Benji ba Dîyi dia Nzambi badi ne disanka

“Tudi bajadike ne: mpungilu eu udi tshimue tshia ku bintu bidi Yehowa mutulongoluele bua tuetu kufika ku dienza mudimu wa Bukalenge wa bungi.” Aa mmêyi akamba umue wa ku ba ngamba-malu bakenza miyuki ya ntuadijilu mu Mpungilu wa Distrike wa Bantemu ba Yehowa wa “Benji ba Dîyi dia Nzambi.” Wakamba kabidi ne: “Tudi badilongolole bua batulongeshe mushindu wa kuikala ne nsombelu wa disanka mu dîku, bua batukankamije bua kushala balamate bulongolodi bua Yehowa, batusake bua kushala anu ne lukunukunu mu mudimu wa Bukalenge ne bua batuvuluije tumanye tshitudi ne bua kushadila batabale.”

KUBANGILA ku ndekelu kua ngondo muitanu mu 2000, batumikidi anyi benji ba dîyi dia Nzambi miliyo mivule ne balunda babu bakasangila miaba ya bungi pa buloba bujima bua kulonda dilongesha dia mushinga mukole didi difumina mu Bible. Ntshinyi tshivuabu balonge mu mpungilu wa matuku asatu eu?

Dituku dia kumpala: Katupu muoyo bionso bidi Yehowa muenze

Mu muyuki wa mbangilu, mulombodi wa mpungilu wakaleja bateleji ne: bavua ne bua kupeta mabenesha adi afumina ku ditendelela Yehowa mu buobumue mu mpungilu. Wakabajadikila bonso ne: ditabuja ne malanda abu ne Yehowa bivua mua kushindama.

“Nzambi wa disanka” mmumanye tshidi muntu yonso ukengela bua kuikala ne disanka. (1 Timote 1:11, NW) Nunku, muyuki uvua wamba ne: “Kuenza disua dia Nzambi kudi kutupetesha disanka” wakashindika ne: Bible udi utuleja mushindu utudi mua kuikala ne nsombelu muimpe. (Yone 13:17) Nkonko mishilangane yakelabu Bantemu ba Yehowa bakadi ne matuku a bungi mu bulelela ne mandamuna akafilabu biakaleja mudi kutumikila disua dia Nzambi mu malu mashilashilangane kuakaja nsombelu wa muntu. Muyuki muisatu uvua wamba ne: “Tusankayi bikole bua buimpe bua Yehowa” wakaleja ne: bu mudi bena Kristo ‘bidikija Nzambi,’ mbimpe bikale benze “malu mimpe onso.” (Efeso 5:1, 9) Mushindu umue munene utudi mua kuenza malu mimpe onso nkuyisha lumu luimpe ne kuvuija bantu bayidi.​—Musambu 145:7.

Muyuki uvua wamba se: “Tushalayi bashindame anu bu badi bamona Utu kayi umueneka” wakaleja wuowu mudi ditabuja dikole dituambuluisha bua “kumona” Nzambi utu kayi umueneka. Ngamba-malu wakumvuija ne: bantu badi bakole mu nyuma badi bajadika ngikadilu idi Nzambi nayi, bajadika too ne bukokeshi budiye nabu bua kumanya meji adi munda muetu. (Nsumuinu 5:21) Bantu bakelabu nkonko bakalonda malu avuabu benze bua kukolesha ditabuja diabu ne kufika ku diteka malu a Nzambi pa muaba wa kumpala.

Tshitupa tshia mu dinda tshiakajika ne muyuki wa nshindamenu uvua wamba ne: “Tumbishayi Yehowa bualu udi Muenji wa malu a dikema.” Muyuki eu wakatuambuluisha bua kujadika ne: patudi tumanya malu a bungi a Yehowa, tudi tufika ku dimona malu atudi ne bua kumutumbishila bu Muenji wa malu a dikema. Ngamba-malu uvua muenze muyuki eu wakamba ne: “Patudi tubandila bintu  bia mpatshi bidi Nzambi mufuke ne malu onso a dikema adiye utuenzela mpindieu, mutshima wetu mûle tente ne dianyisha udi utusaka bua kumutumbisha. Patudi tuelangana meji bua bishima biakenzelaye bantu bende kale, tudi tumvua muoyo wa kumutumbisha. Ne patudi tuelangana meji a malu a dikema adi Yehowa mulaye bua kuenza mu katupa kîpi emu, bidi bitusaka kabidi bua kumuleja dianyisha.”

