Bantu badi Yehowa mujadike tshiakabidi badi bamutumbisha buloba bujima

“Nenshintulule muakulu wa bisamba bua ulue muakulu mukezuke, bua buobu bonso babile dîna dia Yehowa.”​—SEFANYA 3:9, NW.

1. Bua tshinyi mikenji ya dikenga yakakumbanyina Yuda ne bisamba bikuabu?

 BUSHUWA, mikenji ya kabutu ivua Yehowa mupeshe Sefanya bua kumanyisha ivua mikole! Mêyi au avua amanyisha dikenga akakumbanyina ditunga dia Yuda ne Yelushalema tshimenga tshiende tshikulu, bualu bakokeshi ne bantu bonso mu tshibungi kabavua benza disua dia Yehowa to. Bisamba bivua nabu mutumba bu mudi bena Peleshete, bena Moaba ne bena Amona, bivua pabi ne bua kupeta dinyoka dia tshiji tshia Nzambi. Bua tshinyi? Bualu munkatshi mua bidimu nkama ne nkama, bisamba ebi bivua anu biluisha bantu ba Yehowa ne tshikisu. Bua muanda eu kabidi ke buvuabu ne bua kubutuila bukokeshi bua bukole bua Ashû, ne kadivua ne bua kuikalaku kabidi nansha.

2. Mbanganyi bavuabu mua kuikala bambile mêyi adi mu Sefanya 3:8?

² Nansha nanku, kuvua bamue bantu bakane mu Yuda wa kale. Bantu abu bavua bindile ne muoyo kulukulu kabutu kavua Nzambi mulongoluele bantu babi, ne bimueneka ne: bakane aba ke bavuabu bambile mêyi aa: ‘Nunku Yehowa udi wamba ne: Nungindile, too ne ku dituku dindi mbika bua kunyenga bintu; bualu bua ngakupangadija bua kusangisha bisamba bia bantu, bua kukungija makalenge, bua meme kupumuna tshiji tshianyi mene; bualu bua buloba buonso nebupie mu kapia ka lukunukunu luanyi.’​—Sefanya 3:8.

“Muakulu mukezuke” bua banganyi?

3. Mmukenji kayi wa ditekemena uvua Nzambi musake Sefanya bua kumanyisha?

³ Sefanya wakamanyisha mikenji ya kudi Yehowa ivua imanyisha kabutu. Kadi Nzambi wakasaka muprofete eu bua kumanyisha kabidi mukenji mulenga wa ditekemena. Mukenji eu uvua ne bua kukolesha bantu bavua bashale balamate Yehowa. Anu mudibi bifunda mu Sefanya 3:9 (NW), Yehowa Nzambi wakamba ne: “Nenshintulule muakulu wa bisamba bua ulue muakulu mukezuke, bua buobu bonso babile dîna dia Yehowa, bua bamusadile dikaya ku dikaya.”

4, 5. (a) Ntshinyi tshivua ne bua kuenzekela bantu babi? (b) Mbanganyi bavua muanda eu ne bua kupetesha masanka, ne bua tshinyi?

 ⁴ Kuvua ne bua kuikala bantu bavuabu kabayi ne bua kupesha muakulu mukezuke nansha. Mulayi udi wamba bualu buabu ne: ‘Nengumushe munkatshi muenu bantu bebe badi baditumbisha ne dipetu diabu.’ (Sefanya 3:11) Nenku Nzambi uvua ne bua kumbusha baditumbishi bavua bapepeja mikenji yende ne benza malu mabi. Ne mbanganyi bavua muanda eu mua kupetesha masanka? Sefanya 3:12, 13 udi wamba ne: ‘[Meme Yehowa] nenshiye bantu bakengeshibue ne bapele munkatshi muenu, buobu nebanyemene ku dîna dia Yehowa. Ba mu Isalele batshidi bashala kabena benza malu mabi kabidi, kabena bamba mashimi; kabena basangana mukana muabu ludimi ludi ludinga; bualu bua nebadie ne balale panshi; kakuena kuikalaku muntu wabatshinyisha.’

