Malu a mu nsombelu

Ndi muambuluishe muaba wonso uvuabu nanyi dijinga

MALONDA KUDI JAMES B. BERRY

Tuvua mu 1939. Dîba adi nsombelu uvua mukole mu États-Unis bualu mfranga yakapueka mushinga, ne kabidi mvita ikavua pa kutuadija ku Mputu kuonso. Meme ne muakunyanyi wa balume Bennett tuakumbuka kuetu ku Mississippi batangile mu tshimenga tshia Houston (ku Texas) tuenda tukeba mudimu.

DIMUE edi patukavua ku ndekelu kua muvu wa été, tuakateleja bualu bua dikema ku tshisanji, ne: basalayi ba Hitler mbakuate ditunga dia Pologne. Muakunyanyi kutulaye dîyi ne: “Armagedone watuadiji!” Anu pinapu tuetu kulekela midimu ituvua tuenza. Tuetu kuya ku Nzubu wa Bukalenge uvua pabuipi netu ne tuetu kubuela mu bisangilu bua musangu wa kumpala. Bua tshinyi tuakaya ku Nzubu wa Bukalenge? Indilayi ntuadijile ne muyuki eu ku mbangilu.

Bavua bandelele ku Hebron, mu provense wa Mississippi, mu 1915. Tuvua basombele ku madimi. Balongi ba Bible (dîna dia Bantemu ba Yehowa tshikondo atshi) bavua balua tshitupa atshi musangu bu umue ku tshidimu ne benzela muyuki ku nzubu kua muntu. Ke tshiakafikisha baledi banyi ku dikala ne mikanda ya bungi ya malu a mu Bible. Meme ne Bennett tuakafika ku ditaba malu avua mikanda ayi ilongesha bu mudi bua se: Mu Inferno kamutu kapia to, anyima utu ufua, bantu bakane nebasombe pa buloba tshiendelele. Kadi kutshivua malu a bungi atuvua katuyi bamanye to. Dimue dîba pankavua mujikije tulasa, meme ne muakunyanyi tuakaya ku Texas mu dikeba dia mudimu.

Patuakamonangana ne Bantemu ku Nzubu wa Bukalenge, bakatukonka bua kumanya ni tuvua bampanda-njila. Katuvua nansha bamanye ne: mpanda-njila mmusadidi wa ku dîba ne ku dîba wa Bantemu ba Yehowa to. Pashishe bakajinga kumanya ni tuvua basue kuyisha. Tuakabandamuna ne: “Eyowa!” Tuvua tuela meji ne: bavua mua kututuma ne mukuabu muntu bua atuleje mua kuyisha.  Kadi bakatupesha amu karte ka muaba utuvua ne bua kuya kuyisha pashishe kutuambilabu ne: “Ndayi nuenze mudimu muab’eu!” Pabi, meme ne Bennett katuvua bamanye tshintu nansha tshimue bua mushindu wa kuyisha to, ne katuvuaku basue bua baye kutufuisha bundu to. Ndekelu wa bionso, tuakela karte ka teritware aku ku poste bua kukapingaja mu tshisumbu, pashishe tuetu kualukila ku Mississipi!

Tudi tumuenesha bulelela bua mu Bible mu nsombelu wetu

Patuakapingana kuetu, tuakenza bu tshidimu tshijima tubala mikanda ya Bantemu dituku dionso. Butuku tuvua tubadila ku bukenke bua kapia bualu katuvua ne nzembu kumbelu to. Tshikondo atshi basadidi ba zone anyi batangidi bena ngendu bavua bakumbula bisumbu bia Bantemu ba Yehowa ne Bantemu bakuabu bavua kule bua kubakolesha mu nyuma. Ted Klein (umue wa ku basadidi aba) wakakumbula tshisumbu tshietu ne uvua upatuka netu meme ne Bennett bua kuyisha ku nzubu ne ku nzubu. Misangu ya bungi uvua utuangata tuetu bonso babidi musangu umue. Wakatumvuija tshivua mudimu wa bumpanda-njila.

