Udi wela meji ne: ki mbakumvue bimpe anyi?

ANTONIO uvua mumvue malu mamutonde. Antonio wakamona diakamue kakuyi nansha mushindu wa kubiumvuija, Leonardo mulunda wende wa katapula kateka katshiyi umusankidila. * Misangu ya bungi Leonardo katshivua kabidi umuela muoyo to, nansha pavuabu munkatshi mua balunda babu bakuabu bivua bimueneke anu bu bavua bajilangane. Antonio kubanga kutshina wela meji ne: uvua mua kuikala muenze ta muambe bualu buvua mulunda wende Leonardo mupange kumvua bimpe. Kadi buvua bualu kayi?

Bitu bifikila bantu ba bungi bua kumvua amue malu bibi. A bungi kaatu malu makole to, atu mapepele bua kualongolola. Makuabu adi mua kubungamija muntu bikole bitambe, nangananga padi meji mabi atungunuka ne kumuvuila mu mutu nansha mumane kuenza muende muonso bua kuumbusha. Bua tshinyi bitu bifika bua kumvua amue malu bibi? Mmunyi mutuwu ashiya bantu badi baumvue bibi? Tshiudi mua kuenza ntshinyi bikala bakuabu kabayi bumvue bimpe bualu buudi wenza? Meji adi bakuabu bakuelela adiku mua kukuenzela bualu anyi?

Mbikole bua kuepuka diumvua amue malu bibi

Bu mudi bantu kabayi mua kumanya meji adi mu mutshima wetu, ku tototo nansha ku ndandanda bakuabu nebafike anu ku dibenga kumvua bimpe malu atudi tuamba anyi tuenza. Malu atu afikisha ku diumvua imue mianda bibi adi a bungi. Imue misangu, ndipangila patupu dia mushindu wa kumvuija ngenyi yetu mu mêyi matokesha ne majalame. Mitoyi anyi malu makuabu adi afila ditanaji adi mua kupangisha bantu bakuabu bua kututeleja ne ntema yonso.

Bantu badi kabidi mua kuangata bibi imue mishindu ne ngenzelu ya malu idi nayi muntu. Tshilejilu, bantu badi mua kuangata muena bumama bu muntu udi ne mashika, kayi utangila malu a bakuabu, anyi muena lutambishi. Mianda ikadi mifikile muntu mu dikola diende idi mua kumufikisha ku dienza amue malu kayi wanji kuela meji padiye mu imue nsombelu. Dishilangana dia bibidilu bidi bantu bakole nabi ne dia miakulu didi dileja ne: bantu kabena mua kutekemena bua kumvuangana mu malu onso to. Ku bionso ebi, tudi mua kusakidila dilondelangana malu adi kaayi majalame anyi dijanangana; ne kabiena ne bua kutukemesha patudi tumona bantu bumvuija imue misangu malu atuvua bambe anyi benze bishilangane ne tshituvua natshi mu  meji. Bionso ebi bitu bitekesha bantu badi bela meji ne: bakuabu mbumvue bibi tshivuabu basue kuamba anyi kuenza.

Tshilejilu, dimue edi Anna wakamba pende tshianana bua mulunda wende kampanda uvua kayipu dîba adi ne: mmumanyike bikole. Bantu bakambulula bualu abu munga mushindu, pashishe kukemeshabi Anna pakamonaye mulunda wende au umuamba ne tshiji kumpala kua bantu ba bungi ne: Anna uvua ne mukawu bua malu mimpe avuabu benzele nsongakaji au kudi mulunda wabu mukuabu wa balume. Bualu buvua Anna muambe, bavua babukudimune bibi menemene, ne bionso biakenzaye bua kumvuija mulunda wende eu ne: kavua ne lungenyi lua kumuamba bualu bubi biakaya mu mâyi. Bualu abu buakalela bilumbu, ne matuku a bungi menemene akanji kupita kumpala kua Anna kujikijaye tshilumbu etshi tshionso nkong.

