Katuvua nkayetu to patuvua mu diteta

Vicky uvua muana wa katoto wa bakaji muimpe kumona uvua ne bukole bua mubidi ne musangelu. Pakaledibuaye (mu muvu wa printemps wa 1993), tuakasanka bikole. Musangu au tuvua bimpe be, tuvua basombele mu ka-tshimenga kakese ku Sud kua ditunga dia Suède.

KADI pakakumbaja Vicky tshidimu tshijima ne tshitupa, nsombelu wetu wakenza bu wakanyanguka. Wakatuadija kusama, ke tuetu kumuambula mu lupitadi. Katuakupua muoyo nansha kakese tshikondo tshiakatuambila munganga ne: muanetu wa bakaji eu udi ne disama dia kansere ka bana (leucémie aiguë lymphoblastique) katu kakuata globile yabu mitoke.

Katuvu mua kuitaba ne: muanetu mukese mushindu’eu uvua mua kupia disama dibi dia nunku to. Kanji nansha kudia bia panu, mikolo ikadi ku tshina. Bua kutukolesha ku muoyo, munganga au wakatuambila ne: bivua bikengela bua yeye kulonda manga bikole, ne kumuela mashi njila ne njila. Atshi kabidi tshivua tshikumina.

Ditabuja dietu didi dibuela mu diteta

Tuvua banange muanetu eu bikole, ne dijinga dietu divua dia kumuondapisha bimpe menemene. Nansha nanku, katuvua mua kuitaba bua bamuele mashi to. Tudi tuitaba ne muoyo mujima tshidi Bible wamba patoke ne: bena Kristo badi ne bua ‘kulekela mashi.’ (Bienzedi 15:28, 29) Tuvua kabidi bamanye bimpe se: nansha diedibua mashi ditu ne njiwu. Bantu binunu ne binunu mbapie masama ne mbafue mene amu bua dibela mashi. Mpindieu tshituvua mua kuenza tshivua anu kukeba luondapu lukole luvua kaluyi lulomba dimuela mashi to. Ke dîba diakabuela ditabuja dietu mu diteta adi.

Tshituvua mua kuenza mpindieu ntshinyi?  Tuakamanyisha Tshibambalu tshia Malu a Mpitadi ku biro bia Bantemu ba Yehowa bia mu Suède bua kutuambuluisha. * Biro kumvua nanku, e kutumabi diakamue fakse mu mpitadi ya bungi ya mu Mputu amu, bitukebela lupitadi ne munganga uvua musue bua kuitaba bua kuondapa muana ne manga nkayawu, kabiyi bia dimuela mashi to. Malu akatuenzela bana betu bena Kristo ne lukunukunu, ne dinanga akatukolesha bikole be! Katuvua nkayetu mu mvita eyi ituvua tuluangana bua ditabuja dietu to.

Kunyima kua mêba, bakatupetela lupitadi ne munganga mu tshimenga tshia Homburg/​Saar, (mu Allemagne). Tuakadilongolola bua kuangata ndeke ne kuyamu bua kutetesha Vicky mubidi. Patuakafika, bana betu bena Kristo ba mu tshisumbu tshia Bantemu ba Yehowa tshituvua tubuela mu Homburg, ne bamue balela betu bakalua kutuakidila. Ne muanetu umue wa mu bena mu Komite wa Diumvuangana ne Mpitadi wakatuakidila pende ne musangelu. Wakaya netu mu lupitadi ne kutuenzelaye tshionso tshivua tshikengedibua. Ku muoyo kuakatukola patuakamona ne: nansha too ne mu ditunga dia ku babende, bana betu ba mu nyuma bavua anuku bua kutukuatshisha.

Patuakabuela mua doktere Graf mu lupitadi alu, wakatukuolesha pende ku muoyo. Uvua utumvuila be, ne wakatushindikila ne: uvua ne bua kuenza muende muonso bua kuondapa Vicky kayi umuela mashi to. Nansha bu mashi ende mua kupueka too ne mu itanu, uvua anu ne bua kutungunuka ne kumuondapa kayi unyungisha bua tshilumbu tshia mashi to. Wakamba kabidi ne: kuvua mushindu wa Vicky kumvuaye bimpe bualu tuvua bamuteteshe kumpala kua dîba ne balue nende diakamue kudiye. Wakatuambila ne: tshivua musangu wende wa kumpala wa kuondapa muntu uvua ne disama dia buena dia Vicky anu ne manga nkayawu kayi umuela mashi. Tuvua ne dianyisha dia bungi kudi doktere Graf, ne kabidi muoyo mukole wende ne mushindu uvuaye mudisuike bua kutuambuluisha biakatusankisha bikole.

