‘Muntu mupete meji ngwa diakalenga’

UVUA muimbi wa tusala, mumanyi wa malu a diibaka ne mukalenge. Uvua ne bubanji kupita bakalenge bonso ba pa buloba, bualu uvua upeta makuta mapite pa dolare miliyo 200 ku tshidimu tshionso. Muntu au uvua kabidi muende lumu bua meji avuaye nawu. Mukalenge-mukaji mukuabu uvua mulue kumumona wakakema bikole, kufikaye too ne ku diamba ne: ‘Bakangambila anu tshitupa tshia mêyi; lungenyi luebe ne bubanji buebe bidi bipita lumu lungakumvua bunene.’ (1 Bakelenge 10:4-9) Elu ke lumu luvua nalu Solomo Mukalenge wa Isalele wa kale.

Solomo uvua ne bubanji ne meji. Bintu bivuaye nabi ebi ke biakatamba kumuambuluisha bua ikale mukumbane bua kuleja tshidi ne mushinga menemene ku bibidi ebi. Wakafunda ne: “Muntu mupete meji, muikale kabidi ne lungenyi, ngwa diakalenga. Mbimpe kupeta meji pamutu pa kupeta biuma, tshiuma tshia kudi meji ntshipite mpawungi ku mushinga. Meji adi mapite mabue a busanga ku mushinga, ku bintu biudi ujinga, kakuena tshidi mua kufuanangana nawo.”​—Nsumuinu 3:13-15, MMM.

Kadi nkuepi kutudi mua kupeta meji? Bua tshinyi mmapite bubanji ku mushinga? Adi ne malu kayi adi mua kutusankisha? Nshapita wa 8 wa mukanda wa Nsumuinu wa mu Bible mufunda kudi Solomo udi wandamuna nkonko eyi bimpe bia dikema. Mu nshapita eu mbakuishe meji bu muntu udi mumanye kuakula ne kuenza bualu kampanda. Ne meji nkayawu adi aleja buimpe ne mushinga wawu.

‘Adi ela dîyi diawu’

Nshapita wa 8 wa Nsumuinu udi utuadija ne lukonko elu: ‘Meji kaena ela dîyi diawu anyi? Dijingulula dia mianda kadiena dibandisha dîyi diadi anyi?’ * Meji ne dijingulula dia mianda bidi bitungunuka ne kuela dîyi, kadi mbishilangane bikole ne mukaji wa ndumba udi yeye walaminangana mu miaba ya mîdima, ne padiye umona nsongalume mutebelele muikale nkayende, udi umuambila mêyi a ntekesha umunungenawu ku matshi. (Nsumuinu 7:12) ‘Wowo adi mimane pa mutu pa mikuna idi pepi ne njila, ku masangu a njila mene. Pepi ne biibi bia musoko, kudi bantu babuelela mu biibi nkudiwu ela dîyi diawu.’ (Nsumuinu 8:1-3) Badi bumvua dîyi dikole dia dikima didi meji ela mu miaba itu bantu batambakana bu mudi ku biibi bia musoko, mu masangu a njila, ne ku bibuelelu bia musoko. Bantu badi mua kumvua dîyi adi bipepele ne kuenza tshididi diamba.

Nnganyi udi mua kuelesha mpata ne: bantu pabuipi ne bonso badi pa buloba badi bajinga kupeta meji a kudi Nzambi mafunda mu Bible kabena mua kuapeta? Tshimue tshibungu tshidi tshiamba ne: “Bible ke mukanda udi bantu bapite bungi babala.” (The World Book Encyclopedia) Tshidi tshiamba kabidi ne: “Bakadi babanye Bible mivule kupita mukanda mukuabu wonso. Bakadi kabidi bakudimune Bible misangu mivule ne mu miakulu mivule kupita mukanda  mukuabu wonso.” Bu mukadi Bible yonso mujima anyi bitupa biende bikale mu miakulu minene ne mikese mipite pa 2 100, bantu bapite pa 90 pa lukama badi pa buloba badi ne mushindu wa kubala nansha tshitupa tshia Dîyi dia Nzambi mu muakulu wabu.

