Udi muenze bua bulelela buikale munda muebe anyi?

‘Nuandamuke ku dikudimuna dia meji enu bu meji mapiamapia bua nuenu nujingulule mudi disua dia Nzambi didi dimpe, didi dimusankisha, ne didi diakane tshishiki.’​—LOMO 12:2.

1, 2. Bua tshinyi ki mbitekete bua kuikala muena Kristo mulelela lelu?

 KUIKALA muena Kristo mulelela mu matuku a ku nshikidilu aa adi ne “malu makole” ki mbualu butekete to. (2 Timote 3:1) Bua muntu kulonda tshilejilu tshia Kristo, udi ne bua kuanji kutshimuna malu a pa buloba. (1 Yone 5:4) Vuluka tshiakamba Yezu bua njila wa bena Kristo ne: “Buelayi ku tshiibi tshibulakane, bualu tshiibi tshinene ne njila munene bidi bifikisha muntu ku kabutu, bavule ke badi bayilamu. Kadi tshiibi tshidi tshifikisha muntu ku muoyo ntshibulakane, kabidi njila wa kufikaku udi mukese; amu bakese ke badi bamumona.” Wakamba kabidi ne: “Pikala muntu musue kundonda, adibenge, ambule makenga ende ku dituku ku dituku, andonde.”​—Matayo 7:13, 14; Luka 9:23, MMM.

² Muena Kristo yeye mumane kupeta njila mubulakane udi ufikisha ku muoyo, lutatu ludiye ulua kupeta ndua kushala mu njila au. Bua tshinyi kushalamu kudi kufila lutatu? Bualu, patudi tudilambula kudi Nzambi ne tutambula, Satana udi ubanga kutulondakaja ne mateyi ende masokome. (Efeso 6:11) Udi umona miaba itudi ne butekete ne ukeba pa kubuelela bua kunyanga ngikadilu yetu ya mu nyuma. Tumanye ne: wakakeba bua kushindisha Yezu panshi, kêna mua kutushila mpunga nansha.​—Matayo 4:1-11.

Mateyi adi nawu Satana

3. Mmunyi muvua Satana mukune dielakana mu lungenyi lua Eva?

³ Buteyi bumue budi Satana ukuata nabu bantu mbua kubueja dielakana anyi mpata mu lungenyi luabu. Udi ukeba miaba idi bia-mvita bietu bia mu nyuma biteketele. Ku tshibangidilu menemene, buteyi ebu ke buakakuataye nabu Eva pakamuebejaye ne: “Nzambi wakamba ne, kanudi mamuma a mitshi yonso idi mu budimi, anyi?” (Genese 3:1) Tuambe ne: tshivua Satana wamba ntshia se: ‘Mbushuwa se: Nzambi mmunuelele mukenji wa nunku anyi? Yeye ng’udi munupale tshintu tshitambe buimpe mushindu’eu anyi? Nzambi se mmumanye ne: dituku dinudi anu nudia tshimuma etshi, mêsu enu adi ne bua kubululuka ne nudi ne bua kulua bu Nzambi, numanya malu mimpe ne malu mabi!’ Satana wakakuna lutete lua dielakana peshi mpata, ne kuindilaye bua lutoloke.​—Genese 3:5.

4. Ndielakana peshi mpata ya mushindu kayi idi mua kunyanga bamue bantu lelu?

⁴ Mmunyi mudi Satana ukuata bantu mu buteyi ebu lelu? Tuetu balengulule dibala dia Bible, didilongela, masambila, mudimu wa diyisha, ne bisangilu bia tshisumbu, tudi mua kupona mu mpata idi bakuabu bela. Tshilejilu: “Mmunyi mutudi bamanye ne: ebu ke bulelela buvua Yezu mulongeshe?” “Matuku etu aa nga ku nshikidilu bulelela anyi? Tuetu bine si tukadi mu lukama lua bidimu lua 21.” “Armagedone ukadi pabuipi anyi peshi utshidi anu kule?” Padi dielakana anyi mpata ya mushindu’eu ijuka munda muetu, ntshinyi tshitudi mua kuenza bua kuyumbusha?

5, 6. Ntshinyi tshitudi ne bua kuenza bikala dielakana dijuke munda muetu?

