Sanka pamue ne Nzambi wa disanka

“Mpindiewu, bana betu, ikalayi ne disanka. . . . Nanku [Nzambi] wa dinanga ne bupole neikale nenu.”​—2 KOLINTO 13:11, Mukanda wa Mvidi Mukulu.

1, 2. (a) Bua tshinyi bantu ba bungi kabena ne disanka? (b) Disanka ntshinyi, ne mmunyi mutudi mua kudipeta?

 MU MATUKU mabi aa, bantu ba bungi kabena bamona tshidi mua kubasankisha to. Padi makenga abakuata anyi akuata muntu udibu banange, badi mua kumvua anu bu Yobo, wakamba ne: ‘Muntu udi muledibue kudi mukaji udi ne matuku makese a muoyo wende ne udi mûle tente ne ntatu.’ (Yobo 14:1) Bena Kristo batu pabu bapeta ntatu mikole ya mu “matuku makole” aa, ke bualu kayi nansha basadidi ba Yehowa ba lulamatu batu pabu bateketa mu mikolo imue misangu.​—2 Timote 3:1, MMM.

² Kadi bena Kristo badi mua kuikala ne disanka nansha padibu mu ntatu. (Bienzedi 5:40, 41) Bua wewe kumvua mudibi mua kuenzeka nunku, tshia kumpala anji tangila tshidi disanka diumvuija. Tudi mua kuamba ne: disanka nkuikala musanguluke bua dipeta tshintu kampanda tshimpe anyi bua ditekemena dia kutshipeta. * Nanku tuetu babale mabenesha atudi nawu mpindieu dimue ku dimue, ne bele kabidi meji ku masanka adi matuindile mu bukua-panu bupiabupia bua Nzambi, tudi mua kuikala anu ne disanka.

3. Bua tshinyi tudi mua kuamba ne: muntu yonso udi anu ne amue malu a kusankila?

³ Muntu yonso utu ne amue mabenesha adiye ne bua kulejila Nzambi dianyisha. Tatu wa dîku udi mua kujimija mudimu wende. Tshia bushuwa, nebimutonde bikole. Mmusue kupetela bena dîku diende tshiakudia ne tshia kuvuala. Nansha nanku, bikalaye ne bukole bua mubidi, udi ne bua kuikala ne dianyisha bua muanda eu. Yeye mupete mudimu mukuabu, neikale mua kuwenza bikole. Tuangate tshilejilu tshikuabu tshia muanetu wa bakaji muena Kristo udi ne disama dimutshibuile panshi. Kadi udi mua kuela Nzambi tuasakidila bualu balunda ne balela bende badi bamuambuluisha bua kutantamena disama edi ne lutulu ne muoyo mukole. Bena Kristo balelela bonso, nansha buobu ne malu kayi, badi mua kusanka bua mudibu bamanye Yehowa, “Nzambi wa disanka,” ne Yezu Kristo, “Mukokeshi umuepele ne wa disanka.” (1 Timote 1:11; 6:15, NW) Kakuyi mpata, Yehowa Nzambi ne Yezu Kristo badi ne disanka kadiyi kuelekeja. Mbalame disanka diabu nansha mudi malu adi pa buloba mashilangane bikole ne avua Yehowa mulongolole ku tshibangidilu. Tshilejilu  tshiabu tshidi mua kutulongesha malu a bungi bua mushindu wa tuetu kulama disanka dietu.

Kabatu banji kujimija disanka diabu

4, 5. (a) Ntshinyi tshiakenza Yehowa pakamutombekela bantu babidi ba kumpala? (b) Mmunyi muvua Yehowa mutungunuke ne kuangata bantu bimpe?

