Mushindu udi Kasumbu Kaludiki kashilangane ne tshisumbu tshimanyike kua mbulamatadi

BISANGILU bia ku tshidimu bia Société Watch Tower Bible and Tract wa mu Pennsylvanie mbienzeke katshia mu Tshiongo 1885. Patshivua disangisha dia bena Kristo bela manyi dienda dienzeka ku ndekelu kua lukama lua bidimu lua 19, baludiki ne bawetu badi ku mutu kua tshisumbu etshi tshimanyike kua mbulamatadi bavua buonso ne ditekemena dia kupeta muoyo mu diulu. Ke muvuabi misangu yonso nanku.

Kuvua dishilangana mu bualu bumue. Mu 1940, bakasungula Hayden Covington (nzuji uvua upesha Société mibelu wa munkatshi mua “mikoko mikuabo,” uvua yeye ne ditekemena dia kupeta muoyo pa buloba) bua kuikalaye muludiki wa Société. (Yone 10:16) Mu 1942 too ne mu 1945, uvua tshindondi tshia mulombodi wa Société. Dîba adi, Muanetu Covington wakalekela mudimu wa muludiki wa Société bua kutumikila tshivua tshimueneka bu disua dia Yehowa musangu au, dia se: baludiki ne bonso badi ku mutu kua tshisumbu tshimanyike kua mbulamatadi tshia mu Pennsylvanie bavua ne bua kuikala bena Kristo bela manyi. Pashishe Lyman Swingle wakapingana pa muaba wa Hayden Covington mu kasumbu ka baludiki, ne tshikondo atshi bakasungula Frederick Franz tshindondi tshia mulombodi.

Bua tshinganyi basadidi ba Yehowa bavua bela meji ne: baludiki ne bonso bavua ku mutu kua Société Watch Tower Bible and Tract wa mu Pennsylvanie bavua ne bua kuikala bena Kristo bela manyi? Bualu tshikondo atshi, kasumbu ka baludiki ne bana betu bavua ku mutu kua tshisumbu tshimanyike kua mbulamatshi tshia mu Pennsylvanie bavua tshintu tshimue ne Kasumbu Kaludiki ka Bantemu ba Yehowa kadi kenza anu ne balume bela manyi.

Tshisangilu tshia ku tshidimu tshia mushinga

Mu tshisangilu tshia ku tshidimu tshiakenzeka mu dia 2 Kasuamansense 1944, mu Pittsburgh, bena mu tshisumbu tshimanyike kua mbulamatadi tshia mu Pennsylvanie bakangata mapangadika manene asambombo avua ashintulula mukanda wa mêyi atshi a nshindamenu. Mukanda au uvua wamba ne: bavua ne bua kuelela bantu badi bafile mapa bua kuambuluisha mudimu wa Société tukanda, kadi dipangadika disatu diakashipa dîyi adi. Luapolo luakafilabu bua tshisangilu tshia ku tshidimu atshi luvua luamba ne: “Bungi bua bena mu Société nebushikidile anu pa bantu 500 . . . Muntu yonso udibu basungule udi ne bua kuikala musadidi wa ku dîba ne ku dîba wa Société anyi musadidi wa mêba makese wa kumpanyi [tshisumbu] wa bantemu ba Yehowa ne udi ne bua kuikala ne lungenyi lua buena lua Mukalenge.”

Pashishe, bantu bavua badilambule ne muoyo mujima kudi Yehowa ke bavua ne bua kusungula baludiki ba Société, kabiyi bua bungi bua makuta avuabu bafile bua kutungunuja mudimu wa Bukalenge nansha. Muanda eu wakamueneka upetangana ne malu avuabu ne bua kulengeja ku kakese ku kakese akavua Yeshaya 60:17 mumanyishe ne: ‘Nendue ne or mu muaba muakadi tshiamu tshia mitaku, nendue ne argent mu muaba muakadi tshiamu tshifike, nendue ne tshiamu tshia mitaku mu muaba muakadi mabaya, ne tshiamu tshifike mu muaba muakadi mabue. Nemvuije ditalala [batangidi] bebe, nemvuije buakane [baludiki ba midimu] bebe.’ Pavua mulayi eu wakula bua “batangidi” ne “baludiki ba midimu,” uvua uleja muvua ngenzelu wa malu mu bulongolodi bua bantu ba Yehowa ne bua kushintuluka.

Bualu bua mushinga ebu bua kufikisha bulongolodi ku dilonda bimpe menemene mêyi a teokrasi buakenzeka ku ndekelu kua “dinda ne dilolo, binunu bibidi ne nkama isatu,” bidibu bambe mu Danyele 8:14. Dîba adi, ‘bakalengeja [muaba munsantu].’

