Diyikila ne bakishi didi mua kukumbaja majinga etu a mu nyuma anyi?

BUONSO buetu tutu ne majinga a mu nyuma ne a ku mubidi. Ke bualu kayi bantu ba bungi batu bela nkonko bu eyi: Bua tshinyi tudi ne muoyo? Bua tshinyi bantu badi bakenga? Ne tshitu tshituenzekela patutu tufua ntshinyi? Bantu ba bungi badi basue bulelela batu bakeba mandamuna a nkonko eyi ne a mikuabu ya buena eyi kudi bafue, batu baya kudi bena mbuku anyi bena mikendi bua kuyikila ne mikishi ya bafue.

Mu matunga a bungi, bantu batu basue kuyikila ne bakishi pabu se batu baya kutendelela. Tshilejilu, mu Brésil bantu batu bamanye kuyikila ne bakishi mbatue ku 4 000 000; badi balonda malongesha mafunda kudi Hyppolyte Léon Denizard Rivail, mulongeshi ne muena nkidi wa mu ditunga dia France wa mu bidimu bia 1800, wakafunda mikanda mu dîna dia Allan Kardec. Kardec eu wakabanga malu a diyikila ne bakishi musangu wa kumpala mu 1854. Kunyima wakela bena mbuku ba miaba ya bungi nkonko ne kufundaye mandamuna abu mu mukanda wende (Le livre des Esprits) wakapatulaye mu 1857. Wakafunda kabidi mikanda mikuabu ibidi (Le livre des Médiums ne L’Évangile selon le spiritisme).

Diyikila ne bakishi ditu dienda pamue ne bilele bia mu bitendelelu ebi: ditendelela bankambua, buloji, dipaka ta dipakisha manga, majimbu anyi ditendelela Satana. Kadi, bantu badi balonda malongesha a Kardec batu bamba ne: abu malu wowu atu wawu mushindu. Pa tshibidilu, mu mikanda yabu mutu amue mêyi a mu Bible, ne batu balejamu ne: Yezu udi “mulombodi ne tshilejilu tshidi bantu bonso ne bua kulonda.” Batu bamba ne: malongesha a Yezu “mmikenji ya Nzambi menemene.” Allan Kardec uvua wangata mikanda ya malu a bakishi bu mikenji ya musangu muisatu idi Nzambi mupeshe bantu kunyima kua ya Mose ne ya Yezu.

Diyikila ne bakishi ditu dikoka bantu ba bungi bualu batu balomba bantu bua kunanganganabu ne kuenzelangana malu mimpe. Dimue dilongesha ndiodi edi: “Kakuyi dinanga, lupandu kaluenaku to.” Bantu ba bungi batu mu malu a diyikila ne bakishi batu benza midimu ya diambuluisha nayi bantu ne tshisumi, bafila diambuluisha ne biibakisha mpitadi, tulasa ne bikuabu. Tshia bushuwa mba kuela kalumbandi. Kadi malongesha a bena malu a diyikila ne bakishi mmafuanangane ne malongesha a Yezu adi mu Bible anyi? Tuangate bilejilu bia malu abidi aa: ditekemena didiku bua bafue ne tshidi bantu bapetela makenga.

Nditekemena kayi didiku bua bafue?

Bena malu a diyikila ne bakishi ba bungi batu bitabuja ne: padi muntu ufua, udi ubuela mu mubidi mukuabu. Umue mukanda wabu udi wamba ne: “Dibuela mu mubidi mukuabu padi muntu ufua ndilongesha dimu’epele didi dituleja buakane bua Nzambi; ndilongesha dimu’epele didi mua kuleja malu enzeka matuku atshidi alua ne kukolesha ditekemena dietu.” Bena malu a diyikila ne bakishi batu bamba ne: padi bantu bafua, anyima idi mu mibidi idi ipatuka anu bu mudi tshibeyibeyi tshipatuka mu lukutu luatshi.” Batu bamba ne: anyima eyi idi ilua kubuela tshiakabidi mu mibidi ya bantu bua kumbusha mpekatu ivuayi mienze pavuayi ne muoyo kumpala. Kadi kabena bavuluka mpekatu ayi to. Mukanda mukuabu udi wamba ne: “Nzambi wakamona bikumbanyine bua kubenga kuvuluka mpekatu ya kale.”​—L’Évangile selon le spiritisme.

