Tshia kuenza padi malu makutekeshe mu mikolo

• Asafa wakadiabila ne: ‘Bulelela, ngakalengeja mutshima wanyi patupu, ngakuowa bianza bianyi pangakadi tshiyi ne tshilumbu. Bualu bua dinda too ne ku dilolo ngakakumibua, ngakakengeshibua ku dinda ne ku dinda.’​—Musambu 73:13, 14.

• Baluka wakatua mikemu ne: ‘Wewe wakuamba ne: Ndi ne mulau! Bualu bua Yehowa wakutentakaja kanyinganyinga pa mutu pa dikenga dianyi; ndi mupungile ne kutua kuanyi kua mikemu, ne tshiena mpeta dikisha.’​—Yelemiya 45:3.

• Naomi wakadilakana ne: ‘Nzambi wa Bukole Buonso wakatamba kunkengesha. Ngakaya tente, ne Yehowa wakampingaja kuetu bitupu; nudi numbikidila ne: Naomi bua tshinyi, bualu bua Yehowa wakampisha ne Wa Bukole Buonso wakankengesha?’​—Luta 1:20, 21.

MU BIBLE mudi bilejilu bia bungi bia batendeledi ba Yehowa ba lulamatu bavua mu bimue bikondo malu anji kubatekesha mu mikolo. Tshidiku ntshia se: bu mutudi buonso buetu bapange bupuangane, tutu dimue edi malu anji kututekesha mu mikolo. Bumue bamue ba kutudi badi mua kuikala batekete mu maboko bikole, pamu’apa bikale ne tunyinganyinga tukole kupita bakuabu bua ntatu mikole ivua mibakuate.

Wewe kuyi mutangila bimpe, diteketa mu maboko dia mushindu’eu didi mua kunyanga nsombelu webe ne bantu, kunyanga kabidi bulunda buebe ne Yehowa. Muntu mukaji mukuabu muena Kristo udi ne tunyinganyinga tukole udi wamba ne: “Mvua mbenga misangu ya bungi bua kuya kuvuabu bambikila bua kujikija lutetuku bualu mvua ngela meji ne: tshivua mukumbanyine bua kudisangisha ne bena mu tshisumbu to.” Ngelelu wa meji wa mushindu’eu udi mua kujiwula muntu! Kadi bidi bikengela kuenza tshinyi bua kubenga kujiwuka nunku?

Shemeja bulunda ne Yehowa

Mu Musambu wa 73, Asafa wakafunda kuleja bimpe muvuaye upampakana. Pavuaye ufuanyikija nsombelu wende ne wa bantu babi bavua ne kantu ku bianza, lubabu luvua lumukuata. Wakamona se: bantu babi bavua ne lutambishi ne tshikisu, kadi bamueneka anu bu bavua mua kuepuka anyi kabayi mua kupeta mene dinyoka. Asafa wakaleja ne: pamu’apa kabivua ne mushinga bua kuikala ne ngikadilu muimpe to.​—Musambu 73:3-9, 13, 14.

Udiku pebe umona diakalenga dia tshidingishilu didi nadi benji ba malu mabi anu muvua Asafa udimona anyi? Asafa wakenza tshinyi bua kulekela meji mabi avuaye nawu aa? Udi wamba ne: ‘Pangakela meji bua kumanya bualu ebu, buakupita kunkengesha, too ne pangakabuela mu muaba wa tshijila wa Nzambi, ne ngakelanganamu meji a ku nshikidilu kuabu.’ (Musambu 73:16, 17) Asafa wakenza bimpe bualu wakasambila Yehowa. Tuetu basue kuamba anu muakalua mupostolo Paulo kuleja, Asafa wakashipa ‘muntu wa pa buloba’ uvua munda muende, e kubishaye “muntu udi ne nyuma.” Pakapetaye lungenyi luimpe lupialupia lua malu a mu nyuma, Asafa wakalua kujingulula se: Yehowa udi ukina malu mabi ne neapeshe bantu babi manyoka mu tshikondo tshidiye mulongolole.​—1 Kolinto 2:14, 15.

Bulelela, bidi bimpe bua kuenza bua Bible  akuambuluishe witabe nsombelu mushindu udiye eu! Yehowa udi utuvuluija ne: mêsu ende ki mmafue to, udi umona bionso bidi bantu babi benza. Bible udi utulongesha ne: ‘Kanudidingi; Nzambi kêna usekibua; bualu bua tshintu tshionso tshidi muntu ukuna, ntshiotshi tshiapolaye . . . Katupangi mu kuenza kua malu mimpe.’ (Galatia 6:7-9) Yehowa neateke bantu babi “mu miaba ya busenu”; neabele ‘panshi mu dibutuka.’ (Musambu 73:18) Nansha ku tototo nansha ku ndandanda, buakane bua Nzambi nebutshimune.

