Nkonko ya babadi

Bena Kristo balelela badi ne bua kulonda tshilele tshitu natshi bantu tshia kupeshangana programe ya ordinatere mienza bua kusumbisha, bayabanyinangana tshianana anyi?

Bamue badi mua kudishima, bamba mudibi kabiyi bibi bua kupeshangana programe ya ordinatere, bualu Yezu wakamba ne: “Mbanupeshe tshianana, nupeshangane penu tshianana.” Muaba eu Yezu kavua wakula bua kuabanyina bantu mikanda anyi programe ya ordinatere idi anu benayi nkayabu ne bukenji bua kua mbulamatadi bua kuenza nanku to, bualu mbayelele mêyi ne mikandu kua mbulamatadi. Kadi kupeshangana kuvuaye muleje muaba eu kuoku kudi kutangila mudimu wa kuyisha. Yezu wakambila bapostolo bende bua kuyabu mu bimenga ne mu misoko mishilangane bua kuyisha Bukalenge, kuondapa babedi, ne kuipata bademon. Bapostolo kabavua ne bua kufutshishangana bua bintu ebi to, kadi bavua ne bua ‘kupeshangana tshianana.’​—Matayo 10:7, 8, MMM.

Bu mudi ordinatere ya ku nzubu ne ya mu biro yenda ivulangana lelu, bantu ba bungi badi dijinga ne programe ya ordinatere. Bua kuyipeta, bitu bikengela nangananga kuyisumba. Bamue bantu batu benza programe bayipeshangana  tshianana, balomba bantu bua kuyitentula ne kuyipesha bakuabu pabu. Kadi programe ya bungi ya ordinatere itubu benza, batu bayenza bua kuyipana. Nansha bikalabi bua ordinatere idi bantu nayi ku nzubu anyi mu biro ku mudimu, badi benza nayi mudimu badi ne bua kuyisumba anyi kuyifutshila makuta. Bikala muntu muangate anyi mutentule programe yonso kayi muyifutshile makuta, mmushipe mukenji wa mbulamatadi anu bu muntu udi muenze fotokopi ya mikanda ya bende mijima mijima, anyi mene muyipeshe bantu tshianana.

Programe ya bungi (kusangisha ne ya manaya) itu yenda ne mukanda wa dianyishilangana dia kua mbulamatadi udi ulomba muenayi anyi muntu yonso udi wenza nayi mudimu bua atumikile mêyi ne mikandu bidibu bele mu mukanda eu. Mikanda ya bungi ya kua mbulamatadi itu yanyishilangana bualu ebu itu itamba kuleja ne: anu muntu umuepele ke udi mua kuenza mudimu ne programe eu ne kumubueja mu ordinatere (pa tshibidilu mu ordinatere umue patupu), nansha yeye muikale wa ku nzubu, ku mudimu anyi mu kalasa. Batu bamba mu imue mikanda ya dianyishilangana eyi ne: muntu udi ne programe kampanda wa ordinatere udi mua kumutentulula ne kudilaminaye buende yeye nkayende, kadi kêna ne bua kumutentuila muntu mukuabu to. Bikala muena programe musue kupesha muntu programe eu mujima (kusangisha ne mukanda wa dianyisha dia kua mbulamatadi ne mikanda mikuabu ya programe eu), udi mua kumupesha. Kadi, kêna kabidi ne bukenji bua kuenza mudimu ne programe eu to. Mikanda ya dianyishilangana eyi itu mishilangane, ke bualu kayi muntu yonso udi usumba anyi udibu bapesha programe kampanda udi ne bua kuditatshisha bua kumanya bimpe bualu budibu banyishe anyi babenge mu mukanda wa dianyishilangana wa programe eu.

Mu matunga a bungi mutu mikenji idi ipesha muenji anyi mupatudi wa tshintu kampanda bukenji bua kuenzaye mudimu wende kakuyi muntu umutentula. Mikenji eyi mmiela bua kukuba “dimanya didi nadi muntu dia kupatula tshintu kampanda,” bu mudi programe ya ordinatere. Matunga aa atu enzeja bantu bua kutumikila mikenji eyi. Tshilejilu, tshikandakanda tshikuabu tshia mu dia 14 Tshiongo 2000 tshidi tshiamba ne: “Bampulushi ba mu Allemagne ne ba mu Danemark bavua bakuate bantu ba mu tshisumbu tshiakabikilabu ne: tshisumbu tshia bivi banene ba programe ya ordinatere” bavua batentulula programe ya ordinatere (ne ya manaya), babiabanyina bantu tshianana, anyi mene bapanyisha bimue bia kudibi ku Internet.​—The New York Times.