Allan Kardec wakafunda ne: “Kubenga dilongesha dia se: muntu udi ubuela mu mubidi mukuabu padiye ufua, nkubenga kabidi bulelela bua mêyi a Kristo.” Kadi pabi, Yezu kakatela mêyi aa a “dibuela mu mubidi mukuabu kunyima kua lufu” to, ne kakalongesha dilongesha edi nansha kakese. (Bala tshiena-bualu tshia “ Bible utu ulongesha ne: muntu utu ubuela mu mubidi mukuabu kunyima kua lufu anyi?” mu dibeji dia 22.) Yezu wakalongesha dibika dia bafue. Yezu mene wakabisha bantu basatu ku lufu pavuaye wenza mudimu wende pa buloba: wakabisha muana wa balume wa mukamba wa mu Naina, kubisha muana wa bakaji wa mukalenge wa mu sunagoga,  ne mulunda wende munene Lazalo. (Mâko 5:22-24, 35-43; Luka 7:11-15; Yone 11:1-44) Tukonkononayi mushindu uvuaye mubishe mukuabu muntu ne tshivuaye wamba bua “dibika dia bafue.”

Dibika dia Lazalo ku lufu

Yezu wakumvua ne: mulunda wende Lazalo uvua usama. Kunyima kua matuku abidi, kuluaye kuambila bayidi bende ne: ‘Mulunda wetu Lazalo udi mulale tulu; kadi ndi nya kumubisha ku tulu.’ Bayidi kabavua bumvue tshivua Yezu usua kuamba to, ke yeye kubambila bimpe ne: “Lazalo udi mufue.” Ndekelu wa bionso pakaya Yezu ku lukita lua Lazalo, ukavua mufue kumana kupita matuku anayi. Nansha nanku kulombaye bua bumbushe dibue divua dikanga ku mushiku wa lukita. Pashishe wakela lubila ne: ‘Lazalo, lupuka.’ Bualu bua dikema e kuenzeka. ‘Wakadi mufue wakalupuka, munyengela bilulu ku bianza ne ku makasa. Kumpala kuende kuakadi kunyengela tshitambala. Yezu wakabambila ne: numujingulule, aye biende.’​—Yone 11:5, 6, 11-14, 43, 44.

Kakuyi mpata, atshi katshivua dibuela mu mubidi mukuabu kunyima kua lufu nansha. Yezu wakamba ne: Lazalo uvua mulale, kavua mumanye bualu nansha bumue to. Anu mudi Bible wamba, ‘malu akadiye upangadija akajimina.’ Kavua ‘mumanye bualu [nansha] bumue.’ (Musambu 146:4; Muambi 9:5) Pakabika Lazalo ku lufu, kavua muntu mukuabu muikale ne munga anyima mu mubidi wende nansha. Uvua ne bumuntu bua muomumue ne buvuaye nabu kumpala, uvua anu bukole buende abu, ne kavua mupue muoyo malu avuaye mumanye kumpala kua kufuaye to. Wakapetulula muoyo uvuaye mujimije ne buana buonso awu, e kusombaye ne bananga bende bavua bamudile pavuaye mufue.​—Yone 12:1, 2.

Kadi Lazalo wakalua kufua kabidi. Nunku dibika diende divua ne tshipatshila kayi? Dibika dia Lazalo ne dia bantu bakuabu ku lufu didi dikolesha dieyemena dietu dia bualu budi Nzambi mulaye bua se: basadidi Bende ba lulamatu nebabike ku lufu mu tshikondo tshidiye mulongolole. Bishima bia Yezu ebi biakumvuija bimpe menemene mêyi ende aa: ‘Meme ndi bianyi dibisha, ndi bianyi muoyo: udi ungitabuja, nansha biafuaye, neikale ne muoyo kabidi.’​—Yone 11:25.