Disomba nende diakatuambuluisha bikole bua kuela meji bua malu a bungi atuvua mua kuenza bua kukuatshila Nzambi mudimu. Nanku mu dia 18 Tshisanga 1940, Muanetu Klein wakatutambuisha meme, Bennett ne muakunyetu wa bakaji Velva. Baledi betu bavuapu dîba dituakatambula adi ne bakasanka bua dipangadika dituvua bangate. Buobu pabu bakalua kutambula kunyima kua bidimu bitue bu ku bibidi. Bubidi buabu kushalabu balamate Nzambi too ne ku lufu luabu. Tatu wakafua mu 1956 ne Mamu yeye mu 1975.

Pakankonka Muanetu Klein ni mvua mua kuenza bumpanda-njila, ngakamuambila ne: mvua musue kubuenza, kadi tshivua ne makuta, tshivua ne bilamba, tshivua ne tshintu nansha tshimue to. Wakangambila ne: “Kuditatshishi bua bintu abi to, meme nentangile bualu buabi.” Ke tshiakenzaye. Tshia kumpala wakatuma dilomba dianyi dia mudimu wa bumpanda-njila ku biro. Pashishe wakaya nanyi mu tshimenga tshia Nouvelle-Orléans, mutantshi wa kilometre mitue ku 300, kundejaye bimue bisasa bia nzubu milenga ivua pa mutu pa Nzubu wa Bukalenge. Bavua balamine bampanda-njila nzubu ayi. Panyima pa matuku makese ngakaya kusombelamu ne meme kubanga bumpanda-njila. Bantemu ba mu Nouvelle-Orléans bavua bambuluisha bampanda-njila ne bilamba, makuta ne biakudia. Mu munya, bana betu bavua batutuadila biakudia ne babishiya ku tshiibi anyi mene batutekelabi mu tshiamu tshia mashika (frigo). Muanetu mukuabu uvua ne restoran wende pabuipi apu wakatuambila bua tuikale tuya ku ma dilolo dionso bua kuangata biakudia bia lelulelu bivua bishala bu mudi: munyinyi, mampa, ndunga ne bikuabu.

Bena tshimvundu badi batuvuila

Kunyima kua matuku, bakantuma ku Jackson (mu Mississippi) bua kuenza bumpanda-njila. Meme ne nsonga utuvua tuenza nende mudimu tuakatuilangana ne bena tshimvundu muaba eu, kumuenekabi se: bampulushi bavua muaba eu bavua bakuate ku tshia bena tshimvundu aba! Biakatuenzekela kabidi nanku mu Columbus (mu Mississipi) muakaluabu kututuma. Batoke bakuabu bakatukina bualu tuvua tuyisha bantu ba bisamba bionso ne makoba onso katuyi tusunguluja. Bantu ba bungi bavua bela meji ne: tuvua tusaka bantu ku ditombokela mbulamatadi. Ke meji avua nawu komanda wa Tshisumbu tshia basalayi bena Amerike bavua banange ditunga diabu bikole. Misangu ne misangu uvua usaka bena tshimvundu bua kutuluishabu.

Musangu wa kumpala wakatubundabu mu Columbus, bena bimvundu bavua benda batulonda mu nyima patuvua tuenda tuabanya bibejibeji mu njila. Bakatusakila tuetu kudikuma ku dididisha dia mmuenu dia magazen kampanda. Bantu bakunguila kaba aku bua kumona tshivua tshienzeka. Katantshi aka bampulushi e kuluabu ne kuyabu  netu ku tubadi. Bena tshimvundu abu bakatulonda too ne ku tubadi, ne kuambabu kumpala kua bena mbulamatadi bavua muaba au ne: tuetu bumbuke mu musoko au dituku kampanda divuabu bafunde, apu tuvua mua kushala ne muoyo. Patuvua tudidinga tumumbuka kunyima kua dituku adi, bavua mua kutuenzela bibi anyi kutushipa mene. Tuakamona ne: bivua bimpe bua tuetu kuanji kumbukamu. Kadi kunyima kua mbingu mikese, tuakapinganamu ne kutuadijilula kuyisha.