Kadi kunyima kua tshisangilu tshia mushinga tshia mu 1944 atshi, lukonko lunene luakashala luimane. Bu muvua Kasumbu Kaludiki kikale tshintu tshimue ne tshisumbu tshimanyike kua mbulamatadi tshia mu Pennsylvanie tshienza ne bantu muanda-mutekete ba mu kasumbu ka baludiki, nanku bivuaku bisua kuleja ne: Kasumbu Kaludiki kakavuaku  ne bua kuikala ne bena Kristo bela manyi bapite pa muanda-mutekete anyi? Kabidi, bu muvuabu basungula baludiki kudi bena mu tshisumbu atshi, mbuena kuamba ne: bena mu tshisumbu tshimanyike kua mbulamatadi bavua basungula bena mu Kasumbu Kaludiki mu tshisangilu tshionso tshia ku tshidimu anyi? Baludiki ne bantu badi ku mutu kua Société Watch Tower Bible and Tract wa mu Pennsylvanie ne bena mu Kasumbu Kaludiki mbantu bamue bamue abu anyi mbashilangane?

Tshisangilu tshikuabu tshia ku tshidimu tshikena kupua muoyo

Bakandamuna nkonko eyi mu tshisangilu tshia ku tshidimu tshiakenzeka mu dia 1 Kasuamansense 1971. Mu tshisangilu atshi, munga ngamba-malu wakaleja ne: kasumbu kaludiki ka “mupika wa lulamatu ne wa budimu” nkapite Société Watch Tower Bible and Tract wa mu Pennsylvanie ku bidimu nkama ne nkama. (Matayo 24:45-47, NW) Bakenza kasumbu kaludiki mu Pentekoste wa mu tshidimu tshia 33 B.B., nkama ya bidimu mipite pa 18 kumpala kua kuenzabu tshisumbu tshimanyike kua mbulamatadi tshia mu Pennsylvanie. Kumpalampala, kasumbu kaludiki kakavua kenza ne balume muanda-mutekete to, kadi kavua ne bapostolo 12. Kunyima, bakalua kuvudija bungi bua bantu bavuamu, bualu bavua balombola “ku Yelushalema kudi bapostolo ne bakulu.”​—Tuetu mbadi baladike maleta; Bienzedi 15:2.

Mu 1971 ngamba-malu au wakumvuija ne: bena mu Société Watch Tower kabavua mua kusungula bena mu Kasumbu Kaludiki nansha. Bua tshinganyi? Wakamba ne: “Bualu, kasumbu kaludiki ka “mupika” ki nkateka kudi muntu nansha umue to. Nkateka kudi . . . Yezu Kristo, udi muikale Mutu wa tshisumbu tshia bena Kristo balelela, Mukalenge ne Mfumu wa kasumbu ka ‘mupika wa lulamatu ne budimu’.” Mbiumvuike patoke ne: bena mu Kasumbu Kaludiki kabena ne bua kubasungula kudi bena mu tshisumbu nansha tshimue tshimanyike kua mbulamatadi to.

Ngamba-malu au wakatungunuka, e kuambaye mêyi a mushinga mukole ne: “Kasumbu kaludiki kakena ne bantu ku mutu kuaku bu mudi Kasumbu ka Baludiki ba Société, mmumue ne: mulombodi, tshindondi tshia mulombodi ne mufundi udi kabidi mulami wa tshibutshilu nansha. Kasumbu Kaludiki kadi anu patupu ne muntu utu ulombola bisangilu.” Munkatshi mua bidimu bia bungi, mulombodi wa tshisumbu tshimanyike kua mbulamatadi tshia mu Pennsylvanie uvua kabidi muntu uvua ku mutu kua Kasumbu Kaludiki. Kabivua kabidi ne bua kuikala nanku to. Nansha mudi bena mu Kasumbu Kaludiki kabayi ne dimanya ne bipedi bia muomumue, midimu yabu idi ne bua kuikala ya muomumue. Ngamba-malu au wakaleja kabidi ne: “Nanku muntu yonso udi mu kasumbu kaludiki udi mua kuikala ulombola bisangilu nansha yeye kayi mulombodi wa . . . Société . . . Bidi bilondeshila anu mushindu udibu balongolole dilondangana dia badi balombola bisangilu bia kasumbu kaludiki.”

Mu tshisangilu tshia ku tshidimu atshi tshikena kupua muoyo tshia mu 1971, bakaleja bimpe dishilangana didi pankatshi pa bela manyi badi mu Kasumbu Kaludiki ne baludiki ba tshisumbu tshimanyike kua mbulamatadi tshia mu Pennsylvanie. Nansha nanku, bena mu Kasumbu Kaludiki bakatungunuka ne kuikala baludiki ba Société. Kadi lelu lukonko ludi lujuka ne: Kudiku tshijadiki tshia mu Bible tshidi tshileja ne: baludiki ba Société Watch Tower Bible and Tract wa mu Pennsylvanie badi ne bua kuikala anu bena mu Kasumbu Kaludiki anyi?

