Mushindu wa kudikuba mu buloba bûle tente ne njiwu

KUENDELA muaba udibu bajike mine mu buloba kudi mua kushipesha bantu. Kadi kabienaku mua kuikala bilenga bu wewe mua kuikala ne karte kadi kakuleja miaba yonso idibu bajike mine eyi anyi? Fuanyikijabi ne: mbakulongeshe mua kumanya mishindu kabukabu ya mine. Dimanya edi nedikuepule bikole ku njiwu idi mua kukukosesha bimue bitupa bia mubidi anyi kukukebela mene lufu.

Bible udi bu karte aku ne dilongesha dia mushindu wa kumanya muaba udibu bajike mine. Mu Bible mudi meji kaayi kuelekeja adi mua kutuambuluisha bua kuepuka njiwu ne kumanya mua kupita ne ntatu itu itukuata.

Tangila mudi Nsumuinu 2:10, 11 utukankamija: “Padi meji abuela munda muebe, ne padi dimanya dikusankisha mu muoyo webe, meji neakukube, [dijingulula dia malu nedikulame].” (Mukanda wa Mvidi Mukulu) Meji ne dijingulula dia malu bidibu batele muaba eu ki mbia muntu to, kadi bidi bifumina kudi Nzambi. “Kadi muntu yonso udi uteleja [meji a Nzambi], neasombe talalaa, neikale ne bupole, kayi utshina dikenga.” (Nsumuinu 1:33, MMM) Mpindieu tumonayi mudi Bible mua kutuleja tshia kuenza bua tuetu kudikuba ne mudiye mua kutulongesha mushindu wa kuepuka ntatu ya bungi.

Mushindu wa kuepuka njiwu idi ikebesha lufu

Bishiferi bidibu bapatule kudi Bulongolodi bua malu a Makanda a mubidi pa Buloba bujima (OMS) bidi bileja ne: bantu badi bafue mu njiwu ya mashinyi pa buloba bujima mbatue ku 1 171 000. Bantu bakuabu pabuipi ne miliyo 40 mbatapike, ne banga bapite pa miliyo 8 mbashale balema.

Nansha mutudi katuyi ne mushindu wa kudikuba ku njiwu yonso patudi tuendesha mashinyi, dilonda mikenji ya ba-kanyemesha didi mua kutuambuluisha bikole. Bible udi wamba mu Lomo 13:1 ne: “Muntu yonso atumikile bamfumu ba ditunga.” (MMM) Bamfumu aba ke badi bela mikenji ya ba-kanyemesha ne benza bua bantu bayilonde. Ba-kanyemesha badi balonda mubelu eu badi bakepeshaku njiwu ne ntatu mikole itu imueneka kunyima kua njiwu.

Bualu bukuabu budi butusaka bua kuendesha mashinyi bimpe ndiangata muoyo ne mushinga. Bible udi wamba bua Yehowa Nzambi ne: ‘Kuudi wewe kudi mushimi wa muoyo.’ (Musambu 36:9) Muoyo ndipa dia Nzambi. Ke bua tshinyi katuena ne bukenji bua kunyenga muntu mukuabu dipa edi anyi kupepeja muoyo wende nansha wetu tuetu bine nansha.​—Genese 9:5, 6.

Bua kuleja se: tudi tuangata muoyo wa muntu ne mushinga, bidi bitulomba kabidi bua tuikale bajadike ne: nzubu anyi mashinyi etu kabiena mua kukebesha njiwu to. Mu Isalele wa kale, didikuba ku njiwu divua pa muaba wa kumpala mu malu onso. Tshilejilu, pavuabu basa nzubu, Mikenji ya Nzambi ivua ilomba bua bele ka-lupangu ku musaka uvua muikale muaba uvua bena mu dîku batamba kuenzela malu abu. “Nuele lupangu  lukese ku musaka, bua tshilumbu katshinukuatshi pikala muntu mukulukeku.” (Dutelonome 22:8, MMM) Pavua muntu ukuluka bualu kabavua batumikile mukenji eu, muena nzubu au ke uvua ne tshilumbu kudi Nzambi. Kakuyi mpata, kutumikila dîyi dilenga edi divua mu mukenji eu kuvua kukepeshishaku njiwu pavua bantu benza mudimu anyi bajikija lutetuku.

