“Dîyi dia Yehowa diakatungunuka ne kutangalaka”

‘Udi utuma mukenji wende pa buloba; dîyi diende didi diya lubilu.’​—MUSAMBU 147:15.

1, 2. Mmudimu kayi uvua Yezu mupeshe bayidi bende, ne uvua ubalomba tshinganyi?

 UMUE wa ku milayi minene ya mu Bible ya dikema udi mu Bienzedi 1:8. Katupa kîpi kumpala kua Yezu kubandaye mu diulu wakambila bayidi bende ba lulamatu ne: ‘Nenuangate bukole, panupuekela nyuma muimpe pambidi penu; nenuikale bamanyi banyi ne ku mfudilu kua buloba.’ Mmudimu bunenapu kayi!

² Kumanyisha dîyi dia Nzambi pa buloba bujima kuvua mua kuikala kumueneke bu mudimu mukole bua bayidi abu bakese bavuabu baupeshe. Tangila tshivuawu ubalomba: bavua ne bua kuambuluisha bantu bua kumvua lumu luimpe lua Bukalenge bua Nzambi. (Matayo 24:14) Kuyisha malu a Yezu kuvua kubalomba kabidi bua bamanyishe banga bantu malongesha ende avua ne bukole ne babumvuije mudimu udiye nawu mu malu adi Yehowa mulongolole bua kuenza. Mudimu eu uvua ubalomba kabidi bua kuvuija bantu bayidi ne pashishe kubatambuisha. Ne bavua ne bua kuenza bionso ebi pa buloba bujima!​—Matayo 28:19, 20.

3. Mbualu kayi buvua Yezu mujadikile bayidi bende, ne mmunyi muakenzabu mudimu uvuaye mubapeshe?

³ Nansha nanku, Yezu wakajadikila bayidi bende ne: nyuma muimpe uvua ne bua kubambuluisha bua kukumbaja mudimu uvuaye mubapeshe. Nansha muvua mudimu eu muikale wa bungi ne nansha muvuaku baluishi bavua benza muabu muonso anu bua kubajimija, bayidi ba kumpala ba Yezu aba bakakumbaja bimpe tshivuaye mubambile. Ebu mbualu bulelela buakenzeka budi muntu kayi mua kuelesha mpata to.

4. Mmunyi muvua dinanga dia Nzambi dimuenekele mu mudimu wa diyisha ne wa dilongesha bantu?

⁴ Mudimu wa kuyisha ne kulongesha pa buloba bujima uvua uleja ne: Nzambi uvua munange bantu bavua kabayi bamumanye to. Mudimu eu wakapesha bantu abu njila wa kusemena pabuipi ne Yehowa ne wa yeye kubabuikidila mpekatu yabu. (Bienzedi 26:18) Mudimu wa kuyisha ne kulongesha eu wakaleja kabidi dinanga didi nadi Nzambi kudi bantu badi bayisha mukenji eu, bualu mmudimu udi ubapetesha mushindu wa buobu kuleja ne: mbalamate Yehowa ne mbanange bantu nabu. (Matayo 22:37-39) Mupostolo Paulo uvua wangata mudimu wa bena Kristo ne mushinga wa bungi, ke bualu kayi wakaubikila ne: “tshiuma.”​—2 Kolinto 4:7, MMM.

5. (a) Mmuaba kayi utudi tupeta muyuki mulelela wa bena Kristo ba ku kumpala, ne ndivulangana kayi didibu bakulamu? (b) Bua tshinyi mukanda wa Bienzedi udi ne mushinga kudi basadidi ba Nzambi lelu?

⁵ Muyuki mulelela wa mudimu wa diyisha wa bena Kristo ba kumpala udi mu mukanda wa Bienzedi uvua nyuma wa Nzambi musake muyidi Luka bua kufunda. Mmuyuki udi wakula bua divulangana anyi ditanta dia lukasa lukasa didi dikemesha. Divulangana dia dimanya dia Dîyi dia Nzambi edi didi dituvuluija Musambu 147:15 udi wamba ne: ‘[Yehowa] udi utuma mukenji wende pa buloba; dîyi diende didi diya lubilu.’ Muyuki wa bena Kristo ba kumpala bavua nyuma muimpe mupeshe bukole udi utusankisha ne udi kabidi ne mushinga wa bungi kutudi lelu. Bantemu ba Yehowa badi benza mudimu wa muomumue wa kuyisha ne kuvuija bantu bayidi, tshidibi, buobu badi bawenza mpindieu mu matunga a bungi. Tudi kabidi tupeta ntatu ya mushindu umue ne yakapeta bena Kristo mu bidimu lukama bia kumpala. Patudi tukonkonona mushindu uvua Yehowa mubeneshe bena Kristo ba kumpala ne mubapeshe bukole, dishindika dietu dia se: neatukuatshishe didi dikola.