Bantemu ba Yehowa badi bamanyisha bantu mukenji wa mu Bible miaba yonso. Badi bayisha lumu luimpe lua Bukalenge bua Nzambi ne balongesha bantu bulelela bua mu Dîyi dia Nzambi ne tshisumi mu matunga matue ku 235. Batu babanya bibejibeji biabu bia malu a mu Bible: tshia Tshibumba tshia Nsentedi (tshidi tshipatuka mu miakulu 140), ne tshia Réveillez-vous! (tshidi tshipatuka mu miakulu mitue ku 83), babiabanya miliyo mipite pa 20 ku tshibejibeji tshionso tshia kudibi paditshi tshipatuka. Bushuwa, meji adi atungunuka ne kuela lubila miaba idi bantu ba bungi.

‘Dîyi dianyi didi kudi bukua-bantu’

Meji makuisha bu muntu adi abanga kuakula amba ne: ‘Nuenu bantu, ndi nnuela dîyi dianyi; ne dîyi dianyi didi kudi bukua-bantu. Nuenu batshimbakanyi, nuyile mua kumanya budimu; nuenu bapote, nuyile mua kuikala ne mutshima wa kujingulula malu.’​—Nsumuinu 8:4, 5.

Dîyi didi meji ela didi diumvuika miaba yonso. Adi ela bantu bonso dîyi diawu. Adi abikila nansha bantu badi babule lungenyi bua balue kupeta budimu anyi ditalama, ne bantu badi batshimbakane bua bapete dimanya. Bulelela, Bantemu ba Yehowa mbajadike ne: Bible mmukanda wa bantu bonso, ne batu badienzeja kabayi basunguluja bantu bua kukolesha muntu yonso udibu bapeta bua abale Bible apete pende mêyi a meji adimu.

‘Mukana muanyi nemuambe mêyi malelela’

Meji adi aleja buimpe buawu amba ne: ‘Umvuayi, bualu bua nengambe mianda minene; ne ku mishiku yanyi nekupatuke mêyi makane. Bualu bua mukana muanyi nemuambe mêyi malelela; bubi budi tshintu tshidi tshintonda ku mishiku yanyi. Mêyi onso a mukana muanyi adi ambibua mu buakane; kakuena dîyi dia mashimi anyi dikonyangale munkatshi muawu.’ Malu adi meji atulongesha adi matambe buimpe, malulame, a bulelela ne buakane. Kakuena bualu bua dishima anyi bukonyangale munda muawu. ‘Buonso buawu adi mêyi a bushuwa kudi muntu udi ujingulula mianda, adi mêyi makane kudi badi bapeta lungenyi.’​—Nsumuinu 8:6-9.

Nenku mbiakane mudi meji atubela ne: ‘Nusungule diyisha dianyi, kanusungudi tshiamu tshia argent; nusungule lungenyi bu tshintu tshipite tshiamu tshia or wa mushinga mukole buimpe.’ Mubelu eu mmuimpe ‘[bualu] meji adi apita mabue a bilenga bulengele; bintu bionso biudi mua kujinga kabiena mua kuelekejibua nawu.’ (Nsumuinu 8:10, 11) Kadi mbua tshinyi? Ntshinyi tshidi tshivuija meji tshintu tshia mushinga wa bungi kupita bubanji?

‘Mamuma anyi adi apita or buimpe’

Bintu bimpe bidi meji apesha badi baateleja bidi ne mushinga wa bungi kupita or, argent ne mabue a bilengejilu. Bua kuleja tshidi bintu bimpe ebi, meji adi amba ne: ‘Meme, meji, ndi mvuija budimu muaba wanyi wa kushikama, ndi mpeta lungenyi ne bukole bua kupangadija malu bimpe. Kutshina Yehowa nkuikala ne malu mabi  lukuna. Kudisua, kudibandisha ne njila wa malu mabi, mukana mudi muamba mêyi a tshitshu, ndi mbikina.’​—Nsumuinu 8:12, 13.

Meji adi apesha muntu udi nawu budimu ne bukole bua kupangadija malu bimpe. Muntu udi ne meji a kudi Nzambi udi kabidi ne kanemu ne ditshina dia Nzambi, bualu “ditshina dia Yehowa ntshibangidilu tshia meji.” (Nsumuinu 9:10) Muntu au udi ukina malu adi Yehowa mukine. Kêna ne didibandisha, budiambi, ngikadilu mubi anyi buakulavi nansha kakese. Mushindu udiye ukina malu mabi udi umukuba bua kenji malu mabi ne bukokeshi budiye nabu. Nanku mbia mushinga menemene bua bana betu badi balombola mu tshisumbu tshia bena Kristo, nansha batatu ba mêku, kukebabu meji!

