Tutshimunayi butekete bua mubidi wetu

‘Meji mateka ku malu a mubidi adi lufu.’​—LOMO 8:6.

1. Mmunyi mutu bamue bantu bamona mubidi wa muntu, ne nnkonko kayi itudi ne bua kuandamuna?

 ‘NDI nkusakidila, bualu bua difukibua dianyi didi dilengeja meji a mua kukunemeka bikole, didi dinkemesha.’ (Musambu 139:14) Ke muakimba Davidi pavuaye ubandila mubidi wa muntu udi muikale tshimue tshia ku bifukibua bia Yehowa. Bamue balongeshi ba mu bitendelelu, pamutu pa kutumbisha Nzambi bilenga nunku, batu buobu bangata mubidi bu muaba udi mpekatu musokomene ne bu tshia-mudimu tshia mpekatu. Batu baubikila ne: “tshisokomenu tshia dipanga, muaba udi bubi buladile, buloko ta lupangu lua malu mabi, lufu luenda ne muoyo, tshitalu tshia muoyo.” Bulelela, mupostolo Paulo wakamba ne: “Mu mubidi wanyi mene, kamuena muikale bualu buimpe.” (Lomo 7:18) Kadi mêyi aa adiku asua kumvuija ne: mubidi wetu mmutekela anu dienza mpekatu anyi?

2. (a) ‘Kuteka meji ku malu a mubidi’ kudi kumvuija tshinyi? (b) Mvita kayi idi pankatshi pa “mubidi” ne “nyuma” idi yenzeka munda mua bantu badi basue kusankisha Nzambi?

² Imue misangu Mukanda wa Nzambi utu utela “mubidi” bua kuleja muntu mupange bupuangane ne muena mpekatu mulela kudi ntomboji Adama. (Efeso 2:3; Musambu 51:5; Lomo 5:12) Bumpianyi budiye mutushile mbutukebele ‘butekete bua mubidi.’ (Lomo 6:19) Kadi Paulo wakadimuija bena Kristo ne: ‘Meji mateka ku malu a mubidi adi lufu.’ (Lomo 8:6) ‘Kuteka meji ku malu a mubidi’ nunku kudi kumvuija kuikala balombola ne basaka kudi majinga a mubidi wa mpekatu. (1 Yone 2:16) Nenku patudi tukeba bua kusankisha Nzambi, mvita ya munanunanu idi ijuka pankatshi pa bumuntu buetu bua mu nyuma ne dipanga bupuangane ditudi nadi didi misangu yonso ditusaka bua kuenza ‘malu a mubidi.’ (Galatia 5:17-23; 1 Petelo 2:11) Kunyima kua Paulo mumane kumvuija mvita mikole ivuaye uluangana munda muende, wakatua tshikemu ne: ‘Ke meme [eu] muena majiya! Wansulula ku mubidi wa lufu elu nnganyi?’ (Lomo 7:24) Ebi bidi bisua kuleja ne: Paulo  kavua ne bukole bua kukandamena mateta anyi? Bible udi uleja ne: kabiena nanku to.

