Udi mua kupeta masanka afila Bukalenge

PAULO uvua mupostolo muena Kristo uvua mumanye kuakula bimpe imue miakulu ya mu tshikondo tshiende. Tulasa tuvuaye mulonge tudi mumue ne tua muntu udi mulonge iniversite lelu. Manême ne masanka onso avua mafundila muena Lomo yonso Paulo uvua uapeta pende. (Bienzedi 21:37-40; 22:3, 8) Bionso ebi bivua mua kuikala bimuambuluishe bua kulua mubanji ne muntu wa butumbi. Kadi wakamba ne: ‘Malu aa akadi a mushinga muimpe kundi, ngowu au angakabala bu tshintu tshijimine bua Kristo. Ndi mbibala bu bintu bia kuela ku diyala bua meme mpete Kristo.’ (Filipoi 3:7, 8) Bua tshinyi Paulo wakamba mêyi aa?

Paulo, uvua mumanyike kumpala mu dîna dia Shaula wa ku Tâso uvua ukengesha bantu ‘bavuaye usangana mu Njila,’ wakalua muena kuitabuja pakamonaye tshikena-kumoma tshia Yezu mubishibue ne mutumbishibue. (Bienzedi 9:1-19) Bua Paulo, tshikena-kumona etshi tshiakamonaye mu njila wa ku Damaseke tshiakamujadikila menemene ne: Yezu uvua Masiya mulaya anyi Kristo, uvua ne bua kulua mfumu wa Bukalenge buvuabu balaye. Tshikena-kumona etshi tshiakashintulula kabidi nsombelu wende bikole, anu mudibi bileja mu mêyi adiye muambe kuulu eku. Tudi mua kuamba kabidi ne: bu muvuaye musue malu malelela, Paulo wakalekela malu ende a kale ne kudilengejaye.​—Galatia 1:13-16.

 Muaku wa pa muanda utubu bakudimuna misangu mivule mu Bible ne: ‘kudilengeja’ nkudimuinu wa muaku wa mu tshiena-Gelika udi umvuija “kumanya panyima,” mushilangane ne “kumanya kumpala.” Nanku, didilengeja didi diumvuija ne: muntu udi ushintulula meji, lungenyi anyi tshidiye wipatshila, ulekela malu ende a kale ne uamona mabi. (Bienzedi 3:19; Buakabuluibua 2:5, MMM) Bua bidi bitangila Paulo, kakalekela muanda wa mushinga eu uvuaye mumone mu njila wa ku Damaseke ushala anu bu bualu buvua bumusankishe patupu anyi mene bu tshintu tshidi bantu babikila ne: mbualu bumona bua mu nyuma nansha. Buende yeye, tshivua mushindu wa kumutabuluja bua kumuleja ne: nsombelu uvuaye nende kumpala wa dipanga kumanya Kristo uvua tshianana. Wakajingulula kabidi ne: bua dimanya dipiadipia divuaye mupete pa bidi bitangila Kristo kumuambuluishadi, uvua ne bua kushintulula nsombelu wende.​—Lomo 2:4; Efeso 4:24.

Dishintuluka diakamupetesha masanka

Malu a Nzambi avua Paulo mumanye avua nangananga a mu tshisumbu tshia Bafalese muvuaye kumpala. Mu malongesha abu muvua nkindi ne bilele bia bantu. Bu muvua Paulo kayi musue malu a ntendelelu mukuabu, lukunukunu luende ne bionso bivuaye wenza bivua bibi. Nansha muvuaye wela meji ne: uvua wenzela Nzambi mudimu, uvua bushuwa umuluisha.​—Filipoi 3:5, 6.

Panyima pa mumane kupeta dimanya dijalame didi ditangila Yezu ne mudimu wende mu malu adi Nzambi mulongolole bua kuenza, Paulo uvua kumpala kua malu avuaye ne bua kusungula: Uvua ne bua kushala Mufalese ne kutungunuka ne muanzu uvuaye nawu wa lumu anyi, peshi uvua ne bua kushintuluka ne kubanga kuenza tshionso tshivua tshikengedibua bua Nzambi kumuanyisha? Kadi Paulo wakasungula tshivua tshiakane, bualu wakamba ne: ‘Bualu bua tshiena mfua bundu bua lumu luimpe; bua ludi bukole bua Nzambi [bua] lupandu kudi muntu yonso udi witabuja, kudi muena Yuda diambedi, ne kudi muena Gelika kabidi.’ (Lomo 1:16) Paulo wakalua muyishi wa lukunukunu wa lumu luimpe lua Kristo ne lua Bukalenge.

Kunyima kua bidimu bia bungi, Paulo wakambila bena Kristo nende ne: “Bana betu, tshiena ngamba ne: nkadi mupete, ndi ngamba amu se: ndi mpua bidi kunyima kuanyi muoyo, nya muluijakane muanyi muonso bua kukuata bidi kumpala, nnyemena ku kipatshila bua kupeta difutu didi [Nzambi] mutubikidile mu diulu bualu bua Kristo Yezu.” (Filipoi 3:13, 14, MMM) Lumu luimpe luakambuluisha Paulo bualu wakitaba ne muoyo mujima bua kulekela malu avua amutapulula ne Nzambi, ne wakipatshila bintu bivua mu diumvuangana ne disua dia Nzambi.

Ntshinyi tshiudi mua kuenza?

