“Bushuwa, Mfumu mmubike ku lufu!”

Elabi meji muvua lufu lua Yezu lubungamije bayidi bende. Ditekemena diabu diakamueneka bu tshintu tshifue anu muvua tshitalu tshivua Yosefe wa ku Alimataya muladike mu lukita. Kabidi, ditekemena dionso divuabu nadi dia se: Yezu uvua mua kupikula bena Yuda ku bupika bua bena Lomo diakajimina padi.

TUANJI kuamba, bu lufu lua Yezu luikale nshikidilu wa bionso, bayidi bende bavua mua kuikala pamu’apa bajimine anu muakajimina bayidi ba bantu ba bungi bavua badiamba muvuabu ba-Masiya. Kadi Yezu yeye uvua ne muoyo! Bilondeshile Dîyi dia Nzambi, wakamuenekela bayidi bende misangu mivule matuku makese kunyima kua lufu luende. Ke bua tshinyi bamue ba kudibu bakamba ne: “Bushuwa, Mfumu mmubike ku lufu!”​—Luka 24:34, Mukanda wa Mvidi Mukulu.

Bayidi ba Yezu bavua ne bua kujadikila bantu tshivuabu bitabila Yezu bu Masiya. Pa kujadika bualu ebu, bakamba ne: dibika diende ku lufu divua tshijadiki tshikole tshivua tshileja ne: Yezu uvua Masiya. Kakuyi mpata, ‘bapostolo bakadi bamba ne bukole bua bungi bua dibika dia Mukalenge Yezu ku lufu.’​—Bienzedi 4:33.

Bikalaku kuvua muntu uvua mua kuleja patoke se: dibika dia Yezu ku lufu mbualu bua dishima, (pamu’apa mufikishe muyidi umue wa Yezu ku ditaba ne: dibika diende divua dia dishima, peshi muleje ne: tshitalu tshia Yezu tshivua tshishale mu lukita), Buena-Kristo buvua mua kuikala bufue amu ku mbangilu. Kadi kabuakafua to. Pakamanya  bayidi ba Kristo ne: mfumuabu eu uvua ne muoyo, bakaya miaba yonso benda bamanyisha bantu dibika diende ku lufu, ne ba bungi bakalua bayidi ne bena kuitabuja ba Kristo mubisha ku lufu.

Bua tshinyi wewe pebe udi mua kuitaba ne: Yezu uvua mubike ku lufu? Mmalu kayi adi aleja ne: eu mmuanda uvua muenzeke?

Bua tshinyi tudi ne bua kukonkonona bijadiki?

Evanjeliyo yonso inayi idi ilonda bua dibika dia Yezu ku lufu. (Matayo 28:1-10; Mâko 16:1-8; Luka 24:1-12; Yone 20:1-29) * Bitupa bikuabu bia mu Bible bifunda mu tshiena-Greke bidi bijadika ne: Kristo uvua mubike ku lufu.

Kabiena bikemesha bua muvua bayidi ba Yezu bamanyishe dibika diende ku lufu to! Pikalabi bilelela se: Nzambi uvua mumubishe ku lufu, nanku elu ke lumu luakatamba kukemesha bantu pa buloba. Bidi bileja ne: Nzambi utuku, kabidi ne: Yezu udi ne muoyo.

Mmunyi mudi bualu ebu bututangila? Yezu wakasambila ne: ‘Eu udi muoyo wa tshiendelele, bua buobu bakumanye wewe, Nzambi umuepele mulelela, ne yeye uwakatuma, Yezu Kristo mene.’ (Yone 17:3) Bushuwa, tudi mua kupeta dimanya didi difikisha ku muoyo didi ditangila Yezu ne Tatuende. Tuetu tutumikila malu atudi tumanya adi abatangila, nansha bu lufu mua kutukuata, Nzambi neatubishe ku lufu bualu wakabisha Yezu pende. (Yone 5:28, 29) Tudi mua kutekemena muoyo wa tshiendelele mu mparadizu pa buloba bukokesha kudi Bukalenge bua Nzambi bua mu diulu budi mu bianza bia Muanende Yezu Kristo, Mukalenge wa bakalenge.​—Yeshaya 9:6, 7; Luka 23:43; Buakabuluibua 17:14.