Tshitupa tshia mpungilu tshia dilolo tshiakabanga ne muyuki wa se: “Kanupungidi bua kuenza malu mimpe.” Muyuki eu wakavuluija bateleji buonso ne: ntatu idiku lelu’eu idi ijadika ne: nshikidilu ukadi pabuipi. (2 Timote 3:1) Kadi patudi katuyi tupungila, tudi tujadika ne: tudi “ba ku badi ne ditabuja too ne ku dilama dia anyima ne muoyo.”​—Ebelu 10:39, NW.

Mmubelu kayi wa mu Bible wakafilabu bua malu a mu dîku? Muyuki wa bitupa bisatu wa kumpala mu mpungilu eu uvua wamba ne: “Tumikile Dîyi dia Nzambi,” wakatuadija ne tshiena-bualu tshia se: “Paudi ukeba muntu wa kuselangana nende.” Kusungula muntu wa kuselangana nende ndimue dia ku mapangadika manene atu bantu bangata. Ke bualu kayi bena Kristo batu banji kuindila too ne padibu bakola bashindama bafika dîba dia kuselangana, ne kabidi badi ne bua kuselangana ‘anu mu Mukalenge.’ (1 Kolinto 7:39) Tshitupa tshibidi tshia muyuki eu tshiakaleja ne: Yehowa mmusue bua mêku onso a bena Kristo alubuluke, ikale makole mu nyuma, tshiakapesha kabidi mêku mibelu mimpe idi mua kuafikisha ku dikala mushindu eu. Tshitupa tshia ndekelu tshiakavuluija baledi ne: bua kulongeshabu bana bua banange Nzambi, mbimpe buobu badianjila kumunanga.

Malu akalejabu mu muyuki uvua wamba ne: “Lekelayi dijanangana ne biakulakula” akatuambuluisha bua kumvua se: nansha mutudi bamanye mutu malu kampanda adi akemesha enzeka, mbimpe tuikale ne meji, katuikadi ba-tshitaba-mvinyingu dîba ditudi tumvua malu adi akemeshangana. Mbimpe bua bena Kristo kuakula anu malu adibu bajadike ne: mmalelela, bu mudi lumu luimpe lua Bukalenge. Muyuki uvua wamba ne: “Tutantamenayi ‘dieba mu mubidi’” wakakolesha bantu ba bungi ku muoyo. Wakabambuluisha bua kumona se: nansha tuetu ne ntatu ya munanunanu, Yehowa udi mua kutukolesha bua kuyitantamena ku diambuluisha dia nyuma wende munsantu, Dîyi diende, ne bana betu bena Kristo. Tshilejilu tshia mupostolo Paulo tshia muvuaye mutantamene ntatu ya buena ayi tshiakakankamija bantu bikole.​—2 Kolinto 12:7-10; Filipoi 4:11, 13.

Muyuki wa ndekelu bua dituku dia kumpala uvua ne: “Tuendayi tshiapamue ne bulongolodi bua Yehowa.” Wakatuleja mudi bulongolodi bua Nzambi buye kumpala mu malu asatu masunguluke: (1) lumvu lua butoke bua mu nyuma ludi Yehowa wenda anu utuvudijila, (2) mudimu udiye mutupeshe, ne (3) diakajilula dia ndongoluelu wa malu wa bulongolodi buetu pa dîba  diadi. Pashishe ngamba-malu wakamba ushindika ne: “Tudi tusanka bua malu atudi batekemene kumpala eku.” Wakebeja ne: “Malu onso aa kaenaku atusaka bua kushala ne ditabuja dia buena dituvua nadi kumpala, too ne ku ndekelu anyi?” (Ebelu 3:14) Diandamuna divua ditoke. Kuakapatuka ne broshire mupiamupia uvua ne tshiena-bualu tshia se: Udi mua kulua mulunda wa Nzambi. Neambuluishe bikole bua kulongesha nende bantu badi kabayi bamanye mukanda wa bungi anyi badi babala ne lutatu bua balonge malu adi atangila Yehowa.

