Mushindu utudi mua kudienzeja bua kuikala ne buimpe

KUIKALA ne “buimpe” kudi kumvuija kuikala ne ngikadilu mulenga, ne bienzedi ne meji makane; bulenga bua mu ngikadilu. Mufundi mukuabu wa nkonga-miaku diende Marvin Vincent, udi wamba ne: diumvuija dia ntuadijilu dia muaku wa mu tshiena-Greke mukudimuna ne: “buimpe” didi dileja “bulenga bua mishindu yonso.” Nenku kabiena bitukemesha bua mutu bantu imue misangu babikila budimu, dikima, didikanda, malu makane, luse, dinanukila, malu malelela, budipuekeshi ne lulamatu ne: nngikadilu idi ileja buimpe. Batu kabidi bumvuija buimpe bu “dilonda dia mukenji wa ngikadilu muakane.”

Mukenji wa malu malenga, wa buimpe ne wa buakane utudi ne bua kutumikila ngua nganyi? Tshimue tshikandakanda tshiakamba ne: “Bilondeshile lungenyi ludi nalu bena nkindi bavule pa bidi bitangila ngikadilu muimpe, mpata idibu bajule kudi bena kasumbu ka nkindi ka Bukenke mmivuije lungenyi luonso lua kusungula tshidi tshiakane ne tshidi tshibi bu muanda udi utangila disua dia muntu nkayende, tshidi muoyo wende musue peshi tshidi tshilengelela bantu ba muaba udiye.” (Newsweek) Kadi kulonda bualu budi muoyo musue nkayaku peshi tshintu tshidi tshilengelela muntu ke mushindu muimpe wa kujadika tshidi tshimpe ne tshidi tshibi anyi? Tòo. Bua tuetu kuikala ne buimpe, tudi dijinga ne mikenji ya kueyemena idi ileja tshidi tshimpe ne tshidi tshibi; mikenji idi mua kuambuluisha bua kujadika ne: bualu kampanda, lungenyi kansanga peshi ngikadilu kankenga mmubi anyi mmuimpe.

Mpokolo umuepele mulelela wa mikenji idi ipeshangana ngikadilu muimpe

Mikenji idi ileja muntu ngikadilu muimpe wa kulonda idi anu ifumina kudi Mufuki wa bantu, Yehowa Nzambi. Katupa kîpi kunyima kua yeye mumane kufuka Adama muntu wa kumpala, Yehowa Nzambi wakamuelela mukenji eu: “Udi mua kudia mamuma a mitshi yonso ya mu budimi, bu mûdi musue; kadi mamuma a mutshi wa lungenyi lua kujingulula malu mimpe ne malu  mabi kuadi nansha; bualu bua mu dituku diudi wadia wewe neufue bulelela.” (Genese 2:16, 17) Yehowa Nzambi wakinyika mutshi au dîna dia wadi mushindu bua kuleja bukenji budiye anu yeye nkayende nabu bua kujadikila bifukibua biende tshidi tshimpe ne tshidi tshibi. Mushindu’eu ke wakalua mikenji ya Nzambi idi ileja tshidi tshimpe ne tshidi tshibi kushala nshindamenu wa kupimina anyi kujinguluila tshidi bienzedi bia muntu, mmuenenu wende ne ngikadilu yende. Bu kakuyi mikenji eyi katuvua mua kumanya bua kusunguluja biakane tshidi tshimpe ne tshidi tshibi to.

Mukenji uvua utangila mutshi wa dimanya dia malu mimpe ne mabi wakateka Adama ne Eva kumpala kua malu abidi a kusungula: kutumikila anyi kubenga kutumikila. Buabu buobu, kutumikila mukenji au ke kuvua kumvuija kuikala ne buimpe. Kunyima kua matuku, Yehowa wakalua kumanyisha tshidi tshimusankisha ne tshidi katshiyi tshimusankisha, ne wakatufundishilatshi mu Bible. Nenku kudienzeja bua kuikala ne buimpe kudi kumvuija kutumikila mêyi makane a Yehowa adi mu Bible.

Tumanye bimpe mikenji ya Nzambi

Bu mudi Yehowa mututekele mikenji idi ileja tshidi tshimpe ne tshidi tshibi ne muyileje patoke mu Bible, katuenaku ne bua kujinga bua kuyimanya bimpe menemene anyi? Mupostolo Paulo wakafunda ne: ‘Dîyi dionso dia mu Mukanda wa Nzambi didi difume munda mua Nzambi bu mupuya wende, ne didi ne mudimu muimpe wa kuyisha bantu, ne wa kubabela, ne wa kubadimuija, ne wa kubalongesha mu buakane bua Nzambi; bua muntu wa Nzambi ikale mukumbajibue, mulongolola tshishiki bua midimu yonso mimpe.’​—2 Timote 3:16, 17.

