikisha ku diamba ne: nyuma muimpe udi ne mudimu munene menemene? Tshia kumpalampala: mikanda idi ileja malu malomba bua kuikala mutangidi wa mu nyuma ivua mifundisha ku nyuma muimpe. Mu mukanda uvua Paulo mutumine Timote ne uvuaye mutumine Tito, wakaleja malu adi muntu ne bua kukumbaja bua kuikalaye mutangidi anyi musadidi wa mudimu. Malu onso masanga akatelaye avua matue ku 16. Tshilejilu, batangidi  bavua ne bua kuikala kabayi kadiwu, badia pa ndilu ne banua pa nnuinu, bikale ne lungenyi luimpe, bikale ne bulongame, bakididianganyi, bamanye mua kulongesha ne batatu ba mêku ba tshitembu. Bavua ne bua kuikala banua maluvu pa nnuinu, kabavua ne bua kuikala banangi ba mfranga, bavua ne bua kuikala bantu bavua bamanye mua kudikanda. Bantu bavua bipatshila bua kulua basadidi ba mudimu bavua babalomba pabu malu manene aa.​—1 Timote 3:1-10, 12, 13; Tito 1:5-9.

11. Ng’imue ngikadilu kayi idibu ne bua kukumbaja kudi balume badi bipatshila bua kuambula majitu a mu tshisumbu?

¹¹ Ngikadilu milomba eyi idi ileja ne: bantu badibu bateka bua kulombola malu mu ntendelelu wa Yehowa badi ne bua kuikala bena Kristo ba tshitembu. Bantu badi bakeba bua kuambula bujitu bua tshisumbu badi ne bua kuleja ne: nyuma muimpe udi ubalombola. (2 Timote 1:14) Bidi ne bua kumueneka patoke ne: nyuma wa Nzambi udi ukuamisha munda mua bantu aba mamuma aa: “dinanga, disanka, ditalala, lutulu, buimpe, luse, [ditabuja], kalolo ne didikanda.” (Galatia 5:22, 23, MML) Mamuma aa adi ne bua kumueneka mu malanda abu ne bena Kristo nabu ne mu malanda abu ne bantu bakuabu. Nansha biobi bua mamuma a nyuma peshi bua ngikadilu mikuabu milomba bua kuikala batangidi, muntu yonso udi ne biende bidiye mutambe kukolela. Kadi mu nsombelu wabu mujima, bonso badi batekemene bua babateke batangidi anyi basadidi ba mudimu badi ne bua kuleja ne: mbantu bakole mu nyuma badi bakumbaja malu adi Dîyi dia Nzambi dilomba.

12. Nnganyi utudi mua kuamba ne: mmuteka kudi nyuma muimpe?

¹² Pavua Paulo ubela bakuabu bua kumuidikijabu, wakabambila nenku ne dikima bualu yeye muine uvua widikija Yezu Kristo, eu ‘wakatushila tshilejilu bua tuetu tumulonde mu makasa ende [bimpe menemene].’ (1 Petelo 2:21; 1 Kolinto 11:1) Nenku tudi mua kuamba bua bantu badi bakumbaja malu malomba a mu Bible aa dîba didibu babateka batangidi anyi basadidi ba mudimu ne: mbabateke kudi nyuma muimpe.

13. Mmunyi mudi nyuma muimpe wambuluisha aba badi bafila mêna a balume badibu bamona se: badi mua kuambuluisha mu tshisumbu?

¹³ Kudi muanda mukuabu udi uleja mushindu udi nyuma muimpe ulombola malu padibu bafila mêna a badibu bajinga kuteka ne padibu bateka batangidi. Yezu wakamba ne: ‘Tatu wa mu diulu utu upa badi bamulomba nyuma muimpe.’ (Luka 11:13) Nenku padi bakulu basangila bua kufila mêna a balume badi mua kuenza mudimu mu tshisumbu, badi balomba bua nyuma wa Nzambi abalombole. Badi bafila mêna a balume aba bilondeshile malu maleja mu Dîyi dia Nzambi difundisha ku nyuma, ne nyuma muimpe pende udi ubambuluisha bua kujingulula bikala muntu udibu bakeba kuteka ukumbaja malu adi Bible ulomba. Aba badi bafila mêna a bantu aba kabena ne bua kulonda patupu tshimuenekelu, tulasa tudibu balonge anyi bipedi bidi nabi bantu abu nansha. Tshia kumpala badi ne bua kukeba bua kumanya bikala muanetu au muikale muntu mukole mu nyuma, udi bena mu tshisumbu mua kuya kulomba mibelu ya mu nyuma kabayi belakana.