Mateta ne mpekatu

3. Mmunyi mudi bantu ba bungi bangata mpekatu ne mateta, kadi mmunyi mudi Bible utudimuija bua lungenyi elu?

³ Bantu ba bungi lelu kabatu bitaba ne: mpekatu utuku to. Bamue batu baseka bamba ne: “mpekatu” mmuaku wa kale udi umvuija tulemalema tua bantu. Kadi ki mbamanye ne: “tudi ne bua kumueneka bonso patoke ku tshilumbuluilu tshia Kristo, bua muntu yonso apete difutu dia pa bualu buimpe nansha bubi buvuaye muenze [ne] mubidi wende.” (2 Kolinto 5:10, MMM) Mukuabu udi mua kuamba usendeka ne: “Ndi mua kukandamena bintu bionso pa kumbusha mateta!” Banga batu basombele miaba itu bantu basue kupeta masanka anu lelulelu, pamu’apa mbua kudia biakudia, kuenda kua masandi, kunaya anyi kuenza malu makuabu. Tshionso tshidibu bakeba batu bajinga bua kutshipeta anu mpindieu mpindieu! (Luka 15:12) Ki mbamanye ne: pa kumbusha masanka adiku lelu, kudi dikuabu kumpala eku dia ‘muoyo wa bushuwa’ to. (1 Timote 6:19) Kadi Bible udi utulongesha bua kuela meji bimpe ne bua kumona kule, bikale tuepuka tshintu tshionso tshidi mua kutuenzela bibi mu nyuma anyi mu malu makuabu. Lumue lusumuinu lua mu Mukanda wa Nzambi ludi luamba ne: ‘Muntu mudimuke udi utangila dikenga diamba kumukuata, udi usokoma; kadi batshimbakanyi badi bapitaku, badi bakengeshibua.’​—Nsumuinu 27:12.

4. Mmubelu kayi wakafila Paulo mu 1 Kolinto 10:12, 13?

⁴ Pavua Paulo mufundile bena Kristo bavua basombele mu Kolinto (tshimenga tshivua tshimanyike bua buenzavi buvuamu), wakababela bua kudimukilabu mateta ne bukole budi nabu mpekatu. Wakamba ne: ‘Muntu udi wela meji ne: ndi muimane, adimuke bua kaponyi biende. Kakuena diteta diakunukuata didi kadiyi dikuata muntu yonso; kadi Nzambi udi mua kueyemenyibua, ngudi kayi witabuja bua nuenu nutetshibue ne diteta didi dinupita bukole; kadi palua diteta, yeye neanuenzele njila wa kupandukila, bua nuenu numanye mua kutantamana mu diteta.’ (1 Kolinto 10:12, 13) Tuetu bonso, bana ne bakole, balume ne bakaji, tutu tupeta mateta a bungi mu kalasa, ku mudimu ne miaba mikuabu. Bua nanku tukonkononayi mêyi a Paulo aa ne tumonayi mudiwu mua kutuambuluisha.

Kutambi kudieyemena to

5. Bua tshinyi kutamba kudieyemena kudi mua kutukebela njiwu?

⁵ Paulo udi wamba ne: ‘Muntu udi wela meji ne: ndi muimane, adimuke bua kaponyi biende.’ (1 Kolinto 10:12) Kutamba kudieyemena tuamba mutudi ne bukole bua kudilama bimpe kudi mua kutukebela njiwu. Kudi kuleja ne: katuena bamanye bimpe tshidi mpekatu ne bukole budiye nabu to. Bikala bantu bu mudi Mose, Davidi, Solomo ne mupostolo Petelo bapone mu mpekatu, tudiku mua kuela meji ne: tuetu katuena mua kuenza mpekatu anyi? (Nomba 20:2-13; 2 Samuele 11:1-27; 1 Bakelenge 11:1-6; Matayo 26:69-75) Nsumuinu 14:16 udi wamba ne: ‘Muena meji udi udimuka, udi wepuka ku bubi, kadi mupote udi ne dikamakama, udi udieyemena.’ Kabidi, Yezu wakamba ne: “Muoyo mmusue kuenza, kadi mubidi tshiawu mbutekete.” (Matayo 26:41, MMM) Bu mudiku kakuyi muntu mupange bupuangane utu kayi umvua majinga mabi amuvuila, tudi ne bua kuteleja didimuija dia Paulo edi ne lubatshi bua tuetu kukandamena mateta, tshianana tudi mua kukuluka.​—Yelemiya 17:9.