Mutantshi kaunengi, ba bandi muanda-mukulu kutuvuila ne kutubuejabu ku makanda mu mashinyi abu abidi. Bakaya netu muitu, kutuvulabu bilamba ne kuangatabu mukaba uvua ku mupanu wanyi, kutuelabu muntu yonso mikaba 30! Tuvua ne buôwa bua dikema bualu bavua ne bingoma ne mionji. Mvua ngela meji ne: nebatusuike mionji, pashishe kutukupa mu musulu. Bakapanda mikanda ituvua nayi ne kutangalajabu mabeji panshi, bakangata kabidi tshisanji tshietu tshia fono, kutshitutabu ku tshikuku tshia mutshi, tshiotshi kutayika tupese tupese.

Bamane kutuela mfimbu too, bakatuambila mpindieu bua tuetu kuvuala bilamba ne kulonda ka-jila kavua muitu amu katuyi tutangila panyima nansha. Patuvua tuenda tuya, meji avua atuambila ne: tuetu badishime batangile anu panyima, bavua batushipa kakuyi muntu ulua kubenza bualu! Kadi kunyima kua minite mikese, tuakabumvua batemesha mashinyi ne buobu kuya.

Musangu mukuabu kabidi, bena tshimvundu bakatulonda ne tshiji, tuakadijingila bilamba mu nshingu ne tuetu kuowela mu musulu kampanda bua kubanyema. Matuku makese panyima apu, bakatukuata bamba ne: tuvua tusaka bantu bua kutombokela mbulamatadi. Tuakenza mbingu isatu mu buloko bangabanga ne kutulumbuluishabu. Bakamanyisha muanda eu mu Columbus mujima. Bakapatula mene balongi ba mu tshilongelu tshivua pabuipi apu kumpala kua dîba bua kuluabu kumona muvuabu batulumbuluisha. Pakafika dituku adi, mu nzubu muvua mûle tente ne bantu bimane kuulu bua kumona muvuabu balumbuluishangana! Munkatshi mua bantu bavua ne bua kuakuila Provense muvua bampasata babidi, mfumu wa tshimenga ne bampulushi.

Bakatuma Ntemu mukuabu mulumbuluidianganyi diende G. C. Clarke ne mulunda wende bua kutuakuilabu petu. Bakalomba bua balumbuluishi bashipe tshilumbu tshia disaka bantu bua kutombokela mbulamatadi bualu kakuvua tshivua tshitshijadika to. Mulumbuluidianganyi uvua wenza mudimu ne Muanetu Clarke wakatuakuila bikole nansha muvuaye kayi Ntemu wa Yehowa. Musangu mukuabu wakambila nzuji ne: “Bantu batu bamba ne: Bantemu ba Yehowa mbapale. Mmuomu anyi? Bavua bamba Thomas Edison ne: uvua mupale!” Pashishe kutangilaye kuvuabu bashile muendu wamba ne: “Kadi tangila muendu wawa!” Edison uvua muenze muendu eu, bamue bavua mua kumuangata bu mupale, kadi muntu nansha umue kêna mua kubipisha bintu bidiye muenze to.

Kunyima kua nzuji mulombodi munene wa ku kabadi aku mumane kumvua bijadiki ebi, wakambila prokirere ne: “Kuena ne katshijadiki nansha kamue kadi kaleja ne: badi basaka bantu ku ditombokela mbulamatadi to, badi ne bukenji bua kuenza mudimu eu. Kulu nabu kabidi mu nzubu wa tshilumbuluidi emu bua kujimijila Provense mujima dîba ne mfranga patupu ne kunjimijila meme panyi dîba paudi kuyi ne bijadiki nansha!” Tshilumbu tshietu e kujikatshi!

Kadi panyima, nzuji wakatubikidila mu biro biende bikuabu. Uvua mumanye bimpe ne: bantu bonso mu tshimenga bavua babenge dipangadika diende. Ke yeye kutupesha mubelu wa se: “Tshimvua muambe tshidi tshilonda mikenji, kadi mubelu undi meme nnupesha bonso babidi ngua se: numbuke mu tshimenga etshi, tshianana badi banushipa!”  Tuvua bamanye ne: uvua wamba bulelela, ke tuetu kumbukamu.