14. Ntshinyi tshidi Bienzedi 6:1-3 utulongesha?

¹⁴ Nansha mudi tusumbu tua bakulu tusangila ne batangidi bena-ngendu bua kufila mêna a bana betu ba balume badi mua kulua bakulu anyi basadidi ba mudimu, dibateka dilelela didi dienzeka bilondeshile tshilejilu tshidibu batushile tshia mu bidimu lukama bia kumpala. Umue musangu, bana betu bavua dijinga ne balume bakumbane bua kuenzabu mudimu kampanda munene. Kasumbu kaludiki kufilaku mubelu eu: ‘Nukebe balume muanda-mutekete munkatshi muenu badi ne lumu luimpe, badi bûle tente ne nyuma ne lungenyi, netubateke pa mutu pa bualu ebu.’ (Bienzedi 6:1-3) Nansha muvuabi se: balume bavua batangila tshilumbu atshi ke bakafila mêna a bantu bavuabu bakeba kuteka, balume ba mu Yelushalema bavua ne bukenji abu ke bakabateka. Tshilejilu tshia muomumue etshi ke tshitudi tulonda lelu.

15. Mmunyi mudi Kasumbu Kaludiki kikale ne dîyi dia kuamba mu mianda ya diteka balume mu tshisumbu?

¹⁵ Kasumbu Kaludiki ka Bantemu ba Yehowa kuoku ke kadi kaditekela buludiludi bena mu  Komite yonso ya Filiale. Bua kujadika muntu udi mua kuenza mudimu munene eu, bena mu Kasumbu Kaludiki badi bavuluka mêyi a Yezu a se: “Wikalabo bambike bia bungi, nebamulombe bia bungi; wikalabo bambike bipite bungi, nebamulombe kabidi bipite bungi.” (Luka 12:48, MMM) Pa kumbusha diteka bena mu Komite ya Filiale, Kasumbu Kaludiki kadi kateka bakulu ba Betele ne batangidi bena-ngendu. Kadi, Kasumbu Kaludiki aka nkapeshe bana betu ba kueyemena bukenji bua kubatekela bantu bakuabu mu midimu. Kudi tshilejilu tshia mu Bible tshidi tshijadika bualu ebu.

‘Teka bakulu bu mumvua mukuambile’

16. Bua tshinyi Paulo wakashiya Tito mu Kreta, ne ntshinyi tshidibi bileja bua bantu badibu bateka lelu’eu bilondeshile mêyi a teokrasi?

¹⁶ Paulo wakambila Tito muenzejanganyi nende wa mudimu ne: “Mvua mukushiye mu Kreta bua wewe kulongolola malu onso, kuajikija, ne bua kuteka bakulu mu bimenga bionso bu mumvua mukuambile.” (Tito 1:5, MMM) Pashishe Paulo wakaleja ngikadilu ivua Tito ne bua kukeba kudi balume bavua mua kukumbanyina midimu eyi. Ke bua tshinyi lelu Kasumbu Kaludiki kadi kateka bana betu badi bakumbaje malu malomba mu filiale ne kabapesha bukenji bua kuteka bakulu ne basadidi ba mudimu. Badi balomba baleji-mpala ba Kasumbu Kaludiki aba bua bikale bajingulule bimpe ne balonde mêyi a mu Bible adi aleja mushindu wa kuteka bantu aba. Nenku Kasumbu Kaludiki ke kadi kalombola mianda ya diteka balume badi bakumbaje malu malomba mu Bible bua kuambuluishabu mu bisumbu bia Bantemu ba Yehowa bidi pa buloba bujima.

17. Mmunyi mutu biro bia filiale bikonkonona mianda idi itangila bantu badibu basue kuteka batangidi ne basadidi ba mudimu?

¹⁷ Padibu batuma mêna a bantu badibu basue kuteka batangidi anyi basadidi ba mudimu ku biro bia filiale wa Bantemu ba Yehowa, balume bapie mu nyuma badi kuntuaku badi beyemena nyuma wa Nzambi bua abalombole mu diteka dia bantu aba. Bantu aba mbajadike ne: ebu mbujitu bunene, ne: kabena ne bua kutenteka muntu bianza lukasa-lukasa to, tshianana badi mua kudibuejakaja mu mpekatu yende.​—1 Timote 5:22.

18, 19. (a) Mmunyi mutubu bamanyisha diteka bamue bantu? (b) Mmunyi mudi difila mêna ne diteka bantu mu midimu dienzeka?

¹⁸ Badi mua kutuma mukanda muikale ne  tshitampi tshia tshisumbu tshimanyike kua mbulamatadi bua kumanyisha diteka bana betu mu midimu. Mukanda wa nunku udi mua kushala bua kuikala kuteka nawu bana betu ba balume ba bungi mu tshisumbu.