Dituku dibidi: Tutungunukayi ne kuambila bantu bienzedi bia Nzambi bia kukema

Panyima pa dikonkonona dia mvese wa dituku adi, dituku dibidi dia mpungilu eu diakatungunuka ne muyuki wa bitupa bisatu uvua ne tshiena-bualu tshia se: “Basadidi ba Dîyi dia Nzambi.” Tshitupa tshia kumpala tshiakaleja mudi mudimu wetu wa diyisha pa buloba bujima wenda uya anu kumpala lelu’eu. Tutu tuamba kuteketa mu maboko bua padi bantu bavule babenga kuteleja mukenji wa Bukalenge. Bamanyishi ndambu bakadi benze matuku a bungi mu bulelela bakumvuija mudi dikolesha muoyo bua kutantamena dibalengulula anyi buluishi mu buambi dibambuluishe bua kushala ne disanka mu mudimu wa buambi. Tshitupa tshibidi tshia muyuki eu tshiakavuluija bavua mu mpungilu eu ne: Bantemu ba Yehowa batu badienzeja bua kuyisha bantu miaba yonso padibu baya kuyisha anyi padibu bapetangana nabu mu mpukapuka. Tshitupa tshia ndekelu tshiakumvuija mishindu kabukabu idi muena Kristo yonso mua kuvudija mudimu wende. Ngamba-malu wakaleja ushindika ne: bua muntu yonso kuvudijaye mudimu wende, udi ne bua kuteka Bukalenge bua Nzambi muaba wa kumpala, nansha biobi bifuane kumufikisha ku makenga anyi bimulomba bua kudipangisha bimue bintu.​—Matayo 6:19-21.

Muyuki uvua wamba ne: “Tulamatayi Nzambi ne tusanke ne bitudi nabi” uvua muela pa dîba diawu menemene bualu lelu tudi munkatshi mua bantu badi kabayi batshina Nzambi badi ne lukuka lua bintu lupite bukole.” Amue malu akamba ngamba-malu avua mimanyine pa 1 Timote 6:6-10, 18, 19, wakaamba bua kuleja mudi kulamata Nzambi kuambuluisha bena Kristo bua kuepuka dinanga dia makuta, bualu didi mua kubapambuisha ne kubafikisha ku tunyinganyinga tuvule. Wakaleja ne: nansha tuetu bampeta anyi balanda, bua tuetu kuikala ne disanka mbimpe malanda etu ne Yehowa ikale mimpe ne kabidi tuikale bimpe mu nyuma. Malu akalenga bantu  ba bungi kabidi nga mu muyuki uvua wamba ne: “Katuenji malu adi mua kufuisha Nzambi bundu.” Muyuki eu wakaleja mudi Yehowa kayi mua kupua Bantemu bende ba lulamatu muoyo. Tshilejilu tshiakashiya Yezu Kristo (udi “muomumue makelela ne lelu ne tshiendelele”) netshiambuluishe ba bungi bua kunanukila ne lubilu bua kupeta muoyo.​—Ebelu 13:8.

Bua kujikija tshitupa tshia mu dinda, kuvua muyuki wa batismo, muyuki utu misangu yonso muyuki wa mikukuku mu bisangilu binene bia Bantemu ba Yehowa. Ndisanka bungipu kayi nunku dituvua nadi patuakela mêsu e kumona bantu bapiabapia bavua badilambule balonda mu makasa a Yezu batambula batismo mu mâyi! (Matayo 3:13-17) Buonso batu bafika ku ditambula batu bamane kukumbaja malu a bungi adi aleja butumike buabu anyi mudibu benji ba dîyi dia Nzambi. Padibu batambula badi balua bena mudimu (ba-ministre) anyi bambi ba lumu luimpe bamanyike, basanka bikole bua padibu bamanye ne: badi batumbisha dîna dia Nzambi dîba didibu benza mudimu eu.​—Nsumuinu 27:11.

Tuakapeta mibelu misunguluke mu muyuki uvua wamba ne: “Tukolayi mu nyuma bua kumanya mua ‘kusunguluja tshidi tshimpe ne tshidi tshibi.’” Mêyi a bena panu adi aleja bantu tshidi tshimpe ne tshidi tshibi mmapangile mapangidilemu. Ke bualu kayi tudi ne bua kueyemena mêyi a Yehowa. (Lomo 12:2) Muyuki eu wakakankamija bantu buonso bua kudienzejabu bikole bua kupeta lumvu lujalame lua njila ya Nzambi ne kuenza muabu muonso bua kukola mu nyuma. Nunku patudi tuibidija meji etu, meji aa neamanye mua ‘kujingulula tshidi tshimpe ne tshidi tshibi.’​—Ebelu 5:11-14.