 Divulangana dia bungi bua bayidi

6. Ntshiambilu kayi tshidi tshitangila divulangana tshidi misangu isatu mu mukanda wa Bienzedi, ne tshidi tshiumvuija tshinyi?

⁶ Mushindu umue wa kumanya mudi mêyi a mu Bienzedi 1:8 akumbana ngua kukonkonona mêyi aa a se: ‘dîyi dia [Yehowa diakatungunuka ne] kutangalaka.’ Mêyi aa adi mu Bible miaba isatu patupu mu mukanda wa Bienzedi, ne mmashilangane anu ku tuntu tukese. (Bienzedi 6:7; 12:24; 19:20, Muanda Mulenga Lelu) Tshiambilu “Diyi dia [Yehowa]” anyi “diyi dia [Nzambi]” tshidi mu mvese eyi tshidi tshiumvuija lumu luimpe anyi mukenji mulenga wa bulelela bua Nzambi, mukenji wa muoyo udi ne bukole, uvua mushintulule bikadilu bia bantu bakawitaba.​—Ebelu 4:12.

7. Ditangalaka dia dîyi dia Nzambi didibu bambe mu Bienzedi 6:7 didi ditangila tshinganyi, ne ntshinyi tshiakenzeka dituku dia Pentekoste wa mu 33 B.B.?

⁷ Muaba wa kumpala udi Bible wakula bua ditangalaka dia dîyi dia Nzambi mmu Bienzedi 6:7 (MML). Tudi tubalamu ne: ‘Dîyi dia [Yehowa diakatungunuka ne] kutangalaka bikole. Bungi bua balongi buakadi buenda buvula bikole mu Yelushalema ne bakuidi bapite bungi bakadi bitabuja muanda mulenga.’ Muaba eu badi bakula bua divulangana dia bungi bua bayidi. Kumpala, mu dituku dia Pentekoste wa mu 33 B.B., Nzambi wakitshikijila bayidi batue ku 120 bavua basangile mu nzubu wa kuulu nyuma muimpe wende. Pashishe mupostolo Petelo wakenza muyuki wa tshikuma, ne ku bantu bakauteleja, bantu batue ku 3 000 bakalua bena kuitabuja dituku dine adi. Kayumbayumba kavua ne bua kuikala kakuatakane pavua bantu aba binunu bivule baya batangile ku dijiba anyi majiba a mâyi avua munda anyi pambelu pa tshimenga tshia Yelushalema bua kutambulabu mu dîna dia Yezu uvuabu bapopele ku mutshi bu muena tshibawu matuku matue ku 50 mamane kupita.​—Bienzedi 2:41.

8. Mmunyi muakavula bungi bua bayidi mu bidimu biakalonda kunyima kua Pentekoste wa mu 33 B.B.?

⁸ Atshi tshivua anu ntuadijilu. Balombodi ba bitendelelu bakatungunuka ne kuenza muabu muonso bua kulekesha mudimu  wa diyisha, e kupangila. Bundu buakakuata balombodi ba bitendelelu aba bualu “[Yehowa] wakadi usangisha kudibo bakuabo [bayidi] bakadi basungidibua.” (Bienzedi 2:47) Mutantshi mukese “bungi bua balume buakakumbana bu binunu bitanu.” Panyima apu, ‘bena kuitabuja bakasangishibua kudi Mukalenge, bisumbu bia balume ne bia bakaji, batambe ba diambedi bungi.’ (Bienzedi 4:4; 5:14) Tudi tubala bua matuku akalua kulonda ne: ‘Nunku bena [mu tshisumbu] ba mu Yudaya yonso ne ba mu Galela ne ba mu Samalea bakadi ne ditalala, bakadi badiunda mu bualu bua Nzambi; bakadi benda mu ditshina dia [Yehowa] ne mu disamba dia nyuma muimpe; bakadi bavulangana ba bungi.’ (Bienzedi 9:31) Kunyima kua bidimu ndambu, pamu’apa bu mu 58 B.B., bakakula bua “bena Yuda binunu ne binunu [bavua] bitabe.” (Bienzedi 21:20, MMM) Tshikondo atshi, kuvua kabidi bantu ba bisamba bia bende bavule bakalua bena kuitabuja.