Nanku lukonko lua kumanya bikala Yezu uvua mubike tshia bushuwa ku lufu ludi ne mushinga wa bungi. Ludi lutangila muoyo utudi nawu mpindieu ne wa matuku atshilualua. Ke bua tshinyi tudi tukulomba bua ukonkonone pebe bijadiki binayi ebi bidi bileja ne: Yezu wakafua ne bakamubisha ku lufu.

Yezu wakafuila ku mutshi bulelela

Bamue bantu bena mpata badi bamba ne: nansha muvuabu bapopele Yezu ku mutshi, ki nku mutshi aku kuakafuilaye to. Badi bamba ne: Yezu ukavua pa kukula muoyo, kadi bua tshitalela tshia mu lukita wakalua kufululuka. Kadi, bijadiki bionso bidiku bidi bileja ne: tshitalu tshia Yezu ke tshivuabu babueje mu lukita.

Bu muvuabu bashipe Yezu patoke, kuvua bantu bavua badimuene ne abu abidi se: uvua mufuile ku mutshi tshia bushuwa. Mfumu wa basalayi uvuabu bapeshe bukenji bua kubashipa wakajadika ne: Yezu uvua mufue bushuwa. Mfumu wa basalayi eu uvua kabidi ne mudimu wa kujadika ne: Yezu mmufue bulelela. Tshikuabu tshia kumanya ntshia se: Pontio Pilato ngovena wa bena Lomo wakitaba bua kupesha Yosefe wa ku Alimataya tshitalu tshia Yezu bua kutshijika anu pakajadikaye ne: Yezu uvua mufue bulelela.​—Mâko 15:39-46.

Bakasangana lukita munda mutupu

Lukita luakasanganabu munda mutupu luakapesha bayidi bende tshijadiki tshia kumpala tshia se: Yezu uvua mubike ku lufu, ne kakuena muntu ukadi muele tshijadiki etshi mpata to. Bakajika Yezu mu lukita lupialupia luvuabu kabayi banji kujikamu muntu mukuabu to. Lukita alu luvua pabuipi ne muaba uvuabu bapopelangana ku mitshi ne muntu nansha umue kavua mua kupanga kumanya muaba uvualu to. (Yone 19:41, 42) Malu onso adibu balonde mu Evanjeliyo adi umvuangana, aleja ne: pakafika balunda ba Yezu ku lukita mu dinda dibidi dia kunyima kua lufu luende, tshitalu tshiende katshivuamu to.​—Matayo 28:1-7; Mâko 16:1-7; Luka 24:1-3; Yone 20:1-10.

Baluishi nansha balunda ba Yezu bakakema bua kusangana lukita luende munda mutupu. Katshia kuonso aku baluishi bende bavua bakeba bua bamushipe ne bamujike. Buobu bamane kukumbaja tshivuabu bakeba, bakakanga lukita ne kuteka  basalayi bua kululama. Nansha nanku, mu dinda dia dituku dia kumpala dia lumingu, lukita luvua munda mutupu.

Balunda ba Yezu ke bavua bapatule tshitalu tshiende mu lukita anyi? Tòo, bualu Evanjeliyo idi ileja ne: bavua ne dibungama dikole kunyima kua lufu luende. Kabidi, bayidi bende kabavua mua kuitaba bua babakengeshe ne babashipe bua bualu buvuabu bamanye bimpe ne: mbua dishima nansha.

