Badi belesha dibika dia Yezu ku lufu mpata

Muepiskopo mukuabu munene wa mu Ekeleziya wa bena Angleterre wa mu tshimenga tshia Canterbury wakamba ne: “Ndi mua kunuambila mu bulelela ne: nansha mutudi mua kuamba tushindika ne: Yezu uvua ne muoyo panu . . . , katuena mua kuamba ne dishindika dia muomumue ne: tudi bamanye bua se: Nzambi uvua mumubishe ku lufu to.”

KADI mupostolo Paulo yeye uvua ujadika ne: Yezu uvua mubike ku lufu. Mu mukanda wende wa kumpala wakatuminaye bena Kristo nende ba ku Kolinto wa kale, Paulo wakamba ne: ‘Ngakafila kunudi kumpala kua malu onso bualu bungakangata kabidi ne: Kristo wakafuila malu mabi etu, bu mudi Mukanda wa Nzambi wamba; wakajikibua, wakabishibua ku lufu pakapita matuku asatu, bu mudi Mukanda wa Nzambi wamba.’​—1 Kolinto 15:3, 4.

Ditabuja dibika dia Yezu ku lufu ke diakasaka bayidi bende bua kuyisha bena Gelika ne bena Lomo lumu luimpe: ‘munkatshi mua bifukibua bionso muinshi mua diulu.’ (Kolosai 1:23) Bushuwa, dibika dia Yezu ku lufu ke padi menemene bena Kristo bashimikile ditabuja diabu.

Kadi ku ntuadijilu menemene, bantu ba bungi bavua belesha dibika dia Yezu ku lufu mpata. Bua bena Yuda bonso, bivua bienze anu bu muntu upenda Nzambi pavua bayidi ba Yezu bamba ne: muntu eu uvuabu bashipele ku mutshi uvua Masiya. Bena Gelika bavua bamanye mukanda bikole ne bavua balongesha ne: anyima katu ufua to; buabu buobu lungenyi lua se: muntu udi mua kubika ku lufu luvua lubi be.​—Bienzedi 17:32-34.

Bedi ba mpata ba matuku etu aa

Mu bidimu bishale ebi, bamue bamanyi badi badiamba mudibu bena Kristo mbapatule mikanda ne biena-bualu bidi bileja mudi dibika dia Yezu ku lufu dikale muanu wa patupu, ne mbajudije mpata mikole bua tshilumbu etshi. Mu dikeba diabu dia “Yezu wa mu miyuki ya kale,” bamanyi bashilangane badi bakokangana bamba ne: malu a mu Evanjeliyo a lukita luvua lushale munda mutupu ne dimueneka dia Yezu kunyima kua dibika diende mmafuikakaja patupu, mbaafuikakaje matuku a bungi kunyima kua lufu luende bua kumona mua kushindika mêyi ende a se: bukole buende buvua bufumina mu diulu.

Tshilejilu, tuangatayi mêyi a Gerd Lüdemann mumanyi wa mu Allemagne, mmulongeshi wa Dipungila Dipiadipia ne mufundi wa mukanda udi ne mutu wa bualu ne: Bualu buvua menemene buenzekele Yezu​—Dikonkonona malu adi akula bua dibika  diende (Angl). Udi welesha mpata wamba ne: dibika dia Yezu ku lufu “mmuyuki mufuikakaja” udi muntu yonso udi ne “dimanya dia malu a panu” kayi ne bua kuitaba to.

Mulongeshi Lüdemann udi wamba ne: mupostolo Petelo kavua mumone Kristo mubike ku lufu to, uvua mumone tshikena-kumona bualu uvua ne kanyinganyinga kapite bukole ne uvua udipisha bua muvuaye muvile Yezu. Lüdemann udi wamba kabidi ne: dimueneka dia Yezu kudi bena kuitabuja bapite pa 500 musangu umue divua “disanka dikole dia bantu mu tshibungi.” (1 Kolinto 15:5, 6) Mu tshikoso, bamanyi ba bungi badi bangata malu adi Bible uleja bua dibika dia Yezu ku lufu bu mianda mifuikakaja patupu yakapeshilula bayidi bukole bua mu nyuma ne lukunukunu lua kutungunuka ne kuenza mudimu wa Nzambi.

Bushuwa, bantu ba bungi kabatu batamba kusua mpata ya mushindu’eu idi bena meji bela. Kadi, tuetu bonso tudi ne bua kumanya bimpe tshilumbu tshia dibika dia Yezu ku lufu. Bua tshinyi? Bualu, bikalaye kavua mubike ku lufu, Buena-Kristo mbuashila pa dishima. Kadi, bikala dibika dia Yezu ku lufu dikale bualu bulelela buvua buenzeke, Buena-Kristo mbuashila pa bulelela; ne ki ng’anu mêyi a Kristo nkayawu akakumbana, kadi ne malu akalayaye kabidi. Tuambe kabidi ne: dibika ku lufu diodi mua kuenzeka, lufu kaluena mutshimunyi munene to, kadi ludi muluishi udibu mua kutshimuna.​—1 Kolinto 15:55.

[Mêyi a dianyisha bua tshimfuanyi mu dibeji 3]

Biangatshila mu nkudimuinu wa Self-Pronouncing Edition of the Holy Bible, udi ne nkudimuinu wa King James ne wa Revised versions