⁵ Yakobo wakafila mubelu mulenga pakafundaye ne: “Pikala umue wa kunudi mupange meji, aalombe kudi [Nzambi], neamupeshewo, bualu [Nzambi] udi upesha bonso tshianana kayi usunguluja. Kadi alombe ne ditaba, kayi welakana, bualu muntu udi welakana mmufuane mavuala a mbu adibo bajula kudi tshipepele, aya eku ne eku. Muntu wa nanku katekemenyi bua kupeta tshintu nansha tshintu kayi kudi Mfumu; mmuntu wa mioyo ibidi, ukudimuka mu ende malu onso.”​—Yakobo 1:5-8, MMM.

 ⁶ Nanku ntshinyi tshitudi ne bua kuenza? Tudi ne bua kutungunuka ne kusambila bua ‘kulomba Nzambi’ atupeshe ditabuja ne dijingulula dia malu, ne atukuatshishe mu makanda atudi tuenza bua kudilongela pa bidi bitangila nkonko anyi malu onso atudi tuelakana. Tudi mua kulomba kabidi diambuluisha kudi bantu badi ne ditabuja dikole, katuyi tuelakana se: Yehowa udi mua kupanga kutupesha diambuluisha ditudi nadi dijinga nansha. Yakobo wakamba kabidi ne: ‘Nunku nudikokeshe kudi Nzambi; kadi nukandamene Diabolo ne yeye neanunyeme. Semenayi pabuipi ne Nzambi ne yeye neasemene pabuipi nenu.’ Bushuwa, dielakana ditudi nadi nedijike anu tuetu bashemeje malanda ne Nzambi patudi tudilongela ne tusambila.​—Yakobo 4:7, 8.

7, 8. Ng’amue malu kayi manene adi ambuluisha bua kumanya ntendelelu uvua Yezu mulongeshe, ne mbanganyi badi baakumbaja?

⁷ Angata tshilejilu tshia lukonko elu: Ntshinyi tshidi tshileja ne: tudi mu ntendelelu uvua Yezu mulongeshe? Bua kuluandamuna, mmalu kayi atudi ne bua kukonkonona? Bible udi uleja ne: bena Kristo balelela badi ne bua kuikala ne dinanga dia bushuwa munkatshi muabu. (Yone 13:34, 35) Badi ne bua kutumbisha dîna dia Nzambi: Yehowa. (Yeshaya 12:4, 5; Matayo 6:9) Ne badi ne bua kumanyisha dîna edi.​—Ekesode 3:15; Yone 17:26.

⁸ Tshimanyinu tshikuabu tshia ntendelelu mulelela ndiangata dia Bible, Dîyi dia Nzambi ne mushinga. Mmukanda umuepele udi utuleja bumuntu bua Nzambi ne majinga ende. (Yone 17:17; 2 Timote 3:16, 17) Bena Kristo balelela badi kabidi bamanyisha bantu Bukalenge bua Nzambi, ne: buobu ke tshintu tshimuepele tshidibu ne bua kutekemena bua kupeta muoyo wa tshiendelele mu mparadizu pa buloba. (Mâko 13:10; Buakabuluibua 21:1-4) Kabena babuelakana mu malu a tshididi a bena panu anyi mu nsombelu wabu udi unyangangana nansha. (Yone 15:19; Yakobo 1:27; 4:4) Mbanganyi badi bakumbaje malu aa lelu? Malu adi ajadika ne: kakuena bantu bakuabu pa kumbusha Bantemu ba Yehowa.

Tshia kuenza ntshinyi bikala dielakana kadiyi dijika lukasa

9, 10. Ntshinyi tshitudi mua kuenza bua kutshimuna dielakana didi kadiyi dijika lukasa?

⁹ Ntshinyi tshitudi mua kuenza bikala dielakana anyi mpata mimane kutukuata? Ntshinganyi tshitudi ne bua kuenza dîba adi? Solomo Mukalenge wa meji udi utuandamuna ne: ‘Muananyi, biwitabuja mêyi anyi, biwateka mikenji yanyi munda muebe, bua wewe utelejije matshi ebe ku meji, bua kufila mutshima webe ku dijingulula dia mianda; e, biwadidila dijingulula dia mianda muadi, biwabandishila kumanya kua malu dîyi diebe, biwakukeba bu muudi ukeba tshiamu tshia argent, biwakukeja bu muudi ukeja biuma bisokoka, nunku neujingulule ditshina dia Yehowa, neusangane dimanya dia malu a Nzambi.’ ​—Tuetu mbadi baladike maleta; Nsumuinu 2:1-5.