6. Ndîba kayi ne mmushindu kayi utudi ne bua kudilongolola ku mateta?

⁶ Mbia meji bua kudianjila kudilongolola bua ntatu idi mua kujuka mu tshimpitshimpi. Mukalenge Asa wakamona ne: tshikondo tshia ditalala ke tshivua dîba diakane dia yeye kuasa ngumbu mu misoko yende. (2 Kulondolola 14:2, 6, 7) Uvua mumanye ne: kubanga kudilongolola mvita mimane kutuadija kuvua mua kulua bu kuladila mayi mabole. Bia muomumue, mapangadika a tshitudi ne bua kuenza padi mateta atukuata atu mimpe kuangata padi lungenyi lutukije, padiku ditalala, kakuyi ndululu. (Musambu 63:6) Danyele ne balunda bende basatu bavua batshina Nzambi bakapangadija bua kushala balamate mukenji wa Yehowa kumpala kua kubenzejabu bua kudia biakudia bia mukalenge. Ke bualu kayi kabakelakana bua kushala balamate malu akavuabu bitabuje, bakabenga bua kudia biakudia bibi abi. (Danyele 1:8) Kumpala kua mateta  kuluawu, tuikalayi badianjile kukolesha dipangadika dietu dia kushala badilame bimpe. Nanku netupete bukole bua kubenga kuenza mpekatu.

7. Bua tshinyi kumanya ne: bakuabu bakadi bafike ku dikandamena mateta kudi kukolesha?

⁷ Mêyi a Paulo a se: ‘Kakuena diteta diakunukuata didi kadiyi dikuata muntu yonso’ adi atukolesha be! (1 Kolinto 10:13) Mupostolo Petelo wakafunda ne: ‘Nutantamene [Diabolo] bajalame mu ditabuja dienu; bualu bua nudi bamanye ne: makenga [a] muomumue adi makumbajibue mu bana benu ba mu Kristo badi pa buloba ebu.’ (1 Petelo 5:9) Kakuyi mpata, bu mudi bakuabu bapete mateta a muomumue ne bafike ku diakandamena ne diambuluisha dia Nzambi, tuetu petu tudi mua kuakandamena. Kadi bu mutudi bena Kristo balelela ne basombe pa buloba bua malu mabi, tuikalayi bamanye ne: ku tototo nansha ku ndandanda netupete mateta. Mmunyi mutudi mua kujadika ne: netutshimune butekete bua mubidi wetu ne mateta adi atusaka ku mpekatu?

Tudi mua kukandamena mateta!

8. Mmushindu kayi munene utudi mua kuepuka mateta?

⁸ Mushindu munene wa kubenga ‘kuikala mu bupika bua bubi’ nkuepuka mateta padiku mushindu. (Lomo 6:6) Nsumuinu 4:14, 15 (MMM) udi utubela ne: “Kulondi njila wa bantu babi, kuendi ne benji ba bibi. Epuka njila wabo, kupitshidimu, umusesuke, uye luseke lukuabo.” Misangu mivule tutu badianjile kumanya ne: amue malu adi mua kutufikisha ku mpekatu. Nenku bu mutudi bena Kristo, tshintu tshitudi mua kuenza ntshia ‘kuya luseke lukuabu,’ kuikala mutantshi mule ne muntu yonso anyi tshintu tshionso peshi muaba wonso udi mua kutujula majinga ne nkuka mibi munda muetu.

9. Mmunyi mudi Bible uleja ne: bidi bikengela kunyema mateta?

⁹ Kunyema diteta mbualu bukuabu bua mushinga butudi ne bua kuenza bua kutshimuna mateta. Paulo wakatubela ne: ‘Nyemayi masandi.’ (1 Kolinto 6:18) Wakafunda kabidi ne: ‘Nyemayi kutendelela kua mpingu.’ (1 Kolinto 10:14) Mupostolo eu wakadimuija kabidi Timote bua kunyemaye dijinga dinekeshe dia kupeta bubanji ne “nkuka ya bansongalume.”​—2 Timote 2:22; 1 Timote 6:9-11.