 Pashishe kulondabu kudi muyuki mukuabu wa bitupa bisatu uvua wamba ne: “Tudienzejayi bikole bua kukola mu nyuma.” Bena Kristo balelela mbamanye mudi dikolesha ne dilama dia makanda a mu nyuma dikale ne mushinga. Bua nanku badi ne bua kudienzeja bikole, mmumue ne: badi ne bua kubala, kulonga ne kuelangana meji a malu adibu balonga ne babala aa. (Matayo 7:13, 14; Luka 13:24) Bantu badi bakole mu nyuma batu kabidi basuminyina ne “kulomba kuonso ne disengelela dionso.” (Efeso 6:18) Masambila etu adi aleja bukole bua ditabuja ne lulamatu luetu, makanda etu a mu nyuma ne tshitudi tuangata bu “malu a mushinga wa bungi.” (Filipoi 1:10, NW) Tuakamona kabidi ne: bidi ne mushinga bua kushemeja malanda etu ne Yehowa anu mutu muana muena butumike ne tatuende muena malu malenga. Kuikala mu tshitendelelu kampanda (nansha tshiotshi tshilelela) ki nkudi ne mushinga nkayaku to, kadi mbimpe tuikale ne ditabuja dikole bu badi ‘bamone Nzambi.’​—Ebelu 11:6, 27, MMM.

Muyuki uvua wamba ne: “Kukola kuenu kua mu nyuma kumueneke” wakakula bua dikola dia mu nyuma. Tuakamona bitupa bisatu bia dikola dia mu nyuma edi: (1) kukolesha dimanya, lumvu ne meji, (2) kukuama mamuma a nyuma wa Nzambi, ne (3) kukumbaja majitu etu mu dîku.

Pakajika muyuki wa ndekelu wa dituku adi uvua wamba ne: “Tuendayi mu butoke bua Dîyi dia Nzambi budi buenda bulua ku kakese ku kakese,” bavua mu mpungilu bakasanka pakapetabu mukanda mupiamupia wa La prophétie d’Isaïe, lumière pour tous les humains (volume I). Mukanda eu ng’wa kumpala wa ku mikanda ibidi idi yumvuija nshapita ne nshapita yonso wa mukanda wa mu Bible wa Yeshaya. Ngamba-malu wakamba ne: “Mukanda wa Yeshaya udi ne mukenji udi ututangila tuetu petu lelu’eu. Bushuwa, milayi ya bungi idimu yakakumbana kale mu matuku a Yeshaya. . . . Nansha nanku, milayi ya bungi ya Yeshaya idi yenda ikumbana lelu, ne mikuabu neyikumbane mu bukua-panu bupiabupia budi Nzambi mulaye.”

Dituku disatu: Ikalayi benji ba Dîyi dia Yehowa

Dituku dia ndekelu dia mpungilu diakatuadija ne dikonkonona dia mvese wa dituku adi. Kudilondabu kudi muyuki wa bitupa bisatu uvua wamba ne: “Mulayi wa Sefanya udi ne mushinga bua bantu badi benza disua dia Nzambi.” Bitupa bisatu bia muyuki eu biakaleja se: anu muvua Yehowa muenze tshikondo tshivua ditunga dia Yuda dimutombokele, ke muakengeshaye kabidi bonso badi babenga kuteleja padiye ubadimuija lelu’eu. Bu mudibu benzela Nzambi mpekatu, nebatambakane kabayi wa kubambuluisha anu bu bampofo, kabayi mua kupeta wa kubapikula. Kadi bena Kristo balelela mbatungunuke buobu ne kukeba Yehowa ne lulamatu, ne nebabasokoke mu dituku dia tshiji tshia Nzambi. Nansha lelu’eu kabidi badi bapeta mabenesha mavule. Badi bakula “muakulu mukezuke” wa bulelela bua mu Bible. (Sefanya 3:9, NW) Ngamba-malu wakamba ne: “Kuakula muakulu mukezuke kakuena kumvuija anu kuitabuja bulelela  ne kubulongesha bakuabu to, kadi kudi kumvuija kabidi kuakaja bikadilu bietu bua biumvuangane ne mêyi ne mikenji ya Nzambi.”

Bavua mu mpungilu eu bavua ne mioyo kulukulu bua kulonda drama uvua ne tshiena-bualu ne: “Bilejilu bidi bitudimuija matuku etu aa.” Drama wa malu ne mvuadilu wa tshiena kale eu wakaleja muakafua bena Isalele binunu ne binunu ku mikalu ya Buloba Bulaya bua pavuabu bapue Yehowa muoyo ne pavua bakaji ba bampangano bende nabu masandi ne bababueje mu ntendelelu wa dishima. Umue wa ku bantu bavua batambe kutumba mu drama eu uvua Yamina, uvua ne mioyo ibidi ku ntuadijilu: eku ujinga kulonda bakaji ba bena Moaba bavua balengele kumona, eku ujinga kushala mulamate Yehowa. Drama eu wakaleja patoke muvua Zimeli uvua kayi utshina Nzambi muikale ne meji mabi ne lungenyi lua dipambuishangana, ne muvua Pinehasa yeye ne ditabuja ne lulamatu. Drama wakaleja ne dishindika dionso mudi kubuelakana ne bantu badi kabayi banange Yehowa kuikala ne njiwu.