Ngakumbuka muaba au meme kuya mu tshimenga tshia Clarksville (mu Tennessee) muvua Bennett ne Velva, bampanda-njila ba pa buabu. Kunyima kua ngondo mikese, bakatutuma mu tshimenga tshia Paris (mu Kentucky). Kunyima kua tshidimu tshimue ne tshitupa, patukavua pa kuenzamu tshisumbu, meme ne Bennett batubikila bua bualu bua pa buabu.

Mudimu wa bu-misionere

Patuakamona batubikila bua kubuela mu kalasa kibidi ka Gilada (Tshilongelu tshia Bible tshia Société Watchtower), tuakambilangana ne: ‘Mbenze tshilema! Bua tshinyi badi babikila bansonga babidi ba mu Mississippi kabayi nansha ne tshintu bua kubuelabu mu kalasa aka?’ Kadi nansha mutuvua tuela meji ne: bavua bangata amu bantu badi balonge bikole, tuakaya amu kuya. Kalasa kavua ne balongi 100, ne kavua kenza ngondo itanu. Tuakajikija mu dia 31 Tshiongo 1944, ne tuvua ne disanka dia kuya kuambuluisha ku ba bende. Kadi tshikondo atshi bivua biangata matuku a bungi bua kupeta mikanda ya njila, ke bualu kayi bakanji kutuma balongi mu États-Unis bua kuenzelabu muomu bumpanda-njila bua matuku makese. Tuetu bamane kuenza bumpanda-njila matuku ndambu mu Alabama ne mu Géorgie, bakalua kututuma meme ne Bennett mu Barbade (mu Antilles).

Mvita Mibidi ya Buloba bujima itshivua minunke. Tshikondo atshi bavua bakandike mudimu ne mikanda ya Bantemu ba Yehowa mu Barbade ne miaba mikuabu ya bungi. Anu bu mutubu benza pa tshibidilu mu Barbade, bena mbulamatadi bakakangula ne kukalakasabu mu bibuta bietu, kusanganabu mikanda ituvua basokokemu. Dîba adi tuakamba ne: ‘Kuetu kuajiki.’ Kadi muena mbulamatadi mukuabu kutuambilaye amu se: “Nutufuile luse, tuvua ne bua kukalakasa mu bibuta bienu; imue ya ku mikanda eyi mbayikandike mu Barbade.” Kadi wakatupitshisha ne mikanda yonso ituvua bambule! Pashishe, patuakayisha bena mbulamatadi bakuabu, bakatuambila ne: kabavua bamanye tshivuabu bakandikile mikanda eyi to. Kunyima kua ngondo mikese, bakakangula mudimu wetu.

Mudimu uvua wenda bimpe menemene mu Barbade. Yonso wa kutudi uvua ne malonga a Bible matue ku 15, ne balongi ba Bible ba bungi bakadiunda mu nyuma. Tuvua ne disanka dia kumona bamue balua mu bisangilu bia tshisumbu. Kadi bu muvuabu bakandike mikanda yetu tshikondo kampanda, bana betu ba mu Barbade kabavua bamanye ngenyi mipiamipia ya mushindu wa kulombola bisangilu to. Mpindieu, tuakalongesha bamue bana betu ba bungi bavua bakumbane mushindu wa kuenza bisangilu. Tuvua ne disanka dia kuambuluisha bantu ba bungi batuvua tulonga nabu, tuakasanka bua kubamona batuadija kuyisha, ne muvua bantu benda bavula mu tshisumbu.

Ndi ngenza dîku

Kunyima kua ngondo bu 18 mu Barbade, ngakapingana mu États-Unis bualu bavua ne bua kumpanda. Pamvuamu apu, ngakasela Ntemu mukuabu utuvua tufundilangana nende mikanda diende Dorothy. Meme ne mukajanyi tuakaya kuenza bumpanda-njila mu Tallahassee (mu Floride), kadi kunyima kua ngondo isambombo tuakaya mu Louisville (mu Kentucky)  muvuabu bangangate ku mudimu kudi Ntemu mukuabu. Muakunyanyi Bennett wakatungunuka ne mudimu wende bidimu bia bungi mu Barbade. Pashishe wakasela misionere nende mukuabu ne kuenzaye mudimu wa mutangidi muena ngendu mu bidiila abi. Ku ndekelu, bakapingana mu États-Unis bua masama. Bakatungunuka ne mudimu wa butangidi buena ngendu, bambuluisha bisumbu bia muakulu wa tshiena-Espagne too ne pakafua Bennett mu 1990 muikale ne bidimu 73.