⁵ Bena lulamatu bashadile ba mu Yuda wa kale ke bavua ne bua kupeta masanka. Bua tshinyi? Bualu bavua batumikile mêyi aa: ‘Kebayi Yehowa, nuenu bena [bupuekele] bonso ba pa buloba, badi batumikila mikenji yende; kebayi buakane, kebayi [bupuekele]; bumue nebanusokoke mu dituku dia tshiji tshia Yehowa.’​—Sefanya 2:3.

6. Ntshinyi tshiakenzeka pakakumbana mulayi wa Sefanya bua musangu wa kumpala?

⁶ Pakakumbana mulayi wa Sefanya bua musangu wa kumpala, Nzambi wakanyoka Yuda mupange lulamatu pakalekelaye Bukokeshi bua Bukole bua bena Babulona butshimuna Yuda ne kuyabu ne bantu mu bupika mu 607 K.B.B. Bamue bantu bakapanduka, munkatshi muabu muvua muprofete Yelemiya, ne bakuabu bakashala balamate Yehowa pavuabu mu bupika. Mu 539 K.B.B., bakatonkola Babulona kudi bena Madai ne bena Pelasa balombola kudi Mukalenge Kolesha (anyi Sirise). Kunyima kua bidimu bu bibidi, Kolesha wakatuma dîyi bua bashadile bena Yuda bapingane mu ditunga diabu. Panyima pa matuku, bakibakulula ntempelo wa mu Yelushalema, ne bakuidi bakabangulula mudimu wabu wa kulongesha bantu Mikenji. (Malaki 2:7) Nenku Yehowa uvua utantshisha bashadile aba bajadika anyi bapingaja tshiakabidi mu ditunga diabu, kadi anu pavuabu bashala ne lulamatu.

7, 8. Mêyi a mulayi adi mu Sefanya 3:14-17 akakumbanyina banganyi, ne bua tshinyi udi wandamuna nanku?

⁷ Sefanya wakamanyisha bua bantu bavua ne bua kupeta masanka bua dibajadika tshiakabidi edi, wamba ne: ‘Imba biebe, wewe muana mukaji wa Siona; bena Isalele, elayi mbila; ikale ne disanka, sankaku bikole ne mutshima webe wonso, wewe muana mukaji wa mu Yelushalema! Yehowa wakumusha bilumbu biebe, wakuipata badi nebe lukuna; Mukalenge wa Isalele, Yehowa mene, udi munkatshi muenu; kuena umona makenga kabidi. Mu dituku adi nebambile Yelushalema ne: Kutshinyi, wewe Siona; bianza biebe kabiteketshi. Yehowa Nzambi webe udi munkatshi muenu, muena bukitu bukole udi ukusungila. Yeye neasanke bua bualu buebe ne disanka dinene, neakusangaje mu dinanga diende, neasanke bua bualu buebe ne kuimba kua misambu.’​—Sefanya 3:14-17.

⁸ Mêyi a mulayi aa avua akula bua bashadile bakapatulabu mu bupika mu Babulona ne bakaluabu nabu mu buloba bua bankambua babu. Sefanya 3:18-20 mmuleje bimpe muanda eu, tudi tubalamu ne: ‘Nensangishe popamue badi bajinga dituku dia tshijila bakadi nebe diambedi; bipendu biakanemesha bujitu pambidi pabu. Mona, mu tshikondo atshi nenjikije tshilumbu tshia bonso bakadi bakukengesha; nempandishe udi mulema, nempingaje wakuipatabu; nembavuije bantu badi ne butumbi ne badi ne dîna dinene, bakadi bakuatshike bundu mu buloba  buonso diambedi. Mu tshikondo atshi nendue nenu, ne mu tshikondo atshi nennusangishe popamue; bua nennuvuijile dîna dinene ne butumbi munkatshi mua bantu bonso ba pa buloba, pangapingaja diakalengele dienu ku mêsu kuenu mu muaba wa bupika buenu. Yehowa udi wamba dîyi eyi.’

