Dimanyisha dia pa buadi

KU NDEKELU kua tshisangilu tshia ku tshidimu tshia Société Watch Tower Bible and Tract wa mu Pennsylvanie mu dia 7 Kasuamansense 2000, John Barr, mulombodi wa tshisangilu atshi wa mu Kasumbu Kaludiki wakenza dimanyisha dia pa buadi. Dimanyisha edi divua dishindamene pa miyuki ivua Theodore Jaracz ne Daniel Sydlik benze ku ntuadijilu watshi.​—Bala malu adi mu dibeji dia 12-16 ne dia 28-31 a tshibejibeji etshi.

Muanetu Barr wakaleja bualu bua mushinga wa bungi pakambaye ne: “Mbapeshe ‘mupika wa lulamatu ne wa budimu’ ne Kasumbu Kaludiki kende midimu minene kupita idi nayi bisumbu bimanyike kua mbulamatadi (anyi associations légales). Mu mukanda wa tshibungu udi ne mêyi a nshindamenu a bisumbu bionso ebi mbakulemu bua midimu idibi ne bua kuenza. Mfumuetu Yezu Kristo mmuteke kasumbu ka mupika wa lulamatu ku mutu kua ‘bintu’ biende bionso anyi midimu ya Bukalenge ya pa buloba apa.”​—Matayo 24:45-47, NW.

Bua tshisumbu tshia mu Pennsylvanie tshidi tshimanyike kua mbulamatadi, Muanetu Barr wakamba ne: “Société Watch Tower Bible and Tract wa mu Pennsylvanie mmuambuluishe bikole mu tshikondo tshietu etshi kubangila katshia watuadija mu 1884. Nansha nanku, utshidi anu tshisumbu tshidi tshimanyike kua mbulamatadi tshidi “mupika wa lulamatu ne wa budimu” wenza natshi mudimu padibi bikengela.”

Muanetu Sydlik ne Muanetu Jaracz bakumvuija mu miyuki yabu ne: dipesha “mupika wa lulamatu ne wa budimu” bintu bionso bia Mfumu bidi pa buloba kadiena dipangisha kasumbu ka mupika bua kuitabila balume badi bakumbaje malu malomba ba munkatshi mua “mikoko mikuabo” bua kuenzabu imue midimu idi itangila malu a dilombola nansha. (Yone 10:16) Ne kakuena muaba nansha umue mu Bible udibu balomba bua se: baludiki bonso ba bisumbu bimanyike kua mbulamatadi bidi Bantemu ba Yehowa benza nabi mudimu badi ne bua kuikala bonso anu bena Kristo bela manyi nansha.

Muanetu Barr wakambila bateleji ne: matuku adi panshi aa bamue bena mu Kasumbu Kaludiki ka Bantemu ba Yehowa bavua baludiki ne badi ku mutu kua bisumbu bionso bimanyike kua mbulamatadi bidi “mupika wa lulamatu ne wa budimu” wenza nabi mudimu mu États-Unis mbadilekele nkayabu mudimu eu. Mbasungule bana betu ba kueyemena ba mu tshisumbu tshia mikoko mikuabu bua kupinganabu pa muaba wabu.

Dipangadika dia Kasumbu Kaludiki edi ndimpe ditambe. Didi dipesha bena mu Kasumbu Kaludiki mushindu wa kutamba kudifila mu dilongolola biakudia bia mu nyuma ne malu makuabu bua kukumbaja majinga a mu nyuma a bana betu ba pa buloba bujima.

Bua kujikija, mulombodi wa tshisangilu etshi wakambila bateleji abu bavua bamulonde ne disanka ne: “Nansha mudibu bapeshe batangidi bapiluke midimu kabukabu ya kulombola ne ya mu bisumbu bimanyike kua mbulamatadi, . . . buonso buabu badi benza mudimu ku bulombodi bua mu nyuma bua Kasumbu Kaludiki. . . . Tuetu bonso tudi tulomba Yehowa bua abeneshe mudimu mukole utudi tukuata pamue bua kuenza disua diende, bua butumbi ne lumu lua dîna diende dinene.”