Bible udi wamba tshinyi bua muntu utshidi kamama?

MUAKU wa mu tshiena-Ebelu bethu·lah udi umvuija muntu mukaji udi kayi muanji kusomba ne mulume mu dibaka ne utu kayi muanji kumanya balume. (Genese 24:16; Dutelonome 32:25; Balumbuluishi 21:12; 1 Bakelenge 1:2; Esetê 2:2, 3, 17; Muadi wa Yelemiya 1:18; 2:21) Kadi badi mua kuangata muaku wa mu tshiena-Greke par·thenos bua kuakula bua bajike balume ne bakaji.​—Matayo 25:1-12; Luka 1:27; Bienzedi 21:9; 1 Kolinto 7:25, 36-38.

Bilondeshile Mikenji ya Mose, muntu mulume uvua unyanguka ne nsongakaji utshivua kamama kayi mubangila uvua ne bua kupesha tatuende wa nsongakaji nshekele ya argent 50 (dolare 110), uvua ne bua kumusela (bikala tatuende wa nsongakaji muanyishe), ne kavua ne bua kumubenga ‘matuku ende onso.’ (Ekesode 22:16, 17; Dutelonome 22:28, 29) Kadi pavua nsongakaji mubangila utshivua kamama uvua bantu bamane kumanya ne: mmukaji wa bende, kayi wela lubila pavua muntu wa tshianana umukuata ku bukole bua kumanyangana nende, bavua ne bua kumushipa ne mabue. Pavuaye ubenga kuela lubila bivua bileja ne: uvua muanyishe ne bua nanku bavua bamuangata bu muena masandi. (Dutelonome 22:23, 24; tangila Matayo 1:18, 19) Bu muvuabu bangata nsongakaji mubangila utshivua kamama bu ‘mukaji wa bende,’ bidi kabidi biumvuija bua tshinyi mu Yoele 1:8 badi bakula bua ‘mukaji utshidi kamama’ udidila ‘mulume udi mumubangile mu bunsongakaji buende.’

Mupostolo Paulo wakaleja ne: bujike mbutambe buimpe bua bena Kristo badi bamanye mua kudikanda, bualu utshidi kamama anyi udi kayi muanji kusangila ne mulume anyi mukaji udi ne budikadidi bua bungi mu mudimu wa Mukalenge. (1 Kolinto 7:25-35) Kadi bua badi kabayi bamanye mua kudikanda, wakamba ne: “Biela muntu meji ne: udi wenzela bumama buende bibi, pikalabu bupitshishe tshikondo tshia bunsonga, ne eu ke mushindu udibi ne bua kuenzeka, enze mudiye musue; kêna wenza mpekatu to. Baselangane.”​—1 Kolinto 7:36, NW.

Muaku wa mu tshiena-Greke udibu bakudimune ne: “bumama” mu 1 Kolinto 7:36-38, (NW) udi umvuija ne: “kamama.” Ke bualu kayi bantu bavua bamba ne: Paulo uvua wakula bua bujitu budi nabu tatu peshi muntu udi ukolesha muana wa bakaji wa kuselesha. Tudi tubala mvese eu mu Mukanda wa Mvidi Mukulu ne: “Pikala muntu kampanda wela meji ne: muanende wa bakaji ukadi muakanyine mua kuyaye ku dibaka, katshinyi bua kumuselesha; padiye umona ne: ndi ne bua kumuselesha, enze mudiye musue, kena wenza bibi pa kutuma muanende ku dibaka.” Lungenyi lukuabu ludi se: mvese eu udi wakula bua muntu udi wangata dipangadika dia kusela nsongakaji udiye mubangile. Tudi tubala mu Muanda Mulenga Lelu ne: “Biela nsongalume meji ne, tshiena ngenzela nsongakaji bimpe, bikala nsongalume ne dialakana dipite ne biatshinkeye ne baselangane, mbimpe! Baselangane bu mudiye musue; kena wenza bualu bubi nansha.”

Pabi mvese idi midianjile ne idi ilonda idi ileja ne: kabena bakula bua nsongakaji utshidi kamama to, kadi badi bakula bua bumama bua muntu. Mumvuiji kampanda wa malu a mu Bible wakamba ne: “Ndi ngela meji ne: muaba eu mupostolo udi utungunuka ne muyuki wende wa kumpala, ubela bantu badi kabayi banji kubuela mu dibaka, badi ne budikadidi bua kudiangatshila mapangadika, bua kubambila tshidibu ne bua kuenza; kamama udibu bamba muikale umvuija bumama bua muntu mulume.” (Matthew Henry’s Commentary on the Whole Bible, 1976, Vol. III, dib. 1036) Bu mudibu mua kuangata muaku wa mu tshiena-Greke par·thenos bua kuakula kabidi bua bajike bantu balume, muaku “bumama” udibu bakudimune mu Bible wa Darby ne mu Traduction du monde nouveau mmukumbane ne udi upetangana bimpe ne malu adi madianjile ne adi malonde mvese eu.

Bumama bua mu nyuma ne mulayi wa Masiya

Anu muvua muakuidi munene mu Isalele ne bua kusela amu nsongakaji utshivua kamama (Lewitiki 21:10, 13, 14; tangila Yehezekele 44:22), ke muvua Muakuidi Munene Yezu Kristo ne bua kuikala anu ne “kamama” bu ‘mukaji musela’ mu diulu. (Buakabuluibua 21:9; Ebelu 7:26; tangila Efeso 5:25-30.) Ke bua tshinyi mupostolo Paulo uvua uditatshisha bikole bua tshisumbu tshia bena Kolinto tshikale tshikezuke, ujinga bua kutshifila ‘bu mukaji utshidi kamama kudi Kristo.’ (2 Kolinto 11:2-6) Mukaji wa Kristo mmuenza ne bantu 144 000 bela manyi a nyuma badi balame ‘bumama’ buabu pa kuditapulula ne bena panu ne kuikala ne ngikadilu muimpe ne malongesha malenga.​—Buakabuluibua 14:1, 4; tangila 1 Kolinto 5:9-13; 6:15-20; Yakobo 4:4; 2 Yone 8-11.

Nansha mudi muaku wa mu tshiena-Ebelu bethu·lah umvuija “kamama,” muaku mukuabu (al·mah) ke udi mu Yeshaya 7:14: ‘Monayi! Mukaji utshidi kamama [ha·al·mah] neimite difu, nealele muana wa balume, neamuinyike dîna ne: Imanuele.’ Muaku al·mah udi umvuija “mukaji utshidi kamama” ne badi mua kuwangata bua kuakula nansha bua nsongakaji udi kayi kamama peshi utshidi kamama. Mbautele bua “nsongakaji” Lebeka kumpala kua kumuselabu pavuabu bamubikila kabidi ne: “kamama” (bethu·lah). (Genese 24:16, 43) Muenzeja kudi nyuma wa Nzambi, Matayo wakangata muaku wa mu tshiena-Greke par·thenos (kamama) pavuaye uleja ne: mêyi a mu Yeshaya 7:14 akakumbana bua musangu wa ndekelu pakalelabu Yezu Masiya kudi nsongakaji utshivua kamama. Matayo ne Luka badi baleja bonso babidi ne: Mariya mamuende wa Yezu uvua kamama pakimitaye difu ku bukole bua nyuma muimpe wa Nzambi.​—Matayo 1:18-25; Luka 1:26-35.