Bena mu Lettonie badi bitaba lumu luimpe
Bamanyishi ba Bukalenge badi balonda
Bena mu Lettonie badi bitaba lumu luimpe
BIBLE udi uleja bimpe ne: Nzambi mmusue bua “bantu bonso basungidibue, bafike ku dimanya dia malu malelela.” (1 Timote 2:4) Bantu bavuabu bapangishe mua kuteleja lumu luimpe munkatshi mua bidimu bia bungi mbapete mpindieu mushindu wa kuluteleja! Mu ditunga dia Lettonie, anu mutubi mu matunga makuabu, bana ne bakulumpe ba miaba mishilangane badi mpindieu bitaba lumu luimpe, anu mudi malu adi alonda aa aleja.
• Mu Rēzekne (tshimenga tshia ku Est kua Lettonie), mamu mukuabu ne muanende wa bakaji bakalomba muntu mukaji kampanda mu njila bua abaludike kuvuabu baya. Kunyima kua muntu mukaji eu (bu bisongakaja muikale Ntemu wa Yehowa) mumane kubaludika, wakababikila mu bisangilu bia Bantemu ba Yehowa.
Bu muvua mamu eu ne muanende banange malu a Nzambi bikole, bakitaba bua kuyamu. Mu njila, buobu kumvuangana ne: pavuabu anu bamona bualu bubi mu bisangilu amu, bavua ne bua kupatuka diakamue. Kadi bisangilu biakabasankisha bikole kabayiku nansha kabidi mua kuela meji a kupingana kumbelu to. Bakitaba bua kulonga Bible ne badi babuela lelu mu bisangilu bionso. Mu ngondo isatu patupu, kubangabu kuyisha pabu ne mpindieu mbindile bua kutambula.
• Mu tshimue tshimenga (tshia ku Ouest kua Lettonie), Ntemu mukuabu wakayisha Anna, muntu mukaji wa bidimu 85. Anna e kusankidila bulelela ne kuitabaye bua kulonga Bible. Muanende wa bakaji ne balela bende bakuabu bakabenga bua kulongaye Bible kuosha ne munu muiku. Kadi Anna kakabalonda anyi kulekela bukulakaje buende ne tusamasama bimupangisha bua kulonga Bible.
Dimue edi, Anna kuambila muanende wa bakaji ne: ndi ne bua kutambula. Muana kumuambilaye ne: “Mamu wewe mudidinge mutambule, ndi nya kukushiya ku nzubu wa bakulakaje.” Kadi Anna kakatshina to. Bakamutambuishila mene mu nzubu muende bualu kavua ne bukole bua mubidi to.
Kadi ntshinyi tshiakenza muanende wa bakaji? Wakashintuluka, wakalambila mamuende biakudia bimpe kunyima kua batismo. Pashishe kuebejaye mamuende ne: “Udi mumvue munyi mpindieu paudi mutambule?” Mamuende kumuandamuna ne: “Bu muana mutoke!”
• Mu Tshisua-munene 1998, Bantemu babidi bakayisha musalayi mukuabu wa mu ditunga dia URSS wa kale ukavua muangate pansio. Bu muvuaye witaba ne: Mufuki utuku, wakitaba bua kulonga Bible ne pashishe mukajende e kubanga pende kulonga. Bakaya kumpala ne lukasa, ne kutuadijabu kuyisha. Tshidimu tshiakalonda, muntu uvua musalayi kale eu wakatambula. Mushindu udi mulume eu ne mukajende banange malu a mu nyuma udi ukankamija bantu bonso badi mu tshisumbu. Yeye ne mukajende bavua kabidi benze mudimu wa dilongolola nzubu kampanda bua kuluaye Nzubu wa Bukalenge.