9. Ntshinyi tshiudi mua kuamba bua bena Kristo ba kumpala?

⁹ Divulangana dia bungi bua bayidi edi divua dienzeke bualu kuvua bantu ba bungi bavua bakudimune mitshima. Ntendelelu eu uvua mupiamupia, kadi benamu bavua ne tshisumi tshia bungi. Pamutu pa kuikalabu bena ekeleziya bavua bashinge anu ibidi panshi, bayidi aba bavua badifile bikole kudi Yehowa ne ku Dîyi diende, bu muvuabu pamu’apa babalongeshe bulelela kudi bantu bavuabu bakengeshe ne tshikisu tshikole. (Bienzedi 16:23, 26-33) Bantu bakitabuja Buena-Kristo bavua badianjile kuelangana meji bikole bua ditabuja edi ne pashishe kuangatabu dipangadika dia muoyo mujima bua kubuelamu. (Lomo 12:1) Bavua babalongeshe njila ya Nzambi; bulelela buvua mu ngenyi ne mu mitshima yabu. (Ebelu 8:10, 11) Bavua badilongolole bua kufuila malu avuabu bitabuje.​—Bienzedi 7:51-60.

10. Mbujitu kayi buakitaba bena Kristo ba kumpala, ne mmunyi mutudi bafuanangane nabu lelu?

¹⁰ Bantu bakitaba malongesha a bena Kristo bakajingulula ne: bavua ne bujitu bua kumanyisha bakuabu bulelela. Mudimu eu ke wakambuluisha bikole bua bungi bua bayidi kuvulabu. Mukonkononyi mukuabu wa malu a mu Bible wakamba ne: “Kabavua bangata dimanyisha bantu [malu a] ditabuja bu bualu bulamina anu bantu bavua ne lukunukunu lua bungi anyi bavuabu basungule bua kuikalabu ba-evanjeliste nansha. Kuyisha lumu luimpe kuvua mudimu wa pa buawu ne bujitu bua muntu yonso uvua mu Ekeleziya. . . . Divulangana dia musangu umue dia bena Kristo diakapesha bena mu tshisumbu etshi bukole anu ku ntuadijilu kuatshi menemene.” Wakafunda kabidi ne: “Diyisha lumu luimpe ke diakapesha bena Kristo ba kumpala bukole.” Mbia muomumue bua bena Kristo balelela lelu’eu.

Divulangana dia miaba

11. Ndivulangana kayi didibu bambe mu Bienzedi 12:24, ne mmunyi muakenzekadi?

¹¹ Muaba muibidi udibu bakula bua ditangalaka dia Dîyi dia Nzambi mmu Bienzedi 12:24 (MML), mudibu bamba ne: “Diyi dia [Yehowa] diakadi ditangalaka bikole bitambe.” Muaba eu mêyi aa adi akula bua divulangana dia miaba yakafika Dîyi dia Nzambi. Nansha muvua mbulamatadi uuluisha, mudimu eu wakatungunuka anu ne kuya kumpala. Nzambi wakitshikijila bayidi nyuma muimpe mu Yelushalema, ne kumbukila anu pinapu dîyi kutangalakadi ne lukasa luonso. Bu muvuabu bakengesha bayidi mu Yelushalema, bakamuangalaka mu nseke yonso ya mu Yudaya ne mu Samalea. Ntshinyi tshiakenzeka? ‘Bakadi batangadike bakendakana bamba dîyi dia lumu luimpe.’ (Bienzedi 8:1, 4) Nyuma muimpe wakalombola Filipo bua kuyaye kuyisha munga muntu, ne pakatambula muntu eu ke yeye pende kufikisha mukenji wakamuyishabu au mu Etiopia. (Bienzedi 8:26-28, 38, 39) Bulelela kabuakanenga ne kuela miji mu Luda, mu Mpata wa Shalona ne mu Yopa. (Bienzedi 9:35, 42) Kunyima, mupostolo Paulo wakenza ngendu mile pa mâyi ne mu mpata wenda wenza bisumbu mu matunga mavule a ku muelelu kua Mbuu wa Mediterane. Mupostolo Petelo wakaya ku Babulona. (1 Petelo 5:13) Bidimu 30 kunyima kua ditshikija dia nyuma muimpe mu Pentekoste, Paulo wakafunda ne: lumu luimpe lukavua ‘luambibue munkatshi mua bifukibua bionso muinshi mua diulu.’ Pamu’apa uvua wamba bua bitupa bia buloba bivua bimanyike tshikondo atshi.​—Kolosai 1:23.