9. Ndumu kayi luakadipetesha Yehowa mu Yuda?

⁹ Elabi meji bua muvua bualu ebu bupampakaje bisamba bia bena mutumba bivua biluisha bantu ba Nzambi! Babulona wa bukole uvua mukuate bantu ba mu Yuda ku bupika, ne kabavuaku ne ditekemena dia se: bavua mua kubalekela dimue dîba nansha. Bualu bukuabu, ditunga diabu divua dibutula butubutu. Kadi ku bukole buende yeye Nzambi wakabapingaja mu buloba buabu kunyima kua bidimu 70, pavua eku kabutu kindile bisamba bia baluishi babu. Ndumu kayipu luakadipetesha Yehowa pakapingajaye bashadile aba ba lulamatu! Wakabavuijila ‘dîna dinene ne butumbi munkatshi mua bantu bonso ba pa buloba.’ Dijadika tshiakabidi edi diakatumbishisha bikole Yehowa ne bantu bavua ne dîna diende!

Ntendelelu wa Yehowa udi utumba

10, 11. Ntshikondo kayi tshivua mulayi wa Sefanya wa dijadika tshiakabidi ne bua kukumbana mu tshitupa tshinene, mmunyi mutudi bajadike bualu ebu?

¹⁰ Dijadika tshiakabidi dikuabu dia bashadile diakenzeka mu bidimu lukama bia kumpala bia mu Bikondo Bietu ebi, pavua Yezu Kristo musangishe bashadile ba Isalele mu ntendelelu mulelela. Atshi tshivua ka-diosha ka muanda utshivua kumpala, bualu dijadika tshiakabidi dinene ditshivua kumpala. Mulayi wa Mika wakamanyisha ne: “Bidi ne bua kuenzeka mu tshitupa tshia ndekelu tshia matuku ne: mukuna wa nzubu wa Yehowa neulue kujalama bikole pa mutu pa lusongo lua mikuna, ne bushuwa neutumbuke pa mutu pa tukunakuna; ne bisamba bidi ne bua kutshimukilaku.”​—Mika 4:1, NW.

¹¹ Ndîba kayi divua muanda eu ne bua kuenzeka? Anu muakamba mulayi, uvua ne bua kuenzeka “mu tshitupa tshia ndekelu tshia matuku,” mmumue ne: mu ‘matuku a ku nshikidilu.’ (2 Timote 3:1) Muanda eu uvua ne bua kuenzeka kumpala kua nshikidilu wa ndongoluelu eu wa malu, padi bisamba bitshikale bitendelela  nzambi ya dishima apa. Mika 4:5 udi wamba ne: ‘Ba mu bisamba bionso batshidi benda muntu ne muntu mu dina dia nzambi wende.’ Kadi bidi munyi bua batendeledi balelela? Mulayi wa Mika udi wandamuna ne: “Kadi tuetu netuende mu dina dia Yehowa Nzambi wetu tshiendelele.”

12. Mmunyi mudi ntendelelu mulelela mutumbuke mu matuku a ku nshikidilu aa?

¹² Nanku mu matuku a ku nshikidilu aa, “mukuna wa nzubu wa Yehowa [mmulue] kujalama bikole pa mutu pa lusongo lua mikuna.” Ntendelelu mulelela wa Yehowa mmujadika tshiakabidi, mmujalame bikole, ne mmutumbuke ku mutu kua bitendelelu bikuabu bionso. Mulayi wa Mika ukavua mumanyishe kabidi ne: “bisamba bidi ne bua kutshimukilaku.” Ne bantu badi mu ntendelelu mulelela ‘badi ne bua kuenda mu dîna dia Yehowa Nzambi [wabu] tshiendelele.’

13, 14. Ndîba kayi diakabuela bukua-panu mu “tshitupa tshia ndekelu tshia matuku,” ne katshia tshine tshikondo atshi ntshinyi tshidi tshienzeka mu ntendelelu mulelela?