10. Mbilejilu kayi bibidi bidi bileja mushinga wa kunyema mateta?

¹⁰ Angata tshilejilu tshia Davidi Mukalenge wa Isalele. Pavuaye pa mutu pa nzubu wende, wakakenzakana e kumona mukaji mulengele wowa mâyi, ke majinga mabi kuula mu mutshima wende. Uvua ne bua kuikala mutuluke panshi ne munyeme diteta adi. Kadi yeye wakebeja bualu bua mukaji eu (Beta-sheba) ne malu akalua kuenzeka avua mabi matambe. (2 Samuele 11:1–12:23) Kadi ntshinyi tshiakenza Yosefe pavua mukaji wa mfumuende umuambila bua kushala nende? Bible udi utuambila ne: ‘Yeye wakadi wambila Yosefe bualu ebu ku dituku ku dituku, kadi yeye kakamumvuila bua kulalaye nende, anyi bua kushala nende.’ Nansha muvua Yosefe kayi ne Mikenji ya Mose (ivuabu kabayi banji kufila dîba adi), wakamuandamuna ne: “Ndi mua kuenza bualu ebu bubi bunene ne mua kuenzela Nzambi bibi munyi?” Dimue dituku mukaji eu wakamukuata, umuambila ne: “Ulale n’anyi!” Yosefe wakashalaku  muaba au bua kukeba bua kuelangana nende meji anyi? Tòo, ‘wakanyema, wakapatuka.’ Yosefe kakashila diteta dia kuenda kua masandi muaba nansha mukese. Wakanyema!​—Genese 39:7-16.

11. Ntshinyi tshitudi mua kuenza bituikala ne diteta didi dituvuila njila ne njila?

¹¹ Imue misangu bantu batu bamona kunyema bu dikala ne buôwa, pabi kumbuka muaba udi bualu buenzekela kutu misangu mivule njila wa meji. Pamu’apa kudi diteta ditu dituvuila njila ne njila ku mudimu. Nansha mutudi katuyi mua kuikala ne mushindu wa kushintulula mudimu, kudi mua kuikala mishindu mikuabu ya tuetu kumbuka mu malu adi atetangana. Tudi ne bua kunyema tshintu tshionso tshitudi bamanye ne: ntshibi, ne tudi ne bua kuikala ne dipangadika dia kuenza anu tshidi tshiakane. (Amosa 5:15) Misangu mikuabu, kunyema mateta kudi mua kutulomba bua kuepuka site anyi miaba idibu baleja bindidimbi bia bantu butaka ku Internet ne ya manaya adi amueneka kaayi makane. Kudi mua kumvuija kabidi kuosha tshikandakanda kampanda peshi kukeba balunda bapiabapia badi banange Nzambi ne badi mua kutuambuluisha. (Nsumuinu 13:20) Nansha kuoku diteta kayi didi ditusaka ku mpekatu, netuleje mutudi ne meji bituikala badisuike bua kudiela nyima.​—Lomo 12:9.

Mushindu udi disambila mua kutuambuluisha

12. Ntshinyi tshitudi tulomba Nzambi patudi tusambila ne: ‘Kutufikishi padi mateyi’?

¹² Paulo udi utukankamija ne: ‘Nzambi udi mua kueyemenyibua, ngudi kayi witabuja bua nuenu nutetshibue ne diteta didi dinupita bukole; kadi palua diteta, yeye neanuenzele njila wa kupandukila, bua nuenu numanye mua kutantamana mu diteta.’ (1 Kolinto 10:13) Bua kutuambuluisha, Yehowa udi wandamuna masambila atudi tuenza bua kumulomba diambuluisha bua tumone mua kutantamena mateta. Yezu Kristo wakatulongesha bua kusambila ne: ‘Kutufikishi padi mateyi, kadi utusungile kudi [mubi].’ (Matayo 6:13) Tuetu tusambila ne muoyo mujima nenku, Yehowa neatuteleje ne kakutuela nyima patudi mu diteta; neatusungile kudi Satana ne mateyi ende. (Efeso 6:11) Tulombe Nzambi atuambuluishe bua kujingulula ne: edi nditeta ne kabidi bua tuikale ne bukole bua kudikandamena. Bituamusengelela bua katulekedi tupona patudi mu diteta, neatuambuluishe bua “mubi” Satana katupitshi makanda to.

