Mushindu uvua bukamba butatshishe bakaji babidi

SANDRA mmukaji mukamba wa mu ditunga dia Australie. Dîba diakafua bayende (kukadi kupite bidimu ndambu mpindieu), kanyinganyinga kakamba kumushipa. Udi wamba ne: “Dijimina dia mu tshimpitshimpi dia bayanyi uvua mulunda wanyi munene diakambungamija bikole be! Tshiena mumanye mungakumbuka mu lupitadi meme kufika ku nzubu, anyi malu makuabu angakenza dituku adi to. Mu mbingu yakalonda, tunyinganyinga tumvua natu e kubanga kunsamisha bikole.”

Elaine (mamu mukole ne mulunda wa Sandra) mmushale mukaji mukamba kukadi mpindieu tuamba bidimu bu bisambombo bijima. Wakatshiunga bayende David munkatshi mua ngondo isambombo kumpala kua yeye kufua disama dia kansere. Matuku makese kunyima kua lufu lua bayende, mêsu ende akanji kushala bu mafue, bifumine anu ku kanyinganyinga kakole kavuaye naku. Kumana kupita bidimu bibidi, wakakuluka dimue dituku mu bantu. Munganga uvua umuondapa kakamukuata ne disama nansha dimue to. Kadi, wakamona ne: Elaine uvua mushale mulame kanyinganyinga mundamunda, ke yeye kumuambila bua apingane ku nzubu ne enze muende muonso bua kudila muadi. Elaine udi wamba ne: “Kuakapita matuku a bungi bua kanyinganyinga kanyi kushisha kujika.” Udi wamba kabidi tshivuaye wenza pavuaye nkayende ne: “Mvua ne tshibidilu tshia kuya mu nzubu wa bulalu, ndikuta bilamba bia David ku mutu.”

Bulelela, kufuisha mulume kudi mua kukebesha ntatu ya bungi, bualu bukamba ki ng’anu kusomba kuyi ne mulume to, budi kabidi ne makuabu malu a bungi. Tshilejilu, dîba dikuabu Sandra uvua udiumvua kayi bu yeye to. Anu mutu bakaji ba bungi batshidi bafuminaku ku difuisha babayabu badiumvua, uvua kabidi udimona kayi ne pa kutua dikasa. Sandra udi wamba ne: “Bayanyi ke uvua usuika dîyi dia ndekelu mu malu atuvua tuenza, pakafuaye lufu lua tshimpitshimpi, ngakashala ndiangatshila mapangadika nkayanyi. Tshitshivua kabidi mmona tulu to. Mvua anu mutshioke. Tshivua mumanye tshia kuenza to.”

Malu a buena a Sandra ne Elaine aa atu enzeka dituku dionso edi pa buloba bujima. Masama, njiwu, mvita, dishipa bantu ba dikoba ne bisa bikuabu, ne tshikisu ke bidi bitamba kuvudija bungi bua bakaji bakamba. * Ba bungi ba ku bakaji aba badi bakenga ne tunyinganyinga munda muabu, kabayi bamanye tshia kuenza to. Kadi mpindieu, ntshinyi tshidi balunda ne balela ba bakamba mua kuenza bua kubambuluisha? Tshiena-bualu tshidi tshilonda tshidi ne mibelu idi mua kukuambuluisha.

[Mêyi adi kuinshi]