Kupanda muntu kakuyi dimuela mashi kudi kuikale “luondapu lunene ludi luenda lutangalaka”

TSHIKANDAKANDA tshikuabu tshidi tshiamba muinshi mua mutu wa bualu eu: “Dipanda muntu ‘kakuyi dimuela mashi’” ne: baminganga ba mu ditunga dia Canada “mbapatule mamanya mapiamapia mu bidimu bitanu bishale ebi adi mambuluishe bua luondapu lua dipanda muntu kakuyi dimuela mashi kulualu luondapu lunene ludi luenda lutangalaka.” (Maclean’s) Umue wa kudibu mmunganga Brian Muirhead, mutuanganyi wa manga a tulu, wa mu Kasumbu ka bantu badi balonga malu a Bukole bua mubidi mu tshimenga tshia Winnipeg (Health Sciences Centre). Ntshinyi tshiakamusaka bua kukeba mishindu ya diondopa kakuyi mashi?

Mu 1986, Doktere Muirhead wakenza mudimu mukole wa kupanda tatu wa bidimu 70 uvua ne mputa wa lubangu uvua upatuka mashi. Kadi bu muvua tatu eu Ntemu wa Yehowa ne utumikila Bible, uvua mulombe bua bamuondope kabayi bamuela mashi to. (Bienzedi 15:28, 29) Tshikandakanda etshi tshidi tshileja ne: Doktere Muirhead “wakanyemena ku mushindu wa kuondapa utubu kabayi batamba kulonda, wa kuela mubedi mâyi adibu babikila ne: solution saline bua mashi ende kaimanyi to. Wakapanda tatu eu kakuyi bualu, biobi kumusaka bua kuamba ne: ‘tuvua tuela bantu mashi bikole. Kadi ngakamona ne: dîba divua dikumbane dia kukeba mishindu mikuabu ya kuondapa bantu.’”

“Dipampakana bua mushindu wikala mashi aluabu kupana mu matuku adi kumpala ne buôwa budi nabu babedi bua kupetela masama ku tuishi tua mu mashi” ke bidi bifikishe ku dikeba mushindu wa kupanda muntu kakuyi dimuela mashi. Ngenyi mipiamipia idi badoktere bapatule mmiambuluishe Bantemu ba Yehowa ne bantu bakuabu ba bungi. Tshikandakanda atshi tshidi tshiamba ne: “Pa kumbusha dibenga kuela babedi ba bungi mashi, kupanda kakuyi diela mashi kudi kukepesha dipetela disama mu mashi mikale ne tuishi.” Kadi nansha mashi “kaayi ne tuishi” adi mua kuikala ne njiwu ya disama pa kushipa bikubi bia mubidi wa mubedi bua tshitupa tshîpi.

Ntshinganyi menemene tshitu tshisaka Bantemu ba Yehowa bua kuitaba ngondapilu idi kayiyi ya mashi? Broshire wa Comment le sang peut-il vous sauver la vie? udi mua kukuambuluisha mu bualu ebu. Bantemu ba Yehowa nebikale ne disanka dia kukumvuija malu adimu.