Mu 1950, mukajanyi Dorothy wakalela muana wa bakaji wa kumpala, utuakinyika ne: Daryl. Bana bonso basanga batuakalela bavua batanu. Muana muibidi, Derrick, wakafua disama dia menenjite pavuaye ne bidimu bibidi ne tshitupa. Kadi tuakalua kulela Leslie mu 1956, ne Everett wakalua kulonda mu 1958. Meme ne Dorothy tuakenza muetu muonso bua kukolesha bana betu mu njila wa bulelela bua mu Bible. Tuvua tudienzeja bua kuikala kulonga mu dîku ku lumingu luonso, ne tuvua tuenza bua dilonga edi dikale disankisha bana bonso. Patshivua Daryl, Leslie ne Everett bapuekele, tuvua tubapesha nkonko lumingu luonso bua kukebabu mandamuna avuabu ne bua kufila lumingu luvua lulonda. Bavua kabidi benza manaya a mushindu wa kuyisha ku nzubu ne ku nzubu. Muana umue uvua ubuela mu tshilaminu tshia bilamba udienza bu muntu udibu bayisha. Bakuabu bavua bimana pambelu ku tshiibi bakokola. Bavua bamba malu avua asekesha bua kutshingishangana, kadi bionso ebi biakabanangishisha mudimu wa diyisha. Tuvua kabidi ne tshibidilu tshia kuyisha nabu.

Patuakalela Elton muanetu wa mukala mu 1973, Dorothy ukavua ne bidimu bitue ku 50 ne meme nkavua pabuipi ne bidimu 60. Bavua batubikila mu tshisumbu ne: Abalahama ne Sala! (Genese 17:15-17) Bana banyi ba balume bakole bavua bayisha misangu mivule ne Elton. Tuakamona ne: tshivua mushindu munene wa kuyisha bantu pavuabu batumona ne mêku majima (bana ba balume ne ba bakaji, baledi ne bana) tuenza mudimu pamue, tuyisha bakuabu bulelela bua mu Bible. Bakulu ba Elton bavua bamuambula pa makaya benda bashilangana, bamupesha trakte mu tshianza. Bantu bavua anu bateleja misangu yonso pavuabu bunzulula tshiibi ne bamona kana katekete ka balume pa makaya a tutuaku. Bana betu bakole aba bakalongesha Elton mushindu wa kupesha muntu trakte pavuabu bajikija kuyikila ne bua kumuambila mêyi makese. Ke mushindu wakabangaye kuyisha nanku.

Mu bungi bua bidimu, tuakambuluisha bantu bakuabu bua kumanya Yehowa. Ku ndekelu kua bidimu bia 1970, tuakumbuka ku Louisville tuetu kuya ku Shelbyville (mu Kentucky) mu tshisumbu muvuabu dijinga ne bantu. Patuakafikaku, tuakamona muakavula bantu mu tshisumbu, tuetu kupeta lupangu ne kuasamu Nzubu wa Bukalenge. Pashishe bakatulomba bua kuya mu tshisumbu tshikuabu tshivua pabuipi apu.

Mpukapuka yakafikila dîku dianyi

Dijinga dianyi divua dia kumona bana batuvua balele bashala bonso mu njila wa Yehowa, kadi kabiakenzeka nanku to. Pakakolabu ne kumbukabu kumbelu, basatu ba ku bana banyi banayi badi bashale ne muoyo bakumbuka mu njila wa bulelela. Kadi, Everett muananyi wa balume ke wakangidikija ne kutuadijaye pende mudimu wa ku dîba ne ku dîba. Wakenza mudimu ku biro binene bitu ku New York bidi bilombola mudimu wa Bantemu ba Yehowa pa buloba bujima, ne mu 1984 bakamubikila bua kubuela mu kalasa ka 77 ka Gilada. Pakajikijaye kalasa aka, bakamutuma mu Sierra Leone (mu Afrike). Mu 1988 wakasela Marianne, mpanda-njila uvua mufumine mu Belgique. Katshia anu baselangana bonso babidi badi benza bu-misionere pamue.