⁴ Adama ne Eva bavua ne mubidi muimpe ne lungenyi lupuangane pavuabu mu budimi bua Edene. Bavua ne mudimu muimpe ne muaba mulenga wa kuwenzela. Tshivua tshipite bionso ntshia se: bavua ne diakalenga dia kuyikila ne Yehowa pa tshibidilu. Dijinga dia Nzambi divua dia kubamona anu ne nsombelu wa disanka. Kadi baledi betu ba kumpala bakakeka bintu bimpe bionso ebi; bakiba tshimuma tshikandika tshia “mutshi wa lungenyi lua kujingulula malu mimpe ne malu mabi.” Bupidia buabu ebu ke budi bukebeshe diakabi dionso ditudi tuetu ndelanganyi yabu tumona lelu’eu.​—Genese 2:15-17; 3:6; Lomo 5:12.

⁵ Kadi, Yehowa kakalekela bua lungenyi lua tshikeku elu lua Adama ne Eva lujimije disanka divuaye nadi nansha. Uvua mujadike ne: mitshima ya bamue bantu ba mu ndelanganyi yabu ivua mua kubasaka bua kumusadila. Bushuwa, ke tshivuaye mujadike bimpe menemene bualu kumpala kua Adama ne Eva kulelabu muanabu wa kumpala, wakamanyisha dijinga diende dia kupikula bana babu ba butumike! (Genese 1:31; 3:15) Mu nkama ya bidimu yakalonda, bantu ba bungi bakalonda dikasa dia Adama ne Eva, kadi Yehowa kakabela nyima bua bupidia budi buasakane ebu nansha. Wakatangija ntema yende kudi balume ne bakaji ‘bakasankisha mutshima wende,’ aba bakenza muabu muonso bua kumusankisha bualu bavua bamunange.​—Nsumuinu 27:11; Ebelu 6:10.

6, 7. Mmalu kayi akambuluisha Yezu bua kushala anu ne disanka?

⁶ Kadi Yezu pende, mmunyi muakalamaye disanka diende? Bu muvuaye tshifukibua tshia bukole tshia mu nyuma mu diulu, uvua ne mishindu yonso ya kumona malu avua balume ne bakaji bavua pa buloba benza. Nansha muvuabu bapange bupuangane, Yezu uvua anu mubanange. (Nsumuinu 8:31) Kunyima, pakaluaye pa buloba, ne ‘kusombaye munkatshi’ mua bantu, uvua anu mubanange. (Yone 1:14, Muanda Mulenga Lelu) Ntshinyi tshiakambuluisha Muana eu mupuangane wa Nzambi bua kushala muangate bantu bapange bupuangane mushindu’eu?

⁷ Tshia kumpalampala, Yezu kavua unekesha mu malu avuaye ujinga kuenza anyi avuaye ujinga bua bakuabu kuenza nansha. Uvua mumanye ne: kavua ne bua kukudimuna mitshima ya bantu bonso ba pa buloba to. (Matayo 10:32-39) Ke bua tshinyi uvua usanka nansha pavua muntu umue tshianana witaba mukenji wa Bukalenge. Nansha muvua imue misangu ngikadilu ne lungenyi bia bayidi bende kabiyi bimpe, Yezu uvua mumanye ne: mu mitshima yabu bavua basue kuenza disua dia Nzambi, ne uvua mubanange bua bualu abu. (Luka 9:46; 22:24, 28-32, 60-62) Nunku, pavuaye usambila Tatuende wa mu diulu, Yezu wakumvuija mu tshikoso bualu buimpe buvua bayidi bende benze too ne dîba adi ne: ‘Bakutumikila dîyi diebe.’​—Yone 17:6.

8. Tela imue mishindu itudi mua kuidikija Yehowa ne Yezu bua tuetu kulama disanka dietu.

⁸ Kakuyi mpata, bidi mua kutuambuluisha tuetu bonso bituelangana meji bimpe menemene bua tshilejilu tshituleja kudi Yehowa Nzambi ne Yezu Kristo mu muanda eu. Tudiku mua kutamba kuidikija Yehowa, katuyi pamu’apa tupita kunyingalala padi malu kaayi enzeka mushindu utuvua belele meji anyi? Tudiku mua kuidikija Yezu bimpe menemene mu dikala anu ne disanka mu nsombelu itudi nayi mpindieu, ne tubenga kunekesha mu malu atudi tujinga bua tuetu anyi bakuabu kuenza? Tumonayi mutudi mua kutumikila amue mêyi aa mu muanda udi ne mushinga wa bungi ku mêsu kua bena Kristo ba lukunukunu ba miaba yonso: mudimu wa budimi.