Tshilejilu, tangila tshilumbu tshiakapeta Kunihito utudi batele mu tshiena-bualu tshishale pakalejaye bupuekele mu mushindu utubu babuangata muaba udiye mukolele. Dikonkonona mikenji ya mu Bible bimpebimpe diakalua kumuambuluisha bua kuikalaye umona bualu ne bualu mu mushindu udi mubuakanyine. Bible udi utukankamija bua kuikala bena bupuekele, ne utubela bua kuepuka ditamba kudieyemena ne didibandisha. (Nsumuinu 11:2; Mika 6:8) Kadi pavua mupostolo Paulo utela ngikadillu ya kukumbaja bua kuenza “mudimu wa mutangidi,” bualu buakambaye mbua ‘kuipatshila’ mudimu eu. (1 Timote 3:1, NW) Muntu udi ‘wipatshila’ mudimu eu udi ne bua kuepuka lutambishi anyi didibandisha, kadi kêna ne bua kudipuekesha milongo tshianana nansha.

Bible udi wamba tshinyi bua ngikadilu mulenga mu malu a bungenda? Kulonda njila mikondakane peshi kuibila mu malu a mikenji ta a bitadi bia mbulamatadi nkutangalake lelu mu bungenda. Kadi nansha bakuabu buobu benza malu a mushindu kayi, mukenji wa mu Bible udi se: tudi ne bua ‘kuenda bimpe mu malu onso.’ (Ebelu 13:18) Nenku tudi tudienzeja bua kuikala ne buimpe patudi tuamba malu malelela ne majalame kumpala kua bamfumu ba mudimu, bena mudimu, ba-kiliya ne bena mbulamatadi. (Dutelonome 25:13-16; Lomo 13:1; Tito 2:9, 10) Kuamba kua malu malelela kudi kufikisha bakuabu ku ditueyemena ne ku dijinga kushala netu bulunda. Ne kufunda malu atudi bumvuangane bua kuenza mu mikanda kutu misangu mivule kuambuluisha bua kuepuka dipangakanangana ne dibuejakaja bidi mua kujuka bua ‘malu [akena malongolola atu] atutulukila.’​—Muambi 9:11; Yakobo 4:13, 14.

Tudi kabidi ne bua kudienzeja bua kuikala ne buimpe mu mvuadilu ne ndengejilu wa mubidi. Disungula bilamba bia kuvuala ditu dilondeshila muaba udi muntu mukolele, kadi bantu pabu badi mua kuikala basakangana bikole bua kulonda miodele mipiamipia. Kadi ntshinyi tshitudi ne bua kulondela modele wonso mupiamupia udi upatuka? Bible udi utubela bua kubenga ‘kuidikija malu a bena panu.’ (Lomo 12:2, Mukanda wa Mvidi Mukulu) Pamutu pa kuela mukenji, mupostolo Paulo wakafunda ku bukole bua nyuma wa Nzambi ne: “Ndi njinga kabidi bua bakaji bavuale bilamba mvuadilu muakane, ne didipuekesha ne kanemu; kabadilengeji ne nsuki miluka bipia, anyi bilenga bienza ne biamu bia or, anyi mabue anyi bivualu bia mushinga mukole, kadi badilengeje ne bienzedi bimpe, bu mudibi bikumbanyina bakaji badi badiamba ne: Tudi tunemeka [Nzambi].” (1 Timote 2:9, 10, Muanda Mulenga Lelu) Dîyi edi didi ditangila ne bantu balume ne bantu bakaji. Kadi bu mutu bantu ne bantu ba miaba mishilangane bikale ne tshiabu tshibidilu anyi muntu yonso ne tshidi wende muoyo musue, kudi mushindu wa buobu kudisunguila mvuadilu mishilangane idi ibalengelela.

Bible udi kabidi uleja bilele bibi bidi Nzambi ubenga patoke. Tshilejilu, tudi tubala mu 1 Kolinto 6:9, 10 ne: ‘Kanuena bamanye ne: bantu babi  kabena bapiana bukalenge bua Nzambi anyi? Kanudingibu; bena tshiendenda, anyi bena mpingu, anyi bena masandi, anyi badileji bu bakaji, anyi balume badi benzelangana malu a bundu, anyi bibi, anyi bena lukuka lua bintu, anyi bakuatshiki ba maluvu, anyi bapendianganyi, anyi banyengi ba bintu, kabena bapiana bukalenge bua Nzambi.’ Mvese eu wakambuluisha Maria utudi batele mu tshiena-bualu tshishale bua kumonaye ne: bilondeshile mikenji miela kudi Mufuki idi ileja bantu ngikadilu mulenga wa kulonda, malanda ende ne Juan avua mabi, ne uvua ne bua kuashipa bikalaye uvua musue bua Nzambi amuanyishe. Mbiumvuike patoke se: bua kuikala ne buimpe, tudi ne bua kumanya mikenji ya Yehowa bimpe menemene.

