Bitendelelu nebifileku ditalala pa buloba anyi?

KUBANGILA mu dia 28 too ne mu dia 31 Tshimungu 2000, bantu bapite pa 500 bafumine mu matunga 73 bakasangila mu tshimenga tshia New York. Bakadisangisha ku ONU bua kuenza “Tshisangilu tshia balombodi ba bitendelelu bua kufila Ditalala dia Bidimu tshinunu Bipiabipia pa Buloba.” Balombodi ba bitendelelu aba bavua ba mu nzambi mishilanshilangane, ba bungi bavua bavuale bilamba ku mitu, bavuale mizabi mienze bu mikunze, bele bifulu ku mitu peshi bavuale mizabi mifike. Munkatshi muabu muvua bena Bahai, ba-mizilma, bena Buda, bena Buena-Yuda, bena Hindu, bena Jaïn, bena Shinto, bena Sikh, bena Tao, bena Zoroastre, ne bena bitendelelu bikuabu bia Bukua-buena-Kristo.

Balombodi ba bitendelelu aba bakasangila ku ONU munkatshi mua matuku abidi a kumpala a ku anayi avua tshisangilu etshi ne bua kuenza. Kadi ki ntshisumbu tshia ONU tshivua tshilongolole anyi tshifile makuta bua kuenza tshisangilu etshi to; mbena bisumbu kabukabu bia malu a diambuluishangana ne mfranga. Nansha nanku, bena ONU ne balombodi ba bitendelelu abu bakakula bua mushinga wa dienza mudimu pamue bua kujikija bupele, kansungasunga, dinyanguka dia buloba ne bidipu, mvita ne bingoma binene.

Balombodi aba bakatua biala pa mukanda uvua ne tshiena-bualu etshi: “Ndondo bua kufila Ditalala pa Buloba.” Nansha muvuabu baleje mu mukanda eu ne: “imue misangu bitendelelu ke bitu bienzeja” mvita ne malu a tshikisu, bakambamu ne: bantu badi batue biala bavua ne bua “kukuatshishangana ne ONU . . . bua kukeba ditalala.” Kadi kakuvuaku mapangadika masunguluke avuabu bangate bua kuleja mushindu uvuabu mua kufila ditalala edi nansha.

Dituku dibidi, Bawa Jain (mulombodi munene wa tshisangilu etshi) wakajikija mêyi ende a mbangilu wamba ne: kukadi bidimu ndambu uvua mumone tshimfuanyi tshikuabu tshizola ku nzubu ya ONU. Bavua bazole muntu mupite nzubu wa biro bia Mulombodi wa ONU ku bule. Muntu au uvua ukokola ku nzubu bienze anu bu ku tshiibi. Kuinshi kua tshimfuanyi etshi kuvua miaku eyi: ‘Mukalenge wa ditalala.’ Muena-muabu Jain wakamba ne: “[Tshimfuanyi etshi] tshiakankemesha bikole pangakatshimona. Meme kuebeja bantu ba bungi bua kungambilabu [tshivuatshi] tshiumvuija. Ndi mmona ne: lelu ndi ne diandamuna. Disangila dienu bonso muaba eu, nuenu balombodi ba bitendelelu ba buloba bujima, didi dindeja meme ne: [eu] ke mukalenge wa ditalala udi ukokola ku tshiibi tshia ONU.”

Kadi Bible udi wamba munga mushindu. Udi uleja ne: Yezu Kristo ke Mukalenge wa Ditalala. Neafile ditalala pa buloba, ki nku diambuluisha dia bamfumu ba tshididi anyi balombodi ba bitendelelu to, kadi nku diambuluisha dia Bukalenge bua Nzambi. Bukalenge ebu (ta mbulamatadi wa Nzambi wa mu diulu) ke buasangisha bantu bena butumike mu buobumue, kuenza kabidi bua disua dia Nzambi dienzeke pa buloba.​—Yeshaya 9:6; Matayo 6:9, 10.