Nnganyi uvua mumbushe tshitalu mu lukita? Ki mbaluishi ba Yezu bavua mua kuikala bangate tshitalu atshi to. Bu buobu batshiangate bushuwa, bavua mua kulua kutshipatula kunyima bua kuleja patoke ne: malu avua bayidi bamba a se: Yezu uvua mubike ku lufu ne uvua ne muoyo avua a dishima. Kadi bualu bua mushindu’au kabuvua buenzeke to, bualu Nzambi ke uvua mumbushe tshitalu atshi mu lukita.

Kunyima kua mbingu, baluishi ba Yezu kabakela mêyi a Petelo aa mpata nansha: ‘Nuenu bena Isalele, umvuayi mêyi aa: Yezu wa ku Nazaleta, muntu mujadikibue kudi Nzambi ku mêsu kuenu bua malu makole akenzaye ne malu a kukema ne bimanyinu biakamuenzeja Nzambi munkatshi muenu, bu munudi bamanye; yeye wakadi mufila bu muakadi meji akasungula Nzambi ne bu muakadi budianjidi kumanya buende, nuenu nuakuenzeja bianza bia bantu babi bua kumutekabu ku mutshi ne bua kumushipabu. Nzambi wakamubisha, mumane kusulula nkanu ya lufu, bualu bua kakadi mua kusuikibua kudilu tshiendelele. Bualu bua Davidi udi wamba bualu buende ne: Nakumona Mukalenge ku mêsu kuanyi matuku onso. Ne bualu bukuabu, mubidi wanyi neulale ne ditekemena, bua wewe kuena ushiya muoyo wanyi mu Muaba wa Bafue, kuena ufila webe wa tshijila bua kubolaye.’​—Bienzedi 2:22-27.

Bantu ba bungi bakamona Yezu mubisha ku lufu

Luka mufundi wa Evanjeliyo wakamba mu mukanda wa Bienzedi ne: ‘Pakamana [Yezu] kukenga, wakamueneka [kudi bapostolo] ne muoyo, bimanyinu bia bualu ebu biakadi bia bungi, wakamuenekamueneka kudibu nunku matuku makumi anayi wamba malu a bukalenge bua Nzambi.’ (Bienzedi 1:2, 3) Bayidi ba bungi bakamona Yezu uvua mubike ku lufu misangu ne miaba mishilangane: bakamumona mu budimi, mu njila, dîba divuabu badia, ku Dijiba dia Tibelia.​—Matayo 28:8-10; Luka 24:13-43; Yone 21:1-23.

Bedi ba mpata kabena basue kuitabaku nansha kakese ne: Yezu uvua mumueneke misangu yonso eyi to. Badi bamba ne: bafundi mbafuikakaje miyuki eyi, peshi badi batela amue malu adimu adi amueneka bu adi kaayi umvuangana. Dishilangana mu tu-malu tukese tua mu Evanjeliyo didi dijadika ne: bafundi kabavua bumvuangane mu musokoko to. Dimanya ditudi nadi bua Yezu didi divula padi mufundi umue ufunda malu adi alua kukumbaja malu a mukuabu.

Bantu bavua bamone Yezu kunyima kua dibika diende ku lufu bavua balotakana anyi? Muntu yonso udi wamba mêyi a nunku kabena mua kuitaba tshidiye wamba to, bualu bantu ba bungi bakamona Yezu. Munkatshi muabu muvua balobi, bantu bakaji, muena mbulamatadi kampanda, ne mupostolo Toma muena mpata, wakatuishibua ne: Yezu uvua mubike ku lufu pakadimuenaye bualu ebu ne ende abidi. (Yone 20:24-29) Misangu ya bungi bayidi ba Yezu kabavua bamanya diakamue Mukalenge wabu eu uvua mubike ku lufu to. Umue musangu, bantu bapite pa 500 bakamumona, ba bungi ba kudibu batshivua ne muoyo tshikondo tshiakangata mupostolo Paulo muanda eu bua kujadika  ne: Yezu uvua mubike ku lufu.​—1 Kolinto 15:6.