¹⁰ Mêyi aa kaenaku atukemesha anyi? Bituitaba bua kuteya ntema mikole ku meji a Nzambi, ‘netusangane dimanya dia malu a Nzambi.’ Bushuwa, tudi mua kupeta dimanya dia Mfumu Mutambe Bunene wa diulu ne buloba anu tuetu bitabuje mêyi ende ne baateke munda muetu. Mbuena kuamba ne: tudi ne bua kunyemena kudi Yehowa mu masambila ne didilongela. Biuma bisokoka bidi mu Dîyi diende bidi mua kumbusha dielakana anyi mpata yonso munda muetu, ne bidi mua kutuambuluisha bua kumona butoke bua bulelela.

11. Mmunyi muvua musadidi wa Elisha mupete dielakana?

¹¹ Tshilejilu tshipepele tshia muvua disambila diambuluishe musadidi wa Nzambi uvua ne buôwa ne dielakana tshidi mu 2 Bakelenge 6:11-18. Musadidi wa Elisha kavua ne lumonu lua mu nyuma to. Kavua mua kumona biluilu bia mu diulu bivua bilue kuambuluisha muprofete eu wa Nzambi uvuabu bajingile kudi basalayi ba bena Sulia. Bu muvuaye ne buôwa, wakela dîyi ne: ‘Aka, mukalenge wanyi, netuenze tshinyi?’ Mmunyi muakamuandamuna Elisha? ‘Kutshinyi nansha; bualu bua badi netu badi bapita badi nabu bungi.’ Kadi mmunyi muvua musadidi eu mua kujadika bulelela bua bivua Elisha wamba? Kavua mua kumona biluilu bia mu diulu abi to.

12. (a) Mmunyi muakajika dielakana dia musadidi wa Elisha? (b) Mmunyi mutudi mua kujikija dielakana dionso ditudi mua kuikala nadi?

¹² ‘Elisha wakatendelela Yehowa ne: ndi nkusengelela ne: utabaje mêsu ende bua yeye amone. Yehowa wakatabaja mêsu a nsongalume, wakamona mikuna miûle tente ne tubalu ne makalu a kapia binyunguluka Elisha.’ Yehowa wakenza bua musadidi wa Elisha amone biluilu bia mu diulu bivua bilame Elisha. Kadi katuena ne bua kukeba bua Nzambi kutupeshaye diambuluisha dia muomumue lelu to. Umanye ne: musadidi wa muprofete eu kavua ne Bible mujima wa kulonga bua kumona mua kukolesha ditabuja diende nansha. Kadi tuetu tudi ne Bible. Bituikala tumulonga bimpe, ditabuja dietu didi padi mua kukola. Tshilejilu, tudi mua kuelangana meji a miyuki mivule idi itumvuija mushindu udi Yehowa mu lubanza luende lua mu diulu. Miyuki eyi kayena mua kushiya muntu ne dielakana anyi mpata nansha mikese bua se: Yehowa udi ne bulongolodi bua mu diulu budi buambuluisha basadidi bende lelu mu mudimu wa dilongesha bantu udi wenzeka buloba bujima.​—Yeshaya 6:1-4; Yehezekele 1:4-28; Danyele 7:9, 10; Buakabuluibua 4:1-11; 14:6, 7.

Dimukilayi mateyi a Satana!

13. Mbinganyi bidi Satana ukeba bua kutekesha nabi dilamata dietu ku bulelela?

¹³ Ng’amue malu kayi adi Satana utekesha nawu  bumuntu buetu bua bena Kristo ne dilamata dietu ku bulelela? Bumue bua kudiwu ntshiendenda mu mishindu yatshi yonso. Lelu udi bena panu badine mu tshiendenda ne kasuki, kuenda masandi ne mukaji ta mulume wa bende anyi dimanyangana dia mulume ne mukaji wa tshianana butuku bumue patupu mbilue malu adibu benza dituku dionso kudi bena mu tshipungu etshi tshia bantu badi bateke dikeba dia masanka pa muaba wa kumpala. Sinema, TV, ne video bidi bisaka bantu bua kuikala ne nsombelu eu. Bindidimbi bia bantu butaka anyi benda masandi mbiambule mbuaya ku TV, mu mikanda ne bikandakanda, nangananga ku Internet. Bena muoyo wa zukuzuku ke bakuatshika mu buteyi ebu.​—1 Tesalonike 4:3-5; Yakobo 1:13-15.