¹³ Malu adi enzeka bua kukumbaja milayi ya mu Bible adi ajadika ne: mu tshidimu tshia 1914 bukua-panu ebu mbubuele mu “tshitupa tshia ndekelu tshia matuku,” mmumue ne: mu matuku abu a ndekelu. (Mâko 13:4-10) Malu akadi menzeke adi aleja ne: Yehowa wakatuadija kusangisha mu ntendelelu mulelela bashadile bela manyi ba lulamatu badi ne ditekemena dia kupeta muoyo mu diulu. Disangisha edi mbaditue mu nyima kudi dikuabu dia “musumba munene wa bantu . . . ba bisamba bionso, ba bisa bionso, matunga ne miakulu yonso,” badi ne ditekemena dia kuikala ne muoyo wa kashidi pa buloba.​—Buakabuluibua 7:9, MMM.

¹⁴ Katshia ku Mvita ya Kumpala ya Buloba bujima too ne lelu’eu, ntendelelu wa Yehowa udibu balonda kudi bantu badi ne dîna diende mmuye kumpala bikole ku bulombodi buende. Batendeledi ba Yehowa bavua binunu bikese kunyima kua Mvita ya Kumpala ya Buloba bujima lelu badi miliyo mitue ku isambombo, badisangisha mu bisumbu bifike ku 91 000 bidi mu matunga 235. Tshidimu tshionso, bamanyishi ba Bukalenge aba badi benza mêba mapite pa muliyare mujima bua kutumbisha Nzambi patoke mu buambi. Bidi bimueneka bimpe ne: Bantemu ba Yehowa ke bantu badi bakumbaja mêyi a Yezu a se: ‘Nebambile bantu bonso ba pa buloba lumu luimpe elu lua bukalenge buanyi, neluikale tshimanyishilu ku bisamba bionso; pashishe nshikidilu nealue.’​—Matayo 24:14.

15. Mmunyi mudi mêyi a mu Sefanya 2:3 akumbana lelu?

¹⁵ Sefanya 3:17 udi wamba ne: “Yehowa Nzambi webe udi munkatshi muenu, muena bukitu bukole udi ukusungila.” Bantu ba Yehowa mbatante mu nyuma matuku a ku nshikidilu aa bualu yeye udi ‘munkatshi muabu,’ muikale Nzambi wabu wa-bukole-buonso. Bidi bienzeka lelu anu muvuabi bienzeke pakapingana bena Yuda wa kale mu 537 K.B.B. Ke bualu kayi tudi tumona mudi Sefanya 2:3 ukumbana mu mushindu munene mu tshikondo tshietu etshi, padiye wamba ne: ‘Kebayi Yehowa, nuenu bena [bupuekele] bonso ba pa buloba.’ Mu 537 K.B.B., muaku “bonso” uvua ukonga bashadile bena Yuda bakafuma mu bupika mu Babulona. Lelu udi ukonga bena bupuekele ba mu matunga onso a pa buloba  bujima, badi bitaba lumu luimpe lua Bukalenge budibu bayisha pa buloba bujima ne badi batshimukila ku “mukuna wa nzubu wa Yehowa.”

Ntendelelu mulelela udi utanta

16. Ntshinyi tshidi pamu’apa baluishi betu bumvua padibu bamona divulangana dia bantu ba Yehowa mu bikondo bietu ebi?

¹⁶ Kunyima kua 537 K.B.B., bantu ba bungi ba mu bisamba bivua pabuipi apu bakakema bua dijadika tshiakabidi dia bantu ba Nzambi mu ntendelelu mulelela mu buloba buabu. Bushuwa, dijadika tshiakabidi edi diakenzekela mu tshitupa tshikese tshia buloba. Udiku mua kuela meji bua bidi bamue bantu bamba (nansha baluishi ba bantu ba Nzambi) mpindieu udibu bamona mudi basadidi ba Yehowa ba mu bikondo bietu ebi bavulangane, batante ne baye kumpala mu mushindu wa dikema anyi? Pamu’apa, bamue baluishi badi bela meji a buena a Bafalese pakamonabu muvua bantu batshimukila kudi Yezu. Bakadila ne: ‘Monayi, ba pa buloba bonso badi bamulonda.’​—Yone 12:19.