12. Mmunyi muvua baluishi ba Buena-Kristo bitabe pabu bua se: miaba ivua dîyi dia Nzambi difike ivua mivulangane?

¹² Nansha baluishi ba Buena-Kristo bakitaba ne: dîyi dia Nzambi divua diele miji mu miaba yonso ivua bena Lomo bakokesha. Tshilejilu, Bienzedi 17:6 (MMM)  udi ulonda ne: mu Tesalonike, ku Nord kua ditunga dia Gelika, baluishi bakadiabakena bamba ne: “Bantu aba mbatombole buloba bujima, mpindiewu badi munu.” Kabidi, ku ntuadijilu kua lukama luibidi lua bidimu, pavua Pline Muana mu Bitunia, wakafundila mukalenge wa bena Lomo Trajan mukanda bua tshilumbu tshia Buena-Kristo. Uvua udilakana wamba ne: “[Kabuena] anu mu bimenga patupu to, kadi mbunyange ne misoko ne ditunga bidi netu mutumba.”

13. Mmunyi muvua divulangana dia miaba ivua dîyi dia Nzambi difike dileja ne: Nzambi mmunange bantu?

¹³ Divulangana edi dia miaba ivua dîyi difike divua dileja ne: Yehowa mmunange bikole bantu badi bakanyine bua kubapikulabu. Pakamona Petelo ne: Kônelio (muntu wa bisamba bia bende) uvua mupete nyuma muimpe, wakamba ne: ‘Bulelela, ndi njingulula ne: Nzambi kêna ne kansungasunga, kadi yeye udi witabuja wa mu tshisamba tshionso udi umutshina, udi wenza malu makane.’ (Bienzedi 10:34, 35) Bushuwa, lumu luimpe luvua ne ludi mukenji wa kumanyisha bantu bonso. Ne divulangana dia miaba ivua dîyi dia Nzambi difike diakapetesha bantu ba miaba yonso mushindu wa kuleja dianyisha bua dinanga divua Nzambi mubaleje. Mu lukama lua bidimu lua 21 elu, dîyi dia Nzambi nditangalake miaba ya pa buloba pabuipi ne yonso.

Ditangalaka dia Dîyi diakatshimuna

14. Ndivulangana kayi didibu bambe mu Bienzedi 19:20, ne dîyi dia Nzambi diakatshimuna binganyi?

¹⁴ Muaba muisatu udibu bakula bua ditangalaka dia dîyi dia Nzambi mmu Bienzedi 19:20 (MML), mudibu bamba ne: “Nunku ke muakadi diyi dia Mfumu dimuangalaka bikole ne [ditshimuna].” Muaku wa mu tshiena-Gelika utudi bakudimune ne: “ditshimuna,” udi umvuija “kuleja bukole.” Mvese idi kumpala kua mvese eu idi ileja ne: bantu ba bungi ba mu Efeso bakalua bena kuitabuja, ne bena majimbu ba bungi bakuosha mikanda yabu kumpala kua bantu bonso. Mushindu’eu ke uvua dîyi dia Nzambi ditshimune malongesha a bitendelelu bia dishima. Lumu luimpe luakatshimuna kabidi ntatu mikuabu bu mudi dikengesha bayidi. Tshintu nansha tshimue katshivua mua kuluimanyika to. Mu muanda eu tudi tumona kabidi malu adi mafuanangane ne a mu Buena-Kristo bulelela bua mu tshikondo tshietu etshi.