Lama disanka diebe mu mudimu wa buambi

9. Mmunyi muvua Yelemiya mupetulule disanka diende, ne mmunyi mudi tshilejilu tshiende mua kutuambuluisha?

⁹ Yehowa mmusue bua tuikale ne disanka mu mudimu wende. Disanka dietu kadiena ne bua kuikala dilondeshila ku bipeta bitudi tupatula mu mudimu eu nansha. (Luka 10:17, 20) Muprofete Yelemiya wakayisha bidimu bia bungi muaba uvua kauyi upatula bipeta bimpe to. Pavuaye wela anu meji bua bupidia bua bantu, uvua ujimija disanka diende. (Yelemiya 20:8) Kadi pavuaye wela meji bua buimpe bua mukenji au, uvua upetulula  kabidi disanka. Wakambila Yehowa ne: ‘Ngakasangana mêyi ebe, ngakaadia; mêyi ebe akadi kundi bu disanka ne akasankisha mutshima wanyi; bualu bua badi bambikila ku dîna diebe, wewe Yehowa.’ (Yelemiya 15:16) Bulelela, Yelemiya wakasanka bua mudimu wa diyisha Dîyi dia Nzambi uvuaye nawu. Tuetu petu tudi mua kusanka mushindu’au.

10. Mmunyi mutudi mua kulama disanka dietu mu buambi nansha muaba utudi tuyishila kawuyi upatula tshintu mpindieu?

¹⁰ Nansha bantu ba bungi buobu babenga kuitaba lumu luimpe, tudi ne bualu bua kusankila patudi mu mudimu wa budimi. Vuluka ne: Yehowa uvua mujadike bimpe ne: mitshima ya bamue bantu ivua mua kubasaka bua kumusadila. Nenku anu bu yeye, tuikale anu batekemene bua se: ndekelu wa bionso bamue bantu nebafike ku dimanya tshilumbu tshia bukokeshi bua buloba bujima ne nebitabe mukenji wa Bukalenge. Katuena ne bua kupua muoyo bua se: nsombelu ya bantu itu ishintuluka. Nansha muntu udi utamba kudimona ne disanka dia bungi udi mua kubanga kuela meji bikole bua tshidiye wikadila ne muoyo padiye ujimija bintu anyi upeta lutatu luvuaye kayi muelele meji. Newambuluisheku muntu wa mushindu’eu padiye ‘umanya majinga ende a mu nyuma’ anyi? (Matayo 5:3, NW) Muntu kampanda wa mu muaba utudi tuyishila udi mua kudilongolola bua kuteleja lumu luimpe pawaya kuyishamu!

11, 12. Mbualu kayi buakenzeka mu musoko kampanda, ne budi butulongesha tshinyi?

¹¹ Bantu badi mu teritware wetu badi kabidi mua kushintuluka. Tuangate tshilejilu. Mu musoko kampanda mukese muvua tshisumbu tshia bansonga baselangane bavua balunda ba pa muoyo, bavua kabidi ne bana. Pavua Bantemu ba Yehowa baya kubayisha, ku nzubu yonso bavua anu babandamuna ne: “Kabiena bitusankisha to!” Pavua muntu uteleja mukenji wa Bukalenge, bena mutumba nende bavua balua musangu umue bua kumutekesha mu maboko bua kayikidi kabidi ne Bantemu to. Kabiyi mua dibiamba, bivua bikole bua kuyisha mu musoko eu. Nansha nanku, Bantemu kabakapungila to; bakatungunuka anu ne kuyisha. Ntshinyi tshiakenzeka?