Mushinga udi bakuabu bakuangata nawu utu utamba kufumina ku mushindu udibu bamona meji audi nawu. Ke bua tshinyi bitu misangu mivule bibungamija padi bakuabu bakudimuna bibi bualu buudi muambe anyi muenze. Udi mua kunyingalala, umona ne: kakuena bualu budi mua kufikisha muntu mukuabu bua yeye kukumvua bibi nunku to. Buebe wewe, meji a mushindu’eu adi mua kuikala a kansungasunga, a dibandangana anyi a dishima menemene, ne adi mua kukubungamija bikole, nangananga wewe muangate bidibu bamba kudi bantu badi bakula malu kaayi majalame ne kaayi nansha ne mushinga.

Nansha mudibi mua kukutonda bua mushindu udi bakuabu bakuangata, bidi anu bimpe bua kunemeka mmuenenu wabu. Ki mbimpe bua muena Kristo kupepejaye malu adi bakuabu nawu mu meji, ne katuena basue bua mêyi anyi bienzedi bietu bitatshishe bakuabu nansha. (Matayo 7:12; 1 Kolinto 8:12) Ke bualu kayi udi mua kuenza bukole imue misangu bua kulongolola meji a muntu pa bualu kampanda budiye ukumvuila bibi. Kadi kutamba kuditatshisha bua bakuangate ne mushinga kudi mua kukupangisha bua kupeta tshiudi ujinga, kudi mua kufikisha bakuabu ku dikupepeja anyi kukufikisha ku diela meji ne: bantu kabatshiena bakusue. Kadi manya ne: mushinga webe mulelela kawena ufumina ku meji adi bakuabu bakuelela to.

Kabidi, udi mua kulua kujingulula ne: malu adibu bakuamba nga bushuwa. Abi kabidi bidi mua kulua kukubungamija bikole. Kadi biwitaba bilema biebe kuyi ukeba bua kudibingisha, malu a mushindu’eu adi mua kukuambuluisha, adi mua kukusaka bua kushintuluka padibi bikengedibua.

Ntatu itu ilua kumueneka

Amue malu mumvua bibi adi mua kufikisha muntu ta kubenga kumufikisha ku ntatu mikole. Tshilejilu, wewe mumvue muntu wakula ne dîyi dikole mu restoran, udi mua kuamba ne: mmumanye mua kusomba ne bantu, anyi se: mmuena madileji. Pabi, imue misangu udi mutupakane. Muntu udiye wakula nende udi mua kuikala ne mapapa. Peshi pamu’apa muntu udi umusumbisha udi umueneka kayi ne disanka, imue misangu kêna udiumvua bimpe to. Nansha mutu diumvua malu bibi mushindu’eu difikisha ku ngenyi mibi, pamu’apa kadiena mua kufikisha muntu ku ntatu mikole anyi idi mua kushala matuku a bungi to. Kadi misangu mikuabu, diumvua malu bibi didi mua kukebelangana lutatu lukole. Tangila bilejilu bibidi bia malu akenzeka mu Isalele wa kale.

Pakafua Nahasha mukalenge wa bena Amona, Davidi wakatuma bantu bua kusamba muanende Hanuna ukavua mutuadije kukokesha pa muaba wa tatuende. Kadi bena Amona bakamona bantu aba bu bavua baye bua kutentekela ditunga diabu, ke kufikishabi Hanuna tshia kumpala ku dipuekesha batumibue aba milongo ne pashishe ku diela bena Isalele mvita. Bantu batue ku 47 000 bakafua bua diumvua dibi dia bualu  buenza ne meji malenga.​—1 Kulondolola 19:1-19.

Ku ntuadijilu kua malu a bena Isalele, bakakokosa tshilumbu tshikuabu tshivua bantu bumvue bibi. Tshisamba tshia bena Lubena, tshia bena Gada ne tshitupa tshia tshisamba tshia bena Manashe biakasa tshioshelu tshinene tshia dikema ku muelelu kua Musulu wa Yadene. Bisamba bikuabu bia Isalele biakamona bualu ebu bu dibenga kuikala ne lulamatu ne bu ditombokela Yehowa. Ke buobu kudisangisha bua kubaluisha mvita. Kadi kumpala kua kuenza bualu kampanda bua kubanyoka, bisamba bikuabu bia Isalele biakanji kutuma bantu bua kuyabu kuleja muvuabi ne kanyinganyinga ne muvuabi bimona muanda au bu wa dipanga lulamatu kudi Nzambi. Ke tshiakenzabu, nunku bantu bavua bibake tshioshelu bakandamuna ne: kabavua ne meji a kulekela ntendelelu mulelela nansha. Kadi bakasa tshioshelu atshi bua kuikalatshi tshivulukilu tshivua tshileja lulamatu luabu kudi Yehowa. Diumvua bualu ebu bibi divua mua kuikala padi dishipeshe bantu miandanda, kadi meji akambuluisha bua kutshingulula ntatu mikole eyi.​—Yoshua 22:10-34.