Biakudia bia mu nyuma bidi Yehowa utupesha ku mesa ende ne didisangisha ne bantu ba Nzambi nebikuambuluishe bua kukolesha ditabuja diebe ne kulekela ngenyi mibi ne malu onso adi akutekesha mu mikolo. (Ebelu 10:25) Anu bu Asafa, wewe muikale pabuipi ne Nzambi, neudimuene mutuye ukuatshisha bantu bualu mmubanange. Asafa udi utungunuka wamba ne: ‘Ntu ngikala nebe matuku onso; wewe udi unkuata ku tshianza tshianyi tshia balume. Wewe neundombole ne meji ebe, pashishe, neumbueje mu butumbi.’ (Musambu 73:23, 24) Muena Kristo mukuabu uvuabu bakengesha ku buana buende wakamona bulelela bua mêyi aa. Udi wamba ne: “Kushala kuanyi mulamate tshisumbu kuakammuenesha malu a mushindu mukuabu. Ngakamona bimpe ne: bakulu bena Kristo badi ne dinanga, ki mbampulushi to, mbalami.” Eyowa, bakulu bena Kristo bena muoyo wa luse aba badi benza mudimu mukole bua kuambuluisha bana babu bua kuepuka malu a tunyinganyinga.​—Yeshaya 32:1, 2; 1 Tesalonike 2:7, 8.

Itaba mibelu ya Yehowa

Baluka (sekretere wa muprofete Yelemiya) wakatua mikemu bua tunyinganyinga tuvuaye natu mu mudimu wende. Kadi Yehowa wakamuambuluisha bua kuangata nsombelu muvuaye amu. Wakamuambila ne: ‘Wewe udi udikebela malu manene anyi? Yehowa udi wamba ne: Kudikebediwu nansha; bualu bua mona, nentumine bonso ba pa buloba makenga. Kadi nenkupe muoyo webe bu tshintu tshiudi unyenga mu mvita mu miaba yonso iudi uya.’​—Yelemiya 45:2-5.

Yehowa wakambila Baluka kayi umina miaku ne: tshivua tshimulubakaje ndungenyi lua dikeba bintu luvuaye nalu. Baluka kavua mua kupeta disanka mu mudimu uvua Nzambi mumupeshe au eku wenda ukeba bua kuenza malu manene to. Nansha wewe pebe udi mua kumona se: mamuende wa ditshimuna diteketa mu maboko, nkuepuka malu adi mua kukubueja mu ditanaja ne kuanyisha ditalala didi muntu mua kupetela ku disanka didi Nzambi ufila.​—Filipoi 4:6, 7.

Naomi mukaji mukamba kakalekela kanyinganyinga kamushikika panshi mu Moaba pakafua bayende ne bana bende ba balume babidi to. Kadi bidi bimueneka ne: wakanjiku kunyingalala bikole buende yeye ne bua bakaji ba bana bende babidi abu. Pavuaye ubambila bua baye, wakamba ne: ‘Mutshima wanyi udi utamba kunyingalala bualu buenu, bualu bua Yehowa  wakateka tshianza tshiende kundi.’ Pakafikaye mu Beteleme wakambila bantu ne: ‘Kanumbikidi ne: Naomi [“Disanka dianyi”] kabidi, numbikile ne: Mala [“Dikenga”]; bualu bua Nzambi wa Bukole Buonso wakatamba kunkengesha.’​—Luta 1:13, 20.

Kadi Naomi kakasomba lua pa nkayende bua kudila, kayi ukeba Yehowa ne bantu bende to. Patshivuaye mu Moaba, wakumvua bamba ne: ‘Yehowa wakashala kupingana kudi bantu bende bua kubapaye biakudia kabidi.’ (Luta 1:6) Wakamona se: bivua bitambe buimpe bua yeye kuikala munkatshi mua bantu ba Yehowa. Pashishe, Naomi wakapingana ku Yuda pamue ne Luta mukaji wa muanende ne kumupesha meji a tshivuaye mua kuenza bua mulela wabu Boaza kumupianaye.

Bia muomumue lelu, bena lulamatu badi bafuishe bena dibaka nabu badi bafika ku ditshimuna tunyinganyinga padibu batungunuka ne kuenza mudimu bikole mu tshisumbu. Anu bu Naomi, badi badifila mu malu a mu nyuma, babala Dîyi dia Nzambi dituku dionso.

Masanka adi muntu udi ulonda meji a Nzambi upeta

Miyuki ya mu Bible eyi idi itupesha meji a kumona tshia kuenza padi malu matutonde. Asafa wakaya kukeba diambuluisha ku tabernakle wa Yehowa, ne wakashala muindile Yehowa ne lutulu. Baluka wakatumikila mubelu wakamupeshabu, kulekelaye kupitshisha dîba diende mu dikeba bintu. Naomi wakatungunuka ne kusadila munkatshi mua bantu ba Yehowa, ubela nsongakaji Luta bua malu malenga avua mamuindile mu ntendelelu wa Nzambi mulelela.​—1 Kolinto 4:7; Galatia 5:26; 6:4.

Udi mua kutshimuna diteketa mu mikolo anyi kumbusha tunyinganyinga paudi uvuluka ne: Yehowa udi wambuluisha bantu bende (mu tshibungi anyi muntu pa nkayende) bua kutshimunabu. Bua nanku, ikala welangana meji bua dinanga didi Yehowa mukuleje, bua mudiye mufile mulambu bua kukupikula. Leja ne: udi ne dianyisha bua dinanga diena dîna didi nadi bana betu bena Kristo. Bionso biudi wenza ikala ubienza lungenyi lutuma anu ku bulongolodi bupiabupia bua Nzambi bukadi pa kufika. Leja ne: udi wamba anu muakamba Asafa ne: ‘Bidi bimpe bua meme kusemena pabuipi ne Nzambi. Ngakuvuija Mukalenge Yehowa tshinyemenu tshianyi, bua mmanye bianyi mua kuambila bantu bua midimu yebe yonso.’​—Musambu 73:28.