Munganga wa mêsu udi ukuna lutete

Ndiumvuangana kayi didi pankatshi pa mudimu wa munganga musumbishi wa bineta bia mêsu wa mu tshimenga tshia Lviv (mu Ukraine) ne dienzeka dia tshisumbu tshia Bantemu ba Yehowa tshia muakulu wa tshiena-Russie mu Haifa (mu Israël), mutantshi bu wa kilometre 2 000? Muyuki eu udi uleja mushinga wa mêyi adi mu Bible aa: “Kuna maminu ebe ne dinda, kuikishi dilolo; bualu kuena mumanye ne bidi bidiunda ngebi anyi mbiabia.”​—Muambi 11:6.

MUYUKI wetu udi utuadija mu 1990 pavua Ella nsongakaji muena Yuda musombele mu Lviv. Tshikondo atshi, Ella ne bena dîku diabu bavua badilongolola bua kuya kusombela mu Israël. Katupa kakese kumpala kua luendu luabu, Ella uvua ne bua kuanji kamonangana ne munganga kampanda wa mêsu uvua muikale Ntemu wa Yehowa. Mu tshikondo atshi, bavua bakandike mudimu wa Bantemu ba Yehowa mu Ukraine. Nansha nanku, munganga eu wakangata dipangadika dia kuambila Ella malu a mu Bible avuaye mulonge. Ella wakakema  pakumvuaye ne: Nzambi utu ne diende dîna. Ella wakajinga bua kumanya bia bungi, kubafikishabi ku diyikila bilenga malu a mu Bible.

Ella wakanyisha bikole muyuki wabu au, ke kulombaye bua kuyikilabu kabidi lumingu luvua lulonda. Pakaluabu kuyikila, yeye kulomba kabidi bua bayikile musangu mukuabu. Nansha muvua dijinga diende dia kumanya malu a bungi a mu Bible dikale dienda dikola, kuvua tshilumbu. Dituku divua dîku dia ba Ella ne bua kuya ku Israël dikavua pabuipi. Ella utshivua anu ne nyota ya kulonga malu a bungi! Bua kumona mua kulonga malu a bungi mu matuku avua mamushadile aa, Ella wakalomba bua kulonga Bible dituku dionso. Ella kakapeta mushindu wa kutungunuka ne dilonga pakafikaye mu Israël to, kadi lutete lua bulelela lukavua luele miji munda muende. Ku ndekelu kua tshidimu atshi, wakabangulula dilonga dia Bible ne tshisumi.

Mvita yakabudika mu matunga a bitupa abi (Golfe Persique), ditunga dia Irak kubangadi kututa bingoma bia misile bitangija mu Israël. Bantu bavua batamba kulondelangana bualu ebu. Dimue edi Ella uvua mu tshisalu tshinene kampanda, kumvuaye bena mu dîku kampanda (batshivua benyi) bayikila mu tshiena-Russie. Nansha mutshivuaye udilongela nkayende Bible, Ella wakayikila nabu ne kubalejaye mulayi wa mu Bible udi wakula bua ditalala didi ne bua kulua pa buloba apa. Bualu e kuenzeka: mamuabu Natasha, muanende wa balume Sasha (Ariel) ne wa bakaji Ilana, ne Galina mamuende wa Natasha, bakatuadija kulonga Bible ne Ella.

Sasha ke wakatambula kumpala nansha muvuaku ntatu. Bakamuipata mu kalasa (nansha muvuaye mulongi wa meji) bualu uvua muena Kristo ne bilondeshile kuondo kende ka muoyo, kavua mua kulonga malu a busalayi avuabu balongesha mu kalasa kabu to. (Yeshaya 2:2-4) Tshilumbu tshia Sasha kufikatshi too ne ku Kabadi Kakulu ka mu Jérusalem (mu Israël), kuoku kuela Sasha kalumbandi ne kutuma dîyi bua bamupingaja mu kalasa. Tshilumbu etshi tshiakatangalaka mu ditunga dijima. Ne bantu ba bungi ba mu Israël bakapeta mushindu wa kumvua malu a mu Bible atu Bantemu ba Yehowa balongesha. *

Pakajikijaye tulasa tuende tua tshikadilu, Sasha wakatuadija mudimu wa ku dîba ne ku dîba wa Bantemu ba Yehowa. Lelu wa ndaya, Sasha udi mpanda-njila wa pa buende ne mukulu mu tshisumbu. Muakunyende wa bakaji Ilana, udi yeye pende mpindieu mu mudimu wa ku dîba ne ku dîba. Mamuabu ne kakuabu bakadi pabu Bantemu. Lutete luvua munganga wa mêsu eu mukune lutshivua anu lukuama mamuma!