Yezu wakamba bua dibika adi ne: ‘Dîba nedilue diumvua bonso badi mu nkita dîyi diende, nebajuke; bakenzenza bimpe nebajuke mu dibika dia muoyo, bakenzenza bibi nebajuke mu dibika dia dipila.’ (Yone 5:28, 29) Anu muvuabi bienzeke bua Lazalo, ke muikale dibika dia bantu bafue. Kadiakuikala disangisha dia anyima ivua ne muoyo muaba kampanda ne dia mibidi mijula ku lufu ivua mimane kuandamuka buloba anyi mene milue bimue bitupa bia bintu bidi ne muoyo pa buloba nansha. Mufuki wa diulu ne buloba, udi ne meji ne bukole kabiyi ndekelu ke udi mua kujula muntu ku lufu.

Dilongesha dia dibisha dia bantu ku lufu divua Yezu mulongeshe kadienaku dituleja ne: Nzambi mmunange muntu ne muntu yonso anyi? Kadi tuambe tshinyi bua lukonko luibidi alu?

Bua tshinyi bantu badi bakenga?

Makenga adi afumina ku malu adibu benza kudi bantu badi babule meji, dimanya, anyi mene kudi benji ba malu mabi. Kadi tudi mua kuamba tshinyi bua imue mianda mibi idi yenzeka itudi katuyi mua kudingila muntu? Tshilejilu, njiwu ne bipupu bia ku bintu bifuka bidiku bua tshinyi? Bamue bana batu baledibua bilemenda bua tshinyi? Bua Allan Kardec, malu aa mmanyoka. Wakafunda ne: “Bituikala bapete manyoka, abi bidi bileja ne: tudi benze bualu kampanda bubi. Pikala bualu bubi abu kabuyi buenza patudi ne muoyo mpindieu, budi ne bua kuikala bua patuvua ne muoyo kumpala.” Batu balongeshe  bena malu a diyikila ne bakishi bua kusambila ne: “Mukalenge, wewe mene ke buakane. Mvua muakanyine bua kupeta disama diuvua muntumine . . . Ndi ndiangata bu dimfuila luse bua malu anyi a kale ne diteta dia ditabuja ne ditumikila dianyi dia disua Diebe dinene.”​—L’Évangile selon le spiritisme.

Yezu uvuaku mulongeshe nunku anyi? Nansha. Yezu uvua mumanye bimpe mêyi a mu Bible aa: “Buonso buabo badi ne bikondo bidi malu abatulukila.” (Muambi 9:11) Uvua mumanye bimpe ne: minga misangu malu mabi atu pawu enzeka amu nanku. Kaatu bua mpekatu idi muntu muenze to.

Tangila bualu buakamona Yezu ebu: “Pavua Yezu upita, kumonaye muntu mulela mpofu. Balongi bende kumukonkabo ne: ‘Mulongeshi, padibo balele muntu ewu mpofu, nganyi udi muenze bibi? nYeye anyi mbaledi bende?’” Diandamuna dia Yezu diakatokesha tshilumbu etshi bimpe: “Nansha muntu ewu, nansha baledi bende ki mbenze bibi to. Kadi mbienzeke nenku bua mudimu udi [Nzambi] wenza umuenekele kudiye. Yezu mumane kuamba nanku, kutuilaye mate panshi, kusopa nawo buloba, kubulaba mpofu pa mesu. Kumuambilaye ne: ‘Ndaku, wowe mayi mu dijiba dia Silowe.’ . . . Mpofu kuyaye kuowa mayi, kupingana umona bitentame.”​—Yone 9:1-3, 6, 7, MMM.

Mêyi a Yezu akaleja ne: ni muntu au ni mbaledi bende kabavua bamanye bualu bua bumpofu buvuaye muledibue nabu nansha. Nunku Yezu kakalongesha ne: muntu uvua munyokibue bua mpekatu ivuaye muenze pavuaye ne muoyo kumpala to. Uvua mumanye bimpe ne: bantu bonso mbapiane mpekatu, kadi mpekatu wa Adama ki udibu bapiane, ki mpekatu ivuabu benze kumpala kua kuledibuabu to. Bua mpekatu wa Adama, bantu bonso badi baledibua ne mubidi mupange bupuangane, basama ne bafua. (Yobo 14:4; Musambu 51:5; Lomo 5:12; 9:11) Ke malu akatuminabu Yezu bua kujikija aa. Yone Mubatiji wakamba ne: Yezu uvua ‘Muan’a mukoko wa Nzambi, udi umusha bubi bua ba pa buloba!’​—Yone 1:29. *