¹² Mu bungi bua matuku, bana ba bungi ba mu musoko au bakakola, kuselabu ne kusombelabu ku yabu nzubu anu muomu amu. Pakamona bamue ba munkatshi mua bansonga aba ne: nsombelu wabu kavua mubapeteshe disanka dia bushuwa, bakatuadija kukeba bulelela. Bakabupeta pakitababu lumu luimpe luvua Bantemu bamanyisha. Biakenzeka ne: kunyima kua bidimu bia bungi, tshisumbu tshikese tshiakatuadija kudiunda mu musoko eu. Elabi meji bua disanka divua nadi bamanyishi ba Bukalenge aba bavua kabayi batshioke! Dimanyisha mukenji muimpe wa Bukalenge ne disuminyina didi ditupesha petu disanka!

Bena Kristo nebe nebakukuatshishe

13. Nkudi nganyi kutudi ne bua kunyemena padi malu matutekeshe mu mikolo?

¹³ Padi ntatu peshi makenga akukuata, nkuepi kuudi mua kuya bua kupeta busambi? Basadidi ba Yehowa miliyo mivule batu banyemena tshia kumpala kudi Yehowa mu disambila, pashishe kudi bana babu bena Kristo balume ne bakaji. Pavua Yezu pa buloba, wakangata diambuluisha dia kudi  bayidi bende ne mushinga. Butuku bua kumpala kua lufu luende, wakamba bua bualu buabu ne: “bavua nanyi diba dionso mu makenga anyi.” (Luka 22:28, MMM) Kakuyi mpata, bayidi abu bavua bapange bupuangane, kadi lulamatu luabu luakasamba Muana wa Nzambi. Tuetu petu tudi mua kupetela bukole kudi bana betu batudi tutendelela nabu.

14, 15. Ntshinyi tshiakambuluisha muanetu wa balume mukuabu ne mukajende bua kutantamena kanyinganyinga ka lufu lua muanabu wa balume, ne tshilejilu tshiabu tshidi tshikulongesha tshinyi?

¹⁴ Muanetu Michel ne mukajende Diane bakamona mushinga udi diambuluisha dia kudi bana babu ba balume ne ba bakaji mua kuikala nawu. Jonathan, muanabu wa balume wa bidimu 20 ukavua mutambule uvua ne mubidi tumatuma pakamukuatabu ne tshiwuja mu buongo. Ba-minganga bakaluangana muabu muonso bua kumuondopa, kadi disama dia Jonathan diakaya dienda anu dikola too ne pakaluaye kufua dituku dikuabu ku ma-dilolo. Michel ne Diane bavua mu kanyinganyinga kakole. Bakavuluka ne: Tshisangilu tshia Mudimu tshivua ne bua kuenzeka dilolo adi tshikavua ku ndekelu. Nansha nanku, bu muvuabu bajinga busambi ne muoyo mujima, bakambila mukulu uvua nabu bua kuyaye kubafila ku Nzubu wa Bukalenge. Kufikabu anu dîba dikavuabu bamanyisha tshisumbu bua lufu lua Jonathan. Pakajika bisangilu, bana betu ba balume ne ba bakaji bakupukila baledi aba bavua ne binsonji ku mêsu, kubakoleshabu ne mêyi a busambi. Diane udi wamba ne: “Kanyinganyinga kavua katupite mutu patuakafika ku Nzubu wa Bukalenge, kadi bana betu bakatusamba, bakatukankamija bikole bitambe! Nansha muvuabu kabayi mua kumbusha kanyinganyinga katuvua naku, bakatuambuluisha bua tuetu kukola muoyo mu lutatu elu!”​—Lomo 1:11, 12; 1 Kolinto 12:21-26.