Meji adi atungunuka ne kuamba ne: ‘Ndi mua kuleja bantu lungenyi, ndi meji a kukuatshisha nawu bantu; ndi dijingulula dia mianda, ndi ne bukole. Bakalenge badi bakokesha bua bualu buanyi, ne bakokeshi badi balumbulula ne kulumbulula kuakane. Bua bualu buanyi bakokeshi badi bakokesha, ne badi ne butumbi badi bakokesha ne balumbuludi bonso ba pa buloba mene.’ (Nsumuinu 8:14-16) Munkatshi mua mamuma a meji mudi dijingulula dia malu, lungenyi, ne bukole: ngikadilu ya mushinga wa bungi menemene idibu ne bua kuikala nayi kudi bakokeshi, banene ba mbulamatadi ne bantu ba butumbi. Meji adi ne mushinga wa bungi bua bantu badi ne mudimu wa kulombola ne badi bapesha bakuabu mibelu.

Kudi mushindu wa muntu yonso kupeta meji a bushuwa, kadi bantu bonso kabatu baapeta to. Bamue badi baabenga anyi baepuka, nansha padiwu mimane kumpala kuabu. Meji adi amba ne: “Ndi munange badi bannanga, bonso badi bankeba ne lukunukunu nebansangane.” (Nsumuinu 8:17) Anu badi bakeba meji ne muoyo mujima ke badi baapeta.

Njila ya meji idi milulame ne miakane. Adi apetesha badi baakeba masanka. Meji adi amba ne: ‘Biuma ne butumbi bidi kundi; biuma mene bidi bishala musangu mule ne buakane bidi kundi. Mamuma anyi adi apita or buimpe, mapite or yakulengejabu mu ditanda buimpe; lupetu lundi mpeta ludi lutamba tshiamu tshia argent tshia mushinga mukole buimpe. Ndi ngenda mu njila wa buakane, mu njila ya kulumbulula kuakane, bua kupesha badi bannanga bupianyi bua biuma, bua kuwuja bibutshilu biabu tente.’​—Nsumuinu 8:18-21.

Biuma ne butumbi bidi munkatshi mua bintu bidi meji atupesha, pamue ne ngikadilu milenga bu mudi budimu, bukole bua kupangadija malu bimpe, budipuekeshi, dijingulula dia malu, meji adi ambuluisha bantu, ne lungenyi. Muntu wa meji udi mua kupeta bubanji mu njila miakane, ne kutanta mu nyuma. (3 Yone 2) Meji adi apetesha muntu butumbi. Kabidi, bintu bidiye upeta bidi bimusankisha, ne udi ne ditalala dia mu mutshima ne kuondo ka muoyo katoke kumpala kua Nzambi. Bushuwa, wa diakalenga mmuntu udi mupete meji. Mamuma a meji adi apita or milengeja mu ditanda ne tshiamu tshia argent tshia mushinga mukole buimpe.

Mubelu eu mmutufikile dîba diakanyine, bualu tudi basombe ne bantu badi batambe kueyemena dikeba dia bubanji nansha bikale bia  kumona lufu! Katupangi kuvuluka mushinga udi nawu meji ne katulondi njila mikonyangale bua kupeta bubanji nansha kakese. Katulenguludi bintu mene bidi bifila meji bu mudi bisangilu bia bena Kristo ne didilongela Bible ne mikanda ya kudi “mupika wa lulamatu ne wa budimu” anu bua kupeta bubanji to.​—Matayo 24:45-47, NW.

‘Ngakajadikibua ku tshibangidilu tshia bidimu’

Diakuisha meji bu muntu mu Nsumuinu nshapita wa 8 kadiena anu mushindu patupu wa kumvuija ngikadilu kampanda udi kayi mulelela to. Meji aa adi kabidi tshimfuanyi tshia tshifukibua tshia Yehowa tshia mushinga mutambe bukole. Meji adi amba ne: ‘Yehowa wakamfuka ku tshibangidilu tshia bufuki buende, kumpala kua bintu biende bionso, ku tshibangidilu mene. Ngakajadikibua ku tshibangidilu tshia bidimu, ku tshibangidilu mene, diambedi buloba kabuyiku. Pakadi ndondo ya mâyi kayiyi mianji kuikalaku, ngakaledibua; pakadi mishimi miûle tente ne mâyi kayiyiku, ngakadiku. Diambedi mikuna mile kayiyi mianji kujadikibua, kumpala kua mikuna mipuekele, ngakaledibua. Pakadiye kayi muanji kufuka buloba ne madimi abu, anyi lupuishi lua kumudilu lua pa buloba, ngakadiku.’​—Nsumuinu 8:22-26.