17. Ntshinyi tshiakamba mufundi mukuabu bua Bantemu ba Yehowa, ne mmunyi mudibu bavulangane?

¹⁷ Mu mukanda wende kampanda (These Also Believe), Mulongeshi Charles Samuel Braden wakamba ne: ‘Bantemu ba Yehowa mbûje buloba bujima ne diyisha diabu. Tudi mua kuamba bimpe ne: kakuena tshisumbu tshikuabu pa buloba tshidi ne lukunukunu ne disuminyina mu dimuangalaja lumu luimpe lua Bukalenge kupita Bantemu ba Yehowa to. Bidi bimueneka ne: tshisumbu etshi netshitungunuke ne kudiunda.’ Mulongeshi au kavua muele panshi to! Pakafundaye mêyi aa kukadi bidimu 50, Bantemu batue ku 300 000 patupu ke bavua bayisha pa buloba bujima. Kadi ntshinyi tshivuaye mua kuamba lelu udi bantu bungi abu misangu 20 (batue ku miliyo isambombo) bayisha lumu luimpe?

18. Muakulu mukezuke ntshinyi, ne Nzambi mmuupeshe banganyi?

¹⁸ Nzambi wakamba mukana mua muprofete wende ne: “Nenshintulule muakulu wa bisamba bua ulue muakulu mukezuke, bua buobu bonso babile dîna dia Yehowa, bua bamusadile dikaya ku dikaya.” (Sefanya 3:9, NW) Mu matuku a ku nshikidilu aa, Bantemu ba Yehowa ke badi babila dîna dia Yehowa, bamusadila mu buobumue mu tshisuikidi tshidi katshiyi kukosa, ee, “dikaya ku dikaya.” Buobu ke bantu badi Yehowa mupeshe muakulu mukezuke eu. Muakulu mukezuke eu udi umvuija lumvu luimpe lua bulelela budi butangila Nzambi ne malu adiye mulongolole bua kuenza. Anu Yehowa ke udi ufila lumvu elu ku diambuluisha dia nyuma wende. (1 Kolinto 2:10) Mbanganyi badiye mupeshe nyuma wende? Anu ‘badi batumikila mêyi ende.’ (Bienzedi 5:32) Bantemu ba Yehowa nkayabu ke badi bitaba bua kutumikila Yehowa bu Mukokeshi wa bintu bionso. Ke bualu kayi badi bapeta nyuma wa Nzambi ne bakula muakulu mukezuke, bulelela budi butangila Yehowa ne malu malenga adiye mulongolole bua kuenza. Badi batumbisha Yehowa ne muakulu mukezuke eu pa buloba bujima.

19. Kuakula muakulu mukezuke kudi kumvuija malu kayi?

¹⁹ Kuakula muakulu mukezuke kakuena anu kumvuija kuitaba bulelela ne kubulongesha bantu bakuabu to, kadi kudi kumvuija kabidi kuikala ne nsombelu mumvuangane ne mikenji ne mêyi a Nzambi. Bena Kristo bela manyi badi kumpala kua mulongo benda bakeba Yehowa ne bakula muakulu mukezuke. Elabi meji bua malu akadibu benze! Nansha mudi bungi bua bela manyi bukepele, bushadile muinshi mua bantu 8 700, bantu bakuabu batue ku miliyo isambombo badi bidikija ditabuja diabu mu dikeba Yehowa ne mu diakula muakulu mukezuke. Bantu aba bungi budi buenda buvula mba mu musumba munene wa mu matunga onso, badi bitabuja mulambu wa Yezu udi upikula, benza  mudimu wa tshijila mu lubanza lua pa buloba lua ntempelo wa mu nyuma wa Nzambi, ne nebapanduke ku “dikenga dinene” diakuata bukua-panu ebu bubi mu katupa kakese emu.​—Buakabuluibua 7:9, 14, 15.