 Vuluka kabidi ne: Yezu kavua muambe ne: Nzambi ke uvua muenzeje bua muntu au kuledibua mpofu bua yeye Yezu kulua kumuondapa dimue dituku nansha. Bu Nzambi mua kuikala muenze nanku, bivua ne bua kuikala bualu bubi be! Bualu bu nanku buvua mua kutumbisha Nzambi anyi? Tòo. Kadi diondapa mpofu au mu tshishima diakenza bua ‘mudimu udi Nzambi wenza umueneke.’ Anu bu bantu bakuabu ba bungi bavua Yezu muondape, diondapa mpofu adi diakaleja ne: Nzambi mmunange bantu, ne diakajadika ne: dilaya Diende dia kujikija masama ne makenga a bantu mu tshikondo tshidiye mulongolole ndilelela.​—Yeshaya 33:24.

Kabienaku bitukolesha ku muoyo patudi tumvua ne: Tatu wetu wa mu diulu kêna utukengesha to, kadi udi upesha ‘badi bamulomba bintu bimpe anyi?’ (Matayo 7:11) Mbutumbi kayipu buikala Mutambe Bunene ne bua kupeta pamona mêsu a bampofu, pumvua matshi a bampudi matshi, penda balema, patumpikabu, ne panyemabu lubilu!​—Yeshaya 35:5, 6.

Bible udi ukumbaja majinga etu a mu nyuma

Yezu wakamba ne: “Muntu kena ne muoyo bua mampa nkayawo nansha, apo nku muaku wonso udi upatuka mukana mua [Nzambi].” (Matayo 4:4, MMM) Eyowa, tudi tukumbaja majinga etu a mu nyuma patudi tubala Bible, ne patudi ne ngikadilu udiye utulomba. Kuya kudi bena mbuku kakuena kukumbaja majinga etu a mu nyuma bimpe menemene to. Kuenza nunku se mbakubenge patoke mu mikanda ivua Allan Kardec mubikile ne: yoyi ke mikenji ya kumpala idi Nzambi musokoluele bantu.​—Dutelonome 18:10-13.

Bantu ba bungi, kusangisha ne bena malu a diyikila ne bakishi mbamanye bimpe ne: Nzambi udi Muntu Mutambe Bunene, wa tshiendelele, mupuangane, muena bulenga, muimpe ne muakane. Kadi Bible udi utuambila malu makuabu. Udi wamba ne: Nzambi udi ne dîna, dîna diende n’Yehowa, tudi ne bua kunemeka dîna edi anu muvua Yezu udinemeka. (Matayo 6:9; Yone 17:6) Didi dileja ne: Nzambi mmuntu mulelela udi bantu mua kudia nende bulunda. (Lomo 8:38, 39) Patudi tubala Bible, tudi tumona ne: Nzambi udi ne luse, ne “kena mutuenzele bu mudi mibi yetu, kena mutufute bu mudi malu etu a tshishiku.” (Musambu 103:10) Mukalenge Mutambe Bunene Yehowa udi utuleja dinanga, bunene ne meji ende mu Bible. Yeye ke udi ulombola bantu bena butumike ne ubakuba. Kumanya Yehowa ne muanende Yezu Kristo ‘mmuoyo wa tshiendelele.’​—Yone 17:3.

Bible udi utumanyisha malu adi Nzambi mulongolole atudi nawu onso dijinga, ne udi utuambila tshitudi ne bua kuenza bituikala basue kumusankisha. Patudi tukonkonona Bible ne ntema, tudi tupeta mandamuna malelela a nkonko yetu. Bible udi kabidi utuleja tshidi tshimpe ne tshidi tshibi, ne utupesha ditekemena dishindame. Udi utujadikila ne: mu tshitupa tshîpi emu, Nzambi ‘neakupule tshinsonji tshionso ku mêsu kua [bantu]; ne lufu kaluakuikalaku kabidi; madilu kaakuikalaku kabidi, nansha muadi, nansha kanyinganyinga kabidi; malu a kumudilu neumuke.’ (Buakabuluibua 21:3, 4) Yehowa neakuate mudimu ne Yezu Kristo bua kumbushila bantu mpekatu ne dipanga bupuangane bidibu bapiane, ne bantu bena butumike nebapete muoyo wa tshiendelele mu mparadizu pa buloba. Dîba adi, bintu bionso bidibu nabi dijinga, kabidi ne bia mu nyuma, nebabipete bionso nkong.​—Musambu 37:10, 11, 29; Nsumuinu 2:21, 22; Matayo 5:5.