Mushindu udibu bumvuije meji adibu bakuisha bu muntu mu mvese eyi udi upetangana bimpe ne tshitu Bible wamba bua ‘Dîyi.’ Mupostolo Yone wakafunda ne: ‘Ku tshibangidilu Dîyi diakadiku, Dîyi diakadi ne Nzambi, ne Dîyi diakadi nzambi.’ (Yone 1:1) Meji makuisha bu muntu adi tshimfuanyi tshia Yezu Kristo Muana wa Nzambi kumpala kua kuluaye pa buloba. *

Yezu Kristo udi ‘muan’a bute wa bifukibua bionso; bualu bua munda muende muakafukibua bintu bionso bia mu diulu ne bia pa buloba, ne bintu bidi bimuenebua ne bintu bidi kabiyi bimuenebua.’ (Kolosai 1:15, 16) Meji aa adi atungunuka ne kuamba ne: ‘[Yehowa] pakashimikaye bia mu diulu, ngakadiku. Pakatekaye tshijengu tshibaluluke pamutu pa ndondo wa mâyi manene, pakashindikaye matutu a mu diulu, pakavula mishimi ya mu ndondo wa mâyi manene mu miaba yayi, pakapandilaye mâyi manene mukalu wawu, bua mâyi adimu kaasambuki mukenji wende, pakasungulaye miaba ya bishimikidi bia buloba, pa dîba adi ngakadi pepi nende bu muena mudimu wende. Ngakadi ne disanka ku dituku ku dituku, ngakadi nnaya kumpala kuende matuku onso. Ngakadi nsanka mu buloba buende budi ne bantu bashikamamu, ne disanka dianyi divule diakadi bua kusomba ne bukua-bantu.’ (Nsumuinu 8:27-31) Muan’a bute wa Yehowa uvua ku luseke lua Tatuende Mufuki wa diulu ne buloba udi kayi kufuanyikija, wenza nende mudimu ne tshisumi. Pavua Yehowa Nzambi mufuke muntu wa kumpala, Muanende wakenza nende mudimu eu bu Muena mudimu. (Genese 1:26) Ki mpatupu padi Muana wa Nzambi mupite kunanga bukua-bantu nansha!

‘Muntu udi ungumvuila udi ne disanka’

Mudiye meji makuisha bu muntu, Muana wa Nzambi udi wamba ne: ‘Nunku, bana banyi ba balume, nungumvuile: bua badi balamata mu njila yanyi badi ne disanka. Umvuayi diyisha, nuikale ne meji, kanudipetudi nansha. Muntu udi ungumvuila, udi wimana ku biibi bianyi ku dituku ku dituku, udi windila ku biluwa bia ku biibi bianyi, udi ne disanka. Bualu bua [wampeta] udi [upeta] muoyo, udi upeta diakalengele kudi Yehowa. Kadi wapanga [kumpeta] udi wenzela muoyo wende bibi; buonso badi bankina badi bananga lufu.’​—Nsumuinu 8:32-36.

Yezu Kristo ke tshiuwidi tshia meji a Nzambi. “Kudiye ke kudi mpetu yonso ya meji ne ya dimanya misokome.” (Kolosai 2:3, MMM) Nenku tumutelejayi ne lubatshi ne tulondayi mu makasa ende bimpe menemene. (1 Petelo 2:21) Kubenga Yezu nkudienzela bibi ne nkunanga lufu, bualu ‘mu munga muntu yonso kamuena lupandu.’ (Bienzedi 4:12) Bushuwa, tuitabujayi Yezu, bualu yeye ke muntu umue udi Nzambi mufile bua kutupandisha. (Matayo 20:28; Yone 3:16) Nanku netupete disanka didi difumina ku ‘dipeta dia muoyo ne dia diakalengele kudi Yehowa.’

[Mêyi adi kuinshi]

[Bimfuanyi mu dibeji 26]

Meji adi ne mushinga wa bungi bua bawetu badi ne mudimu wa kulombola bakuabu

[Bimfuanyi mu dibeji 27]

Kulenguludi bintu bidi bifila meji