20. Mmalu kayi adi mindile bela manyi ba lulamatu ne bantu badi benza musumba munene?

²⁰ Musumba munene neubuele mu bukua-panu bupiabupia ne buakane bua Nzambi. (2 Petelo 3:13) Yezu Kristo ne bela manyi 144 000 babisha ku lufu bua kupeta muoyo wa mu diulu bua kuikalabu bakalenge ne bakuidi pamue nende, nebenze mbulamatadi mupiamupia. (Lomo 8:16, 17; Buakabuluibua 7:4; 20:6) Bantu bapanduka ku dikenga dinene nebenze mudimu wa kuandamuna buloba mparadizu ne nebatungunuke ne kuakula muakulu mukezuke udi Nzambi mubapeshe. Mêyi aa adi kabidi abakumbanyina buobu: ‘Bana bebe bonso nebikale bayidi ba Yehowa; ditalala dia bana bebe nedikale dinene. Nebakushimike mu buakane.’​—Yeshaya 54:13, 14.

Mudimu mutambe bunene wa dilongesha bantu wa katshia ne katshia

21, 22. (a) Anu mudibu baleje mu Bienzedi 24:15, mbanganyi batuikala ne bua kulongesha muakulu mukezuke? (b) Mmudimu kayi wa dilongesha bantu udi kauyi kuelekeja wenzeka pa buloba mu Bukalenge bua Yezu Kristo?

²¹ Tshisumbu tshinene menemene tshia bantu bapeta mushindu wa kuakula muakulu mukezuke mu bukua-panu bupiabupia ntshia badibu bambe mu Bienzedi 24:15, mutudi tubala ne: “Dibika dia bantu bafue nedikaleku, ne dia bakane ne dia babi.” Kale, bantu miliyo ne miliyo bavua ne muoyo ne bakafua kabayi ne dimanya dijalame dia Yehowa to. Kadi Yehowa neababishe mu bulongame. Bantu aba babishabu ku lufu nebikengele bua kubalongesha muakulu mukezuke.

²² Netshikale diakalenga dinene bua kuenza mudimu eu munene wa dilongesha bantu! Newikale mudimu mutambe bunene wa dilongesha bantu wa katshia ne katshia. Mudimu wonso eu newenzeke ku bulombodi buimpe bua Kristo Yezu. Ku diambuluisha dia mudimu eu, ndekelu wa bionso bantu nebamone muakumbana mêyi adi mu Yeshaya 11:9, adi amba ne: ‘Buloba nebuikale bûle tente ne kumanya kua Yehowa, bu mudi mâyi a mu mâyi manene abuikila mu miaba yawu yonso.’

23. Bua tshinyi udi mua kuamba ne: tudi ba diakalenga be bua mutudi bantu ba Yehowa?

²³ Tudi ba diakalenga be mu matuku a ku nshikidilu aa bua mutudi tudilongolola bua tshikondo atshi tshilenga pikala dimanya dia Yehowa dibuikila buloba tshia bushuwa! Ndiakalenga kayipu ditudi nadi kubangila ku mpindieu bua mutudi bantu ba Nzambi, tumona mudi mêyi a mulayi adi mu Sefanya 3:20 akumbana mu mushindu munene! Tudi tusanganamu mêyi a Yehowa atujadikila ne: ‘Nennuvuijile dîna dinene ne butumbi munkatshi mua bantu bonso ba pa buloba.’

Newandamune munyi?

• Mmushindu kayi wakakumbana mulayi wa dijadika tshiakabidi udi mu Sefanya?

• Mmunyi mudi ntendelelu mulelela mutante mu matuku a ku nshikidilu aa?

• Mmudimu kayi munene wa dilongesha bantu wenzeka mu bukua-panu bupiabupia?

[Nkonko ya dilonga]

[Tshimfuanyi mu dibeji 25]

Bantu ba Yehowa bakapingana mu buloba buabu bua kujadika tshiakabidi ntendelelu mulelela. Udi mumanye diumvuija dia muanda eu lelu anyi?

[Bimfuanyi mu dibeji 26]

Padi Bantemu ba Yehowa bakula “muakulu mukezuke,” badi bamanyisha bantu malu a mu Bible adi akolesha ku muoyo