Drama eu wakalongolola bateleji bua kumvuabu bimpe muyuki uvua umulondela uvua wamba ne: “Kanulu bumvu ba tshipua muoyo.” Dikonkonona dia 1 Kolinto 10:1-10 diakaleja se: Yehowa udi ukonkonona butumike buetu bua kujadika bituikala bakanyine bua kupeta bumpianyi mu bulongolodi bupiabupia. Nansha mpindieu utukadi pa kubuela mu bulongolodi bupiabupia ebu, majinga a mubidi a bamue bantu adi mua kukutakaja malu mimpe a mu nyuma adibu bipatshila. Muyuki au wakatukankamija buonso bua katulu kupangila bua ‘kubuela mu dikisha dia Yehowa’ to.​—Ebelu 4:1.

Muyuki wa patoke uvua ne tshiena-bualu etshi: “Bua tshinyi tudi ne bua kuteya ntema ku bienzedi bia Nzambi bia kukema.” “Midimu [ya Yehowa] ya kukema” idi ileja meji ende ne bukokeshi budiye nabu pa bifukibua bionso. (Yobo 37:14) Nkonko ndambu patupu ivua Yehowa muele Yobo bua kumuelesha nayi meji yakamuleja tshidi bukole bua Mufuki wa bukole buonso. Yehowa neenzele kabidi basadidi bende ba lulamatu “midimu ya kukema” matuku adi kumpala eku. Ngamba-malu wakajikija muyuki wende ne: “Tudi ne malu a bungi atudi ne bua kuteyila ntema ku midimu ya dikema ya Yehowa, tshilejilu: malu avua Yehowa muenze kale, adiye utuenzela lelu ku diambuluisha dia bifukibua biende ne makuabu adiye mulaye bua kukumbaja mu matuku makese kumpala eku.”

Ku ndekelu kua tshikepeshilu tshia dilonga dia Tshibumba tshia Nsentedi dia lumingu alu, tuakateleja muyuki wa ndekelu. Uvua wamba ne: “Tusankayi bikole bua mutudi benji ba Dîyi dia Nzambi.” Muyuki wa tshikuma eu wakaleja mudi kubadibua bu batumikidi anyi benji ba dîyi dia Nzambi kuikale muanda wa lumu lua bungi. (Yakobo 1:22) Wakavuluija kabidi bateleji ne: kuikala batumikidi anyi benji ba dîyi dia Nzambi mutudi emu mbualu bua diakalenga dia pa buadi, ne patudi tutungunuka ne kutumikila dîyi edi, muanda eu udi ulua tshintu tshia mushinga mukole kutudi. Bakakankamija bateleji buonso bua kuikalabu ne bikadilu bidi bileja ne: mpungilu wa distrike eu mmukoleshe dijinga diabu dia kuikala batumikidi anyi benji ba dîyi dia Nzambi ba dilambu. Kutumikila dîyi dia Nzambi ke mushindu umuepele udi mua kutupetesha disanka dia bungi dia bushuwa!

[Kazubu/​Tshimfuanyi mu dibeji 25]

Udi mua kulua mulunda wa Nzambi

Mu Ditanu dilolo, kuakapatuka broshire mupiamupia uvua ne tshiena-bualu tshia se: Udi mua kulua mulunda wa Nzambi. Miaba ya bungi pa buloba bujima, bantu badi ne dijinga dikole dia kulonga Bible mu mushindu mupepele, nunku netuenze mudimu ne broshire eu bua kubalongesha Bible mu mushindu mupepele. Broshire eu neambuluishe bikole bantu bakuabu, badi kabayi balonge tulasa tuvule anyi aba badi babala ne lutatu.

[Kazubu/​Bimfuanyi mu dibeji 26]

Mulayi wa Yeshaya, butoke bua bantu bonso

Bavua mu mpungilu bakasanka bikole pakapetabu mukanda mupiamupia wa La prophétie d’Isaïe, lumière pour tous les humains (volume I). Mu mukanda eu, mbalejamu mushinga udi nawu mulayi wa Yeshaya matuku etu aa.