Tòo. Bantemu ba Yehowa kabatu benza mudimu anu ne tshisumbu tshia mu Pennsylvanie nkayatshi to. Bikuabu bidiku. Tudi mua kutela tshia Société Watchtower Bible and Tract wa mu New York, Incorporated. Tshisumbu etshi tshidi tshitupepejila mudimu mu États-Unis. Kakuyi mpata, Yehowa mmutshibeneshe, nansha mudi badi batshiludika ne aba badi ku mutu kuatshi bikale nangananga ba mu “mikoko mikuabo.” Mu Grande-Bretagne mutu tshisumbu tshia Association Internationale des Étudiants de la Bible. Tudi tuenza mudimu ne bikuabu bisumbu bidi mbulamatadi mimanye bua kuyisha midimu ya Bukalenge kumpala mu matunga makuabu. Buonso buabi bidi biambuluisha, ne mudimu wabi ngua kuenza bua tuyishe lumu luimpe pa buloba bujima. Nansha bisumbu ebi bikale muaba kayi anyi babiludika kudi bantu kayi, Kasumbu Kaludiki ke kadi ku mutu kuabi ne kenza nabi mudimu bilondeshile mêyi a teokrasi. Ke bualu kayi bisumbu ebi bitu ne midimu idibu babipeshe bua kukumbaja bua malu a bukalenge kuyawu kumpala.

Kuikala ne bisumbu bidi mbulamatadi mimanye kudi kutuambuluisha bikole. Tudi tupeta mushindu wa kulonda mikenji ya muaba anyi ya mu ditunga ditudi, anu mudi Dîyi dia Nzambi diamba. (Yelemiya 32:11; Lomo 13:1) Bisumbu bimanyike kua mbulamatadi bidi bitupepejila mudimu  wa dipatula Bible ku biamu, ne mikanda, bibejibeji, broshire anyi minga mikanda idi ituambuluisha bua kumuangalaja mukenji wa Bukalenge. Bu mudi bisumbu ebi bimanyike kua mbulamatadi, bidi kabidi biambuluisha mu malu a disumba dia mpangu yetu, a diabanya bintu bidi bawetu bafila bua kuambuluisha bana betu badi mu dikenga, mu malu a kontra ya difutshila miaba ya kuenzela mpungilu, ne bikuabu. Tudi ne dianyisha dia bungi bua midimu yonso idi bisumbu bimanyike kua mbulamatadi ebi bienza.

Dîna dia Yehowa ke didi kumpala

Mu 1944, bakashintulula kanungu kibidi ka mukanda wa mêyi a nshindamenu wa Société Watch Tower Bible and Tract wa mu Pennsylvanie bua kumvuija bipatshila bia tshisumbu etshi. Bilondeshile mukanda wa mêyi a nshindamenu eu, mu bipatshila bia Société mudi tshipatshila tshinene etshi: “Kuyisha bisamba bionso lumu luimpe lua bukalenge bua Nzambi bulombola kudi Yezu Kristo bu dimanyisha dia dîna, dîyi ne bumfumu bunene bua Nzambi Wa-Bukole-Buonso YEHOWA.”

Kubangila mu 1926 “mupika wa lulamatu” mmutume dîna dia Yehowa kumpala. Nangananga mu tshidimu tshia 1931, dîba divua Balongi ba Bible bangate dîna dia Bantemu ba Yehowa. (Yeshaya 43:10-12) Ku mikanda ivua Société mupatule ne ivua mitambe kuimanyina pa dîna dia Nzambi tudi mua kutela wa: Yehowa (Angl., 1934), “Que ton nom soit sanctifié” (1964), ne wa “Les nations sauront que je suis Jéhovah”​—Comment? (1974).

Tudi tutela nangananga Bible wa Les Saintes Écritures​—Traduction du monde nouveau, wakapatuka mujima mu Anglais mu 1960. Bible eu udi ne dîna dia Yehowa muaba wonso uvua Tetragrame (anyi maleta anayi a mu tshiena-Ebelu: YHWH) umueneka mu Mikanda ya tshiena-Ebelu. Bible eu udi kabidi ne dîna dia Nzambi miaba 237 mu Mikanda ya tshiena-Greke ya bena Kristo yakakonkononabu bimpe bimpe ne kuluabu kumona ne: dîna edi divuamu. Tudi ne dianyisha dia bungi bua mudi Yehowa muambuluishe “mupika” ne Kasumbu Kaludiki kende mu mishindu ya bungi bua kuenzabu mudimu ne matanda a mikanda pamue ne bisumbu bimanyike kua mbulamatadi bua kumanyisha dîna diende pa buloba bujima!

