Mivungu ya ku Mbuu Mufue idi ne mushinga kayi kuudi?

Kumpala kua kuangulabu Mivungu ya ku Mbuu Mufue, mikanda ya ku tshianza idi itangila Mikanda ya tshiena-Ebelu ya mu Bible ivuaku bu ya kale menemene ivua anu ya kubangila mu bidimu bu bia nkama muanda-mukulu ne bia nkama tshitema B.B. Bu mukavuabu bajikije kufunda Mikanda ya tshiena-Ebelu eyi kalekale bidimu bimane kupita pa tshinunu tshijima, bantu bavuaku mua kuangata mikanda ya ku tshianza eyi bu idi yamba tshidi bulelela menemene bua Dîyi dia Nzambi anyi? Mulongeshi (wa mu iniversite) Julio Trebolle Barrera, wa mu kasumbu ka bukua-matunga ka bafundi ba malu a mu Mivungu ya ku Mbuu Mufue udi wamba ne: “Muvungu wa Yeshaya [wa mu Qoumrân] udi ufila tshijadiki tshinene tshia se: mêyi a mu Bible avuabu batentulule kudi batentudi bena Yuda munkatshi mua bidimu bipite pa tshinunu tshijima mmashale anu katakata.”

MUVUNGU udi Barrera wamba eu ngua mukanda mujima wa Yeshaya. Lelu’eu, munkatshi mua mivungu 200 ne bia pamutu mifunda ku bianza ya malu a mu Bible ivuabu bapete mu Qoumrân, mudi mivungu ya mukanda ne mukanda wonso wa ku Mikanda ya tshiena-Ebelu ya mu Bible, pa kumbusha anu wa Esetê. Mivungu eyi kayena mijima bu mudi Muvungu wa Yeshaya to, ya bungi idi anu bitupa bitupa, ne malu adi mashalemu kaena akumbana nansha tshia dikumi tshimue tshia malu a mu mukanda wa mu Bible udiwu atangila to. Mikanda ya mu Bible ivua mitambe kumanyika mu Qoumrân nyoyi eyi: Misambu (mikanda 36), Dutelonome (mikanda 29), ne Yeshaya (mikanda 21). Mêyi a mu mikanda eyi ke adibu kabidi batambe kutela misangu mivule mu Mikanda ya tshiena-Greke ya bena Kristo.

Nansha mudi mivungu eyi ileja ne: Bible kêna yeye mushintuluke, idi ileja kabidi ne: pamu’apa kuvua mfundilu mishilangane ya mêyi a mu Bible a mu Mikanda ya tshiena-Ebelu ivua bena Yuda nayi mu tshikondo tshia Ntempelo Muibidi wa mu Yelushalema, ne mfundilu yonso muikale ne pende padiye mushilangene ne mikuabu. Mivungu eyi kayivua yonso ne mfundilu anyi biambilu bifuanangane ne bia ba-Masorete (batentudi) nansha. Mikuabu mivungu ndambu idi ipetangana menemene ne Bible wa mu tshiena-Greke muinyika ne: Septante. Kumpala, bakebuludi bavua bela meji ne: miaba idi dishilangana dimueneka mu Bible wa Septante idi mua kuikala mifumine ku ditupakana anyi mene ngenyi midielela ku bukole kudi mukudimunyi. Kadi mpindieu mivungu eyi idi isokolola ne: miaba mivule idi dishilangana edi disanganyibua mmifumine ku mfundilu mishilangane ivua mu Mikanda ya tshiena-Ebelu. Ke bualu kayi kudi kabidi imue miaba mu Bible ivua bena Kristo ba kumpala batele mêyi a mu mvese ya mu Mikanda ya tshiena-Ebelu mikale ne biambilu bishilangane ne bia mvese idi mu mfundilu wa ba Masorete.​—Ekesode 1:5; Bienzedi 7:14.

Nanku, diangula dia mushinga mukole dia mivungu mijima ne idi mishale bitumpampa ya mikanda ya mu Bible edi ntshintu tshitambe buimpe tshitudi bapete bua kumona mushindu wa kulonga mua kumvua muvua mfundilu wa Mikanda ya tshiena-Ebelu ya mu Bible. Mivungu ya ku Mbuu Mufue mmishindike mushinga udi nawu Bible wa Septante ne udi nawu Pentateuque samaritain (Pantateke wa bena Samalea) mu mudimu wa difuanyikija dia mfundilu ya Bible. Idi ipetesha bakudimunyi ba Bible mushindu mukuabu wa kumanyabu mua kukonkonona miaba idibu mua kuikala bakajilule mfundilu mu mikanda ya ba-Masorete. Idi kabidi ishindika mu malu mavule ne: bena mu Kasumbu ka Bakudimunyi ba Bible wa Traduction du monde nouveau ki mbapange bua padibu bangate dipangadika dia kupingaja dîna dia Yehowa miaba ivuabu badiumushe mu mfundilu wa ba-Masorete nansha.

 Mivungu (idi yumvuija muvua mikenji ne malongesha a ntendelelu wa kasumbu ka mu Qoumrân) idi isokolola patoke se: tshikondo tshivua Yezu pa buloba, ntendelelu wa bena Yuda kavua anu mushindu umue nansha. Bilele bivua mu ntendelelu wa bena mu Qoumrân bivua bishilangane ne bia Bafalesa ne Basadoka. Dishilangana edi diakafikisha kasumbu ka mu Qoumrân ku diya kusombela mu tshipela. Bavua badishima ne: buobu ke muntu udi wela lubila mu tshipela bua kululamijila Yehowa njila, udibu bamba bualu buende mu Yeshaya 40:3. Ndambu wa bipese bia mivungu udi wakula bua Masiya, uleja ne: bafundi aba bavua batekemene se: ukavua pabuipi menemene ne kulua. Ebu mbualu bua dikema menemene, bualu Luka udi wamba muvua bantu ‘batekemene’ dilua dia Masiya.​—Luka 3:15.

Mivungu ya ku Mbuu Mufue idi ituambuluishaku payi bua kumvua tshivua nsombelu wa bena Yuda mu matuku avua Yezu wenda uyisha. Idi ituambuluisha ne malu atudi nawu bualu bua kumanya dishilangana ne dipetangana didi pankatshi pa tshiena-Ebelu tshia kale ne Bible. Kadi malu adi mafunda mu Mivungu ya bungi ya ku Mbuu Mufue atshidi akengela kuakonkonona bimpe bimpe. Nunku, kudi mua kupatuka kabidi ngenyi mikuabu mipiamipia. Bushuwa, diangula ditambe bunene dia bintu bia kale dia mu lukama lua bidimu lua 20 edi didi dipesha bakebuludi ne balongi ba Bible bukole mu lukama lua bidimu lua 21 elu.

[Mêyi a dianyisha bua bimfuanyi mu dibeji 7]

Dikebulula mu Qoumrân: Pictorial Archive (Near Eastern History) Est.; mikanda: Ne dianyisha dia Shrine of the Book, Israel Museum, Jerusalem