14. Bua tshinyi bamue bena Kristo mbakuatshike mu mateyi a Satana?

¹⁴ Bua muoyo wa zukuzuku, bamue bena Kristo mbanyange ngenyi ne mitshima yabu mu ditangila bindidimbi bia bantu butaka ne bia bantu bangatangana. Buobu nkayabu mbadikuatshishe mu buteyi bua Satana ebu. Dimona bintu ebi ndifikishe bantu ba bungi ku difua mu nyuma. Bantu ba nunku mbabenge kuikala “tuana tukese mu malu mabi.” Ki mbalue ‘bantu bakole mu meji’ nansha. (1 Kolinto 14:20) Tshidimu tshionso, bantu binunu ne binunu batu bapola mamuma a dibenga kulamata mikenji idi mu Dîyi dia Nzambi. Bavua balengulule bua kuvuala ne kulama ‘bintu bionso bia mvita bia Nzambi’ bivuabu nabi.​—Efeso 6:10-13; Kolosai 3:5-10; 1 Timote 1:18, 19.

Tulame tshitudi natshi bimpe

15. Bua tshinyi mbikolele bamue bua kuanyisha bumpianyi buabu bua mu nyuma?

¹⁵ Yezu wakamba ne: “Nenumanye bulelela ne bulelela nebunupe budikadidi.” (Yone 8:32, MML) Bantemu ba bungi bavua balekele nsombelu wabu wa kale ne bapatuke mu bitendelelu muvuabu kumpala. Ke bua tshinyi badi banyisha budikadidi budi bulelela bubapesha. Kadi bamue bana badibu bakoleshe kudi baledi badi mu bulelela badi mua kumona bikole bua kuanyisha bumpianyi buabu bua mu nyuma. Bana aba kabatu banji kubuela mu ntendelelu wa dishima anyi mu malu a bena panu badi bakeba masanka kumpala kua bionso, banua diamba ne baditua mu tshiendenda nansha. Ke bualu kayi kabena bamona dishilangana dinene didi pankatshi pa mparadizu wetu wa mu nyuma ne bukua-panu bua Satana budi bunyanguke. Bamue badi mene mua kupona mu diteta dia kulabula bintu bia mulungu bia panu bua kumona ni badi ne tshintu tshidibu bapangile!​—1 Yone 2:15-17; Buakabuluibua 18:1-5.

16. (a) Nnkonko kayi itudi mua kudiela? (b) Ntshinyi tshitubu batulongesha ne batukankamija bua kuenza?

¹⁶ Tudiku ne bua kuela minu mu mudilu bua tuetu kumanya mutubi biosha ne bisama anyi? Ntatu idi mifikile bakuabu kayenaku mua kutulongesha anyi? Tudiku tukeba bua kupingana mu “bitotshi” bia bukua-panu ebu bua kumona ni tudi bapangile tshintu kampanda anyi? (2 Petelo 2:20-22, MMM) Petelo wakavuluija bena Kristo ba mu bidimu lukama bia kumpala bavua kumpala mu bukua-panu bua Satana ne: ‘Bualu bua matuku mapite akakumbana bua nuenu nulonde disua dia bisamba bia bende, ne bua nuenu nuende mu tshienzenza tshia masandi, mu nkuka, mu kukuatshika kua maluvu, mu manaya a bundu, mu tshingu tshia banu ba maluvu, ne mu kutendelela kua mpingu mibi.’ Kakuyi mpata, katuena ne bua kulabula ‘malu manyanguke’ a panu bua kukeba bua  tuetu kumanya mudi muoyo wetu mua kunyanguka nansha. (1 Petelo 4:3, 4) Kadi badi batulongesha mikenji miakane ya Yehowa mu Nzubu yetu ya Bukalenge idi mikale miaba ya kulongela Bible. Ne batu batukankamija bua tuetu nkayetu tudijinguluile ne meji etu ne: tudi ne bulelela, ne pashishe kuenza bua buikale munda muetu.​—Yoshua 1:8; Lomo 12:1, 2; 2 Timote 3:14-17.

Dîna ditudi nadi ki ntshitadi patupu to

17. Mmunyi mutudi mua kuikala Bantemu ba Yehowa ba nsongo?

¹⁷ Bituenza bua bulelela buikale munda muetu, netukebe bua kubumanyisha bakuabu dîba dionso didi mushindu umueneka. Kabiena bisua kumvuija ne: netukebe bua kubuitabijija bantu badi kabayi babusue nansha. (Matayo 7:6) Kadi katuakupanga kudimanyisha ne: tudi Bantemu ba Yehowa. Muntu yeye muleje nansha anu ka-dijinga kakese ka kumanya bivule, muikale webeja bualu ne muoyo umue peshi witaba bua kuangata mukanda wetu kampanda, tudi tuanyisha ne netuikale badilongolole bua kumumanyisha ditekemena ditudi nadi. Nanku bidi bitulomba bua tuikale dîba dionso ne mukanda wetu kampanda muaba wonso utuikala: kumbelu, ku mudimu, mu kalasa, mu tshisalu anyi miaba ya manaya.​—1 Petelo 3:15.