Badi bamuangalaja Dîyi dia Nzambi

Bible ne mikanda miliyo mivule idibu bapatula idi ileja se: bantu ba Yehowa badi batungunuka ne kumanyisha dîna diende ne mbabingishe Dîyi diende. Ku mbangilu kua bidimu bia 1900, Société Watch Tower wakasumba bukenji bua kupatula Bible muikale ne Mikanda ya tshiena-Greke ya bena Kristo wa The Emphatic Diaglott, mukudimuna kudi Benjamin Wilson mu tshiena-Greke ne mu Anglais. Société wakapatula Bible wa Balongi ba Bible wa King James Version, muikale ne mabeji 500 a mumvuija ku ndekelu. Mu 1942 wakapatula Bible wa King James Version muikale kabidi ne mvese miela mifunda mu milongo munkatshi mua mabeji. Pashishe mu 1944 Société wakatuadija kupatula Bible wa American Standard Version wa mu 1901, mudibu batele dîna dia Nzambi. Mu 1972, Société wakapatula Bible wa The Bible in Living English, muikale kabidi ne dîna dia Yehowa, uvua mufunda kudi Stephen T. Byington.

Bisumbu ebi bimanyike kua mbulamatadi bidi Bantemu ba Yehowa benza nabi mudimu mbiambuluishe bua kupatula ne kuabanya Bible yonso eyi. Kadi bualu bua kutamba kumanya mbua se: kudi diumvuangana dikole pankatshi pa Société Watch Tower ne tshisumbu tshia Bantemu ba Yehowa bela manyi badi benza Komite wa Traduction du Monde Nouveau. Tudi ne disanka bualu too ne mpindieu mbapatute Bible eu (tshitupa anyi mujima) bungi bupite pa 106 400 000 mu miakulu 38. Bulelela, tudi mua kuamba ne: Société Watch Tower Bible and Tract wa mu Pennsylvanie udi sociéte wa Bible menemene!

“Mupika wa lulamatu” ‘mbamuteke pa mutu pa bintu bionso bia Mfumu wende.’ Munkatshi mua bintu ebi mudi nzubu ya biro bia muaba udibu balombuela mudimu wa Bantemu pa buloba bujima, bidi mu New York (États-Unis), ne filiale 110 idi pa buloba bujima. Bena mu kasumbu ka mupika mbamanye bimpe ne: nebalubuile Nzambi bua mushindu  udibu benze mudimu ne bintu bidiye mubapeshe. (Matayo 25:14-30) Kadi muanda eu kawena upangisha “mupika” bua kuitaba bua se: bakulu ba munkatshi mua “mikoko mikuabu” badi bakumbaje malu malomba benze midimu ya dilombola ne ya mu bisumbu bimanyike kua mbulamatadi nansha. Dipesha bawetu aba midimu eyi didi dipesha bena mu Kasumbu Kaludiki dîba dia bungi dia kudifila ku ‘[masambila] ne [mu] mudimu wa dîyi.’​—Bienzedi 6:4.

Pikalaku anu mushindu, Kasumbu Kaludiki, kadi kaleja mpala wa “mupika wa lulamatu ne wa budimu,” nekatungunuke ne kuenza mudimu ne bisumbu ebi bimanyike kua mbulamatadi. Bisumbu ebi bidi biambuluisha, kadi ki mbuena kuamba ne: biobi kabiyiku kuajiki nansha. Mukenji wa mbulamatadi wowu mushipe tshisumbu tshivuawu witaba, mudimu wa diyisha wowu neutungunuke. Nansha mpindieu, mu matunga mudibu bakandike mudimu wetu ne kamuyi bisumbu bimanyike kua mbulamatadi, Bantemu ba Yehowa badi batungunuka anu ne kumanyisha mukenji wa Bukalenge, bavuija bantu bayidi, ne mudimu wa Nzambi udi wenda uya kumpala. Bidi bienzeka nanku bualu Bantemu ba Yehowa badi bakuna ne bamiamina mâyi, ne ‘Nzambi udi ubidiundisha.’​—1 Kolinto 3:6, 7.

Patudi tuela meji bua matuku atshilualua, tudi bajadike ne: Yehowa neakumbaje majinga a mu nyuma ne a ku mubidi a bantu bende. Yeye ne Muanende Yezu Kristo nebatungunuke ne kutulombola ne kutuambuluisha bua tujikije mudimu wa diyisha Bukalenge wonso nkong. Bu mutudi basadidi ba Nzambi, tshionso tshitudi tuenza katshiena tshienzeka ‘bua bungi bua masalayi, anyi bua bukole, kadi mbua nyuma wa Yehowa.’ (Zekâya 4:6) Ke bualu kayi tudi tulomba Nzambi bua atuambuluishe, bamanye ne: bua bukole budi Yehowa utupesha netujikije mudimu udiye mutupeshe mu tshikondo etshi tshia ku nshikidilu!