Anu mudi muledi yonso mua kuela meji, biakatutekesha ku muoyo bua kumona basatu ba ku bana batudi balele balekela njila wa muoyo udi upesha bantu disanka mpindieu ne ditekemena dilenga dia muoyo wa kashidi mu mparadizu pa buloba mu matuku atshilualua. Imue misangu mvua ndipesha tshilema meme nkayanyi. Kadi ngakakola ku muoyo pangakavuluka ne: nansha bamue bana ba Nzambi peshi banjelu ba mu diulu bakalekela kumusadila, nansha mutu Yehowa ulongesha ne dinanga ne bulenga ne kayi wenza bilema. (Dutelonome 32:4; Yone 8:44; Buakabuluibua 12:4, 9) Bualu ebu buakampesha dilongesha dia se: nansha baledi mua kuenza muabu muonso bua kukolesha bana mu njila wa Yehowa, bakuabu badi mua kufika ku dibenga bulelela.

Anu bu mutshi udibu banyungisha kudi tshipepele tshikole, tuitabayi ntatu ne makenga mashilangane adi atuluila. Panyima pa bidimu bia bungi, ndi mumone se: dilonga Bible pa tshibidilu ne dibuela mu bisangilu bidi bimpesha bukole bua kuitaba  ntatu ne makenga au ne bua kumona mua kushala ne muoyo mu nyuma. Bu mundi ngenda nkulakaja ne mmvuluka bilema bimvua muenze kale, ndi ndienzeja bua kushala mutuishile lungenyi luanyi pa malu a mimpe amvua muenze. Bua kuamba bimpe, tuetu bashale anu ne lulamatu, malu a nunku adi atuambuluisha bua kukola mu nyuma. Tuetu bapetemu malongesha, malu a mu nsombelu adi kaayi atusankisha adi mua kutukuatshisha mu mushindu kampanda.​—Yakobo 1:2, 3.

Mpindieu meme ne Dorothy katutshiena ne makanda a mubidi anyi bukole bua kuenza malu atuvua mua kuenza mu mudimu wa Yehowa to. Kadi tudi ne dianyisha mudi bena Kristo netu bananga batuambuluisha. Mu tshisangilu tshionso, bana betu batu batuambila mudibu ne disanka padibu batumonamu. Batu batuambuluisha mu malu a bungi; batu mene batulongoluela nzubu anyi mashinyi.

Imue misangu tutu tuenza bumpanda-njila buambuluishi, ne tutu tulonga Bible ne bantu badi banyisha bulelela. Tutu tutamba kusanka misangu yonso itudi tupeta ngumu ya muanetu udi mu Afrike. Tutshidi tulonga mu dîku, nansha mutudi bashale mpindieu amu babidi. Tudi ne disanka bua mutudi benze bidimu bia bungi menemene mu mudimu wa Yehowa. Udi utujadikila ne: ‘kêna upua muoyo mudimu wetu ne dinanga dituakaleja bua dîna diende.’​—Ebelu 6:10.

[Tshimfuanyi mu dibeji 25]

Badi batutambuisha meme, Velva ne Bennett kud Ted Klein mu dia 18 Tshisanga 1940

[Bimfuanyi mu dibeji 26]

Meme ne mukajanyi Dorothy ku ntuadijilu kua bidimu bia 1940 ne mu 1997

[Tshimfuanyi mu dibeji 27]

Muyuki wa patoke wa “Mukalenge wa ditalala,” benda baumanyisha ne bise mu Barbade

[Tshimfuanyi mu dibeji 27]

Muakunyanyi Bennett kumpala kua nzubu wa ba-misionere