13. Ntshinyi tshitudi ne bua kuenza patudi mu diteta didi kadiyi ditushila muaba?

¹³ Tudi ne bua kusambila ne tshisumi nangananga patudi mu diteta didi kadiyi ditushila muaba. Amue mateta adi mua kujula mvita mikole munda muetu, tubanga kuluangana ne meji ne ngenyi idi anu ituvuluija ne: tudi bushuwa bena butekete. (Musambu 51:5) Tshilejilu, ntshinyi tshitudi mua kuenza bikala malu atudi bavuluke a tshilele kampanda tshibi tshituvua natshi kale atulubakaja? Tshia kuenza ntshinyi bikala meji asua kutusaka bua kupinganaku kabidi? Pamutu pa kukeba patupu bua kujimija meji aa, tudi mua kuambila Yehowa bualu ebu mu disambila njila ne njila. (Musambu 55:22) Udi mua kutuambuluisha ne bukole bua Dîyi diende ne nyuma wende muimpe bua tuetu kumbusha majinga mabi mu meji etu.​—Musambu 19:8, 9.

14. Bua tshinyi disambila didi diambuluisha bua kutantamena mateta?

¹⁴ Pakamona Yezu mushindu uvua bapostolo bende babungila mu budimi bua Getesemane, wakababela ne: “Ikalayi batabale, sambilayi, bua kanuponyi mu ditetshibua. Muoyo mmusue kuenza, kadi mubidi tshiawu mbutekete.” (Matayo 26:41, MMM) Mukuabu mushindu wa tuetu kutshimuna mateta nkumanya njila kabukabu ituwu mua kuvuila ne mushindu utubi bikole bua kuajingulula. Katujingakanyi bua kusambila bua tuikale badipaye mu nyuma ne bua tumanye mua kuluisha mateta. Bu mutu mateta atukuatshila muaba utudi ne butekete bua bungi, tuetu nkayetu katuena ne bukole bua kuakandamena to. Disambila didi ne mushinga wa bungi bualu bukole budi Nzambi ufila budi mua kutuambuluisha bua kutuila Satana nkanana. (Filipoi 4:6, 7) Tudi mua kuikala kabidi dijinga ne diambuluisha dia mu nyuma ne masambila a “bakulu ba [tshisumbu].”​—Yakobo 5:13-18.

Kandamena mateta ne muoyo mujima

15. Mmalu kayi atudi ne bua kuenza patudi tukandamena mateta?

¹⁵ Pa kumbusha diepuka mateta padiku  mushindu, tudi mua kuakandamena ne muoyo mujima too ne padiwu apita anyi padi nsombelu ushintuluka. Pavua Satana mutete Yezu, Yezu wakamutuila nkanana too ne pakaya Diabolo. (Matayo 4:1-11) Muyidi Yakobo wakafunda ne: “Nukandamene Diabolo ne yeye neanunyeme.” (Yakobo 4:7) Dikandamena bualu bubi didi dibanga patudi tukolesha lungenyi luetu ne Dîyi dia Nzambi ne tuangata dipangadika dikole dia kulamata mikenji yende. Tudi ne bua kukuata mvese minene idi yakula bua butekete busunguluke butudi nabu ne kuelanganapu meji. Nebikale bia meji bua kumonangana ne muena Kristo mupie mu nyuma (pamu’apa mukulu) ututu tukuatshila yetu idi mitutonde ne utudi mua kulomba diambuluisha patudi tumvua dijinga dia kuenza bualu bubi dituvuila.​—Nsumuinu 22:17.