15. (a) Ntshinyi tshiakamba mufundi mukuabu wa miyuki ya malu a mu Bible bua bena Kristo ba kumpala? (b) Bilondeshile bayidi, nnganyi uvua ubambuluisha bua kuenzabu mudimu wabu bimpe?

¹⁵ Bapostolo ne bena Kristo bakuabu ba kumpala bakamanyisha dîyi dia Nzambi ne lukunukunu. Mufundi mukuabu wa miyuki ya malu a kale a mu Bible wakamba ne: “Padi bantu ne dijinga dia kuakula bua Mukalenge wabu, kabena bapangila mishindu ya kuakula to. Bushuwa, tshisumi tshia balume ne bakaji aba ke tshidi tshitukemesha kupita mishindu yabu ya dienza mudimu eu.” Pabi, bena Kristo ba kumpala abu bavua bamanye ne: ki mmakanda abu nkayabu avua menze bua mudimu wabu kuendawu bimpe nansha. Kadi Nzambi ke uvua mubatume bua kuenza mudimu au, ne yeye ke wakabambuluisha bua kuwenza. Divulangana anyi ditanta dia mu nyuma didi difumina kudi Nzambi. Mupostolo Paulo wakajadika bualu ebu mu mukanda wende wakatuminaye tshisumbu tshia mu Kolinto. Wakafunda ne: ‘Meme ngakakuna bintu, Apolo wakabimiamina mâyi, kadi Nzambi wakabidiundisha. Bua tudi benzejanganyi ba mudimu ne Nzambi.’​—1 Kolinto 3:6, 9.

 Nyuma muimpe udi ukuata mudimu

16. Ntshinyi tshidi tshileja ne: nyuma muimpe wakapesha bayidi bukole bua kuakula ne dikima?

¹⁶ Vuluka ne: Yezu wakajadikila bayidi bende ne: nyuma muimpe uvua ne bua kubambuluisha bikole bua dîyi dia Nzambi kutangalakadi. Kabidi ne: nyuma muimpe eu uvua ne bua kubapesha bukole bua kuenza mudimu wabu wa diyisha. (Bienzedi 1:8) Mmunyi muakabapeshaye bukole ebu? Katupa kakese kunyima kua Nzambi mumane kuitshikijila bayidi nyuma muimpe mu Pentekoste, bakabikila Petelo ne Yone bua kuakulabu kumpala kua kabadi katambe bunene (Sanedren) ka mu ditunga adi kavua ne banzuji bakapia tshibawu bua muvuabu bashipeshe Yezu. Bapostolo bakumvua buôwa kumpala kua tshisumbu tshinene etshi tshia baluishi anyi? Nansha kakese! Nyuma muimpe wakapesha Petelo ne Yone bukole bua kuakula ne dikima, kukemeshabi, ke baluishi babu ‘kubamanyabu ne: mbakadi ne Yezu.’ (Bienzedi 4:8, 13) Nyuma muimpe wakasaka kabidi Stefano bua kuyisha ne dikima kumpala kua Sanedren. (Bienzedi 6:12; 7:55, 56) Kumpala, nyuma muimpe ukavua musake bayidi bua kuyisha ne dikima. Luka udi wamba ne: ‘Pakatendelelabu Nzambi nunku, muaba wakadibu badisangisha wakakankishibua; buonso buabu bakadi bûle tente ne nyuma muimpe, bakamba dîyi dia Nzambi ne dikima.’​—Bienzedi 4:31.

17. Mmu malu kayi makuabu muvua nyuma muimpe muambuluishe bayidi bua kuenza mudimu wabu?

¹⁷ Yehowa, pamue ne Yezu mubisha ku lufu, wakalombola mudimu wa kuyisha ku diambuluisha dia nyuma wende muimpe. (Yone 14:28; 15:26) Pavua Nzambi muitshikijile Kônelio ne balela bende ne balunda bende ba pa muoyo nyuma muimpe, mupostolo Petelo wakamanya ne: bantu ba bisamba bia bende bavua kabayi batengula bavua mua kukumbaja malu malomba bua kutambula mu dîna dia Yezu Kristo. (Bienzedi 10:24, 44-48) Kunyima, nyuma wakasungula Bânaba ne Shaula (mupostolo Paulo) bua kuenzabu mudimu wa bu-misionere ne bua kubaludika kuvuabu ne bua kuya ne kuvuabu kabayi ne bua kuya. (Bienzedi 13:2, 4; 16:6, 7) Nyuma eu wakalombola mushindu uvua bapostolo ne bakulu ba mu Yelushalema bangata mapangadika. (Bienzedi 15:23, 28, 29) Nyuma muimpe wakalombola kabidi mudimu wa diteka batangidi mu tshisumbu tshia bena Kristo.​—Bienzedi 20:28.