Mushindu wa kuluisha bibidilu bidi bikebesha lufu

Bilondeshile bulongolodi bua OMS, lelu kudi bantu bapite pa muliyare mujima pa buloba badi banua mfuanka, ne ku tshidimu tshionso bantu batue ku miliyo inayi batu bafua bua dinua dia mfuanka. Badi baleja ne: bungi ebu nebupite miliyo mitue ku 10 mu bidimu 20 anyi 30 bidi kumpala eku. Banu ba makanya bakuabu miliyo ya bungi ne ba bintu bidibu banua bamba ne: mbua kujikija lutetuku nebanyange mubidi ne nsombelu wabu bua bibidilu bibi bidibu nabi ebi.

Nansha mudi Dîyi dia Nzambi kadiyi diakula buludi bua dinua dia mfuanka anyi bintu bidi bikuatangana bu mudi diamba, mibelu idimu idi mua kutukuba ku bibidilu ebi. Tshilejilu, 2 Kolinto 7:1 udi utubela ne: ‘Tudilengeje ku manyanu onso a mubidi ne a nyuma.’ Kakuyi mpata, lulengu lua makanya (ne bintu bikuabu bidi bikuata) ludi lunyanga mubidi. Nzambi mmusue bua mibidi yetu ikale ya “tshijila,” mitoke kezukezu. (Lomo 12:1) Kuenaku umona ne: kutumikila mibelu eyi kudi kukepeshishaku njiwu mivule idi mua kukuata muntu anyi?

Mushindu wa kulekela bibidilu bidi bikeba njiwu

Bantu ba bungi badi badia budiavi ne banua bunuavi. Kudia kupitshisha kudi mua kukebela muntu disama dia diabete, dia kansere ne disama dia mioyo. Kunua maluvu kupitshisha kudi mua kuvuija muntu kanuayi wa ntonkola nzaba, kudi mua kumufikisha ku dipia disama dia mutshima (siroze), kudi mua kukosolola mêku peshi kukebesha njiwu ya mashinyi. Kudia kupitshisha kudi kabidi mua kufikisha muntu ku didiunda kupitshisha, mpindieu bifikisha muntu ku didijidika biakudia utshina bua kalu kudiunda kupitshisha, eku wenda unyana upitshisha.

Nansha mudi Bible kayi mukanda wa malu a bumunganga, udi ufila mibelu mijalame idi ileja tshitudi ne bua kudila pa ndiilu ne kunuina pa nnuinu. Udi wamba ne: “Muananyi, unteleje, neupete meji, ludika muoyo webe mu njila muimpe. Kuendakanyi ne bantu badi bakuatshika maluvu, nansha ne badiadia minyinyi, basukumina, bualu munuavi ne mudiavi nebabuele mu bupele.” (Nsumuinu 23:19-21, MMM) Nansha nanku, bilondeshile Bible, kudia ne kunua kudi ne bua kuikala bualu bua disanka. Udi wamba ne: ‘Muntu yonso adie biende, anue biende, asanke biende mu midimu yende yonso, bua eku nkupa kua Nzambi.’​—Muambi 3:13.

Bible udi kabidi utubela bua kubenga kuenzeja mubidi tulasisa kunekesha. Udi utujadikila ne: “dibidija dia mubidi didi dikuatshisha, kadi anu kakese menemene.” Kadi udi wamba kabidi ne: “Dilamata kudi [Nzambi], didi dikuatshisha mu malu onso, bualu bua diodi didi ditulaya muoyo mpindiewu ne bua matuku alualua.” (1 Timote 4:8, Muanda Mulenga Lelu) Pamu’apa udi mua kudiebeja ne: ‘Mmunyi mudi dilamata kudi Nzambi dikuatshisha nansha mpindieu?’ Didi dikuatshisha mu malu a bungi. Pa kumbusha dikolesha muntu mu nyuma, dilamata kudi Nzambi didi ditupesha ngikadilu milenga ya mu nyuma bu mudi dinanga, disanka, ditalala ne didikanda. Ngikadilu eyi idi ipesha muntu meji ne mubidi muimpe.​—Galatia 5:22, 23.

Bipeta bibi bia tshiendenda

Lelu bantu miliyo mivule kabatshiena kabidi badikanda ku bualu bubi nansha bumue. Disama dia SIDA ndimue dia ku bipeta bibi bidi muntu upeta padiye ubenga kudikanda ku malu mabi. Bilondeshile bulongolodi bua OMS, bantu miliyo mipite pa 16 mbafue katshia tshipupu tshia SIDA tshiasakuka, ne lelu bantu bu miliyo 34 nanku badi ne kishi ka SIDA (VIH). Ba bungi badi ne disama edi mbadipetele mu buendenda, bakuabu mbadipetele ku nshingi mikale ne kishi ivua bantu baditue nayi bintu bia lulengu mu mijilu, ne  banga pabu mbadipetele mu mashi avuabu babele.