¹⁵ Dikenga diakenzeja Michel ne Diane bua kuya kudi bana babu. Diakenza kabidi bua buobu kulamatanganabu bikole. Michel udi wamba ne: “Ndi mubange kunanga mukajanyi bikole menemene. Mu bikondo bidi mu mikolo mututeketa, tutu tuyikila malu adi atangila bulelela budi mu Bible ne bua mushindu udi Yehowa utuambuluisha.” Diane udi wamba pende ne: “Ditekemena dia Bukalenge nditambe kukola mu mitshima yetu mpindieu.”

16. Bua tshinyi bidi bimpe bua tuetu kudimanyishila bana betu tshitudi tujinga?

¹⁶ Bushuwa, bana betu bena Kristo balume ne bakaji badi mua kuikala “diambuluisha didi dikolesha” kutudi mu bikondo bia ntatu ne badi mua kutuambuluisha bua kulama disanka dietu. (Kolosai 4:11, NW) Tshibidi, kabena mua kumona malu adi mu mutshima wetu to. Nanku patudi dijinga ne diambuluisha, mbimpe bua tuetu kubamanyisha. Pashishe tuleje ne: tudi tuanyisha ne muoyo mujima tshionso tshidi bana betu benza bua kutusamba, tutshimona ne: mbusambi bufume kudi Yehowa.​—Nsumuinu 12:25; 17:17.

Tangila mu tshisumbu tshienu

17. Ntatu kayi idi muanetu kampanda wa bakaji udi udikoleshila nkayende bana mua kuikala nayi, ne mmunyi mutudi tumona bantu badi bu yeye?

¹⁷ Paudi utamba kunyemena kudi bena Kristo nebe, udi ufika ku dimanya mua kubanyisha ne umona mudi disomba diebe nabu dikupetesha disanka. Tangila mu tshisumbu tshienu. Ntshinyi tshiudi umonamu? Mudiku mamu udi uditatshisha bua kudikoleshila nkayende bana bende mu njila wa bulelela anyi? Udiku mumone tshilejilu tshilenga tshidiye ufila anyi? Tetabi bua kuela meji bua ntatu idiye upeta. Jeanine, muanetu wa bakaji udi udikoleshila bana bende, udi utela imue ya ku ntatu eyi: udi udimona nkaya, bamuambisha kudi bantu balume ku mudimu, tukuta tukese katuyi tukuata ku bianza. Udi wamba ne: kadi lutatu lunene kupita yonso ndua mushindu wa kusankisha majinga a bana bende, bualu muana ne muana yonso udi wende mushindu. Jeanine udi uleja lutatu lukuabu: “Bidi mua kuikala bikole be bua kubenga kuvuija muanebe wa balume mfumu wa dîku bua kuenzaku bu udi ne muntu mukuabu pa mutu pa bayebe udi kayiku. Ndi ne muana wa bakaji, kadi mbikole bua meme kuvuluka ne: tshiena ne bua kumuambika bujitu bua malu anyi meme nkayanyi nansha.” Anu bu mudibu benza kudi baledi binunu ne binunu batshinyi ba Nzambi badi badikoleshila nkayabu bana, Jeanine udi wenza mudimu udi umuangata mêba a bungi bua kumona bua kudisha bana bende. Udi kabidi ulonga Bible ne bana bende, ubalongesha mudimu wa buambi ne uya nabu mu bisangilu bia tshisumbu. (Efeso 6:4) Yehowa udi ne bua kuikala ne disanka dia bungi padiye umona dîku edi didienzeja  dituku dionso bua kushala ne lulamatu! Kabienaku bituenza disanka patudi ne bantu ba mushindu’eu munkatshi muetu anyi? Eyowa, bidi bituenza disanka.

18, 19. Fila tshilejilu tshia mushindu utudi mua kuvudija dianyisha dietu bua bana betu ba mu tshisumbu.

