Tudi basombe mu njiwu

“Bualu buonso buudi wenza dituku dionso, nansha kulala tulu tuetu tua patupu etu, budi mua kukujiwula.”​—Tshikandakanda tshia Discover.

BATU bamba ne: kuikala ne muoyo kudi bu kuendela muaba udibu bajike mine (bia-mvita bitu bitayika), bualu njiwu ne lufu bidi mua kulua dîba dionso tshianana, misangu mivule kabiyi mene bidimanyisha to. Malu a njiwu atu mashilangane ku ditunga ne ku ditunga. Tudi mua kutela njiwu ya mashinyi, mvita, nzala, disama dia SIDA, dia kansere, dia mioyo, ne malu makuabu a bungi. Tshilejilu, mu Afrike wa kuinshi kua Tshipela tshia Sahara, disama dia SIDA ndilue tshintu tshia kumpala tshidi tshishipa bantu, bualu mu tshimue tshia ku bidimu bishale ebi, SIDA “mmushipe bantu 2 200 000 (bungi bupite bua badi bafue mu mvita yonso ya mu Afrike misangu dikumi).”​—U.S.News & World Report.

Pabi bantu badi batula mfranga miliyare ne miliyare bua kushala ne muoyo matuku a bungi ne kukepesha masama ne malema. Ngenyi mivule idi bantu bafile, bu mudi kudia pa ndiilu ne kunua pa nnuinu, ne kuenzeja mubidi kalasisa, idi mua kuambuluisha. Kadi, kudi tshintu tshidi mua kukumanyisha malu malelela adi mua kukuambuluisha bua wewe kusomba ku matshi talalaa kuyi ne njiwu iudi utshina. Tshintu atshi m’Bible. Udi ne mibelu idi ileja mushindu wa kupita ne ntatu ya bungi idi ikuata mubidi wetu ne itunyangila nsombelu. Bushuwa, Bible kêna wakula bua bualu buonso mu bule ne butshiama to. Kadi udi ufila mibelu bua kutuleja tshia kuenza mu malu bu mudi a ndiilu, utuleja tshia kuenza bua kuikala ne makanda mimpe a mubidi, lungenyi lutudi mua kuikala nalu, utupesha mibelu pa bidi bitangila disangila dia mulume ne mukaji, dinua dia maluvu, mfuanka ne bintu bidi bikuata bitu bantu bamba ne: badi banua bua kujikija lutetuku, ne malu makuabu kabukabu.

Nsombelu mmukolele kabidi bantu ba bungi bualu kudi njiwu mu malu a mfranga. Bible udi utuambuluisha kabidi mu bualu ebu. Udi ukankamija muntu bua kuangata makuta ne meji ne kubenga kuatulakaja patupu, ne udi kabidi uleja mushindu wa kuikala muena mudimu anyi mfumu wa mudimu wa tshitembu. Tuambe ne: Bible udi utombola bimpe, utuludika bua mushindu wa kulama mfranga ne wa kuikala ne mubidi muimpe, kabidi udi utuludika mu malu adi atangila muoyo muine. Kadi udi musue kumanya mudi Bible mua kutuambuluisha lelu anyi? Suaku ubale tshiena-bualu tshidi tshilonda.