Udi muvuluke anyi?

Dibala dia nimero ya Tshibumba tshia Nsentedi ya matuku mashale aa divuaku dikusankishe anyi? Nanku anji tetabi bua kuandamuna nkonko idi ilonda eyi:

• Mu Lomo 5:3-5, bua tshinyi mupostolo Paulo wakatela ditekemena ku ndekelu kua malu onso?

Paulo wakatela mulongolongo wa malu adi bena Kristo bapeta: ntatu, ditantamana, dijadikibua ne ditekemena. “Ditekemena” edi ki nditekemena dia kumpala didi muntu upeta padiye utuadija kumanya Bible to, kadi nditekemena dikole, dishindame, ditekemena didi dimueneka patoke didi muena Kristo mua kupeta mu bungi bua matuku.​—15/12, dibeji 22-23.

• Bua tshinyi lelu bena Kristo badi ne bua kujinga kumanya muvua manaya a mu Gelika wa kale enzeka?

Dimanya dia tshivua manaya au ne muvuawu enzeka didi mua kututokeshila mvese ya bungi ya mu Bible. Imue ya kudiyi idi yamba bua ‘kunyema bu mudi mikenji ya manaya yamba,’ ‘kumbusha bujitu buonso ne kushala batangile kudi Yezu tshilejilu tshietu,’ ‘kujikija tshidikijilu tshia lubilu’ ne kupeta tshifulu tshia butumbi anyi difutu. (2 Timote 2:5, Muanda Mulenga Lelu; 4:7, 8; Ebelu 12:1, 2; 1 Kolinto 9:24, 25; 1 Petelo 5:4)​—1/1, dibeji 28-30.

• Mmushindu kayi mupiamupia wa kumanyisha lumu luimpe wakapatuka mu Tshiongo 1914?

Dîba adi bakapatula “Foto-Drama wa bufuki.” Foto-Drama eu uvua filme wa bitupa binayi muikale ne binga bimfuanyi binyungakana ne bikuabu nkama ne nkama bimane tendee bipenta bimpe, bia bungi bikale bienda pamue ne miyuki mikuata pa matadi ivua ibiumvuija. Bakenza bitupa 20 bia filme ya Drama eu ne kubilejabu miaba mivule bua kulongesha bantu mukenji wa mu Bible.​—15/1, dibeji 8-9.

• Mmunyi mudi Kasumbu Kaludiki kashilangane ne tshisumbu tshimanyike kua mbulamatadi?

Nansha mudi bena mu tshisumbu tshimanyike kua mbulamatadi badisunguila baludiki, Kasumbu Kaludiki ki mbakateke kudi muntu nansha, mbakateke kudi Yezu Kristo. Kabiena bilomba bua baludiki ba bisumbu bishilangane bimanyike kua mbulamatadi bidi Bantemu ba Yehowa benza nabi mudimu bikale anu bena mu Kasumbu Kaludiki to. Mu tshisangilu tshia ku tshidimu tshia matuku mashale aa tshia Société Watch Tower Bible and Tract wa mu Pennsylvanie, bena mu Kasumbu Kaludiki bavua baludiki ne aba bavua ku mutu kua Société Watch Tower eu bakadilekela midimu eyi. Bakabapingana kudi bana betu ba balume bakole mu nyuma ba mu “mikoko mikuabo.” (Yone 10:16) Nunku Kasumbu Kaludiki kadi mua kupeta dîba dia bungi dia kudifila mu dilongolola dia biakudia bia mu nyuma ne malu makuabu bua kukumbaja majinga a mu nyuma a bana betu bonso ba buloba bujima.​—15/1, dibeji 29, 31.

• Mbilejilu kayi bibidi bia mu Bible bitudi mua kukonkonona bua kumanya mua kutantamena diteketa mu maboko?

Tshia kumpala ntshia Hana mamuende wa Samuele. Uvua mua kuikala mutekete mu mikolo pavua Eli muakuidi munene wa Isalele mumubande ne bualu buvuaye kayi mujadike. Kadi, wakamumvuija bimpe ne kanemu mushindu uvua malu. Kabidi, Hana kakafikila Eli munda to. Tshilejilu tshibidi ntshia Mâko, eu uvua ne bua kuikala mutekete mu maboko dîba diakabenga mupostolo Paulo bua kuya nende ku luendu lua bu-misionere. Pamutu pa kushala mubungame bua bualu abu, wakatungunuka ne kuenza mudimu ne tshisumi, wenza ngendu ne Banaba.​—1/2, dibeji 20-22.

• Bua tshinyi bena Kristo badi ne bua kudimukila dipesha bantu bakuabu programe ya ordinatere anyi diyangata kudibu?

Programe ya bungi (kusangisha ne ya manaya) itu yenda anu ne mukanda wa mbulamatadi udi wanyishila muena programe anyi muntu yonso udi wenza nende mudimu bua kumubueja mu ordinatere anu umue patupu. Kutentuila bantu bakuabu programe eyi anyi mene kubabanyinayi tshianana nkushipa kua mukenji udi utangila bukenji bua bayenji. Bena Kristo badi ne bua kutumikila mikenji, ‘bapesha Kaisa bintu bia Kaisa.’ (Mâko 12:17)​—15/2, dibeji 28-29.

• Cyrille ne Méthode bavua banganyi, ne mmunyi mudibu bambuluishe bantu bua kulonga Bible?

Bavua bana ba muntu, baledibue ku Tesalonike (mu Gelika) mu bidimu bia nkama muanda-mukulu. Bakapatula mfundilu wa miakulu ya ba-Slave ne kukudimunabu mikanda ya bungi ya mu Bible mu muakulu wa tshi-Slavon tshia kale.​—1/3, dibeji 28-29.

• Tshiambilu tshia: ‘meji mateka ku nyuma’ tshidi tshiumvuija tshinyi?​—Lomo 8:6.

Tshidi tshiumvuija ne: bukole buenzeji bua Yehowa budi butulombola, butukokesha ne butusaka mu malu atudi tuenza. Bua nyuma wa Nzambi kuikalaye utulombola, tudi ne bua kuikala tubala ne tulonga Bible, tutumikila mikenji ya Nzambi ne muoyo mujima ne tulomba nyuma eu kudi Nzambi.​—15/3, dibeji 15.

• Tshia kuenza ntshinyi biwikala wela meji ne: ki mbakumvue bimpe?

Mbimpe kukeba bua kutokesha bualu bunudi nabu ne lungenyi lua dinanga. Biobi kabiyi bikumbane nanku, kuteketshi mu maboko to. Lomba lungenyi ne diambuluisha kudi Yehowa, yeye ke “udi uteta mitshima.” (Nsumuinu 21:2; 1 Samuele 16:7)​—1/4, dibeji 21-23.