16. Ntshinyi tshitudi mua kuenza bua kushala balame ngikadilu muimpe?

¹⁶ Mukanda wa Nzambi udi utubela bua kuvuala bumuntu bupiabupia. (Efeso 4:24) Bidi biumvuija ne: tudi tulekela Yehowa utufumba ne utulengeja. Pavua Paulo ufundila muenzejanganyi nende wa mudimu Timote, wakamuambila ne: ‘Londa malu makane ne a buimpe bua Nzambi ne ditabuja ne dinanga ne ditantamana ne kalolo. Uluangane mvita mimpe ya ditabuja, ulamate ku muoyo wa tshiendelele, kuwakabikidibua.’ (1 Timote 6:11, 12) Tudi mua ‘kulonda malu makane’ patudi tulonga Dîyi dia Nzambi ne tshisumi ne tshipatshila tshia kumanya bumuntu bua Nzambi bimpe menemene ne pashishe kutumikila bidiye utulomba. Bidi kabidi ne mushinga bua kuikala ne malu a bungi a bena Kristo a kuenza bu mudi kuyisha lumu luimpe ne kubuela mu bisangilu. Kusemena pabuipi ne Nzambi ne kuenza malu onso a mu nyuma adiye mulongolole nekutuambuluishe bua kukola mu nyuma ne kuikala anu ne ngikadilu muimpe.​—Yakobo 4:8.

17. Ntshinyi tshidi tshituleja ne: Nzambi kakutulekela patudi mu mateta?

¹⁷ Paulo udi utujadikila ne: diteta dionso diatukuata kadiakupita bukole budi Nzambi mutupeshe bua kuditantamena nansha. Yehowa ‘neatuenzele njila wa kupandukila, bua tuetu tumanye mua kutantamana mu diteta.’ (1 Kolinto 10:13) Bushuwa, bituikala batungunuke ne kueyemena Nzambi, kakuitaba bua diteta ditupite bukole, tufike too ne ku dipangila makanda makumbane a mu nyuma bua kushala ne lulamatu nansha. Mmusue bua tuenze muetu muonso bua kukandamena mateta adi atusaka bua kuenza malu mabi ku mêsu kuende. Tudi kabidi mua kuitabuja mulayi wende wa se: ‘Tshiena nkulekela, nansha kakese, tshiena nkushiya tshianana.’​—Ebelu 13:5.

18. Bua tshinyi tudi ne bua kuikala bajadike ne: tudi mua kutshimuna butekete bua mubidi wetu?

¹⁸ Paulo kavua mupange kumanya muvua mvita ivuaye uluangana ne butekete bua mubidi wende ne bua kujika. Kavua udiangata bu muntu uvua ukuatshisha luse, kayi ne bukole bua kukandamena nkuka ya mubidi wende nansha. Kadi wakamba ne: ‘Meme ndi ndumbila nunku, tshiyi nsesuka mu njila; ndi nduangana ne mbata tshiyi bu muntu udi widikija. Kadi ndi ndikuma too ne pangavuija mubidi wanyi mabuba, ndi ngumbueja mu bupika; bua bumue, pangamana kuambila bakuabu bualu bua Nzambi, meme tshikadi mubengibue.’ (1 Kolinto 9:26, 27) Tuetu petu tudi mua kutshimuna mvita itudi tuluangana ne mubidi wetu mupange bupuangane. Ku diambuluisha dia Bible ne mikanda ya kumulonga nayi, bisangilu bia tshisumbu ne bena Kristo netu bapie mu nyuma, Tatu wetu wa mu diulu udi anu utuvuluija malu adi atuambuluisha bua kulonda njila muakane. Tudi mua kutshimuna butekete bua mubidi wetu ne diambuluisha diende!

Udi muvuluke anyi?

• ‘Kuteka meji ku malu a mubidi’ kudi kumvuija tshinyi?

• Mmunyi mutudi mua kudilongolola bua kutantamena mateta?

• Ntshinyi tshitudi mua kuenza bua kutantamena mateta?

• Mmudimu kayi udi nau disambila patudi mu mateta?

• Ntshinyi tshidi tshitujadikila ne: tudi mua kutshimuna butekete bua mubidi wetu?

[Nkonko ya dilonga]

[Bimfuanyi mu dibeji 10]

Bible kêna ulongesha ne: katuena mua kukandamena majinga a mubidi to

[Tshimfuanyi mu dibeji 12]

Kunyema diteta mmushindu umue munene wa kuepuka mpekatu