Tokesha malu bimpe ne lungenyi lua dinanga

Miyuki eyi idi itupesha dilongesha. Kakuyi mpata, kutokesha tshilumbu bimpe ke njila wa meji. Nnganyi udi mumanye bungi bua bantu bavua bapanduke mu muyiki wa ndekelu utudi baleje eu anu bualu bena ku nseke yonso ibidi bavua bayikile? Misangu ya bungi, biwikala kuyi mumvue bimpe tshivua meji a muntu mukuabu, mioyo ya bantu kayakuikala anu mu njiwu to, kadi bulunda buenu budi mua kunyanguka. Nenku biwikala wela meji ne: muntu kampanda mmukuenzele bibi, udiku mujadike bushuwa ne: udi mumvue malu mushindu udiwu menemene anyi? Mmeji kayi avua muntu au nawu? Mukonka. Udi wela meji ne: ki mmukumvue bimpe anyi? Yukila nende tshilumbu etshi. Kulekedi lutambishi lukupangisha bua kuyikila nende to.

Yezu wakaleja tshintu tshilenga tshidi ne bua kutusaka bua kulongolola malu atudi tuetu anyi bakuabu bumvue bibi pakambaye ne: “Nenku, paudi ulambula webe mulambo pa tshilambuilu, wewe muvuluke ne: muanetu udi nanyi bualu, anji lekela mulambo webe ku tshilambuilu aku, uye kulengejangana ne muanenu awu, pashishe uvue kulambula mulambo webe.” (Matayo 5:23, 24, MMM) Nanku mbimpe kuyikila ne muntu au pa nkayenu, kuyi ubuejamu bantu bakuabu. Malu neanyanguke bikole bikala muntu udi mukuenzele bibi mua kudianjila kumvuila kanyinganyinga kebe kudi bantu bakuabu. (Nsumuinu 17:9) Tshipatshila tshiebe tshidi ne bua kuikala tshia kukeba ditalala ne lungenyi lua dinanga. Umumvuije bimpe tshilumbu tshienu mu mêyi mapepele ne kuyi ukeba bua kumupisha. Umuleje tshiudi umvua bua bualu abu. Pashishe uteleje bimpe tshidiye pende wamba. Kuikadi ne lukasa lua kumutumpila tshilema. Itaba bua se: muanenu eu kavua anu ne meji mabi. Kupu muoyo bua se: dinanga didi “ditaba bionso.”​—1 Kolinto 13:7, MMM.

Kadi nansha nuenu balongolole malu anuvua bumvue bibi au, tunyinganyinga anyi ntatu bidi anu mua kushala mutantshi mule. Nanku ntshinyi tshinudi mua kuenza? Padibi bikengedibua, mbimpe kulomba luse ne muoyo mujima, ne udi mua kuenza kabidi bualu buonso buudi umona ne: mbuakanyine bua kujikija tshilumbu atshi. Mu nsombelu yonso ya nunku, eu udibu babungamije udi ne bua kulonda mubelu eu mufundisha ku nyuma wa se: ‘Nulejangane lutulu, nulekelelangane mibi yenu, bikala muntu ne mukuabu tshilumbu; bu muakanubuikidila Mukalenge [Yehowa] mibi yenu nuenu, nuenze muomumue kabidi. Pa mutu pa malu aa onso nuluate dinanga, didi tshisuikidi [tshipuangane tshia buobumue].’​—Kolosai 3:13, 14; 1 Petelo 4:8.