Pinapu, Ella uvua wenda anu uya kumpala mu nyuma, ne mutantshi eu kutuadijaye kuyisha ku nzubu ne ku nzubu. Ku nzubu wa kumpala kuakayaye, Ella kupetaye Faina, utshifuminaku mu ditunga dia Ukraine. Faina uvua ne dibungama dikole. Ella wakalua kumanya pashishe ne: katupa kakese kumpala kua yeye kukokola ku tshiibi tshia Faina, Faina ukavua mulombe Nzambi umuambila ne: “Tshiena mukumanye to, kadi biwikala munteleje, ungambuluishe.” Bakayikila ne Ella malu akamukolesha ku muoyo be. Faina wakela nkonko ya bungi, ne wakateleja ne ntema mandamuna onso akamupeshabu. Kunyima kua matuku, wakalua kutuishibua ne: Bantemu ba Yehowa badi balongesha bulelela bua mu Bible. Wakakaja programe wende wa dilonga malu a mu iniversite bua kumonaye mua kupeta dîba dia kuikala ubuela mu bisangilu bia Bantemu ne uya kuyisha. Mu ngondo muitanu 1994, Faina wakatambula. Yeye pende wakalua mpanda-jila, muikale udiambuluisha ne bivuaye upeta ku mudimu wa mêba makese uvuaye wenza wa biamu bia ordinatere.

 Umue musangu pavua Ella uyisha (mu 1994, mu ngondo wa dikumi ne umue), wakateketangana musangu umue. Pakamuenzabu mateta mu lupitadi, bakasangana ne: uvua ne mputa ku mala muikale upatula mashi. Patuambi kufika ku dilolo, mashi a Ella akavua makepe mashale grame 7,2. Mukulu wa mu tshisumbu tshiabu, mulombodi wa Komite wa Diumvuangana ne Mpitadi, wakayikila ne baminganga bua kubaleja ngondapilu mivule ivua kayiyi ilomba dienza mudimu anyi diela dia mashi. * Bakapanda Ella biakane kabayi bamuele mashi to, ne wakumvua bimpe kuluaye anu muende mua kale.​—Bienzedi 15:28, 29.

Munganga Karl (muena Yuda muledibue mu Allemagne, uvua wondapa masama a bantu bakaji) uvua muondape Ella wakakema bikole. Pashishe yeye kuvuluka ne: baledi bende, bavua bapanduke tshikondo tshiakashipabu bena Yuda ba bungi kudi bena Nazi, bakavua bamanye Bantemu ba Yehowa pavuabu nabu mu maloko manene. Karl wakela nkonko ya bungi. Nansha muvua mudimu wende wa bu-munganga umuangata dîba dia bungi, Karl wakapeta dîba dia kuikala kulonga Bible. Mu tshidimu tshiakalonda, wakabanga kubuela mu bisangilu bia Bantemu ba Yehowa.

Lutete luakakuna munganga wa mêsu ndupatule tshinyi? Tukadi bamane kumona tshivua tshifikile Sasha ne bena mu dîku diabu. Bia muomumue ne Ella, udi mpindieu mpanda-njila wa pa buende. Pakajikija muanende wa bakaji (Eina) tulasa tua tshikadilu, diakamue wakabanga mudimu wa bumpanda-njila, mmupangadije bua kuwenza kashidi. Faina udi pende mpanda-njila wa pa buende. Kadi bua Karl, munganga wakuondapa Ella, udi mpindieu Ntemu mutambule ne musadidi wa mudimu, muikale wambuluisha babedi ne bantu bakuabu, ubaleja mushindu udi bulelela bua mu Bible buikale ne bukole bua kuondopangana.

Kasumbu kakese ka bena tshimuangi badi bakula tshiena-Russie kavua kalamika ku Tshisumbu tshia muakulu wa tshiena-Ebelu mu Haifa nkalue mpindieu Tshisumbu tshia muakulu wa tshiena-Russie tshidi ne bamanyishi ba bukalenge ba lukunukunu bapite pa 120. Bionso ebi mbienzeke nangananga anu bua lutete lua bulelela luakakuna munganga wa mêsu wa mu Lviv!

[Mêyi adi kuinshi]

[Karte mu dibeji 29]

(Bua kumona malu bimpe, tangila mu mukanda)

UKRAINE

ISRAËL

[Mêyi a dianyisha]

Mountain High Maps® Copyright © 1997 Digital Wisdom, Inc.

[Bimfuanyi mu dibeji 30]

Ella ne muanende wa bakaji Eina

[Tshimfuanyi mu dibeji 31]

Bantemu ba musangelu bena muakulu wa tshiena-Russie mu Haifa. Kubangila ku dia bakaji batangile ku dia balume: Sasha, Ilana, Natasha, Galina, Faina, Ella, Eina, ne Karl