Mona masama makuabu atu afumina ku tshiendenda: mabuba atu atalangana pa bia-ku-mêsu (herpès génital), masasa, kasende, ne Epatite B ne C. Nansh muvua mêna a masama aa kaayiku kale pavuabu bafunda Bible, bitupa bia mubidi bivua masama a mu bilamba aa atamba kukuata bivua bimanyike bimpe tshikondo atshi. Tshilejilu, Nsumuinu 7:23 (MMM) udi ubikila lutatu lukole ludi lufumina ku tshiendenda ne: ‘muketa [udi] utubula mutshima.’ Pa tshibidilu disama dia kasende ditu dikuata mutshima anu mutu dia mutshima (Epatite) dikuata padi muntu. Kakuyi mpata, mubelu wa mu Bible wa se: bena Kristo ‘balekele mashi ne masandi’ mmuakane ne udi uleja dinanga menemene.​—Bienzedi 15:28, 29.

Dinanga dia makuta mbuteyi

Bua kumona mua kulua babanji lelulelu, bantu ba bungi batu bateka makuta abu mu njiwu idi mua kubajimijilawu. Diakabi, batu baajimija tshia bushuwa. Kadi Bible udi wambila musadidi yonso wa Nzambi ne: muntu ‘akuate mudimu, enze budi buimpe ne bianza biende, bua yeye ikale ne tshia kupaye udi utshikengela.’ (Efeso 4:28) Bushuwa, muntu utu wenza mudimu bikole katu anu ulua mubanji to. Kadi, udi ne ditalala mu mutshima wende, udi udiangata ne mushinga, ne pamu’apa udi ufila mene makuta bua kuenzabu nawu bualu buimpe.

Bible udi utudimuija ne: ‘Kadi bobu badi basue kuikala babanji badi bapona mu kutetshibua kua munda ne mu buteyi ne mu nkuka ya bungi idi mipote ne idi ibanyanga, bu yoyi mene idi inyisha bantu mu dibashipesha ne mu dibutuka. Bualu bua lukuka lua biuma ludi muji wa malu mabi a mishindu yonso; bidi bantu bakuabu badi badikebela,  bakadisunsula mubidi wonso ne tunyinganyinga tua bungi.’ (1 Timote 6:9, 10) Bulelela, ba bungi ‘badi basue kuikala babanji’ batu balua babanji. Kadi mbinganyi bitubu bajimija? Kabienaku bilelela bua se: makanda abu a mubidi, dîku diabu ne bumuntu buabu bua mu nyuma, ne nansha tulu mene tudibu balala, bitu bia lutatu anyi?​—Muambi 5:12.

Muntu udi ne meji mmumanye bimpe ne: ‘kêna ne muoyo bualu bua bungi bua bintu bidiye nabi’ to. (Luka 12:15) Makuta ne bimue bintu bitu ne mushinga miaba ya bungi. Kadi Bible udi wamba ne: “[makuta adi mikale bua bukubi, NW].” Udi wamba kabidi ne: ‘kadi [meji] adi atamba bua adi avuija muoyo kudi muenawu.’ (Muambi 7:12) Dimanya dimpe ne meji mbishilangane ne biuma bualu dimanya ne meji bidi mua kutuambuluisha mu malu onso, nangananga mu malu adi atangila muoyo wetu.​—Nsumuinu 4:5-9.

Pikala meji nkayawu mua kutukuba

Mu katupa kîpi emu, meji malelela ‘neavuije muoyo kudi muenawu’ mu mushindu wa dikema. Neabakube ku “dikenga dinene” didi dienda disemena ne lukasa pikala Nzambi mua kubutula bantu babi. (Matayo 24:21) Bible udi wamba ne: mu tshikondo atshi, bantu nebimanshe mfranga yabu mu njila anu bu “tshintu tshidi ne manyanu.” Bua tshinganyi? Bualu nebajingulule ne muadi ku mêsu ne: or ne biamu biabu bia argent kabiena mua kubasumbila muoyo mu “dituku dia tshiji tshikole tshia Yehowa” to. (Yehezekele 7:19) Kadi, “musumba munene” udi ne bantu badimuke ‘bakadibutshila bintu biabu mu diulu’ pa kuteka malu a mu nyuma pa muaba wa kumpala, neupete masanka bua bintu bivuabu badibutshile bimpe ne neupete muoyo wa tshiendelele mu mparadizu pa buloba.​—Buakabuluibua 7:9, 14, NW; 21:3, 4; Matayo 6:19, 20.

