Kujikija bupele, mbualu budi kabuyi mua kuenzeka anyi?

BANTU batu baya kumona biro bia Bulongolodi bua Matunga Masanga bidi mu tshimenga tshia New York batu bamona nzubu wa Tshipangu tshia malu a mpetu ne a nsombelu wa bantu. Batu kabidi bamona bimpe nshiba ne nshinga ya nzembu mu tshisasa tshidi muulu mua mbalanda wa nzubu eu. Muntu mukaji utu wendesha bantu muaba eu udi wamba ne: “Tshisasa ‘tshidi katshiyi tshijike’ etshi tshituku bua kuvuluija bantu se: mudimu udi Bulongolodi bua Matunga Masanga buenza wa malu a mpetu ne nsombelu wa bantu kautu ujika to; kutu anu malu kampanda adi akengela kuenza bua kulengeja nsombelu wa bantu pa buloba.”

Nansha mudibu benze Tshipangu etshi bua kulengeja nsombelu wa bantu bonso bimpe menemene, mudimu eu udi umueneka anu kauyi ujika to. Kadi pavua Yezu Kristo wenza mudimu wende pa buloba mu bidimu lukama bia kumpala, wakamba mêyi adi asankisha aa: ‘Nyuma wa Nzambi udi pambidi panyi, bualu bua yeye wakangela manyi pa mutu ne: ambila bantu bapele lumu luimpe.’ (Luka 4:18) ‘Ndumu luimpe’ kayi luakamanyishaye? Tshivua lumu ludi lutangila Bukalenge budi Yehowa Nzambi (udi ‘musoko wa ngumbu kudi bapele’) ne bua kujadika, eku Yezu Kristo muikale Mukalenge wabu. Bukalenge ebu nebukumbaje malu kayi? Yeshaya wakamanyisha ne: ‘Yehowa wa misumba nealongoluele bantu bonso bidia bia disanka bia manyi, bidia bia disanka bia mvinyo muladika ndala, bia kudia bia manyi bisangisha ne buongo bua mu mifuba, bia mvinyo muladika ndala mulengejibue bimpe. Yeye [neamine] lufu tshiendelele; ne Mukalenge Yehowa neakupule binsonji ku mêsu kua bantu bonso.’​—Yeshaya 25:4-6, 8.

Udi musue kumanya malu makuabu a mushindu wikala Bukalenge bua Nzambi ne bua “kulengeja nsombelu wa bantu pa buloba,” kakuyi kabidi dikenga nansha dimue anyi? Bala malu adi kuinshi eku bua umanye tshiudi mua kuenza bua mulongeshi mukumbane alue kukutangila bua kukuleja malu makuabu a buena aa adi mu Bible.