Dikala dia Yezu ne muoyo didi diambuluisha bantu

Katuena ne bua kuangata dibika dia Yezu ku lufu bu muanda udi usankisha bantu patupu anyi wa kuelelanganapu mpata to. Dikala diende ne muoyo ndiambuluishe bantu ba miaba yonso. Kubangila mu bidimu lukama bia kumpala, bantu ba bungi menemene bavua kabayi bateleja anyi bavua babenga Buena-Kristo mpindieu mbatuishibue ne: ntshitendelelu tshilelela. Tshidi tshibashintuluishe ntshinyi? Dilonga dia Dîyi dia Nzambi ndibajadikile ne: Nzambi wakabisha Yezu ku lufu muikale tshifukibua tshia mu nyuma mu diulu. (Filipoi 2:8-11) Mbitabuje Yezu ne mushindu udi Yehowa mulongolole bua kubapandisha ku diambuluisha dia mulambu wa Kristo udi upikula. (Lomo 5:8) Bantu aba mbapete disanka dia bushuwa padibu benza disua dia Nzambi ne batumikila malongesha a Yezu.

Tangila tshivua kuikala muena Kristo kumvuija mu bidimu lukama bia kumpala. Muena Kristo kavua upeta butumbi, bukokeshi anyi bubanji to. Kadi bena Kristo ba bungi ba kumpala ‘bakitaba ne disanka dipaula dia bintu biabu’ bua ditabuja diabu. (Ebelu 10:34) Buena-Kristo buvua bubalomba bua kudifila ne muoyo mujima ne kuitaba makenga avua afikisha misangu ya bungi ku lufu.

Bangabanga ne kulua bayidi ba Kristo, bamue bavua ne mushindu wa kulua babanji anyi kuenda lumu. Shaula wa ku Tâso bakamulongesha kudi Gamaliele mulongeshi wa Mikenji muende lumu ne yeye muine ukavua wenda upeta lumu mu bena Yuda. (Bienzedi 9:1, 2; 22:3; Galatia 1:14) Kadi, Shaula wakalua mupostolo Paulo. Yeye ne bantu bakuabu ba bungi bakela butumbi ne mianzu ya panu nyima. Bua tshinyi? Bua kutangalaja mukenji wa ditekemena dia bushuwa dia mu milayi ya Nzambi ne kabidi kumanyisha muanda wa se: Yezu uvua mubike ku lufu. (Kolosai 1:28) Bavua bitaba makenga bua bualu buvuabu bamanye se: mbushindamene pa bulelela.

Ke mudibi kabidi lelu bua bantu miliyo mivule. Udi mua kubapeta mu bisumbu bia Bantemu ba Yehowa pa buloba bujima. Bantemu badi bakubikila ne musangelu bua ulue kubuela mu musekelelu wa tshidimu etshi wa lufu lua Kristo, wenzeka mu Dia lumingu dia matuku 8 ngondo muinayi wa tshidimu tshia 2001 etshi ku dilolo. Nebikale ne disanka dia kukumona dituku adi, kukumona kabidi mu bisangilu biabu bionso mudibu balonga Bible.

Tshidi tshikukanda ntshinyi bua kulonga malu a bungi adi atangila lufu lua Yezu ne dibika diende, nsombelu wende ne malongesha ende? Udi utubikila bua tuye kudiye. (Matayo 11:28-30) Enza mushindu mpindieu wa kupeta dimanya dijalame dia Yehowa Nzambi ne Yezu Kristo. Wewe mupete dimanya edi, udi mua kupeta muoyo wa kashidi mu Bukalenge bua Nzambi budiye mupeshe Muanende munanga.

[Mêyi adi kuinshi]

[Bimfuanyi mu dibeji 7]

Bantu miliyo mivule badi bapeta disanka dia bushuwa bualu mbayidi ba Yezu Kristo

[Mêyi a dianyisha bua tshimfuanyi mu dibeji 6]

Biangatshila mu nkudimuinu wa Self-Pronouncing Edition of the Holy Bible, udi ne nkudimuinu wa King James ne wa Revised versions