Longa ne mutshima webe mujima

Buimpe kabuena anu diepuka malu adi mabi patupu to. Butu ne bukole budi busakangana ku malu mimpe. Muntu udi ne buimpe udi ne malu mimpe. Mulongeshi mukuabu udi wamba ne: “Buimpe ntshintu tshia kulonga ne mutshima ne mutu kabidi.” Nenku kuikala ne buimpe kudi kumvuija malu a bungi kupita dibidilangana bikole ne Dîyi dia Nzambi. Kudi kutulomba bua kuelangana meji ku bidi bifunda mu Bible bua mitshima yetu yuwule tente ne dianyisha dia Yehowa ne bua tumvue muoyo utusaka bua kuikala tutumikila mêyi a mu Bible.

Mufundi wa Misambu wakamba ne: ‘Mona mundi munange mikenji yebe! Ndi ngelangana meji bualu buayi dinda too ne ku dilolo.’ (Musambu 119:97) Mukalenge Davidi wakafunda ne: ‘Ndi mvuluka matuku a diambedi, ndi ngelangana meji a bienzedi [bia Nzambi] bionso; ndi ngelangana meji a mudimu wa bianza biebe.’ (Musambu 143:5) Tuetu petu tudi ne bua kuikala tuelangana meji ne tusambila patudi tulonga Bible ne mikanda idi yumvuija malu adimu.

Bulelela, bidi mua kuikala bikole bua kupeta dîba dia kuikala kulonga ne tshisumi ne kuelangana meji. Kadi didienzeja bua kuikala ne buimpe didi ditulomba bua tuetu kudisumbila dîba ne tshikondo mu malu makuabu. (Efeso 5:15, 16) Aaron (udi ne bidimu 24) utu udisumbila dîba edi dituku dionso padiye ubika minite 30 kumpala kua dîba divuaye ubika kumpala. Udi wamba ne: “Kumpala, mvua mbala anu Bible mu minite yonso 30 eyi. Anu matuku mashale aa ke andi mulue kumona mudi dielangana meji dikale ne mushinga. Ke bualu kayi mpindieu nkadi nkosa minite ayi pankatshi bua kuela meji bua malu andi mfuma ku dibala. mbingambuluishe bikole.” Tudi mua kuelangana meji mu bikondo bikuabu kabidi. Davidi wakamba mu musambu kampanda wakimbilaye Yehowa ne: ‘Ndi ngelangana meji a bualu buebe mu mpola ya kutentekela butuku.’ (Musambu 63:6) Bible udi wamba kabidi ne: “Isaka wakaya mu budimi dilolo bua [kuelangana meji, NW].”​—Genese 24:63.

Kuelangana meji kudi ne mushinga wa bungi menemene bua tuetu kushisha kuikala ne buimpe, bualu kudi kutuambuluisha bua kumvua mudi Yehowa umvua, ne kumona malu mushindu utuye uamona. Tshilejilu, Maria uvua mumanye ne: Nzambi mmukandike tshiendenda. Kadi bua ‘kukina malu adi mabi ne kulamata malu adi mimpe,’ uvua ne bua kuelangana meji bua mêyi adi mu mvese minene ya mu Bible. (Lomo 12:9) Mêyi adi mu Kolosai 3:5 akamuambuluisha bua kushintuluka. Mêyi aa adi atukankamija bua ‘kufuisha bitupa bia mibidi yetu [bua]: masandi, malu a bukoya, nkuka ya mubidi, disamina dibi dia mutshima, ne dikuma dia mutshima ku bintu.’ Maria wakadikonka ne: ‘Nkuka ya mubidi ya mushindu kayi indi ne bua kufuishila bitupa bia mubidi wanyi? Mbintu kayi bindi ne bua kuepuka bidi mua kunjula  majinga mabi? Kudiku malu andi ne bua kushintulula mu malanda andi nawu ne bantu balume anyi?’