Bu mututshidi anu bapange bupuangane, nekuikale anu malu atudi tuetu anyi bakuabu mua kumvua bibi, kabidi ne tunyinganyinga. Muntu yonso udi mua kuenza tshilema anyi kuambangana mêyi mashile. Bible udi utuleja patoke ne: “Misangu ya bungi tudi tuenza bilema buonso buetu. Pikala muntu kayi utupakana mu diakula, awu mmuntu mupuangane, udi ne bukole bua kukokesha mubidi wende mujima.” (Yakobo 3:2, MMM) Bu mudi Yehowa mumanye bimpe bualu ebu, udi utupesha mibelu eyi: ‘Kukuatshi tshiji mu mutshima webe lukasa, bualu bua tshiji tshidi tshilala mu tshiadi tshia bapote. Kuteleji matshi ebe ku mêyi onso adibu bamba, bua wewe  kumvu bipendu bia mupika webe; bualu bua mutshima webe udi mumanye ne: Wewe biebe wakapenda bakuabu misangu ya bungi.’​—Muambi 7:9, 21, 22.

“Yehowa udi uteta mitshima”

Tshia kuenza ntshinyi bikalabi bimueneka bikole bua kulongolola meji mabi adi mukuabu ukuelela? Kuteketshi to. Tungunuka ne kuenza muebe muonso bua kupeta ne kuikala ne ngikadilu ya buena Kristo. Lomba Yehowa akuambuluishe bua udilongolole muaba uudi ne tshilema. Bua kuamba bulelela, ki mbantu badi ne bua kujadika mushinga mulelela uudi nawu to. Anu Yehowa ke udi mumanye mua ‘kuteta mitshima’ biakane. (Nsumuinu 21:2) Nansha Yezu, bavua bamuangate ne mushinga mukese ne bamupetule kudi bantu, kadi kabivua bishintulule mushindu uvua Yehowa umuangata to. (Yeshaya 53:3) Nansha mudi bamue bantu mua kukuangata bibi, udi mua ‘kupumuna milombu ya mu mutshima webe’ kumpala kua Yehowa, mujadike se: udi ukuteleja, bualu “Yehowa kena utangila bu mudi bantu batangila, bualu bua bantu badi batangila anu mubidi, kadi Yehowa udi utangila mu mutshima.” (Musambu 62:8; 1 Samuele 16:7) Biwatungunuka ne kuenza tshidi tshiakane, mu bungi bua matuku bantu bavua bakuangate bibi nebamone tshilema tshiabu, nanku nebashintulule lungenyi luabu.​—Galatia 6:9; 2 Timote 2:15.

Udi muvuluke Antonio utudi batele ku ntuadijilu kua tshiena-bualu etshi anyi? Wakapeta dikima dia kulonda mibelu ya mu Bible, kuyaye kuyikila ne mulunda wende Leonardo, kumukonkaye tshivuaye muenze tshivua tshimubungamije. Ntshinyi tshiakenzeka pashishe? Leonardo wakakema bikole. Wakandamuna ne: Antonio kavua mumuenze bualu nansha bumue bua kumubungamija to, ke yeye kumujadikilaye ne: kavuaku ne meji a kumuenzela pende bibi to. Bikalaye uvua umueneka ne mashika, pamu’apa uvua mua kuikala ne bualu bumutonde. Leonardo kulombaye luse wamba ne: uvua mubungamije mulunda wende eu kabiyi ku disua diende, ne kumuelaye tuasakidila bua muvuaye mumuleje tshilumbu etshi. Ke yeye kuamba kabidi ne: mu matuku adi kumpala, nengikale mudimuke bikole bua kubenga kufikisha bakuabu ku diela meji a buena au. Ndululu yonso ivua pankatshi pabu yakajika, ne balunda babidi aba bakashala balamatangane anu muvuabu kumpala.

Kabitu bienza disanka paudi wela meji ne: ki mbakumvue bimpe nansha. Kadi wewe muenze malu onso adi makumbane bua kutokesha mianda ne kutumikila mubelu wa mu Bible udi wakula bua kuleja dinanga ne kufuilangana luse, pamu’apa wewe pebe udi mua kupatula bipeta bilenga bia muomumue.

[Mêyi adi kuinshi]

[Bimfuanyi mu dibeji 23]

Kutokesha tshilumbu ne lungenyi lua dinanga ne lua difuilangana luse kudi mua kupatuisha bipeta bimpe