Makuta adi atukolela

Kadi nkuepi kutuvua mua kupetela makuta a kuondapisha nawu Vicky? Mikaba yakatukoseka pakatuambilabu ne: bivua bikengela makuta a bena Allemagne 150 000 bua bidimu bibidi bivuabu ne bua kuondapa Vicky. Katuvua ne dikuta dia nsongo kaba aku to, pabi bivua bikengela bua batuadije kuondapa Vicky diakamue. Bu mutuvua bena ditunga dikuabu, mbulamatadi wa Allemagne kavua mua kutuanyishila bua kuanjibu kuambula bujitu buetu ne kutuondapisha bu mutuvua katuyi ne makuta a bungi to. Tuetu kushala muaba au ne Vicky wetu usama bikole, eku baminganga bapiluke bashale batuindile; kadi makuta pawu adi aku anyi adi kunu!

Bena lupitadi alu bakitaba bua kutuambuluisha, kutuambilabu ne: tuetu bafute makuta a bena Allemagne au 20 000 musangu umue ne bafunde mukanda wa ditaba dibanza bua avua ashala, bavua batuadija ne manga diakamue. Ndambu wa makuta utuvua nende ne makuabu akatupesha balunda ne balela betu wakatuambuluisha bua kufuta makuta a bena Allemagne 20 000 au. Kadi bua avua mashale?

Musangu eu kabidi tuakavuluka se: katuvua nkayetu mu mvita ya ditabuja dietu nansha. Muanetu mukuabu wa mu nyuma utuvua katuyi nansha bamanye kuonso eku, wakajinga bua kutufutshila makuta avua mashale au. Kadi tuakabenga bua kumutatshisha nansha muvuaye mututekeshile tshianza, bualu tuvua ne mukuabu mushindu wa kujikija dibanza adi.

Badi batuadija dimuondapa

Bakatuadija kuondapa Vicky ne manga nkayawu. Matuku ne mbingu biakapita. Imue misangu bivua bitamba kutukolela, bikolela kabidi ne Vicky menemene. Kadi tuvua tusanka bikole ne tutamba kuanyisha dîba dionso divua dishintuluka dimueneka. Bakamuondapa munkatshi mua ngondo muanda-mukulu. Nansha muakapueka mashi a Vicky too ne mu isambombo, doktere Graf uvua mulamate anu ku tshivuaye mulaye atshi.

Kukadi kupite bidimu bisambombo ne pa mutu, musangu wa ndekelu uvuabu batete mâyi ende a mu muongo, kabavua basangane kabidi nansha katoba ka disama dia kansere aku to.  Mpindieu udi ne mubidi muimpe, disama adi dimane kumushila muaba. Bidi anu bu tshishima bua mudi Vicky mumvue bimpe! Tudi bamanye bimpe ne: bana ba bungi batu ne disama adi batu bafua nansha babuondopa ne manga ne dibela mashi ditekelapu.

Tuakatshimuna mvita ya ditabuja ne diambuluisha dia balela betu, bena Kristo netu balume ne bakaji, ne baminganga bapiluke. Tshibambalu tshia malu a Mpitadi tshivua netu dîba dionso. Doktere Graf ne baminganga nende bakuabu bakaleja mamanya abu onso bua Vicky kumvuaye bimpe. Tudi tubela tuasakidila wa bungi.

Bualu ebu mbukoleshe ditabuja dietu

Tudi tutamba kuela Nzambi wetu Yehowa tuasakidila bua mudiye mutukube ne dinanga dionso, ne bua bukole butuvua bapetele mu Dîyi diende. Patudi tuela dîsu panyima tuvuluka, tudi tumona se: kudi malu a bungi atudi balongele ku bualu buvua butufikile ebu, ne lutatu elu ndukoleshe ditabuja dietu be!

Tshitudi tujinga mpindieu ne muoyo mujima, nkulama bulunda buetu ne Yehowa Nzambi ne kulongesha muanetu wa bakaji eu mushinga udi nawu kuenza disua dia Nzambi. Eyowa, tudi basue kumupesha bumpianyi bua mu nyuma buimpe bua kupetaye muoyo wa tshiendelele mu Mparadizu ulualua, pa buloba apa.​—Bilonda kudi umue wa ku babadi betu.

[Mêyi adi kuinshi]