¹⁹ Diteka bantu mu bisumbu bilondeshile mêyi a teokrasi didi difumina kudi Yehowa, divuila kudi Muanende, dipitshila mu njila udi Nzambi musungule: “mupika wa lulamatu ne wa budimu” ne Kasumbu kende Kaludiki. (Matayo 24:45-47, NW) Nyuma muimpe ke udi uludika anyi ulombola bionso bidibu benza bua kufila mêna ne kuteka bantu mu midimu. Bidi nanku bualu ngikadilu milomba mmileja mu Dîyi dia Nzambi, didi difundisha ku nyuma muimpe, ne muntu yonso udibu bateka udi ufila bijadiki bidi bileja ne: udi ne mamuma a nyuma eu. Pa nanku, tudi ne bua kuangata badibu bateke bu bantu bateka menemene kudi nyuma muimpe. Anu muvuabu bateka batangidi ne basadidi ba mudimu bilondeshile mêyi a teokrasi mu bidimu lukama bia kumpala, ke mudibi bienzeka kabidi lelu’eu.

Tudi ne dianyisha bua mudi Yehowa utulombola

20. Bua tshinyi tudi tumvua anu muakumvua Davidi, mudibi bileja mu Musambu 133:1?

²⁰ Mu tshikondo etshi tshidi malu a mu nyuma aya kumpala ne tshidi mudimu wa diyisha Bukalenge wenda pawu uya kumpala, tudi ne dianyisha bua mudi Yehowa uditangidila mianda ya diteka batangidi ne basadidi ba mudimu. Muanda eu muleja mu Bible udi utuambuluisha bua kutumikila mikenji miakane ya Nzambi munkatshi muetu tuetu Bantemu ba Yehowa. Kabidi, lungenyi lua buena Kristo ne mudimu wa tshisumi udi balume aba benza bidi biambuluisha basadidi ba Yehowa bua kuikalabu mu ditalala ne mu buobumue. Anu bu Davidi mufundi wa misambu, tudi tumvua muoyo utusaka bua kuamba ne: “Monayi mudibio bilenga, mudibio disanka, bua kusomba bonso pamue, bu bana ba muntu.”​—Musambu 133:1, MMM.

21. Mmunyi mudi Yeshaya 60:17 wenda ukumbana lelu?

²¹ Tudi ne dianyisha dia bungi bua mushindu udi Yehowa utulombola ne Dîyi diende ne nyuma wende! Mêyi a mu Yeshaya 60:17 adi ne mushinga menemene: ‘Nendue ne or mu muaba muakadi tshiamu tshia mitaku, nendue ne argent mu muaba muakadi tshiamu tshifike, nendue ne tshiamu tshia mitaku mu muaba muakadi mabaya, ne tshiamu tshifike mu muaba muakadi mabue. Nemvuije ditalala [batangidi] bebe, nemvuije buakane [baludiki bebe ba midimu].’ Mutudi Bantemu ba Yehowa, tudi bapete masanka mu bulongolodi bua Nzambi budi pa buloba bualu tudi balonde ku kakese ku kakese ngenzelu yonso wa malu mu teokrasi.

22. Mbua malu kayi butudi tulejila dianyisha, ne tudi ne bua kuikala badisuike bua kuenza tshinyi?

²² Tudi ne dianyisha divule bua bantu badi munkatshi muetu badibu bateke bilondeshile mêyi a teokrasi. Ne tudi tuanyisha bikole mudimu mukole kadi muikale usankisha udibu benza kudi batangidi ne basadidi ba mudimu aba badibu bateke bilondeshile mêyi a teokrasi. Tudi tutumbisha ne muoyo mujima Tatu wetu wa mu diulu, udi mutupeshe bubanji bua mu nyuma, kutupesha kabidi bintu bikuabu bia bungi. (Nsumuinu 10:22) Nenku tuikalayi badisuike bua kuenda diatshimue ne bulongolodi bua Yehowa. Tutungunukayi nangananga ne kuenza mudimu mu buobumue bua butumbi ne lumu lua dîna diende dinene ne dinsantu.

Newandamune munyi?

• Bua tshinyi tudi mua kuamba ne: diteka batangidi ne basadidi ba mudimu didi dienzeka bilondeshile mêyi a teokrasi, kadi ki mbilondeshile a demokrasi to?

• Mmunyi mudi nyuma muimpe uteka balume ba kueyemena?

• Mmunyi mudi Kasumbu Kaludiki kikale ne dîyi dia kuamba mu mianda ya diteka batangidi ne basadidi ba mudimu?

• Bua bidi bitangila diteka bantu bilondeshile mêyi a teokrasi, bua tshinyi tudi ne bua kuikala ne dianyisha kudi Yehowa?

[Nkonko ya dilonga]

[Bimfuanyi mu dibeji 15]

Bakulu ne basadidi ba mudimu badi ne diakalenga dia kusadila, bualu mbabateke bilondeshile mêyi a teokrasi