Pamu’apa udi mumvue bua lumu luimpe lua Bukalenge anu matuku adi panshi aa. Ditekemena dia kuikala ne muoyo wa kashidi ne mupuangane mu mparadizu kadienaku dikusankisha anyi? Ke mudibi, bualu tuetu bonso tutu ne dijinga dia ku tshifukilu dia kuikala ne muoyo ne kusomba mu ditalala katuyi tutshina tshintu. Bible udi wamba ne: Nzambi mmuteke “dijinga dia [kuikala ne muoyo wa tshiendelele, NW]” mu mioyo yetu. (Muambi 3:11, MMM) Nenku ke mbibi to bua tuetu kutekemena tshikondo tshikala bantu mua kusomba ne muoyo wa kashidi mu ditalala ne disanka. Etshi ke tshintu tshidi lumu luimpe lua Bukalenge lutupesha.

Kadi bua ditekemena adi kuikaladi bualu bulelela, udi ne bua kukeba bua kumanya tshidi lumu luimpe elu lumvuija. Mupostolo Paulo wakabela wamba ne: ‘Nujingulule mudi disua dia Nzambi didi dimpe, didi dimusankisha, ne didi diakane tshishiki.’ (Lomo 12:2) Nanku anu bu Paulo, wewe mumane kupeta dimanya ne dijingulula dia malu edi, mpindieu sungula tshiudi ne bua kulonda.

Kabidi, ukadiku pamu’apa mumane kumvua amue malongesha a malu adi atangila matuku atshilualua. Uvuluke ne: kumpala kua Shaula kuluaye mupostolo Paulo, ukavuaku ne diende dimanya dia malu avua atangila disua dia Nzambi. Kadi pamutu pa kuindila bua se: Nzambi akubuluile malu aa mu tshishima, bua tshinyi kubenga kudienzeja bua kuamanya? Dikonka ne: ‘Ndiku menemene mumanye tshidi Nzambi ujinga bua bantu ne buloba anyi? Mbijadiki kayi bindi mua kufila bua kujadikila bantu malu andi muitabuje? Bijadiki bindi mfila nebimueneke ne: mbilelela bu buobu mua kubikonkonona ne Bible ku  luseke anyi?’ Mushindu’eu ke uudi ne bua kukonkonona malongesha a mu tshitendelelu tshienu. Bushuwa, ke tshiudi ne bua kuenza, bualu Bible udi utubela ne: “Nujingulule malu onso; nulamate malu adi mimpe.” (1 Tesalonike 5:21) Tshitudi mua kumanya ntshia se: dituanyisha dia Nzambi ke didi ne mushinga wa bungi kupita bionso.​—Yone 17:3; 1 Timote 2:3, 4.

Balombodi ba bitendelelu badi mua kutulaya muoyo wa tshiendelele. Kadi bikala dilaya edi kadiyi dia mu malongesha a mu Bible, kadiakutuambuluisha bua kupeta masanka afila Bukalenge bua Nzambi to. Yezu wakadimuija mu Muyiki wende muende lumu wakenzaye pa mukuna ne: ‘Bantu batu bambikila ne: Mukalenge, Mukalenge, kabena babuela bonso mu bukalenge bua mu diulu, anu yeye udi wenza mudi Tatu wanyi udi mu diulu musue.’​—Matayo 7:21.

Tangila ne: Yezu mmuimanyine pa tshilumbu tshia kuenza mudi Tatuende musue. Ke tshidi tshikengedibua bua kushisha kupeta masanka afila Bukalenge bua Nzambi. Tudi mua kuamba kabidi ne: Nzambi katu anu wanyisha bualu buonso budi mua kumueneka bu buimpe nansha. Yezu wakamba kabidi ne: ‘Ba bungi nebangambe ne: Mukalenge, Mukalenge, katuena bambile bantu bualu buebe mu dîna diebe anyi? Katuena bumushe ba-demon mu dîna diebe anyi? Katuena benze malu a kukema a bungi mu dîna diebe anyi? Dituku adi nembambile ne: Tshiakunumanya; umukayi kundi, nudi benji ba malu mabi.’ (Matayo 7:22, 23) Kakuyi mpata, tshintu tshidi ne mushinga ntshia se: tumvue bimpe menemene tshidi lumu luimpe lua Bukalenge lumvuija ne pashishe tulutumikile.​—Matayo 7:24, 25.

Badi mua kukuambuluisha

Bantemu ba Yehowa badi bayisha lumu luimpe lua Bukalenge bua Nzambi kukadi bidimu bipite pa 100. Badi bambuluisha bantu pa buloba bujima ne mikanda yabu ne dîyi diabu dia mukana bua kupetabu dimanya dijalame dia tshidi Bukalenge, masanka afilabu ne tshidi muntu ne bua kuenza bua kuapeta.

Tudi tukulomba bua kuteleja malu adi Bantemu ba Yehowa balongesha. Wewe muitabe ne muenze tshidi lumu luimpe elu luamba, neupete mabenesha a bungi mpindieu ne mu matuku atshilualua pikala Bukalenge bua Nzambi mua kukokesha buloba.​—1 Timote 4:8.

Enza tshidi tshikengela mpindieu, bualu Bukalenge bua Nzambi bukadi pabuipi!

[Bimfuanyi mu dibeji 7]

Bantemu ba Yehowa badi bayisha lumu luimpe lua Bukalenge bua Nzambi ne mikanda yabu ne dîyi diabu dia mukana