¹⁸ Tangila kabidi mu tshisumbu tshienu. Udi mua kumonamu bakaji bakamba ne balume bafuishe batu ‘kabayi bapangika’ mu bisangilu. (Luka 2:37, NW) Badiku badimona nkaya imue misangu anyi? Eyowa. Badi bajinga aba bavuabu nabu mu dibaka ne muoyo mujima! Kadi badi anu benza mudimu wa Yehowa ne baditatshisha bua bakuabu. Lungenyi luabu luimpe ne lushindame ludi luvudija disanka dia tshisumbu tshijima! Muanetu mukuabu wa bakaji udi muenze mudimu wa ku dîba ne ku dîba bidimu bipite pa 30 wakamba ne: “Dimue dia ku masanka anyi mapite bunene ndia kumona bana betu bakulakaje bavua bapete ntatu mivule batshikale benzela Yehowa mudimu ne lulamatu!” Bena Kristo bakadi bantu bakulakaje badi munkatshi muetu badi bakankamija bansonga bikole menemene.

¹⁹ Netuambe tshinyi bua bapiabapia badi babange kudisangisha mu tshisumbu anu matuku adi panshi aa? Katuenaku tumvua disanka padibu bajikula ditabuja diabu mu bisangilu anyi? Ela meji bua mushindu udibu baye kumpala katshia batuadija kulonga Bible. Yehowa udi ne bua kuikala usanka bikole bua bualu buabu. Tudiku tusanka petu anyi? Tudiku tubanyisha, tubela kalumbandi bua bionso bidibu benza anyi?

20. Bua tshinyi tudi mua kuamba ne: muntu yonso udi mu tshisumbu udi ne mushinga wa bungi?

 ²⁰ Ukadi mubuele mu dibaka anyi? Utshidi mujike anyi peshi udi udikoleshila nkayebe bana? Udi muan’a nshiye wa lumue anyi? Udi mufuishe mukajebe anyi bayebe? Ukadi muenze bidimu bia bungi mu tshisumbu anyi peshi udi mubuelamu anu abidi abidi aa? Ikala mujadike ne: tshilejilu tshiebe tshia lulamatu tshidi tshitukankamija tuetu bonso. Ne paudi wimba netu misambu ya Bukalenge, paudi ufila diandamuna peshi wenza mudimu mu Kalasa ka Mudimu wa Nzambi, bidi bitupesha disanka. Tshidi nangananga ne mushinga ntshia se: bionso ebi bidi bisankisha mutshima wa Yehowa.

21. Malu a bungi atudi nawu adi atusaka bua kuenza tshinyi, kadi nnkonko kayi idi ijuka?

²¹ Kakuyi mpata, nansha mu bikondo ebi bia makenga, tudi ne malu a bungi atudi mua kusankila patudi tutendelela Nzambi wetu wa disanka. Nunku mêyi adi Paulo utukankamija nawu aa mmatukumbanyine: “Ikalayi ne disanka. . . . Nanku [Nzambi] wa dinanga ne bupole neikale nenu.” (2 Kolinto 13:11, MMM) Kadi tshitudi mua kuenza ntshinyi bituikale muaba udi tshipupu kampanda tshikuate bantu, bikalabu batukengesha anyi bituikala ne lutatu lukole lua mushindu wa kupeta mfranga? Kudiku mushindu wa kulama disanka dietu nansha patudi mu ntatu ya buena eyi anyi? Fila diandamuna diebe nkayebe pajika dilonga dia tshiena-bualu tshidi tshilonda etshi.

[Mêyi adi kuinshi]

Udi mua kuandamuna anyi?

• Disanka ntshinyi?

• Mmunyi mudi kuikala ne lungenyi luimpe mua kutuambuluisha bua kuikala anu ne disanka?

• Ntshinyi tshidi mua kutuambuluisha bua kuangata teritware wa tshisumbu tshietu bimpe?

• Mmunyi muudi wangata bana betu ba balume ne ba bakaji badi mu tshisumbu tshienu ne mushinga?

[Nkonko ya dilonga]

[Bimfuanyi mu dibeji 10]

Bantu ba mu teritware wetu badi mua kushintuluka

[Tshimfuanyi mu dibeji 12]

Ntatu kayi idi nayi bena mu tshisumbu tshietu?