Mmunyi mutudi mua kupeta muoyo udi kauyi njiwu eu mu matuku atshilualua? Yezu udi wandamuna ne: ‘Eu udi muoyo wa tshiendelele, bua buobu bakumanye wewe, Nzambi umuepele mulelela, ne yeye uwakatuma, Yezu Kristo mene.’ (Yone 17:3) Bantu ba bungi bakadi bapete dimanya edi mu Bible. Mbatekemene malu malenga mu matuku atshilualua ne badi kabidi ne ndambu wa ditalala ne mbadiumvuaku bakubibue mpindieu. Bidi anu muvua mufundi wa Misambu muambe ne: ‘Nendale panshi, nendale tulu mu ditalala kabidi, bualu bua wewe nkayebe, Yehowa, udi umvuijila muaba wa kusomba talalaa.’​—Musambu 4:8.

Udiku mumanye tshintu tshikuabu tshidi mua kukepeshisha njiwu idi mua kukuata mubidi ne muoyo webe mudi Bible mua kuyikepeshisha anyi? Kakuena mukanda mukuabu udi mua kutua diulu padi Bible to. Ne kakuena mukanda mukuabu udi mua kukuambuluisha bua kudikuba mu buloba budi bûle tente ne njiwu ebu to. Bua tshinyi kubenga kulonga Bible bikole menemene?

[Kazubu/​Tshimfuanyi mu dibeji 6]

Bible mmubambuluishe bua kudikuba ne kuikala ne mubidi muimpe

Bua kupua makenga a panu muoyo, muntu mukaji mukuabu diende n’Jane, * uvua ne tshilele tshia kunua bintu bidi bikuatangana bu mudi mfuanka, diamba, marijuana, cocaïne, amphétamines, LSD, ne bikuabu. Uvua kabidi ukuatshika maluvu bikole. Jane udi wamba ne: bayende uvua pende unua bintu ebi. Kabavua bamanye kuvuabu baye batangile to. Pashishe Jane kulua kupetangana ne Bantemu ba Yehowa, kubangaye kubuela mu bisangilu biabu ne kubala Tshibumba tshia Nsentedi ne muanabu Réveillez-vous!, uvua ubadisha kabidi ne bayende bibejibeji ebi. Bubidi buabu kubangabu kulonga Bible ne Bantemu ba Yehowa. Pakatuadijabu kuanyisha mikenji miakane ya Yehowa, bakalekela kunua bintu bionso abi. Ntshinyi tshiakapetabu? Jane wakafunda kunyima kua bidimu ndambu ne: “Nsombelu wetu wa mpindieu mmutupeteshe disanka dia bungi. Ndi ngela Yehowa tuasakidila wa bungi bua mudi Dîyi diende dikale ne bukole bua kulengeja bantu, ne bua mutudi mpindieu basulakaneku ne bikale ne mubidi muimpe.”

Tshilejilu tshia Kurt tshiotshi tshidi tshituleja mushinga wa kuikala muena mudimu wa muoyo mutoke. Kurt uvua wenza mudimu wa ditangila malu a biamu bia ordinatere. Bu muvuabu dijinga ne ordinatere mipiamipia, mfumuende wa mudimu wakamuambila bua kuya kuyisumba ku mushinga muimpe. Kurt kupeta muaba muimpe uvuabu bayipana, buobu kumvuangana mushinga. Kadi, muntu wakapanyisha Kurt biamu ebi wakatupakana pa faktire. Mushinga uvuabu bumvuangane uvua mushadile ku uvua pa faktire au ku dolare 40 000. Kurt umona tshilema etshi, e kumanyishaye kumpanyi au, ke mulombodi wa kumpanyi kuambaye ne: katshia wabanga kuenza mudimu (kukavua bidimu 25), kavuaku muanji kumona muntu wa muoyo mutoke wa mushindu’au to. Kurt wakamumvuija ne: kuondo kende ka muoyo kavua kalongesha kudi Bible. Bua bualu ebu, mulombodi wa kumpanyi au wakalomba Kurt bibejibeji 300 bia nimero wa Réveillez-vous! uvua wakula bua muoyo mutoke anyi dibenga kuibila mu malu a bungenda bua kubipeshaye bena mudimu ba mu kumpanyi au. Bakabandisha Kurt muanzu bua muoyo wende mutoke.

[Mêyi adi kuinshi]

[Tshimfuanyi mu dibeji 7]

“Meme ndi Yehowa Nzambi webe, udi ukuyisha bua wewe wikale ne diakalengele.”​—YESHAYA 48:17