[Mêyi adi kuinshi]

[Kazubu mu dibeji 22]

 BIBLE UTU ULONGESHA NE: MUNTU UTU UBUELA MU MUBIDI MUKUABU KUNYIMA KUA LUFU ANYI?

Dilongesha dia se: muntu utu ubuela mu mubidi mukuabu padiye ufua dituku mu Bible anyi? Tangila imue mvese itu bantu badi bitabuja dilongesha edi batela:

‘Baprofete ne mikenji ya Mose biakamba malu adi kaayi manji kulua too ne pakalua Yone. Eu udi Eliya, ukadi pa kulua biende.’​—Matayo 11:13, 14.

Yone Mubatiji uvua Eliya muledibue tshiakabidi anyi? Pakakonkabu Yone eu ne: ‘Wewe udi Eliya anyi?’ Wakandamuna bimpe ne: ‘Nansha.’ (Yone 1:21) Kadi, bakavua bamane kumanyisha ne: Yone uvua ne bua kulongoluela Masiya njila “ne nyuma ne bukole bia Eliya.” (Luka 1:17; Malaki 4:5, 6) Mbuena kuamba ne: Yone uvua Eliya mu mushindu wa se: wakenza mudimu wa buena uvua Eliya muenze.

‘Bikala muntu kayi muledibue tshiakabidi, kêna mumanye mua kutangila bukalenge bua Nzambi. Kukemi bua dîyi dingakukuambila ne: bunudi nabu mbua kuledibua tshiakabidi.’​—Yone 3:3, 7.

Mupostolo mukuabu wakalua kufunda ne: ‘Batumbishe Nzambi udi kabidi Tatu wa Mukalenge wetu Yezu Kristo, nyeye wakatulela tshiakabidi bu mudi luse luende lunene, bua kutupaye ditekemena didi ne muoyo bua dibika dia Yezu Kristo dia ku bafue.’ (1 Petelo 1:3, 4; Yone 1:12, 13) Bulelela, diledibua tshiakabidi divua Yezu wamba muaba eu divua bumue bualu bua mu nyuma buvua ne bua kuenzekela bayidi bende patshivuabu ne muoyo, kadi kavua wamba bua dibuela mu mubidi mukuabu kunyima kua lufu luabu nansha.

“Padi muntu ufua udi ushala ne muoyo tshiendelele: pajika matuku anyi onso a muoyo pa buloba, nengindile, mumanye ne: nempingane kabidi.”​—Mêyi a Yobo 14:14 mangatshila mu Bible udibu bamba ne: ng’wa mu tshiena-Greke, adibu batela mu mukanda wa L’Évangile selon le spiritisme.

Mukanda wa Nzambi udi wamba mu mvese eu ne: ‘Biafua muntu, neikale ne muoyo kabidi anyi? Ngakadi kuindila matuku onso a tshikondo tshianyi tshia kuluangana mvita, too ne pakadi kulua tshikondo tshia kundekela.’ Bala mvese idi kumpala ne kunyima kua mvese eu. Neumone ne: bafue mbindile ‘dilekela’ mu nkita. (Mvese wa 13) Padibu bashale bindile apu, kabena ne muoyo to. ‘Muntu udi ufua ne bukole buende budi bujimina; e, muntu udi upuola muoyo wende.’​—Yobo 14:10.

[Tshimfuanyi mu dibeji 21]

Ditekemena dia dibika dia bafue didi dileja ne: Nzambi mmunange muntu yonso wa kutudi bikole

[Bimfuanyi mu dibeji 23]

Nzambi neajikije makenga onso a bantu