18. Mmunyi mudi kudimanyisha patoke ne: tudi bena Kristo kuikale kutuambuluisha bikole?

¹⁸ Patudi tudimanyisha patoke ne: tudi bena Kristo, tudi tukolesha bia-mvita bietu bua Satana katupitshi bukole mu mvita misokome idiye utuela nansha. Padiku fete wa diledibua anyi wa Nowele, peshi dinaya dia loteri, bena mudimu netu nebikale bamba misangu yonso ne: “Mulekelayi, au n’Ntemu wa Yehowa.” Bia muomumue, bantu kabakuikala balondelangana malu a busenji kumpala kuetu nansha. Bua muanda eu, patudi tudimanyisha ne: tudi bena Kristo bidi bituambuluisha bikole mu nsombelu wetu, anu muakamba mupostolo Petelo ne: “Nganyi wanuenzela bibi panuikala basuminyine ne dienza malu mempe? Nansha nukenga bua buakane, nudi anu ba diakalenga.”​—1 Petelo 3:13, 14, MMM.

19. Ntshinyi tshidi tshitujadikila ne: tukadi basemene bikole mu matuku a nshikidilu?

¹⁹ Tuetu benze bua bulelela buikale munda muetu, disanka dikuabu dituapeta ndia se: netuikale batuishibue ne: matuku atudi aa nga nshikidilu wa tshikondo etshi. Netufike ku dimanya bimpe ne: milayi ya bungi ya mu Bible idi yenda ikumbana mu tshikondo tshietu etshi. * Didimuija dia Paulo dia se: ‘palua matuku a ku nshikidilu, malu makole nealue,’ ndijadika bimpe kudi malu a buôwa adi menzeke mu bidimu lukama bidi bipite ebi. (2 Timote 3:1-5; Mâko 13:3-37) Tshikandakanda kampanda tshia matuku adi panshi aa tshiakakula bua lukama lua bidimu lua 20 tshivua ne tshiena-bualu tshia se: “Nebikala batshivuluka bu tshikondo tshia buenzavi.” Tshiena-bualu atshi tshiakamba ne: “1999 ntshidimu tshidibu bapite kushipangana tshia ku ndekelu kua lukama lua bidimu ludibu bapite kushipangana.”

20. Mpindieu ntshikondo tshia tuetu kuenza tshinyi?

²⁰ Etshi ki ntshikondo tshia kutenkakana nansha. Mbimueneke patoke mudi Yehowa mubeneshe mudimu mutambe bunene wa dilongesha bantu Bible udi muenzeke pa buloba bujima bu tshimanyishilu kudi bisamba. (Matayo 24:14) Enza bua bulelela buikale munda muebe, ne ubumanyishe bantu bakuabu. Malu audi wenza mpindieu ke adi ajadika ne: neupete anyi kuakupeta muoyo wa tshiendelele. Kutekesha mu maboko kakuena kupetesha mabenesha a Yehowa to. (Luka 9:62) Etshi ke tshikondo tshia tuetu ‘kuikala bashindame, katuyi tunyunga, badifile misangu yonso ku mudimu wa Mfumu; bamanye ne: mudimu utudi tuenza mu dîna dia Mfumu kawena wa patupu nansha.’​—1 Kolinto 15:58, MMM.

[Mêyi adi kuinshi]

Udi muvuluke anyi?

• Mmunyi mutudi mua kujikija mpata anyi dielakana?

• Tshilejilu tshia musadidi wa Elisha tshidi tshitulongesha tshinyi?

• Mmateyi kayi atudi ne bua kuikala badimukile dîba dionso?

• Bua tshinyi tudi ne bua kudimanyisha patoke ne: tudi Bantemu ba Yehowa?

[Nkonko ya dilonga]

[Bimfuanyi mu dibeji 10]

Kudilongela Bible ne kusambila pa tshibidilu bidi mua kutuambuluisha bua kumbusha dielakana

[Tshimfuanyi mu dibeji 11]

Tshikena-kumona tshiakajikija dielakana dia musadidi wa Elisha

[Tshimfuanyi mu dibeji 12]

Batu batulongesha mikenji miakane ya Yehowa mu Nzubu ya Bukalenge bu wa buena eu udi mu ditunga dia Bénin