Nuikale bakumbane ne batuishibue bikole

“Tshintu tshienza ne meji a bungi be”

KATSHIA Bantemu ba Yehowa batuadija mu bikondo bietu ebi, batu batambe kuimanyina pa umue wa ku milayi ya Yezu Kristo wa se: ‘Nebambile bantu bonso ba pa buloba lumu luimpe elu lua bukalenge buanyi, neluikale tshimanyishilu ku bisamba bionso; pashishe, nshikidilu nealue.’ (Matayo 24:14) Pakasemena tshidimu tshia 1914 pabuipi, tshidimu tshiakatuadija ‘matuku a ku nshikidilu,’ Balongi balelela ba Bible bavua batuishibue bikole bakatuadija mudimu wa dikema wa dilongesha bantu Mukanda wa Nzambi pa buloba bujima.​—2 Timote 3:1.

Bua basadidi ba Yehowa aba kumona mua kukumbaja tshipatshila tshiabu tshia kumanyisha lumu luimpe pa buloba bujima, bakapeta mushindu mupiamupia muimpe wa kuenza mudimu eu ne disanka. Bua tuetu kumanya ngenzelu au bimpe, tuanji tutuayi ntshinta tupingana mu bidimu bia kale.

Mushindu mupiamupia wa kumanyisha lumu luimpe

Tudi mu Tshiongo 1914. Fuanyikijabi ne: udi musombe mu mîdima munkatshi mua bantu 5 000 mu nzubu kampanda munene, mu tshimenga tshia New York. Mbanutekele tshilamba tshinene kumpala tshidibu banulejila bindidimbi binyungakana. Muntu mulume wa nsuki mitoke muluate kazaku kale udi umueneka ku tshilamba etshi. Ukadi pamu’apa mubandile bindidimbi bia bantu banyunga, kabayi bakula, kadi eu muntu udi wakula, dîyi diende udiumvua. Musangu eu ke wa kumpala udibu banulejila bindidimbi ku tshiamu tshipiatshipia tshia mushindu’eu, kabidi malu adi bindidimbi ebi bileja adi afila mukenji wa pa buawu. Muntu udi wakula eu n’Charles Taze Russel, mulombodi wa kumpala wa Société Watch Tower, ne “Foto-Drama wa bufuki” ke udibu baleja muaba eu.

Charles Russell wakamona ne: filme ya bindidimbi binyungakana idi mua kuambuluisha bua kuyisha bantu ba bungi. Ke bualu kayi mu 1912, wakatuadija kulongolola “Foto-Drama wa bufuki.” Ku ndekelu, bakenza “Foto Drama wa bufuki” uvua muikale filme wa bimfuanyi, binga bimane tendee ne bikuabu binyungakana, uvua ne bitupa binayi bivua binenga mêba muanda-mukulu.

Bu muvua “Foto-Drama” eu muenza bua kumuleja mu bitupa binayi, uvua uleja malu a kumbukila ku difuka, muvua mianda ya bantu, too ne ku dikumbana dia malu onso adi Nzambi mulongoluele buloba ne bantu, ku ndekelu kua Bukokeshi bua Kristo bua Bidimu Tshinunu. Kuakanji kupita bidimu bia bungi bua filme ya buena eyi kufikayi ku dipatuka ne kubangabu kuyileja bantu bafuta makuta. Nansha nanku, bantu miliyo mivule bakamona “Foto-Drama wa bufuki” kabayi bafuta kantu!

Bavua balongolole mijiki mishême ku matshi ne miyuki 96 mikuata pa matadi bua kuikala kuleja nayi “Foto-Drama.” Bavua benze filme ya bimfuanyi bilengele bivuabu bazola tshikondo atshi bivua bileja muvua mianda yenzeka kubangila ku ntuadijilu kua buloba. Bivua kabidi bikengela bua kuenza nkama ya bimfuanyi bipiabipia, ebi bipenta bimpe, bikuabu bizola kabiyi bitambe kulengeja menemene  to. Bavua bakuata mudimu wa kuenza bimue bia ku bimfuanyi ebi ne filme mikuabu bipenta anu ku bianza. Ne bavua benza nenku njila ne njila, bualu mu bungi bua matuku, bakenza filme 20, filme yonso muikale ne bitupa binayi. Ke tshiakapetesha mushindu wa kuleja tshitupa tshimue tshia “Foto-Drama” mu bimenga 80 dituku dimue!

Bivua bantu kabayi bamona

Mmalu kayi avua bantu kabayi bafika ku diumvua bimpe pavuabu babandila “Foto-Drama”? Mulongi wa Bible Alice Hoffman wakamba ne: “Pakatuadija Filme, tshindidimbi tshia Muanetu Russell tshiakapatuka. Pavuaye umueneka ku tshilamba tshia bindidimbi ne mishiku yende ibanga kunyunga, ditadi divua dituadija kuakula . . . , ne bivua bituenza disanka patuvua tuteleja dîyi diende.”