Ntshinyi tshidi bena Kristo buobu ne bua kuenza mu tshilumbu etshi? Yezu wakamba ne: ‘Nupe kaisa bintu bia Kaisa, nupe Nzambi bintu bia Nzambi.’ (Mâko 12:17) Mêyi aa adi alomba bena Kristo bua kutumikila mikenji ya ditunga idi kayiyi ibengangana ne mikenji ya Nzambi. Bua pa bidi bitangila mbulamatadi, mupostolo Paulo wakafunda ne: “Muntu yonso atumikile bamfumu ba ditunga . . . Muntu mubenge kutumikila mfumu, udi mubenge bulongolodi bua [Nzambi]; bantomboji nebadipishe tshibawu nkayabo.”​—Lomo 13:1, 2, MMM.

Bakulu kabenaku mu tshisumbu bua kuenda kutangila mu ordinatere ya bana betu, bienze bu ne: buobu ke badi ne bukenji bua kubumvuija ne kubenzeja bua batumikile mikenji miela bua kukuba bukenji bua benji ba programe ayi nansha. Kadi mbamanye, ne kabidi batu balongesha ne: bena Kristo badi ne bua kuepuka bua kuangata tshintu tshidi katshiyi tshiabu, ne badi ne bua kudienzeja bua kutumikila mikenji ya mbulamatadi. Butumike ebu budi buepula bena Kristo ku dipeta manyoka atubu bapesha bashipi ba mikenji, ne budi bubapesha kuondo ka muoyo kimpe kumpala kua Nzambi. Paulo wakafunda ne: ‘Bua bualu ebu nudi ne bua kutumikila mbulamatadi; kabiena anu bua kutshina dinyoka nkayadi, kadi mbua [kuondo ketu ka muoyo] kadi kasue bua tuetu tuenze bimpe.’ (Lomo 13:5, MML) Wakaleja kabidi dijinga didi nadi bena Kristo balelela pakambaye ne: ‘Tudi tuitabujibua ne: tudi ne [kuondo ka muoyo] kimpe, tudi basue kuenda bimpe mu malu onso.’​—Ebelu 13:18.

[Kazubu mu dibeji 29]

Imue kumpanyi ne bimue bilongelu bitu bisumba mikanda idi yanyishilangana bua bantu ba bungi kuenza mudimu ne programe umue wa ordinatere, ne mikanda eyi itu ikosa bungi bujalame bua badi mua kuenza mudimu ne programe eu. Mu 1995, bisumbu bia Bantemu ba Yehowa biakalonga dilongesha divua ne tshiena-bualu tshivua tshifila mubelu eu:

“Kumpanyi ya bungi itu yenza ne ipanyisha programe ya ordinatere itu ikandika ditentulula dia programe eyi, ne ifila mukanda wa dianyishilangana udi uleja mushindu wa kuenza nayi mudimu bilondeshile mikenji ya mbulamatadi. Pa tshibidilu, mukanda eu utu uleja ne: muntu udi ne programe eu kêna mua kumutentuila bantu bakuabu to; kuenza nunku nkushipa mikenji ya bukua-matunga ya bukenji budi nabu benji ba programe eyi. . . . Imue kumpanyi minene itu isumbisha ordinatere mimana kubueja programe munda muayi pamue ne mikanda ya dianyishilangana bua kuenza mudimu ne programe eyi. Kadi mikuabu kumpanyi kayitu yoyi ifila mikanda eyi to, bualu programe idibu babueje mu ordinatere kayena ilonda mikenji to, bileja ne: muntu udi uyisumba udi ushipa mikenji ya mbulamatadi padiye wenza nayi mudimu. Bua bualu ebu, bena Kristo badi ne bua kuepuka bua kutentula anyi kutumina bena ordinatere mikuabu programe ya bende peshi malu adi bakuabu bapatule adi mu ordinatere, bidibu bakandike ditentulula (bu mudi mikanda ya Société Watch Tower) ne programe yonso idi muntu mutentulule kakuyi dianyisha dia benayi.”