Kuelangana meji kudi kumvuija kabidi kudianjila kumona tshipeta tshiapatuka ku bualu kampanda. Paulo udi ubela bena Kristo bua kuepuka tshiendenda ne kuikala bamanye mua kudikanda bua se: ‘muntu kasambuki mikalu ne kenzedi muanabu wa mu Kristo bibi mu bualu ebu.’ (1 Tesalonike 4:3-7) Nkonko mimpe ya kuelelapu meji nyeyi: ‘Meme muenze bualu ebu, mbubi kayi bundi mua kudienzela, kuenzela dîku dietu peshi bantu bakuabu? Mmunyi mudibi mua kuntatshisha mu nyuma, mu lungenyi ne mu mubidi? Mmalu kayi avua mafikile bantu bakashipa mikenji ya Nzambi kale?’ Dielangana meji nunku diakapesha Maria muoyo mukole, nanku didi mua kutupeshawu petu.

Bilejilu bikulongeshe

Badi mua kulongela buimpe mu kalasa anyi? Lukonko elu lutu lutatshishe bena meji kukadi bidimu binunu bivule. Platon (muena nkindi wa bena Greke) uvua wela meji ne: badi mua kulongela buimpe mu kalasa. Kadi Aristote yeye uvua umona ne: muntu udi ulua muena buimpe padiye udibidija bua kubumuenesha mu bienzedi. Kamona-kamba mukuabu wakumvuija muyuki wakenzeka pa lukonko elu mushindu’eu: “Mu tshikoso, muntu kêna mua kudimanyina nkayende mêyi adi alongesha buimpe to. Kabena mene mua kuapeta mu mikanda ya tulasa bua kualongeshangana. Muntu utu upeta bikadilu bilenga mu disombela miaba . . . idi bantu bakankamijangana bua kuikala ne buimpe ne babuelelangana kalumbandi.” Kadi nkuepi kutudi mua kupeta bantu badi menemene ne buimpe? Nansha mudi miaba ya bungi bantu batela bimue bilejilu bia buimpe, bu mudi buvua nabu bilobo bia mu mianu yabu ne mu miyuki ya kale, Bible udi ne bilejilu bia bungi bilelela.

Tshilejilu tshia buimpe tshia pa buatshi menemene ntshia Yehowa. Malu atuye wenza atu anu mimpe, malu adi makane ne malenga. Tudi mua kufika ku dikala ne buimpe tuetu ‘tuidikija kuenza mudi Nzambi wenza.’ (Efeso 5:1) Yezu Kristo Muana wa Nzambi ‘wakatushila [kabidi] tshilejilu bua tuetu tumulonde mu makasa ende.’ (1 Petelo 2:21) Pashishe, mu Bible mudi miyuki ya bantu ba bungi ba lulamatu bu mudi: Abalahama, Sala, Yosefe, Luta, Yobo, ne Danyele ne balunda bende basatu ba bena Ebelu. Bilejilu bitudi katuyi mua kupua kabidi muoyo mbia buimpe budi nabu basadidi ba Yehowa ba tshikondo tshietu etshi.

Tudi mua kufika ku dikala ne buimpe

Tudiku mua kufika ku dienza malu adi mimpe ku mêsu kua Nzambi anyi? Mutudi bapiane dipanga bupuangane, kudi mua kuikala mvita mikole munda muetu pankatshi pa lungenyi ne mubidi; pankatshi pa dijinga dia kuenza malu adi mimpe ne dia kulonda meji etu adi matangile anu ku mpekatu. (Lomo 5:12; 7:13-23) Kadi tudi mua kutshimuna mvita eyi ne diambuluisha dia Nzambi. (Lomo 7:24, 25) Yehowa mmutupeshe Dîyi diende ne mikanda idi ituleja malu adimu. Patudi tulonga Bible ne tshisumi, tusambila, ne tuelangana meji bua malu adimu, tudi mua kulua ne mutshima muimpe. Mutshima muimpe wa nunku udi mua kupatula ngenyi, mêyi ne bienzedi bidi bimpe. (Luka 6:45) Tuetu tulonda tshilejilu tshia Yehowa Nzambi ne tshia Yezu Kristo, tudi mua kupeta bumuntu bulenga. Tudi kabidi mua kupetela malongesha a bungi kudi bantu badi bakuatshila Nzambi mudimu ne lulamatu lelu’eu.

Mupostolo Paulo wakabela bantu bavuaye mufundile mukanda bua ‘batambe kutuma meji’ ku buimpe ne malu makuabu adi makanyine lumu. Padi muntu wenza nenku, udi upeta mabenesha kudi Nzambi. (Filipoi 4:8, 9, MML) Yehowa yeye mutuambuluishe, tudi mua kufika ku dikala ne buimpe.

[Tshimfuanyi mu dibeji 6]

Ikala welangana meji a biudi ubala paudi ulonga Bible

[Tshimfuanyi mu dibeji 7]

Neupete bumuntu bulenga biwikala widikija Yezu Kristo