Zola Hoffman udi wamba bua bindidimbi abi bivua bileja malu male mu tshikoso ne: “Mvua musombe muaba au mutonone mêsu nkema, patuvua tutangila bimfuanyi bia matuku avua bintu bifukibua. Tuakamona mutu bilongo bienda bibaluluka ku kakese ku kakese.”

Bu mutu Karl F. Klein (wa mu Kasumbu Kaludiki ka Bantemu ba Yehowa) munange mijiki bikole, udi wamba ne: “Pavuabu baleja bimfuanyi ebi, kuvua mijiki mishême yenda idila, bu mudi ya Narcisse ne ya Humoresque ivua mitumbe bikole.”

Kuvua kabidi malu makuabu akena kupua muoyo. Clayton J. Woodworth, Jr. udi wamba ne: “Misangu mikuabu kuvua bimfuanyi bivua bisekeshangana. Dituku dikuabu pavua ditadi dia tshisanji dimba musambu wa ‘Buuka bu nyunyi, uye ku mukuna webe,’ tuakamona ku tshilamba tshia bindidimbi tshimfuanyi tshia nyama munenanenayi wa ku nyama minene ivuaku kumpala kua Mvula wa kabutu”!

Pa kumbusha “Foto-Drama wa bufuki,” kuakapatuka kabidi “Drama wa Eureka.” (Bala malu adi mu kazubu.) Tshitupa tshiende tshimue tshivua ne miyuki mikuata pa matadi. Tshikuabu tshivua ne mêyi makuata ne filme ya bindidimbi kabiyi binyunga. Nansha muvua “Drame wa Eureka” kayi ne bindidimbi binyungakana, wakambuluisha bikole pavuabu bamuleja miaba ivua bantu kabayi ba bungi.

Tshia-mudimu tshinene tshia kuyisha natshi

Ku ndekelu kua 1914, bantu bapite pa 9 000 000 bakavua bamone “Foto-Drama” mu Amerike wa ku Nord, ku Mputu ne mu Australie. Nansha muvua Balongi ba Bible bakese, bavua batuishibue bikole bua kumanyisha lumu luimpe ne tshia-mudimu tshipiatshipia etshi. Bakafila makuta avua akengela bua kufutshila miaba mimpe bua kumona mua kulejilamu bindidimbi ebi. “Foto-Drama wa Bufuki” wakambuluisha bantu bakamubandila bua kumanyabu Dîyi dia Nzambi ne majinga ende.

Nsonga mukuabu wakafundila Charles Russell ne: “Musangu wa kumpala ungakamona, Filme webe wakalua tshikondo tshia dishintuluka dinene mu nsombelu wanyi; peshi ndi mua kuamba ne: dimanya dianyi dia Bible diakashintuluka bikole menemene.” Muntu mukaji mukuabu wakamba ne: “Nkavua muambe kulenduka, kadi ndi mmona ne: ‘Foto-Drama wa bufuki’ uvuabu baleje muaba eu tshidimu tshishale ke wakampandisha . . . Mpindieu ndi ne ditalala didi bena panu kabayi mua kumpesha ne dindi tshiyi mua kulekela bua kukeba bua kupeta bubanji buonso bua panu to.”

Demetrius Papageorge (udi muenze bidimu bia bungi ku biro bia Société bidi bilombola mudimu pa buloba bujima) wakamba ne: “Patudi tutangila bungi bukese bua Balongi ba Bible ne makuta makese avuaku, ‘Foto-Drama’ uvua tshintu tshienza ne meji a bungi be. Uvua mulombola kudi nyuma wa Yehowa!”

[Kazubu/​Bimfuanyi mu mabeji 8, 9]

“Drama wa Eureka”

Ngondo muanda-mukulu kunyima kua bamane kupatula ne baleje “Foto-Drama” musangu wa kumpala, Société wakamona ne: bivua bikengela kupatula Foto-Drama mukuabu uvua ne dîna dia se: “Drama wa Eureka.” Pavuabu batungunuke ne kuleja “Foto-Drama” mujima mu bimenga binene, “Drama wa Eureka” uvua wenda pende ufila mukenji wa muomumue mu misoko ne ku madimi kuvua bantu. Bakamba bua tshimue tshitupa tshia “Drama wa Eureka” ne: tshivua tshipetesha “bana betu ba bakaji mushindu wa pa buawu” wa kuyishabu. Bua tshinganyi? Bualu tshibuta tshivuabu belela matadi avua ne mêyi a drama eu tshivua ne kilo 14 patupu. Bua kumuleja, bivua bikengela kabidi kuambula tshisanji tshia fono bua kuela matadi.