“Luondapu bua mûfu webe”

BATU bamba ne: masama a bungi adi nawu bantu mmakebesha kudi bintu bu mudi buôwa, tunyinganyinga, mutshiawudi, njiya, lukinu, ne didipisha. Pa kumona malu aa, mêyi a mu Bible a se: ‘ditshina dia Yehowa’ didi “luondapu bua mûfu webe ne dikisha bua mifuba yebe” adi akolesha bantu ku muoyo bikole.​—Nsumuinu 3:7, 8, NW.

Mifuba ke idi yenza ne: mubidi mujima wimane kuulu. Bua bualu ebu, Bible udi utela muaku “mifuba” mu ngakuilu wa mu tshimfuanyi bua kuleja tshidi muntu, nangananga padiye ne malu adi mamutonde bikole ku muoyo. Kadi mmunyi mudi ditshina dia Yehowa dikale “luondapu bua mûfu webe”?

Bumvuiji ba Bible badi ne ngenyi mishilangane pa mushindu udibu bangata muaku “mûfu” mu mvese eu. Umue wa kudibu udi wamba ne: bu mudiwu muikale “pankatshi pa mubidi wa muntu,” “mûfu” udi mua kuikala tshimfuanyi tshia bitupa bionso bia mubidi bidi ne mushinga. Mukuabu mumvuiji wa malu a mu Bible udi wamba pende ne: muaku “mûfu” udi mua kuikala umvuija dila dia ku mûfu, amu mudibu baditele mu Yehezekele 16:4. Pikalabi nanku, Nsumuinu 3:8 udi utuleja mudibi ne mushinga bua tuetu kueyemena Nzambi muetu muonso, anu mudi muana udi munda muikale mulamakaja ku dila dia ku mûfu bua kudiilaye kudi mamuende. Kadi muaba eu, bilondeshile lungenyi lukuabu, “mûfu” udi mua kuikala uleja mifungu ya mubidi. Bidi mua kuikala ne: mu tshitupa tshia nshapita tshidi mvese eu badi baleja dishilangana pankatshi pa bitupa ebi ne “mifuba,” idi mikale bitupa bia mubidi bidi biobi bikolakane.

Nansha kuoku kuikale dikuabu diumvuija, tukuatayi bualu bumue ebu: Kutshina Yehowa ke njila wa meji. Kutumikila mikenji ya Nzambi kudi mua kutuambuluisha bua kuikala ne mubidi muimpe mpindieu. Kudi kabidi mua kuenza bua Yehowa atuanyishe, atupe muoyo wa tshiendelele, bikale ne mubidi muimpe mupuangane mu Bukalenge buende.​—Yeshaya 33:24; Buakabuluibua 21:4; 22:2.

[Mêyi a dianyisha bua tshimfuanyi mu dibeji 32]

Dr. G. Moscoso/​SPL/​Photo Researchers