Udiku mua kuikala ne disanka dia bushuwa anyi?

GEORGE uvua wela muntu yonso muoyo ne disanka. Buende yeye, muoyo ndipa dia mushinga mukole. Nansha muakatuadija bukulakaje kumutatshisha, tshiende tshivua bantu bamumanyine ndisanka ne musangelu. Too ne dituku diakafua George, uvua anu mumanyike bu muntu wa disanka. Kadi wewe, udiku pebe ne disanka bu George anyi? Utuku umona dituku dipiadipia dionso bu tshintu tshikupesha bua kukusankisha anyi? Peshi utu umvua bikutonda anyi mene bikuenza buôwa paudi umona ne: butuku bukadi butshia? Kudiku tshintu tshidi tshikupangisha bua kuikala ne disanka anyi?

Batu bumvuija disanka bu kuikala ne diakalengele dia matuku onso. Disanka edi didi dimuenekela ku musangelu wa bungi ne ku dijinga dia se: musangelu eu utungunuke. Kudiku bantu badi ne disanka dia buena edi anyi?

Lelu’eu, bantu batu bamba ne: bua muntu kuikalaye ne disanka, udi ne bua kuikala muena kantu ku bianza. Ke bualu kayi bantu bavule badi baluangana anu bua kulua babanji. Ba bungi mbalekele balunda anyi balela babu, mbajimije ne bintu bikuabu bia mushinga anu bua kukeba bubanji. Anu bu mutu patu musuasua wenza tshilundu, badi anu babanda bapueka, kabayi ne dîba dia kuela meji a bidibu benza anyi dia kuelela bakuabu meji to. Ke bualu kayi tshikandakanda tshikuabu tshidi tshiamba ne: “Bungi bua bantu badi baminganga basangana ne dibungama dikole dilue bu disama budi anu buenda buvula, ne [dibungama edi] dikadi dienda dikuata too ne bana batekete. . . . Manga adi aladishangana tulu ke adi bantu basumba bikole.” (Los Angeles Times) Bantu ba bungi badi bangata manga ta bintu bia lulengu bidibu bakandike peshi baditua mu dinua maluvu bua kujikija ntatu yabu. Bamue batu batulakaja makuta bungi tshianana padi dibungama dikole  dibakuata bu disama. Pavuabu bakonkonone mu dimue ditunga, “bantu bakaji bakapatuka ba kumpala mu malu a disumba dia bintu bu mushindu wa kutalaja lungenyi. Bungi buabu buvua bumueneka bupite bua bantu balume misangu isatu ku dinyemena ku disumba dia bintu padi dibungama dibakuata.”​—The Guardian.

Kadi, disanka dia bushuwa katuena mua kudipetela mu tshisalu anyi mu magazen, mu kunua kua maluvu, mu dinua manga, mu diditua nshingi anyi ku dikala ne makuta ku banke to. Kabatu bapanyisha disanka nansha; batu badipeta tshianana. Kadi nkuepi kutudi mua kupeta disanka edi? Diandamuna didi mu tshiena-bualu tshidi tshilonda.