18. Mmushindu kayi uvua bena Kristo ba kumpala baleje dinanga diabu?

¹⁸ Nyuma muimpe wakadileja kabidi munkatshi mua bena Kristo pakapatulaye mamuma mimpe, bu mudi dinanga. (Galatia 5:22, 23) Dinanga diakasaka bayidi bua kuabanyangana bintu. Tshilejilu, kunyima kua Pentekoste wa mu 33 B.B., bavua basangishe makuta kaba kamue bua kumona mua kuambuluisha bayidi bavua mu Yelushalema. Bible udi wamba ne: ‘Munkatshi muabu kamuakadi muntu wakadi ukengela tshintu; bualu bua bakadi ne madimi anyi nzubu, bakabipana, bakadi balua ne mushinga wa biakapanabu, bakadi bauteka ku makasa a bapostolo; bakadi babanyangana muntu ne muntu bu muakadiye natshi bualu.’ (Bienzedi 4:34, 35) Bayidi abu kabakaleja anu bena Kristo nabu nkayabu dinanga to, kadi bakadileja kabidi bantu bakuabu pavuabu babayisha lumu luimpe ne babenzela malu makuabu malenga. (Bienzedi 28:8, 9) Yezu wakamba ne: dinanga dia didifila bua bakuabu ke divua mua kuikala tshimanyinu tshia bayidi bende. (Yone 13:34, 35) Bushuwa, dinanga dia mushinga mukole diakakoka bantu bua kusemenabu pabuipi ne Nzambi  ne diakambuluisha bua malu kutantawu mu bidimu lukama bia kumpala anu mudiwu atanta lelu.​—Matayo 5:14, 16.

19. (a) Mmu mishindu kayi isatu ivua dîyi dia Yehowa ditangalake mu bidimu lukama bia kumpala? (b) Ntshinyi tshituamona mu tshiena-bualu tshidi tshilonda?

¹⁹ Tshiambilu “nyuma muimpe” tshidi mu mukanda wa Bienzedi misangu mitue ku 41. Kakuyi mpata, divulangana dia bena Kristo balelela mu bidimu lukama bia kumpala diakenzeka anu ku bukole ne bulombodi bua nyuma muimpe. Bungi bua bayidi buakavula, dîyi dia Nzambi diakatangalaka miaba ya bungi, ne diakatshimuna bitendelelu ne nkindi ya mu tshikondo atshi. Divulangana edi dia mu bidimu lukama bia kumpala ndifuanangane ne mudimu wa Bantemu ba Yehowa lelu. Mu tshiena-bualu tshidi tshilonda, netumone mudi dîyi dia Nzambi ditangalake mu mushindu wa dikema mu tshikondo tshietu etshi.

Udi muvuluke anyi?

• Mmushindu kayi wakavula bungi bua bayidi ba kumpala?

• Mmushindu kayi uvua dîyi dia Nzambi ditangalake miaba ya bungi?

• Mmushindu kayi uvua dîyi dia Nzambi ditshimune mu bidimu lukama bia kumpala?

• Mmunyi muvua nyuma muimpe muambuluishe bua dîyi dia Nzambi kutangalakadi?

[Nkonko ya dilonga]

[Tshimfuanyi mu dibeji 12]

Filipo wakayisha muena Etiopia, lumu luimpe kutangalakalu miaba ya bungi

[Tshimfuanyi mu dibeji 13]

Nyuma muimpe wakalombola bapostolo ne bakulu ba mu Yelushalema

[Mêyi a dianyisha bua tshimfuanyi mu dibeji 10]

Mu ditumba kuulu ku dia balume: Tshimfuanyi tshia tshimenga tshia Yelushalema mu tshikondo tshia ntempelo muibidi–tshidi mu nzubu wa tshilala benyi wa Holyland, mu Yelushalema